काठमाडौँ । नेपाली कांग्रेसमा कानुनी निकास निस्किएपनि यता शेरबहादुर देउवा पक्ष र पछिल्लो संस्थापन पक्ष भएको गगन थापा पक्षबीचको किचलो अझै टुंगिएको छैन । कानुनी प्रक्रिया त सर्वाेच्च अदालतले गगन थापालाई वैधानिकता प्रदान गरेपछि लगभग टुंगिएको छ, तर पनि यता पार्टीको आन्तरिक बेमेल भने कायमै छ ।

जसका कारण अहिले पनि दुवै पक्षले आआफ्ना पक्षका भेला र बैठकहरु गरिरहेकै छन् भने एक अर्काका समूह या पक्षमा बैठक या भेलामा पुगेका छैनन् । दुइमात्र होइन कि पार्टीभित्रको बेमेलले अर्काे तेस्रो पक्ष पनि जन्माएको छ शेखर कोइराला पक्षको । सर्पाेच्चको फैसलासँगै उनले देउवा पक्षका भेलामा नजाने सार्वजनिक घोषणा त गरेका छन् तर पनि यता गगन थापाको पक्षका भेला र बैठकमा पनि पुगेका छैनन् ।

जस्तो कि गत बिहीबार उनी विराटनगरमै रहेका भए पनि यता पार्टीले आयोजना गरेको निर्वाचन समिक्षा कार्यक्रममा पनि पुगेनन् । उनलाई सभापति गगन थापाले कार्यक्रममा आउन फोन गरेका थिए तर पनि उनी त्यहाँ सहभागी भएनन् ।

यता सभापतिले बोलाउँदा पनि नगएका डा कोइरालाले आफू पक्षीय नेता कार्यकर्ताहरुको भेला भने विराटनगरमै गरिरहे । यता पूर्णबहादुर खड्काको अवस्था पनि त्यस्तै छ । उनी न आफू कांग्रेसको बैठकमा सहभागी भएका छन् र नत आफू पक्षीय नेताहरुको भेला बेलाउन नै छोडेका छन् ।

यो त भयो कांग्रेसको पुरानै रोगको कुरा । तर नयाँ अर्थात् आधिकारिक मान्यता पाएको गगन थापा पक्षीय कांग्रेसमा पनि पार्टीभित्रका महत्वपूर्ण विषयहमा सर्वसम्मत हुन सकेको छैन । संसद्को प्रमुख प्रतिपक्षी दल नेपाली कांग्रेसले अहिलेसम्म संसदीय दलको नेता चयन गर्न सकेको छैन । सर्वसम्मत चयनका लागि भएको प्रयासमा संस्थापन पक्ष र इतर पक्षबीच सहमति जुट्न नसक्दा शुक्रबार चुनावको कार्यक्रम सुरु हुनै लाग्दा अन्तिममा आएस स्थगित भएकाो थियो ।

पार्टीमा कुरा नमिल्दा खासगरी सभापति थापा र उपसभापति विश्वप्रकाश शर्माका बीचमा सहमति हुन नसक्दा अरु सबै दलले संसदीय दलको नेता चयन गरिसकेको भए पनि कांग्रेसले गर्न सकेको छैन । पार्टीका नेताहरुले यो विषयमा सभापति र उपसभापतिका बीचमा सुरुदेखि नै कुरा मिल्न नसकेको बताएका छन् । उनीहरुका अनुसार सभापति थापाले रसुवाका सांसद मोहन आचार्यलाई अघि सारेका छन् भने उता विश्वप्रकाशले अर्का सांसद भिष्म आङदेम्बेलाई संसदीय दलको नेता बनाउन चाहेका छन् । यसमा सहमति नजुट्दा शुक्रबार पनि अन्तिममा आएर नेता चयनको काम रोकिएको थियो ।

प्रतिनिधिसभा निर्वाचन सम्पन्न भएको झन्डै दुई महिना पुग्न लाग्दा पनि संसदीय दलको नेता चुन्न कांग्रेस अक्षम देखिएको छ । शुक्रबार बसेको कांग्रेस केन्द्रीय कार्यसम्पादन समितिको बैठकले निर्वाचन स्थगित गरेको थियो । यससँगै बैठकले सर्वसम्मत रूपमा दलको नेता चयन गर्न वार्ता टोली पनि गठन गरेको छ ।

यसै प्रयोजनका लागि उपसभापति विश्वप्रकाश शर्माको नेतृत्वमा वार्ता टोली गठन भएको छ । वार्ता टोलीमा उपसभापति पुष्पा भुसाल, महामन्त्री प्रदीप पौडेल, गुरुराज घिमिरे र निर्वाचन समितिका संयोजक तथा सहमहामन्त्री प्रकाश स्नेही सदस्य रहेका छन् ।

वार्ता टोलीका सदस्य तथा पार्टीका महामन्त्री गुरुराज घिमिरे पनि आङदेम्बेकै पक्षमा रहेकाले पनि उपसभापति विश्वप्रकाशलाई बल मिलिरहेको बताइन्छ । पटक पटक सर्वसम्मतिको प्रयास र संसदीय दलको विधान संशोधनमा सहमति जुटाउन प्रयास भए पनि त्यो सम्भव भएको छैन ।

गएको फागुन २१ मा सम्पन्न निर्वाचनमा कांग्रेसबाट ३८ मध्ये प्रत्यक्षतर्फ १८ र समानुपातिकतर्फ २० जना निर्वाचित भएका छन् । यिनै सांसदमध्येबाट संसदीय दलको नेता छानिने हुन् । कांग्रेसमा विगतमा पनि संसदीय दलको नेता सर्वसम्मत चयन भएको छैन, निर्वाचनबाटै छानिने गरेको छ ।

अघिल्लो अर्थात् २०७९ को निर्वाचनपछि पनि महामन्त्री गगन थापा र सभापति शेरबहादुर देउवाबीच प्रतिस्पर्धा भएको थियो र त्यसमा देउवा विजयी भएका थिए । यस पटक पनि निर्वाचनमै जान सक्ने देखिएको छ ।

खासमा समानुपातिक निर्वाचन प्रणालीबाट छानिएका सांसदहरुमा अधिकांश देउवा पक्षका रहेकाले उनीहरुको असहयोगको डरले सभापति थापा निर्वाचनमा जान नचाहेको बताइएको छ । देउवा पक्षका सांसदले आङ्देम्बेलाई नै मत दिने धारणा बनाएका बुझिएको छ ।

काठमाडाैँ । मोरङ क्षेत्र नम्बर ६ बाट प्रतिनिधिसभा सदस्यका उम्मेदवार डाक्टर शेखर कोइरालाले क्षेत्रीय सभालाई सम्बोधन गर्दै सरकारी अस्पतालको सेवा विस्तार, कलेज स्थापना र सुकुम्बासी समस्या समाधानका लागि ठोस पहल गर्ने प्रतिबद्धता जनाएका छन् ।

उनले स्थानीय सरकारी अस्पतालमा अझै सुधार गर्नुपर्ने आवश्यकता औंल्याउँदै विशेषगरी ल्याब र रगत परीक्षण सेवामा समस्या रहेको बताए। “सामान्य परीक्षणका लागि पनि बिरामीले बाहिर जानुपर्ने अवस्था अन्त्य गर्नुपर्छ,” उनले भने, “आधुनिक ल्याब र रगत जाँचको पूर्ण व्यवस्था मिलाउने काम अब प्राथमिकतामा पर्छ।”

स्वास्थ्य सेवाकै सन्दर्भमा उनले आफ्नी आमाले सञ्चालन गरिरहेको संस्थामार्फत भुरिगङ्गाका हरेक वडामा मासिक रूपमा निःशुल्क स्वास्थ्य शिविर सञ्चालन भइरहेको उल्लेख गरे। ती शिविरमा उपलब्ध सेवा–सुविधा अन्य धेरै स्थानमा समेत सहज रूपमा नपाइने दाबी उनको थियो। आगामी दिनमा यस्तो सेवामूलक कार्यलाई अझ व्यवस्थित र व्यापक बनाइने उनले बताए ।

