काठमाडौँ । बर्मिङ्घम टेस्ट जित्न भारतले इङ्ल्यान्डलाई ६०८ रनको लक्ष्य दिएको थियो । शनिबार खेलको चौथो दिन भारतका तर्फबाट शुभमन गिलले १६१ रन बनाए ।

उनले पहिलो इनिङमा २६९ रन बनाए, योसँगै उनी टेस्टमा ४०० भन्दा बढी रन बनाउने पहिलो भारतीय बने ।

भारतले टेस्टको दुवै इनिङमा १०१४ रन बनायो । टेस्ट इतिहासमा पहिलो पटक भारतले एक खेलमा १००० रनको आँकडा पार गर्यो ।

पहिलो इनिङमा २६९ रन बनाएपछि शुभमन गिलले दोस्रो इनिङमा १६१ रन बनाए । उनले टेस्टमा ४३० रन बनाए । यो भारतीय कप्तानले बनाएको टेस्टमा सबैभन्दा धेरै रन हो । गिलले २०१७ मा श्रीलंका विरुद्धको खेलमा २९३ रन बनाएका विराट कोहलीको रेकर्ड तोडे ।

यस्तै, गिल भारतको लागि टेस्टमा सर्वाधिक रन बनाउने खेलाडी पनि बने । उनले सुनील गावस्करको रेकर्ड तोडे, जसले १९७१ मा वेस्ट इन्डिज विरुद्ध ३४४ रन बनाएका थिए । गावस्करले पहिलो इनिङमा शतक र दोस्रो इनिङमा दोहोरो शतक बनाएका थिए ।

गिल एक इनिङमा शतक र अर्को इनिङमा दोहोरो शतक बनाउने दोस्रो भारतीय खेलाडी बने ।

साथै, गिल टेस्टमा सबैभन्दा धेरै रन बनाउने रेकर्डबाट केवल २७ रन टाढा रहे । टेस्टमा सबैभन्दा धेरै रनको रेकर्ड इङ्गल्याण्डका ग्राहम गुचको नाममा छ । उनले १९९० मा भारत विरुद्ध ४५६ रन बनाएका थिए । शुभमन टेस्टमा ४०० भन्दा बढी रन बनाउने विश्वका पाँचौं खेलाडी बने ।

एजेन्सी । भारतीय टोलीले एन्डरसन–तेन्डुलकर ट्रफीको पहिलो टेस्ट इङ्गल्याण्डसँग ५ विकेटले हारेको छ ।

मंगलबार लिड्सको हेडिंगले क्रिकेट स्टेडियममा भएको खेलको अन्तिम दिन इङ्गल्याण्डले ३५१ रन बनाउनु परेको थियो, जुन टोलीले ५ विकेट गुमाएर हासिल गर्यो ।

खेलपछि भारतीय कप्तान शुभमन गिलले भने–‘खराब फिल्डिङका कारण हामीले खेल हार्यौं । यो एक उत्कृष्ट टेस्ट म्याच थियो र हामीसँग अवसरहरू थिए । तर क्याचहरू छोड्नु र तल्लो क्रमबाट योगदानको अभाव हाम्रो लागि हानिकारक साबित भयो ।

हिजोसम्म हामी ४३० रनको लक्ष्य पुर्‍याउने सोचिरहेका थियौं, तर अन्तिम विकेट केवल ३१ रनमा खस्यो, जसले गर्दा अग्रता घट्यो । आज पनि पहिलो विकेटको लागि उत्कृष्ट साझेदारी हुँदा, हामी खेलमा छौं जस्तो लाग्यो, तर केही अवसर हात लागेनन् ।

पहिलो सत्रमा हाम्रो बलिङ उत्कृष्ट थियो । हामीले रन दिएनौं, तर बल पुरानो भएपछि रन रोक्न गाह्रो हुन्छ । यस्तो अवस्थामा विकेट लिइरहनु महत्त्वपूर्ण छ । जडेजाले धेरै राम्रो बलिङ गरे, अवसरहरू सिर्जना गरे ।’

