काठमाडौं । काठमाडौं महानगरपालिकाले नेपालको सांस्कृतिक राजधानी काठमाडौंमा कुनैबेला अत्यन्त लोकप्रिय रहेको ‘डबली संस्कृति’ ब्युँताउन छलफल सुरु गरेको छ ।

डबली संस्कृतिलाई पुनर्जागृत गरेर महानगरका चोकचोकमा नाटक र कन्सर्ट गर्ने बारेमा महानगरपालिका प्रमुख बालेन्द्र शाह (बालेन) र वरिष्ठ संगीतकार शम्भुजीत बास्कोटाबीच सोमबार छलफल समेत भएको छ । छलफलमा वरिष्ठ संगीतकार बास्कोटाले आफूले धेरैअघि सञ्चालनमा ल्याएको टेलिभिजन रियालिटी शो ‘प्रतिभाको डबली’लाई पुन: प्रारम्भ गर्न चाहेको र यसमा महानगरले सघाउनुपर्ने प्रस्ताव अघि सार्नु भएको थियो ।

यद्यपी गीत, संगीतप्रति विशेष चासो राख्ने महानगर प्रमुख बालेनले ‘रिभाइभ दबु’ नाम दिएर बाह्रै महिना नाटक र गीत प्रस्तुत गर्न सकिने सोच अघि सार्नु भएको छ । जसअनुसार काठमाडौंका स्थानीय कलाकार र राष्ट्रिय कलाकारलाई समेटेर कन्सर्ट गर्ने महानगरको तयारी छ ।

बाँस्कोटा गीतकार, संगीतकार मौलिक स्वर भएका गायक मात्र नभई विभिन्न रियालिटी सो को कुशल सञ्चालक, प्रस्तोता र मोडरेटरका रुपमा चिनिनुहुन्छ । बास्कोटाले तीन हजार बढी गीतमा संगीत दिनु भएको छ भने २५० भन्दा बढी चलचित्रमा पाश्र्व संगीतकारको भूमिका निर्वाह गर्नुभएको छ ।

बास्कोटाकै परिकल्पना र निर्देशनमा २०४४ सालमा पहिलो पटक गायन, नृत्य र बाद्यबाद्यनको रियालिटी सो सञ्चालन भएको थियो । नेपालको मौलिक सो का रुपमा सञ्चालन भएको कार्यक्रम केही समय पछि बन्द हुन पुग्यो । त्यस बेलासम्म अन्य मुलुकमा यस्ता सो हरुका बारेमा चर्चा परिचर्चा पनि भएको थिएन ।

प्रज्ञा प्रतिष्ठानको ओपन थियटर जसलाई पछि डबली नामकरण गरिएको स्थानमा अग्रज कलाकारहरुका सामुन्ने नवप्रतिभाहरुले आफ्नो प्रस्तुति दिने गरेका थिए । त्यस समयमा गायक हरिप्रसाद रिमाल, धर्मराज थापा, नारायण गोपाल, प्रेमध्वज प्रधान लगायतका चर्चित श्रष्टाहरुले स्वयं कार्यक्रम स्थलमै उपस्थित भएर नवकलाकारको मूल्याङ्कन गर्नु भएको थियो । वरिष्ठ कलाकार मदन कृष्ण श्रेष्ठ र हरिवंश आचार्यले स्थापना गर्नु भएको मह स्टुडियोमा प्रारम्भिक छनौट गरी छानिएका प्रतिभालाई प्रज्ञा प्रतिष्ठानको डबली, बसन्तपुर, पाटन कृष्ण मन्दिर, भक्तपुर दरबार क्षेत्रमा प्रदर्शन गर्ने गरिएको थियो ।

कार्यक्रम हेर्न उल्लेख्य मात्रमा उपस्थिति हुने गरेको थियो । अहिले यहि परम्परालाई ब्युँताउन महानगरपालीकाले पहल गरेकामा सर्वत्र चर्चा हुन थालेको छ ।