शिक्षातर्फ संकेत गर्दै डा. कोइरालाले स्थानीयस्तरमै कलेज स्थापना गर्न पहल गर्ने घोषणा गर्नुभयो। हाल विद्यार्थीहरू उच्च शिक्षाका लागि विराटनगर जान बाध्य रहेको उल्लेख गर्दै उनले आर्थिक अवस्था कमजोर भएका परिवारका लागि यो ठूलो समस्या भएको बताए । “अब हाम्रो छोराछोरीले पढ्नका लागि घर छोड्नुपर्ने अवस्था अन्त्य गर्नुपर्छ,” उनले भने ।

सभामा उपस्थित सुकुम्बासी समुदायलाई सम्बोधन गर्दै उहाँले सुकुम्बासी समस्या देशव्यापी भए पनि स्थानीयस्तरमा निष्पक्ष समाधानका लागि आफू अग्रसर हुने बताए सम्बन्धित आयोगका केन्द्रीय सदस्यलाई क्षेत्रमै ल्याएर पारदर्शी रूपमा लालपुर्जा वितरण प्रक्रिया अगाडि बढाउने प्रतिबद्धता उनले व्यक्त गरे ।

विकास निर्माणका कामहरू जारी रहेको उल्लेख गर्दै उनले सडक, शिक्षा, स्वास्थ्य र खानेपानीजस्ता क्षेत्रमा भएका प्रगतिलाई निरन्तरता दिइने बताए। साथै, महिलाहरूको उल्लेखनीय उपस्थितिलाई सकारात्मक सङ्केतका रूपमा व्याख्या गर्दै महिला उद्यमशीलता प्रवर्द्धनका लागि तालिम तथा सहयोग उपलब्ध गराइने जानकारी दिए ।

उनले मतदातालाई प्रत्यक्ष र समानुपातिक दुवै तर्फ नेपाली कांग्रेसको रुख चिन्हमा मतदान गर्न आग्रह गरेका थिए । सभा उत्साहपूर्ण रूपमा सम्पन्न भएको जनाइएको छ।

काठमाडौँ । नेपाली कांग्रेसका नेता डा शेखर कोइरालाले पार्टीलाई एकताबद्ध राख्ने प्रयास सफल हुन नसकेको बताउनुभएको छ ।

नेता डा कोइरालाले आज एक विज्ञप्ति जारी गरी कांग्रेसलाई एकताबद्ध राख्ने आफ्नो प्रयास सफल हुन नसकेको र यस घटनामा संलग्न हामी सबै चुकेको बताउनुभयो । डा कोइरालाले कांग्रेस एक भएर आसन्न निर्वाचनमा होमिनुपर्छ भन्ने सोचका साथ इमानदार प्रयास गरे पनि विभाजनबाट पार्टीलाई जोगाउन नसकेकामा दुःख व्यक्त गर्नुभयो ।

उहाँले आगामी दिनमा आफ्नोसामु आसन्न निर्वाचनमा जाने र आठ दशक लामो कांग्रेस इतिहासको गौरवलाई जोगाउने जिम्मेवारी रहेको बताउनुभयो । नेता डा कोइरालाले अहिलेको विषम परिस्थितिमा पार्टीभित्र एकताको खाँचो रहेको उल्लेख गर्दै सुदृढ कांग्रेसका पक्षमा एक हुन अनुरोध गर्नुभयो ।

नेता डा कोइरालाले पार्टीभित्र गर्नुपर्ने सुधारका प्रक्रिया नरोकिने भन्दै सबैलाई आफ्नो घरमा फर्कन विज्ञप्तिमार्फत आह्वान गर्नुभएको छ ।

काठमाडौं । राष्ट्रिय सभाको निर्वाचनको लागि नेपाली कांग्रेसका नेता डा. शेखर कोइराला समुहले तीन सीट पाएको छ । नेकपा एमालेसँगको चुनावी तालमेलमा कांग्रेसले नौ पाएकोमा तीन सिट कोइराला पक्षले पाएको हको ।

कोइराला समूहले तीन सिटमा मधेश प्रदेशबाट रञ्जित कर्ण, बागमती प्रदेशबाट गीता देवकोटा र लुम्बिनी प्रदेशबाट बासुदेव जंगलीलाई उम्मेदवार बनाएको छ ।

बाँकी छ सिटमा कोशी प्रदेशबाट सुनिलबहादुर थापा, मधेश प्रदेशबाट धर्मेन्द्र पासवान, गण्डकी प्रदेशबाट जगत तिमिल्सिना, लुम्बिनी प्रदेशबाट चन्द्रबहादुर केसी, कर्णाली प्रदेशबाट ललतिजंग शाही र सुदूरपश्चिम प्रदेशबाट खम्मबहादुर खातीलाई उम्मेदवार बनाइएको छ ।

महामन्त्री गगनकुमार थापा र विश्वप्रकाश शर्माले भने निर्वाचनको लागि कसैलाई पनि सिफारिस गरेका छैनन् ।

काठमाडौँ । नेपाली कांग्रेसका नेता डा शेखर कोइरालाले पार्टीभित्रको पछिल्लो अवस्था बारेमा काठमाडौँमा उपलब्ध पदाधिकारी, केन्द्रीय सदस्य, जिल्ला सभापतिलगायतसँग अन्तरक्रिया गरी राय लिनुभएको छ ।

विशालनगरस्थित आफ्नो सम्पर्क कार्यलयमा आज भएको छलफलमा अहिलेको विषम परिस्थिति, समुचित निकास, राष्ट्रमा देखिएको सङ्कटको समाधान र पार्टीभित्रको द्वन्द्व अवतरण कसरी हुन सक्छ भन्ने लगायतका विषयमा छफफल भएको उहाँको सचिवालयले जनाएको छ ।

सो अवसरमा शुक्रबार कांग्रेस केन्द्रीय कार्यसम्पादन समितिको बैठकले गरेको निर्णय र महामन्त्रीहरूले उठाउनुभएको विशेष महाधिवेशनका सम्बन्धमा कसरी समन्वय गर्न सकिन्छ भन्ने बारेमा छलफल भएको थियो ।

साथै आगामी आमनिर्वाचनमा एकताबद्ध रूपमा कसरी अगाडि बढ्न सकिन्छ ? भन्ने विषय, हालै पार्टीको अनुशासन समितिले गरेका कारबाहीको फुकुवालगायत विषयमा छलफल भएको थियो ।

काठमाडौँ । नेपाली कांग्रेसका सभापति शेरबहादुर देउवासँग पार्टीका नेता डा शेखर कोइरालाले भेट गर्नुभएको छ ।

सभापति देउवा निवासमा आज भएको भेटमा पार्टीको १५औँ महाधिवेशनको बारेमा छलफल भएको कोइरालाको स्वकीय सचिव दिनेशचन्द्र थपलियाले जानकारी दिनुभयो ।

भेटमा कोइरालाले क्रियाशील सदस्य वितरण समितिले नम्बर विनाका फाराम जिल्ला जिल्ला पठाएकाले यसले पार्टीभित्र जटिल समस्या उत्पन्न सिर्जना गरेको देउवा सामु बताउनुभएको थियो । उहाँले नम्बर बिनाका फाराम तत्काल फिर्ता गरी नयाँ फाराम पठाउनसमेत सभापतिको ध्यानाकर्षण गराउनुभयो ।

पार्टीभित्र कारबाहीमा परेका नेताको कारबाही फुकुवा गरी पार्टीको महाधिवेशन र आम निर्वाचनमा खटाउन कोइरालाले आग्रह गर्नुभयो । भेटमा कोइरालासँगै पार्टीका नेता एवम् पूर्वमन्त्री डा मीनेन्द्र रिजाल पनि देउवा निवास पुग्नुभएको थियो ।

काठमाडौँ । नेपाली कांग्रेसका नेता डा शेखर कोइरालाले पार्टीभित्र वरिष्ठ र युवापुस्ताको मिलनबिन्दु आफू भएको बताउनुभएको छ ।