इङ्गल्याण्डका कप्तान बेन स्टोक्सले जितको श्रेय बेन डकेटलाई दिए । उनले भने ‘हाम्रो यो मैदान (हेडिंगले) सँग पहिले पनि राम्रो सम्बन्ध थियो, र आजको जितले यसमा अर्को अविस्मरणीय क्षण थप्यो ।

डकेटले उत्कृष्ट काम गरे, ओपनिङमा ठूलो लक्ष्य पछ्याउन सजिलो छैन । क्राउलीसँगको उनको साझेदारीले हामीलाई बल दियो । क्राउलीको इनिङ पनि महत्त्वपूर्ण थियो । दुवैले एकअर्कालाई राम्रोसँग बुझ्छन् र सन्तुलनका साथ खेल्छन् । ओली पोपले पहिलो इनिङमा उत्कृष्ट ब्याटिङ गरे ।

जोश टङ्गुको स्पेलले खेलको मोड नै परिवर्तन गरिदियो । हाम्रो मनोवृत्ति र कडा परिश्रमको परिणामस्वरूप हामीले शीर्ष क्रमलाई पछाडि धकेल्न सफल भयौं । ठूलो लक्ष्य पछ्याउँदा आत्मविश्वास आउँछ, तर यो हरेक पटक हुन्छ भन्ने आवश्यक छैन ।’

मंगलबार, इङ्ग्ल्याण्डले लिड्सको हेडिंगले क्रिकेट स्टेडियममा ५ विकेट गुमाउँदै ३७१ रनको लक्ष्य हासिल गर्यो ।

यो खेल पहिलो ४ दिन बराबरीमा रह्यो, अन्तिम दिन इङ्ग्ल्याण्डले जित्नको लागि ३५० रन बनाउनु पर्ने थियो । घरेलु परिस्थितिमा उत्कृष्ट ब्याटिङ गर्दै टोलीले जित हासिल गर्यो ।

बेन डकेट (१४९ रन) र ज्याक क्राउली (६५ रन) ले १८८ रनको कीर्तिमानी ओपनिङ साझेदारी गरे ।

एजेन्सी । पाकिस्तानका बाबर आजमलाई पछि पार्दै भारतका शुभमन गिल एकदिवसीय अन्तर्राष्ट्रिय क्रिकेट (ओडीआई) वरीयताको शीर्ष स्थानमा पुगेका छन् ।

अन्तर्राष्ट्रिय क्रिकेट काउन्सिल (आईसीसी) ले सार्वजनिक गरेको पछिल्लो वरीयतामा ब्याटिङतर्फ गिल ७९६ अङ्कसहित पहिलो स्थानमा पुगेका हुन् ।

शुभमन गिलले हालै इंग्ल्याण्ड विरुद्धको तीन खेलको एकदिवसीय सिरिजमा उत्कृष्ट प्रदर्शन गरेका थिए । उनले नागपुरमा भएको पहिलो खेलमा ८७ रन र कटकमा भएको दोस्रो खेलमा ६० रन बनाएका थिए ।

यस्तै, एकदिवसीयमा बाबर आजम ७७३ अङ्कसहित दोस्रो स्थानमा छन् । भारतका कप्तान रोहित शर्मा तेस्रो स्थानमा यथावत् छन् ।

यस्तै, एकदिवसीय बलिङ वरीयतामा अफगानिस्तानका राशिद खानलाई पछि पार्दै श्रीलङ्काका महीष तीक्षणा ६८० अङ्कसहित शीर्ष स्थानमा पुगेका छन् । राशिद खान ६६९ अङ्कसहित दोस्रो स्थानमा छन् भने नामिबियाका बर्नार्ड शोल्ट्ज तेस्रो स्थानमा यथावत् छन् ।

त्यसैगरी, एकदिवसीय अलराउन्डर वरीयतामा अफगानिस्तानका मोहम्मद नबी शीर्ष स्थानमा, जिम्बावेका सिकन्दर रजा दोस्रो स्थानमा र अफगानिस्तानकै अजमतुल्लाह ओमरजाई तेस्रो स्थानमा यथावत् छन् ।