उहाँले लामो समयदेखि पार्टीभित्र र बाहिरका ‘फोरम’मा युवापुस्तालाई राज्यको मूल प्रवाहमा जोड्नुपर्छ भन्ने कुरा गर्दै आएपनि त्यसको सुनुवाइ नभएकोले पछिल्लो परिस्थिति निर्माण भएको बताउनुभयो । आफूले कोभिड महामारीको समयदेखि युवाका निम्ति केन्द्रमा २०, प्रदेशमा ३० र स्थानीय तहमा ४० प्रतिशत प्रतिनिधित्वको माग गरेको स्मरण पनि उहाँले गर्नुभयो ।

आज प्रजातन्त्र सेनानी सङ्घका केन्द्रीय समितिका पदाधिकारी एवं सदस्यहरुसँग भएको भेटमा देशको लोकतान्त्रिक आन्दोलनमा प्रजातन्त्र सेनानीले पु¥याउनुभएको योगदानको सधैँ कदर हुने नेता कोइरालाले बताउनुभयो ।

“सयौँ योद्धा र युवाको योगदानले निर्माण भएको पार्टीमा अहिले सैद्धान्तिक विचलन आएको छ”, उहाँले भन्नुभयो, “पार्टीभित्र मूल्य, मान्यता र निष्ठाको पनि पुनर्निर्माण जरुरी छ ।”

काठमाडौं । नेपाली कांग्रेसका नेता शेखर कोइरालाले सत्ता सहयात्री दल नेकपा एमालेमाथि शंका रहेको बताउनुभएको छ ।

नेता कोइरालाले आज सामाजिक सञ्जालमार्फत् घुस मोलमोलाइ प्रकरणमा जोडिएका भूमि व्यवस्था, सहकारी तथा गरिबी निवारण मन्त्री बलराम अधिकारीले राजीनामा नदिइ बसेको र भूमि विधेयक फास्ट ट्र्याकबाट पारित गर्न खोजेकाले एमालेमाथि शंका उब्जिएको बताउनुभएको छ ।

उहाँले कांग्रेसले खोजेको सुशासन यस्तो नभएको पनि स्पष्ट पार्नुभएको छ ।

नेता कोइरालाले घुस मोलाइ प्रकरणमा मुछिएका मन्त्री, सांसद, कर्मचारी र बिचौलियामाथि छानबिन गर्न पनि माग गनुृभएको छ ।

नेता कोइरालाले सामाजिक सञ्जालमा लेख्नुभएको छ–

पोखरा जग्गा घुस प्रकरणमा जोडिएका एमालेका दुई मध्ये एक मन्त्री (भूमीसुधार) अझै राजिनामा नदिई पदमै भईरहैको स्थितिमा भूमी विधेयक फास्ट्रयाकबाट पास गरौं भन्ने एमालेको प्रस्तावले प्रसस्त शंका उव्जाएको छ । यो अवस्थालाई दुई छुट्टाछुट्टै नै मान्न सकिन्न । नेपाली कांग्रेसले सरकारबाट खोजेको सुशासन यस्तो हैन ।

पोखरा जग्गा प्रकरणमा मुछिएका मन्त्री, सांसद, कर्मचारी र विचौलिया माथि निष्पक्ष छानविन गरौं, भूमी विधेयकमा समितिमा गहन छलफल गरौं ।

काठमाडौं । मन्त्रिपरिषद् बैठकमा पूर्वराष्ट्रपति विद्यादेवी भण्डारी र नेपाली कांग्रेसका नेता शेखर कोइरालाको चर्चा भएको छ । प्रधानमन्त्री केपी शर्मा ओलीले भण्डारी र कोइरालासँग जोयिडएर भएका राजनीतिक गतिविधिकाबारेमा मन्त्रिपरिषद्मा ब्रिफिङ गर्नुभएको हो ।

प्रधानमन्त्री निवास बालुवाटारमा बसेको मन्त्रिपरिषद् बैठकमा उनले भण्डारीसँग आइतबार भएको भेटका विषयमा पनि चर्चा गर्नुभएको थियो । उहाँले केही व्यक्तिले भण्डारीलाई सक्रिय राजनीतिमा आउन उकासेको र बढी प्रचारबाजी गरेको बताएका थिए ।

‘उहाँसँग निकै नै राम्रो छलफल भयो । उहाँलाई ज–जसले उकास्दै आएका छन् । आजदेखि त्यो पनि बन्द भएको छ । हामी दुवै जना आजदेखि ’क्लियर’ भएका छौं,’ बैठकमा प्रधानमन्त्री ओलीले भन्नुभयो । पूर्वराष्ट्रपति भण्डारी एमालेको राजनीतिमा फर्किने कि नफर्किने विषयमा भने प्रधानमन्त्री ओलीले स्पष्टरुपमा खुलाउनुभएन ।

बैठकमा नेपाली कांग्रेस नेता शेखर कोइरालाको विषयले पनि मन्त्रिपरिषद् बैठकमा प्रवेश पाएको थियो । प्रधानमन्त्री ओलीले कोइरालाले संसदमा गणितीय अभ्यास गर्न खोजे आरोप लगाउनुभएको थियो । तर, कोइरालाको प्रयास सम्भव नहुने उहाँको भनाइ थियो ।

कोइरालाले केही दिनअघि मात्रै नेकपा माओवादी केन्द्रका अध्यक्ष पुष्पकमल दाहालसँग खुमलटारमा भेटवार्ता गर्नुभएको थियो । त्यसपछि भण्डारीसँग पनि उहाँले राजनीतिक विषयमा छलफल गर्नुभएको थियो । आइतबारमात्रै कोइरालाले आफू पक्षीय सांसदहरूसँग एक होटलमा छलफलमा गर्नुभएको थियो ।

काठमाडौं । अघिल्लो कार्यकाल जब नेपाली कांग्रेसले माओवादीसँग मिलेर सरकार बनाएको थियो त्यसको कटु आलोचक थिए शेखर कोइराला । उनले संसदको तेस्रो पार्टीलाई सबैभन्दा ठूलो पार्टीले किन प्रधानमन्त्री बनाएको भनेर बारम्बार प्रश्न गर्ने गर्दथे । सार्वजनिक कार्यक्रममा भाषण गर्न पुग्यो कि उनले यही प्रसंग निकाल्थे र पार्टी नेतृत्वको विरोध गर्ने गर्दथे ।

विशेषगरी पार्टी सभापति शेरबहादुर देउवा र सरकारको विरोधसँगै उनको एउटा तर्क पनि आउने गर्दथ्यो कि मुलुकमा राजनीतिक स्थायित्वका लागि नेपाली कांग्रेस र एमाले मिलेर सरकार बनाउनुपर्छ । उनले केही समय त्यसका लागि लबिङ पनि गरे । पटक पटक एमाले अध्यक्ष केपी ओलीलाई भेटे र सन्देश दिन खोजे ।

उनले सन्देश मात्र दिएनन्, कोशी प्रदेशको सरकार निर्माणमा पार्टीको निर्णय विपरीत गएर एमालेसँग सहकार्य नै गरे । सहकार्य अनुसारको परिणाम पनि निस्कियो । त्यसपछि त्यस समय उनको प्रवक्ताजस्तो बनेका सांसद डा सुनिल शर्माले अब केन्द्र सरकारमा पनि कोशी प्रदेशकै मोडल भित्रिन्छ भन्न थाले ।

उनको पछिपछि सार्वजनिक कार्यक्रमहरुमा शेखरले नै त्यही भन्न थाले । उनले मुलुकमा राजनीतिक अस्थिरता मात्र छायो, धेरै पार्टी जोडेर नाङ्लो पसलेजस्ता राजनीतिक दलहरु मिलेर सरकार बनाउनु भन्दा कांग्रेस र एमालेले सरकार बनाउँदा स्थायित्व हुन्छ भन्न थाले ।

गत असारमा उनले भने जस्तै गरेर कांग्रेस र एमाले मिलेर सरकार पनि बनाए । एमाले अध्यक्ष ओलि अहिलेलाई प्रधानमन्त्री भए त्यो सरकारलाई कांग्रेसले समर्थन पनि गर्यो र कांग्रेस सरकारमा पनि गयो । तर त्यसपछि भने शेखरले कुनै प्रतिक्रिया दिएनन् यो सरकार र यसको निर्माण प्रक्रियाका बारेमा । उनले आफैले विगतमा सार्वजनिक रुपमा वकालत गर्दै आएको एजेण्डाको अपनत्व नै लिन मानेनन् । आफूले भने बमोजिम नै देशमा सरकार बन्यो भनेर उनले न पार्टी सभापति देउवालाई धन्यवाद दिए नत पार्टीका केन्द्रीय समिति या पदाधिकारीका बैठकहरुमा नै यसबारेमा चर्चा गरे या आफ्नो धारणा बमोजिम सरकार निर्माण गरेकोमा पार्टीमा सकारात्मक विचार नै राखे ।

आफ्नो एजेण्डाको अपनत्व लिनु त परै जाओस अहिले भने उनले त्यही सरकारको विरोध गर्न थालेका छन् । उनले कांग्रेसले किन सरकारले नेतृत्व नगरेको भन्ने जस्ता तर्क अघि सारेर अहिले यो सरकारको र पार्टीकै विरोध गर्दै हिँड्ने गरेका छन् । उनी अहिले नै कांग्रेसले सरकारको नेतृत्व गरोस् भन्छन् र त्यसका लागि सरकारबाट निस्किएर माओवादीसँग मिलेर सरकार बनाउनुपर्ने र कांग्रेसले नेतृत्व गर्नुपर्ने जस्ता तर्क अघि सार्न थालेका छन् । हिजो प्रचण्डको कडा विरोध गर्ने गरेका उनी आज फेरि प्रचण्ड निवास धाउन थालेका छन् । वर्तमान सरकार बाहेकको विकल्पका लागी आफूलाई साथ दिन उनले प्रचण्डलाई नै भनिरहेका छन् ।

उनी हिजो प्रचण्ड निवास पुगे र यही तर्क अघि सारे । वर्तमान सरकारको विकल्प खोज्नुपर्ने अवस्था भएकाले आफू प्रधानमन्त्री बन्ने र त्यसमा सघाउन प्रचण्डलाई उनले सहयोग मागे । समाचार बाहिर आए अनुसार प्रचण्डले शेखरको प्रस्तावमा समर्थन मात्र गरेनन् कि आफू पनि त्यसका लागि लाग्ने बताए ।

त्यसअघि डा शेखर हाल एमालेको राजनीतिमा फर्किएकी पूर्व राष्ट्रपति विद्यादेवी भण्डारीको पुगे र यही प्रस्ताव राखेका थिए । उनले भण्डारीसँग पनि आफूले अबको सरकारको नेतृत्व गर्ने जानकारी दिँदै त्यसमा सघाउन आग्रह गर्दा भण्डारीले समर्थन जनाएकि थिइन् ।

त्यसो भए शेखरसँग सरकार निर्माण गर्न पुग्ने बहुमत देखिन्छ त ? संसदीय दलमा उनी अल्पमतमा छन् भन्ने कुरा सबैमा जगजाहेरै छ । पार्टीको चौधौँ महाधिवेशनमा उनको साथमा रहेका गगन थापा अहिले आफैँ ग्रुप बनाएर हिँडेका छन् । यसबाट थप कमजोर बनेका छन् शेखर संख्याका हिसाबले । प्रधानमन्त्री बन्नका लागि पार्टी संसदीय दलको नेता निर्वाचित हुनुपर्छ र त्यसका लागि पार्टीको संसदीय दलमा बहुमत आवश्यक हुन्छ ।

अहिले उनी यसै पनि अल्पमतमा छन् जसका कारण संसदीय दलमा नेता चयन हुन गाह्रो छ । यो तथ्य उनलाई थाहा छैन भन्न पनि मिल्दैन । थाहा हुँदाहुँदै किन अबको सरकार शेखरको नेतृत्वमा पक्का भनेर सांसद अमरेश कुमार झालाई बोल्न लगाउँदैछन् ? पहिले सुनिल शर्मा जस्तै अहिले उनले अघि सारेका छन् सांसद अमरेश कुमारलाई । नेताहरुकोमा जाँदा पनि सँगैसँगै लिएर हिँड्ने गरेका अमरेशले अबको प्रधानमन्त्री शेखर पक्का भनेर अन्तर्वार्ता दिँदै हिँड्न थालेका छन् । तर उनीसँग तर्क भने केही छैन ।

अहिले नै विद्या भण्डारी पनि पार्टीमा सरकार निर्माण गर्ने विषयको निर्णायक शक्तिका रुपमा स्थापित भैसकेको अवस्था छैन । उनी भर्खरै एमाले पार्टीको राजनीतिमा सक्रिय हुँदै गरेकाले भण्डारीबाट शेखरलाई प्रधानमन्त्री बनाउने सम्मको बाटो तय गर्न सक्ने अवस्था तत्कालै छैन । त्यस्तै अवस्था उता प्रचण्डको पनि छैन । किनभने संसदमा विपक्षी दलको मोर्चाबाट पनि राप्रपा र रास्वपा निस्किसकेको अवस्था छ, यसकारण प्रचण्ड अहिले प्रमुख प्रतिपक्षी दलको नेताका रुपमा एक्लै छन् । उनको मात्र समर्थनले शेखरलाई प्रधानमन्त्री बनाउन सम्भव छैन ।

यस्तो अवस्थामा डा शेखरको दौडधुप अर्थहिन बाहेक अरु केही नभएको कांग्रेसीजनहरु बताउँछन् । उता शेखरकै समूहका एक केन्द्रीय नेता भन्छन्‐ अहिले शेखर समूहमा गगन छैनन् । विश्वप्रकाशले शेखर भन्दा पनि गगनकै समर्थन गर्छन् । त्यसपछि न सशांक खुलिसकेका छन् र नत शेखर समूह विगतको जस्तो बलियो छ । यस्तो बेलामा सरकारको विरोध गर्ने र आफूलाई सरकारका नेतृत्वमा सघाउनका लागि आग्रह गर्दै विपक्षी दलहरुसँग किन शेखरजी दौडधुप गरिरहनुभएको छ, हामीले पत्तो पाउन सकेका छैनौँ ।

काठमाडौं । नेपाली कांग्रेसका नेता शेखर कोइरालाले आफ्नो पार्टी गठबन्धन सरकारको साक्षी किनाराको सदर जस्तै भएको टिप्पणी गरेका छन् ।

सामाजिक सञ्जाल फेसबुकमा आज नेता कोइरालाले बिचौलियाले मन्त्री क्वाटरमा घुसको ब्रिफकेस छाड्ने गरेको जिकिर गरेका छन् ।

सरकारका मन्त्रीहरु घुस डिलको विवादमा तानिए पनि प्रधानमन्त्रीले उनीहरुलाई पदबाट हटाउन नसकेकोतर्फ कोइरालाले व्यंग्य गरेका छन् ।

‘यस्तै रहेछ यहाँको चलन’ भन्दै कोइरालाले फेसबुकमा लेखेका छन्, ‘मन्त्रीक्वाटरमा बिहानै आएर विचौलियाले घुसको ब्रिफकेस छाड्छन्, आफ्नो विरुद्धमा प्रमाण जुटेपछि बर्खास्त हुनुपर्नेमा प्रधानमन्त्रीसँग मिठा कुरा गरेर मन्त्रिमन्त्रीपरिषद बैठकमा भाग लिन्छन् ।’

उनले विपक्षी र सत्ता साझेदार आफ्नै पार्टी नेपाली कांग्रेसलाई पनि निसाना साँधेका छन् ।

कोइरालाले लेखेका छन्, ‘सदनमा विपक्षी कर्मकाण्डी राजीनामा माग्छन् तथा गठबन्धनका सहयात्री हामी नेपाली कांग्रेस भने ‘साक्षी किनाराका सदर’ भएका छौं ।’

कोइरालाले लेखेका छन्–

यस्तै रहेछ यहाँको चलनः

मन्त्रीक्वाटरमा विहानै आएर विचौलियाले घुसको व्रिफकेस छाड्छन्, आफ्नो विरुद्धमा प्रमाण जुटेपछि बर्खास्त हुनुपर्नेमा प्रधानमन्त्रीसँग मिठा कुरा गरेर मन्त्री मन्त्रीपरिषद बैठकमा भाग लिन्छन् । सदनमा विपक्षी कर्मकाण्डी राजिनामा माग्छन् तथा गठवन्धनका सहयात्री हामी नेपाली कांग्रेस भने ‘साक्षी किनाराका सदर’ भएका छौं ।