एजेन्सी । आईपीएल २०२४ को ६६ औँ खेलमा सनराइजर्स हैदरावाद र गुजरात टाइटन्सबीच खेल हुन सकेन । वर्षाका कारण खेल राति अबेरसम्म सुरु हुन सकेन ।

जसका कारण म्याच रेफ्रीले खेल रद्द गरी दुवै टोलीलाई एक–एक अंक दिएका थिए । यस्तो अवस्थामा हैदराबाद प्लेअफ पुग्ने तेस्रो टोली बनेको छ । गुजरात टाइटन्स भने प्लेअफबाट बाहिरिएको छ ।

आफ्नो अन्तिम खेलमा गुजरात जितसँगै बाहिरिने अपेक्षा गरिएको थियो । तर, वर्षाका कारण त्यस्तो हुन सकेन ।

टोलीले निराशाको सामना गरे पनि कप्तान शुभमन गिलको भिडियो भाइरल भइरहेको भइरहेको छ र गुजरात टाइटन्स तथा सनराइजर्स हैदराबादका फ्यानहरूको मन जितेको छ । यस भिडियोमा शुभमन गिल सनराइजर्स हैदरावादका ओपनर अभिषेक शर्माको आमाको खुट्टा छोएको देखिन्छ ।

भिडियोमा गिललाई भारतीय परम्परा अनुसार अभिषेककी आमाको खुट्टा छोएको देख्न सकिन्छ । यसै क्रममा अभिषेककी आमाले गिलको पिठ्युँमा थिचेर आशीर्वाद दिएर आफ्नो माया र स्नेह देखाइन् ।

भिडियोमा गिलले अभिषेककी बहिनीसँग हात मिलाउँछन् । अभिषेक र गिल दुवैले पञ्जाबबाट घरेलु क्रिकेट खेल्छन् । दुवै जना सन् २०१८ को अन्डर–१९ विश्वकपमा भारतीय टोलीको हिस्सा पनि थिए ।

गुजरात टाइटन्सका कप्तान शुभमन गिलले आईपीएल २०२४ को १२ खेलमा ४२६ रन बनाएका छन् । यसमा शतक पनि समावेश छ । योसँगै सनराइजर्स हैदराबादका ओपनिङ ब्याट्सम्यानले १२ खेलमा ४ सय १ रन बनाएका छन् । ट्राभिस हेडसँगै अभिषेक शर्माले टोलीका लागि कीर्तिमानी साझेदारी गरेका छन् ।

एजेन्सी । आईपीएल २०२४ मा गुजरात टाइटन्सविरुद्ध विराट कोहलीले उत्कृष्ट इनिङ्स खेलेका थिए । रोयल च्यालेन्जर्स बैंगलोरको लक्ष्य पछ्याउने क्रममा कोहलीले ४४ बलमा ६ चौका र ३ छक्का सहित अविजित ७० रन बनाए ।

खेलमा शुभमन गिलको कप्तानीमा रहेको गुजरात टाइटन्स ९ विकेटले पराजित भएको थियो । अहिले उक्त म्याचको भिडियो भाइरल भइरहेको छ, जसमा कोहली र गिल झगडा गरिरहेका छन् ।

कोहली र गिलबीचको झगडाको भिडियो सामाजिक सञ्जालमा निकै चर्चामा छ । भिडियोमा देख्न सकिन्छ कि ब्याटिङ गर्ने क्रममा विराट कोहली फिल्डिङ गरिरहेका शुभमन गिलको नजिक आउँछन् र उनको काँधमा ठोक्छन् ।

यो गिलसँग कोहलीको हास्यास्पद शैली थियो । कोहली र गिलबीच निकै राम्रो सम्बन्ध छ । अक्सर कोहली गिलसँग रमाइलो गरेको देखिन्छ । यसलाई कोहली र गिलको ब्रोमान्स भन्न सकिन्छ ।