काठमाडौं । नेपाली कांग्रेसका नेता डा.शेखर कोइराला समूहले पार्टीको संस्थापन पक्षले गरेको अनुशासनको कारबाहीलाई अस्वीकार गर्ने भएको छ ।

बिहीवार संस्थापन इतर पक्षका नेता डा. शेखर कोईरालाको सचिवालयमा भएको संस्थापन इतर समूहले अनुशासन समितिले पूर्वाग्रह राखेर पार्टीका नेताहरुमाथि कारबाही गरेको निष्कर्ष निकालेको हो । नेताहरुले विधानत: कारबाही सही नरहेको बताएका छन् । सञ्चारकर्मीहरुसँग कुरा गर्दै काँग्रेस सांसद एवं संस्थापन इतर पक्षधर नेता राजेन्द्र बजगाईंले उजुरी परेको समयको ६ महिनाभित्रमा कारबाही गर्नुपर्ने भन्ने काँग्रेसको विधान रहेको भएपनि करिव तीन वर्षपछि कारबाही गरिनु गलत भएको बताउनु भयो । उहाँले गठबन्धनको उम्मेदवार हराउन लागेको भन्ने आधार बनाएर अहिले कारबाही गर्नु उचित नरहेको तर्क गर्नुभयो । आसन्न निर्वाचन २०८४ र त्यो भन्दा अघि पनि मध्यावधिको रुपमा पनि हुनसक्ने स्थितिलाई हेरेर कारबाही गरेको भन्दै असन्तुष्टि व्यक्त गर्नुभयो । भेलामा पार्टीको महाधिवेशनबारे पनि छलफल भएको छ ।

उहाँले भन्नुभयो, ‘विधानत: कारबाही ठिक छ की छैन कारबाही भन्ने विषयमा कुरा भयो । उजुरी परेको समयको ६ महिनाभित्रमा कारबाही गर्नुपर्ने भन्ने छ । त्यो संगत नभएकाले यो वैधानिक छैन भन्ने कुरा भयो । नेपाली काँग्रेस र नेकपा एमालेका समस्याहरु पार्टीभित्रका द्वन्द्व समान रुपले हेर्न लायक छ । त्यहाँ पनि कारबाहीको श्रृंखला चलेको छ । हामीले पनि अनुशरण गर्‍यौँ भन्ने हो । गठबन्धनको उम्मेदवार हराउन लागेको भन्ने आधार बनाइएको छ । आसन्न निर्वाचन २०८४ र त्यो भन्दा अघि पनि मध्यावधिको रुपमा भनेर गर्न खोजिएको बुझियो । पार्टीको विधान तोकिएकै समयमा हुन्छ भन्ने विषयमा संशय रहेकोबारे पनि छलफल भएको छ ।’

काँग्रेस नेता अर्जुननरसिंह केसीले कारबाही पक्षपातपूर्ण र पूर्वाग्रही रहेको बताउनु भयो । सिंगो पार्टीको हित र विधान विपरित गइ कारबाही गरिएको भन्दै यसलाई स्वकार्न नसकिने बताउनु भयो । उहाँले १५ औं महाधिवेशनलाई लक्षित गरेर विधि, विधान र प्रक्रिया विपरित पूर्वाग्रहले कारबाही भएको आरोप लगाउनु भयो ।

उहाँले भन्नुभयो, ‘कारबाहीहरु अत्यन्त पक्षपातपूर्ण र पूर्वाग्रही छ । सिंगो पार्टीको हित र पार्टीको विधानलाई गम्भीर अध्ययन गरेर हुनुपर्नेमा त्यसको विपरित भएको छ । नेपाली काँग्रेसको विधान र नियमावलीले उजुरी परेको ६ महिनाभित्रै कारबाही गर्नुपर्ने भनेको छ । अहिले आएर दुई तीन वर्षपछि किन कारबाही भइरहेको छ । यो गम्भीर कुरा छ । १५ औं महाधिवेशनलाई लक्षित गरेर विधि, विधान र प्रक्रिया विपरित पूर्वाग्रहले काम भएको छ । कुनैपनि साथीहरुलाई हामी अन्याय हुन दिँदैनौँ । विधान र विधानको नियमावली भन्दा बाहिर गएर भएका कुनै कारबाही स्वीकार गर्दैनौँ ।’

अनुशासन समितिको कारबाहीमा परेका काँग्रेस खोटाङ जिल्ला सभापति विष्णुकुमार राईले पार्टीको विधान भन्दा बाहिर गएर कारबाही गरिएको भन्दै आपत्ति जनाउनु भयो । पार्टीको विधान भन्दा बाहिर गएर पार्टीलाई क्षति पुर्‍यायो भने उसलाई अनुशासनको ट्रयाकमा ल्याउनुपर्छ भन्ने विधान भएपनि त्यो प्रावधानको उपयोग हुन नसकेको बताउनु भयो । आफूहरु विपीको विचारबाट प्रेरित भएर पार्टीमा लागेको बताउनु भयो । पार्टी विचार, सिद्धान्त र ट्रयाक भन्दा बाहिर गइरहेको बताउनु भयो ।

उहाँले भन्नुभयो, ‘पार्टीको विधान भन्दा बाहिर गएर पार्टीलाई क्षति पुर्‍यायो भने उसलाई अनुशासनको ट्रयाकमा ल्याउनुपर्छ भन्ने विधान थियो । त्यो प्रावधानलाई उपयोग गर्दा कुन ढंगले उपयोग गरेको छ, त्यसको अन्तर्यलाई बुझ्नुपर्छ । यो आग्रह र पूर्वाग्रहबाट प्रेरित छ । विपीको विचारबाट प्रेरित भएर पार्टीमा लागेको हो । अहिलेको नेतृत्वहरु जान्दैनौँ । पार्टी विचार, सिद्धान्त र ट्रयाक भन्दा बाहिर गइरहेको छ ।’

अर्का काँग्रेस नेता एवं अनुशासन समिति सदस्य सञ्जय गौतमले अनुशासन समितिमा २१ सय भन्दा बढी मुद्दाहरु रहेको बताउनु भयो । कतिपय केन्द्रिय सदस्यका, पदाधिकारीका मुद्दाहरु पनि रहेको बताउनु भयो । अनुशासन समितिका बहुमत सदस्यहरुले पार्टीको साधारण सदस्यबाट निष्कासन गरेको र यो राम्रो नभएको बताउनु भयो । उहाँले निष्कासन गर्नेकुरा अन्तिम रहेको र त्यहाँ पुग्ने स्थिति नरहेको बताउनु भयो ।

उहाँले भन्नुभयो, ‘अनुशासन समितिका धेरै मुद्दाहरु छन् । २१ सय भन्दा बढी मुद्दाहरु छन् । कतिपय केन्द्रिय सदस्यका, पदाधिकारीका मुद्दाहरु पनि छन् । व्यापक रुपमा छलफल गरेका छौँ । सर्वसम्मत हुन सकेन । पार्टीको केही साथीहरुले बहुमतका आधारमा पार्टीको साधारण सदस्यबाट निष्कासन गर्नेसम्मको प्रक्रिया अघि बढाउनु भयो । हामी त्यसमा सहमत हुन सकेनौँ । असहमति राख्यौँ । निष्कासन नै गर्ने कुरा अन्तिम कारबाही हो । त्यसमा असहमित जनाएका छाैँ ।’

काँग्रेस नेता गुरु घिमिरेले अनुशासन समितिले गरेको कारबाही पार्टी विधान र नियमावली विपरित रहेको बताउनु भयो । उहाँले यो अवैधानिक र पक्षपातपूर्ण रहेको बताउनु भयो । पार्टीभित्रको अर्को पक्षलाई पाखा लगाउने उद्देश्यमा आधारित रहेर कारबाही गरिएको उहाँको आरोप छ । कारबाहीबारे अनुशासन समितिका ५ जना सदस्यमध्ये दुई जनाले नोट अफ डिसेन्ट लेख्नुभएको पनि जानकारी गराउनु भयो ।

उहाँले भन्नुभयो, ‘अनुशासन समितिले गरेको कारबाही पार्टी विधान र नियमावली विपरित छ । अवैधानिक छ । यो पक्षपातपूर्ण र गुट प्रेरित छ । पार्टीभित्रको अर्को पक्षलाई पाखा लगाउने उद्देश्यमा आधारित छ । यो निर्णय बहुमत र अल्पमतका आधारमा गरिएको छ । अनुशासन समितिका ५ जना सदस्यमध्ये दुई जनाले नोट अफ डिसेन्ट लेख्नुभएको छ ।’

नेताहरुले राजनीतिक रुपबाट अभिप्रेरित भएर कारबाही गरिएको बताए । अनुशासनको कारबाहीको प्रक्रियाबारे सभापति शेरबहादुर देउवालाई स्मरण गराउने सहमति भएको बताए । केन्द्रिय समितिबाट कारबाहीबारे अन्तिम टुंगो लाग्ने जिकिर गरेका छन् । पार्टीभित्र प्रतिष्पर्धी समूहलाई पेल्ने प्रयत्नको शालिन र सभ्य रुपबाट हुने बताए । नेपाली काँग्रेसको अनुशासन समितिले पार्टीको हित विपरित काम गरेको र गत निर्वाचनमा सत्ता गठबन्धनका उम्मेदवारलाई नसघाएको भन्दै केही नेता कार्यकर्ताहरुलाई कारबाही गरेको छ।—न्युज एजेन्सी नेपाल

काठमाडौँ । नेपाली कांग्रेसका नेता डा शेखर कोइरालाले सर्वसम्मतिबाट संसद्मा पेस भई पारित भएको निजामती सेवा विधेयक अनधिकृत रूपमा परिवर्तन गरिनु संसद्प्रति गरिएको अपमान भएको बताउनुभएको छ ।

उहाँले आज सामाजिक सञ्जालमार्फत यो कुनै सामान्य घटना नभई, देश र जनताप्रति गरिएको घोर अपराध र सार्वभौम संसद्प्रति गरिएको अपमान भएको उल्लेख गर्नुभएको छ ।

यस प्रकारणमा जोडिएकालाई तुरुन्त हदैसम्मको कारबाही अगाडि बढाई, परिवर्तन गरिएको व्यवस्थालाई आजै पुरानै अवस्थामा लैजान आग्रह गर्दै नेता कोइरालाले कुलिङ पिरियड नराखी यस विधेयकका अगाडिका काम कारबाही अगाडि बढाउन नहुने बताउनुभएको छ ।

काठमाडौं । नेपाली कांग्रेसका नेता शेखर कोइरालाले सभापति शेरबहादुर देउवालाई प्रश्नैप्रश्न गरेका छन् । उनले कांग्रेस र एमालेबीच भएको ७ बुँदे सहमतिको प्रगतिसमेत मागेका छन् ।

पार्टी केन्द्रीय कार्यालय सानेपामा आज सुरु भएको नेपाली कांग्रेसको केन्द्रीय समिति बैठकमा नेता कोइरालाले एकवर्ष अघि नेकपा एमालेलाई सरकारको नेतृत्व दिनुको कारणबारे सभापति देउवासँग प्रश्न गरेका हुन् । उनले एमालेलाई सरकारको नेतृत्व दिएर कांग्रेसले गल्ती गरेको समेत बताए । ‘कांग्रेस–एमाले गठबन्धनको सरकार बन्नुपर्छ भन्ने म नै हुँ । तर, मैले कांग्रेसको नेतृत्वमा सरकार बन्नुपर्छ भनेको थिएँ,’ कोइरालाले प्रश्न गरे, ‘के कारणले कांग्रेसले एमालेलाई सत्ताको नेतृत्व दियो ?’

नेता कोइरालाले एमालेसँग २०८१ असार १७ गते राति भएको सात बुँदे सहमतिअनुसार संविधान संशोधनको विषयमा भएको प्रगतिबारे पनि सभापति देउवासँग जवाफ मागेका छन् । ‘यदि संविधान संशोधनका लागि यो सत्ता गठबन्धन हो भने सात बुँदे सहमतिमा लेखिएको संविधान संशोधनको मुद्धा कहाँ पुग्यो ?,’ कोइरालाले प्रश्न गर्दै भने, ‘सभापतिज्यूले यसको चित्त बुझ्ने जवाफ दिनुपर्छ ।’

उनले प्रतिनिधिसभा निर्वाचन ०७९ मा नेकपा माओवादी केन्द्रसँग गठबन्धन गरेर अहिले एमालेसँग सहकार्य गरिनुको कारणबारे पनि प्रश्न उठाए । ‘०७९ को संघीय र प्रदेश निर्वाचनमा माओवादीसँग गठबन्धन गरेर निर्वाचनमा गयौँ । अहिले एमालेसँग सरकारमा छौँ,’ नेता कोइरालाले प्रश्न गरे, ‘त्यतिबेला के कारणले माओवादीसँग गठबन्धन गर्‍यौँ र अहिले के कारणले एमालेसँग सत्ता सहकार्य भयो ?’

केन्द्रीय समिति बैठकमा कोइरालाले अन्य केही पेचिला प्रश्न पनि उठाएका छन् । उनले मंसिरमा महाधिवेशन हुनुपर्ने र नहुने हो भने सभापति र पदाधिकारीले त्यसको चित्तबुझ्दो जवाफ दिनुपर्ने बताएका छन् ।

उनले पार्टीको अनुशासन समितिसँग पनि केही प्रश्न राखेका छन् । ’अनुशासन समितिको बैठकमा पार्टी सभापतिज्युले चितवनमा दिनेश कोइरालालाई शेखर कोइरालाले उठाएको हो, शेखरलाई किन कारबाही नगर्ने भनेर भन्नुभएछ । के आधारमा त्यो कुरा गरियो ? सभापतिज्यु यसको जवाफ चाहियो ।’ उनले अनुशासन समिति कमजोर भएको बताउँदै कारबाहीका लागि भएका सिफारिसमा चिठीसम्म काट्ने काम पनि समितिले गर्न नसकेको आरोप लगाएका छन् ।

कोइरालाले पार्टीले विगतमा गरेका निर्णयमा पनि प्रश्न अघि सारेका छन । उनले भनेका छन्, ’विनोद चौधरीको केन्द्रीय सदस्य बन्ने योग्यता थियो कि थिएन ? त्यो हेरियो ? क्रियाशीलको १० वर्षे अवधि पुग्थ्यो ?’

उनले सर्वोच्च अदालतले दोषी किटान गरिसकेको व्यक्ति सर्लाहीमा जिल्ला सभापति पदमा बस्न मिल्ने हो कि होइन भनेर पनि सोधेका छन् । उनले भनेका छन्, ’के कारणले उहाँलाई हटाइएको छैन ? यो घटनाले कांग्रेसलाई कति क्षति पुगेको छ भन्ने कुरा सभापतिज्यु र पदाधिकारीले बुझ्नुभएको छ ?’

काठमाडौं । नेपाली कांग्रेसका नेता शेखर कोइरालाले विद्युत प्राधिकरणको कार्यकारी निर्देशक पदबाट कुलमान घिसिङ बर्खास्त गर्ने निर्णय विनाशकाले विपरित वुद्धि भएको टिप्पणी गर्नुभएको छ ।

नेता कोईरालाले यो निर्णय सरकारको कुशासनको निरन्तरताको अर्को कडी भएको उल्लेख गर्दै यो निर्णयको पुष्टि न कहिल्यै सरकारले गर्न सक्छ, न पार्टीले भन्नु भएको छ ।

उहाँले लेख्नु भएको छ-

कुलमान घिसिङलाई हटाउने सरकारी निर्णयको पुष्टि न कहिल्यै सरकारले गर्न सक्छ, न पार्टीले । नेपाली कांग्रेसले त यसको स्वामित्व लिनै हुन्न । यसरी कतिदिन चल्ने र चलाउने रु विनाशकाले विपरित वुद्धि ।

झापा। नेपाली कांग्रेसका नेता डा शेखर कोइरालाले आर्थिक विकासका लागि विदेशमा रहेका नेपालीको लगानी भित्र्याउने वातावरण बनाउन सरकारसँग आग्रह गर्नुभएको छ ।

पार्टीको पूर्वआप्रवास समन्वय विभागले आज विर्तामोडमा आयोजना गरेको ‘स्वदेशदेखि विदेशसम्म’ विषयक कोशी प्रदेशस्तरीय अन्तरक्रिया कार्यक्रममा उहाँले लगानीमैत्री वातावरण बनाउन सके मुलुक समृद्धिको मार्गमा जान समय नलाग्ने धारणा राख्नुभयो ।

“हाइड्रोपावर, कृषि उत्पादन, जडीबुटी, पर्यटन प्रवर्द्धनलगायत क्षेत्रमा लगानी गरेर आयस्तर बढाउन सकिन्छ”, उहाँले भन्नुभयो, “यसका लागि सरकारले लगानीमैत्री वातावरण बनाउनुपर्छ ।” विदेश जाने नेपालीलाई कमदक्ष, दक्ष र अध्ययन गरी तीन किसिममा प्रकारमा बाँड्नुपर्ने धारणा राख्दै नेता कोइरालाले देश विकासका लागि विदेशमा सिकेका सीप र आर्जेको पैसा स्वदेशमा लगानी गर्ने उत्साहजनक वातावरण बनाउन आवश्यक रहेकामा जोड दिनुभयो ।

नेपाली कांग्रेसका केन्द्रीय सदस्य डा मीनेन्द्र रिजालले जनतामा चुलिएको निराशा अन्त्य गर्ने अवसर नेपाली कांग्रेस र नेपाल कम्युनिष्ट पार्टी (एमाले)लाई प्राप्त भएको भन्दै वर्तमाने गठबन्धनबाट बनेको सरकारले जनता केन्द्रित भएर काम गर्नुपर्नेमा जोड दिनुभयो । उहाँले विश्वमा अर्थतन्त्रको ढाँचा फेरिएको उल्लेख गर्दै उत्पादन गर्नेले भन्दा डिजाइन र बजारीकरण गर्नेले बढी मुनाफा आर्जन गरिरहेका बताउनुभयो ।

कार्यक्रममा नेपाली कांग्रेसका केन्द्रीय सदस्य बलबहादुर केसी, सरिता प्रसार्इं, राजीव कोइराला, सुशीला ढकाल आचार्य, डा गोविन्द पोखरेल, गोमा भट्टराई, दिनेश कोइरालालगायत वक्ताहरूले विदेशमा रहेका नेपालीलाई स्वदेशमा सीप र श्रमको सदुपयोग गर्ने नयाँ नीति र कार्यक्रमको खाँचो रहेको औँल्याउनुभएको थियो ।

दुई दिनसम्म सञ्चालन हुने अन्तरक्रियामा कोशी प्रदेशभरिका एक सयबढी प्रतिनिधिको सहभागिता रहेको विभागका कोशी प्रदेश संयोजक विज्ञानराज प्रसाईंले जानकारी दिनुभयो । कार्यक्रममा पूर्वआप्रवासीहरूको तथ्याङ्क सङ्कलन, उनीहरूमा रहेको सीप र क्षमताको उपयोग कसरी गर्न सकिन्छ भन्ने विषयमा अन्तरक्रियात्मक छलफल हुने र छलफलमा उठेका विषयवस्तुको दस्तावेज बनाएर पार्टी केन्द्रीय समितिमा बुझाइने उहाँले उल्लेख गर्नुभयो । रासस

काठमाडौँ । नेपाली कांग्रेसका नेता डा शेखर कोइराला र तत्कालीन नेपालको शान्ति प्रक्रियामा महत्वपूर्ण भूमिका खेलेका अनमिनका नेपाल प्रमुख इयान मार्टिनबीच भेटवार्ता भएको छ ।

बेलायतको भ्रमणमा रहनुभएका डा कोइराला र मार्टिनबीच नेपालको शान्ति प्रक्रियाका विविध विषयमा छलफल भएको थियो । भेटमा मार्टिनले अहिलेसम्म पनि नेपालको शान्ति प्रक्रिया नटुङ्गिएकाले यसलाई चाँडोभन्दा चाँडो टङु्गोमा पु¥याउन सुझाव दिनुभएको थियो ।

नेता कोइरालाको निजी सचिवालयका अनुसार उहाँले शान्ति प्रक्रियाका कुरालाई लामो समयसम्म राख्न नहुने बताउनुभएको थियो । तत्कालीन समयमा विद्रोहमा रहेको दल समेत निर्वाचन प्रक्रियामा प्रवेश गरिसकेको र अहिले नेपालमा कुनै पनि हिंसा नरहेकाले सङ्क्रमणकालीन न्यायलाई चाँडो टुङ्ग्याउन मार्टिनले डा कोइरालालाई आग्रह गर्नुभएको थियो ।

काठमाडौं । नेपाली कांग्रेसका नेता डा शेखर कोइरालाले सन् १९२३ मा नेपाल र संयुक्त अधिराज्य बेलायतबीच भएको शान्ति तथा मैत्री सन्धीले नेपाललाई एउटा स्वतन्त्र र सार्वभौम राष्ट्रका रूपमा विश्वसामु चिनाएको उल्लेख गर्नुभएको छ ।

बेलायतको संसद् भवन (वेस्ट मिन्स्टर) मा आज आयोजित ‘नेपाल–बेलायत सम्बन्ध’ विषयक कार्यक्रमलाई सम्बोधन गर्दै उहाँले नेपाललाई विश्वसामु स्वतन्त्र र सार्वभौम राष्ट्र मान्ने बेलायतको उक्त कदमप्रति आभार प्रकट गर्नुभएको उहाँका प्रमुख स्वकीय सचिव दिनेशचन्द्र थपलियाले जानकारी दिनुभयो ।

“आजको यहाँहरूको यो कार्यक्रमको उपस्थिति हाम्रो बलियो मित्रताको जग भएको मेरो विश्वास छ”, नेता कोइरालाले भन्नुभयो, “शताब्दी लामो हाम्रो सम्बन्धका बारेमा यहाँ आएर चर्चा गर्न पाउँदा, यहाँहरूको न्यानो आतिथ्यताका लागि आफू अत्यन्त हर्षित भएको छु, सबैलाई धन्यवाद प्रकट गर्दछु ।”

दुई देशबीचका ऐतिहासिक सम्बन्धलाई आज जनस्तरको सहकार्यले बढाउँदै लगेको उल्लेख गर्दै नेता कोइरालाले यही सम्बन्धका आधारमा, नेपाली जनता र नेपालको सार्वभौम संसद्कोतर्फबाट निरन्तर सहयोगका लागि बेलायती सरकारप्रति आभार प्रकट गर्नुभयो ।

“नेपालीहरूले गोर्खाका नाममा बेलायती सेनामा गरेको लामो र अतिविशिष्टकृत सेवा दुई देशकाबीचको शताब्दीदेखिको लामो मित्रताको आधार हो”, उहाँले भन्नुभयो, “दुई लाखभन्दा बढी गोर्खा सैनिकले दुई विश्वयुद्धमा बेलायतको तर्फबाट युद्ध लडे, कतिले आफ्नो अमुल्य जीवन पनि गुमाए । बेलायती सरकारले उहाँहरूको समर्पण र बलिदानको कदर गरी सम्मान गरेकामा खुसी छु ।” उहाँले गोर्खा सैनिकले बेलायतमा इमान्दारिपूर्वक गरेको सेवालाई मध्यनजर गर्दै उहाँहरूका जायज माग ढिला नगरी सम्बोधन गरिदिनुहुन आग्रह गर्नुभयो ।

सङ्कटमा बेलायतले गरेको सहयोग प्रशंसनीय

नेपालमा सङ्कट परेको बेलामा बेलायत सरकारले गरेका निरन्तर सहयोगले दुई देशको सम्बन्धलाई असल मित्रका रूपमा प्रगाढ बनाएको कांग्रेसका नेता डा कोइरालाले बताउनुभयो । एउटा चिकित्सक र राजनीतिकर्मी भएकाले बेलायत सरकारले सन् २०१५ को विनाशकारी भूकम्प र कोभिड–१९ को बेलामा गरेको सहयोगहरू उल्लेख्य भएको भन्दै प्रशंसा गर्नुभयो ।

“नेपालको जलविद्युत्, पर्यटन तथा कृषि तथा वनजन्य उद्यमको अपार सम्भावना, हाम्रा इमानदार र परिश्रमी कामदारका कारण नेपाल वैदेशिक लगानीको लागि अत्यन्त संभावना भएको क्षेत्रमा पर्दछ”, नेता डा कोइरालाले भन्नुभयो । नेपाल सरकारले वैदेशिक लगानी मैत्री वातावरण बनाएको जानकारी गराउँदै उहाँले नेपालमा बेलायती लगानी सकारात्मक भए पनि यसमा अझ वृद्धि गर्न सकिने अपेक्षा राख्नुभयो ।

विश्वका द्रुतगतिमा आर्थिक विकास गरिरहेका र ठुला बजार भएका दुई देशका बीचमा नेपाल अवस्थित रहेको बताउँदै उहाँले स्वच्छ ऊर्जा, पर्यटन, जलविद्युत्, कृषि र प्रविधिलगायत अन्य क्षेत्रमा नेपालमा लगानी गर्न बेलायतका उद्यमीहरूलाई आग्रह गर्नुभयो ।

विभिन्न समयमा हुने उच्चस्तरीय राजकीय र सरकारी भ्रमणहरू, व्यावसायिक, व्यापारिक र सांस्कृतिक आवतजावतलगायतले सम्बन्ध, सहयोग र विश्वास अझ बढाउन मद्दत गरेको उल्लेख गर्दै नेता कोइरालाले दुई देशका सांसदहरूको भ्रमण र विचार आदानप्रदानले बहुआयामिक सम्बन्ध प्रगाढ बनाएको बताउनुभयो ।

“विश्व शान्तिका अग्रदुत गौतम बुद्धको जन्म नेपालको लुम्बिनीमा भएको हो । बेलायतलाई संसदीय लोकतन्त्रको जननी मानिन्छ । यी दुई शान्ति र लोकतन्त्रको मान्यताले हाम्रा दुई देशको सम्बन्धलाई कसिलो बनाउँछ”, नेता डा कोइरालाले भन्नुभयो । उहाँले आफू नेपालमा लोकतान्त्रिक अभियान जगाउने परिवारमा जन्मेको अवगत गराउँदै सन् १९४० को दशकदेखि विभिन्न प्रकारका लोकतान्त्रिक आन्दोलनहरू व्यहोरेको उहाँले जानकारी दिनुभयो ।

“नेपालले लामो समय आन्तरिक द्वन्द्वको अवस्था सामना गर्‍यो । नेपाललाई लोकतान्त्रिक मुलुक बनाउन कांग्रेसले प्रमुख भूमिका निर्वाह गरेको छ”, उहाँले भन्नुभयो, “सशस्त्र द्वन्द्वबाट शान्तिपूर्ण संवैधानिक सरकार बनाउने काम कांग्रेसको नेतृत्वमा भएको हो । संसद्ले हालै सङ्क्रमणकालीन न्यायसम्बन्धी र सत्यनिरुपण आयोग बनाउनेसम्बन्धी विधेयक पास गरेको छ ।”

नेता कोइरालाले लोकरिझ्याइँ गर्ने राजनीति, उग्र राष्ट्रवाद, साम्प्रदायिकता र आर्थिक राष्ट्रवाद जस्ता कार्यले बहुलवाद र विकासलाई चुनौती दिइरहेका उल्लेख गर्दै नेपालका प्रथम जननिर्वाचित प्रधानमन्त्री बिपी कोइरालाले सन् १९७० को दशकमा उक्त विषय बुझेर सचेत गराउँदै भन्नुभएको विषय उद्धृत गर्नुभयो । उहाँले भन्नुभयो, “लोकतन्त्र बचाउनुपर्छ, यसलाई कुनै बहानामा कतै बुझाउनु हुँदैन ।”

नेता डा कोइरालाले भू–परिवेष्ठित र अतिकम विकसित मुलुक नेपालले विश्व वातावरणीय प्रभावमा आफ्नो योगदान नभए पनि विभिन्न चुनौती सामना गरिरहेको जनाउँदै हिमालयन पारिस्थितिक प्रणाली ९इकोसिस्टम०मा परेको प्रभावको न्यूनीकरण र वित्तपोषणको कार्यमा बेलायतको सहयोगको अपेक्षा गर्नुभयो ।

कार्यक्रममा बेलायतका उद्योग व्यापार वाणिज्यमन्त्री ग्यारेथ थोमस र एशिया मामिला हेर्ने विदेश राज्यमन्त्री क्याथराइन वेष्टले पनि आ–आफ्नो मन्तव्य व्यक्त गर्नुभएको थियो । रासस

काठमाडौँ । नेपाली कांग्रेसका नेता डा शेखर कोइरालाले संयुक्त अधिराज्य बेलायतको संसद्मा सम्बोधन गर्ने हुनुभएको छ ।

उहाँले यही १३ जनवरी २०२५ का दिन संसद् भवनभित्र आयोजना गरिने एक विशेष कार्यक्रममा सम्बोधन गर्नुहुने उहाँको निजी सचिवालयले जनाएको छ ।

उक्त कार्यक्रममा बेलायतका एशिया मामिला हेर्ने विदेश राज्यमन्त्री, उद्योग, व्यापार तथा वाणिज्यमन्त्रीका साथै बेलायती सांसदहरूको उपस्थिति रहनेछ ।

नेता कोइराला बेलायतको एशिया मामला हेर्ने विदेश राज्यमन्त्री क्याथराइन वेष्ट र उद्योग व्यापार वाणिज्यमन्त्री ग्यारेथ थोमसको निमन्त्रणामा यही जनवरी ९ मा त्यसतर्फ जाँदै हुनुहुन्छ ।

कैलाली । नेपाली कांग्रेसका नेता डा शेखर कोइरालाले वर्तमान सरकार राजनीतिक स्थायित्वका लागि बनेको बताउनुभएको छ । नेपाल प्रेस युनियन कैलालीले आज धनगढीमा आयोजना गरेको पत्रकार सम्मेलनमा उहाँले संविधान संशोधन, स्थायित्व, आर्थिक अवस्था सुधार, विकास र सुशासनका लक्ष्यसहित सरकार बनेको बताउनुभयो ।

नेता डा कोइरालाले सो लक्ष्यअनुसार सरकारले जुनसुकै अवस्थामा पनि काम गर्नुपर्ने सुझाव दिनुभयो । “यो अन्तिम विकल्पको सरकार हो । संसदका दुई ठूला दल मिलेर बनेको सरकारले पनि काम गर्न नसके देशमा अराजकता निम्तिन्छ भनेर धेरै विद्वानहरूले सचेत गराइराखेका छन् । हामीले पनि आफ्नो तर्फबाट यही कुरा भनिराखेका छौँ । अहिलेको सरकारलाई असफल हुने छुट छैन”,उहाँले जोड दिएर भन्नुभयो,“कुनै पनि हालतमा अहिलेको सरकार अगाडि जानुपर्छ । आफ्नो म्यान्डेड पूरा गर्नुपर्छ ।”

नेता डा कोइरालाले कांग्रेस र एमाले मिलेर मात्र संविधान संशोधन नहुने भएकाले अन्य सबै राजनीतिक दलबीच बृहत् समझदारी गरेर निष्कर्षमा पुग्नुपर्नेमा जोड दिनुभयो ।

नेता डा कोइरालाले गेटा मेडिकल कलेजका भौतिक संरचनालाई सदुपयोग गर्दै स्थापनाको लक्ष्यअनुसार तत्काल काम अगाडि बढाउनुपर्ने र त्यसमा आफूहरूले कोसिस गरिरहेका बताउनुभयो । यसैगरी उहाँले एक वर्षभित्र पार्टीको १५औँ महाधिवेशन गर्नुपर्ने दायित्व रहेकाले सोअनुसार आफ्नो जिम्मेवारीमा जुट्न सबैलाई आह्वान गर्नुभयो । रासस