विराट कोहलीले आईपीएल २०२४ मा ५०० रन पुरा गरेका छन् । यो अंक छुन्ने उनी पहिलो ब्याट्सम्यान बने । बैंगलोरका पूर्व कप्तानले अहिलेसम्म १० इनिङ्समा ७१.४३ को औसत र १४७.४९ को स्ट्राइक रेटमा ब्याटिङ गर्दै ५०० रन बनाएका छन् ।

Virat Kohli loves to tease Shubman Gill😂♥️pic.twitter.com/BPfCS1FCcs

— SHREYA.♥️ (@Here4VK18) April 28, 2024

एजेन्सी । गुजरात टाइटन्सका कप्तान शुभमन गिललाई बुधबार चेन्नई सुपर किंग्सविरुद्ध स्लो ओभर रेट गरेको आरोपमा १२ लाख रुपैयाँ जरिवाना गरिएको छ ।

‘न्यूनतम ओभर रेटको अपराधको सम्बन्धमा आईपीएल आचार संहिता अन्तर्गत यो सिजनको टोलीको पहिलो अपराध थियो । ‘गिललाई १२ लाख रुपैयाँ जरिवाना गरिएको छ ।’ आईपीएलले एक विज्ञप्तिमा भन्यो ।

आईपीएलको १७ औं सिजनमा गुजरात टाइटन्सले पहिलो हार बेहोरेको छ । गुजरात टाइटन्सले आफ्नो आईपीएल इतिहासमा रनको सबैभन्दा ठूलो हार बेहोरेको छ । शुभमन गिल आईपीएल २०२४ मा स्लो ओभर रेटको कारण जरिवाना भोग्ने पहिलो कप्तान बने ।

चेन्नईको एमए चिदम्बरम स्टेडियममा खेलिएको आईपीएल २०२४ को सातौं खेलमा चेन्नई सुपर किंग्सले पहिले ब्याटिङ गर्दै निर्धारित २० ओभरमा ६ विकेट गुमाएर २०६ रन बनाएको थियो ।

जवाफमा गुजरात टाइटन्सको टोलीले २० ओभरमा ८ विकेट गुमाएर १४३ रनमात्रै बनाउन सक्यो र खेल ६३ रनले पराजित भयो । यो जितसँगै चेन्नई आईपीएल २०२४ को अंक तालिकाको शीर्ष स्थानमा पुगेको छ । गुजरात टाइटन्स तेस्रो स्थानबाट छैटौं स्थानमा झरेको छ ।

गुजरात टाइटन्सले आफ्नो अर्को खेल आइतबार सनराइजर्स हैदरावादसँग खेल्ने छ । टोलीसँग ब्रेकको लागि राम्रो समय हुनेछ र यस्तो अवस्थामा शुभमन गिलले हारको निराशाबाट मुक्त भएर आफ्नो टोलीलाई जितको ट्रयाकमा फर्काउने प्रयास गर्नेछन् ।

एजेन्सी । भारत र इंग्ल्याण्डबीचको ५ टेस्ट सिरिजको दोस्रो खेल विशाखापट्टनममा हुँदैछ । डा वाईएस राजशेखर स्टेडियममा भएको पहिलो इनिङ्समा भारतले ३९६ रन बनाएको थियो भने इंग्ल्याण्डले २५३ रन बनाएको थियो ।

अहिले तेस्रो दिन दोस्रो सत्रको खेल चलिरहेको छ । भारतले ४ विकेट गुमाएर २०१ रन बनाएको छ । शुभमन गिल र अक्षर पटेल क्रिजमा छन् ।

शुभमनले १२ इनिङ र ११ महिनापछि शतक बनाएका छन् । उनले आफ्नो अन्तिम शतक २०२३ मार्चमा बनाएका थिए ।

श्रेयस अय्यर २९, यशस्वी जैसवाल १७, रोहित शर्मा १३ र रजत पाटीदार ९ रन बनाएर आउट भए । जेम्स एन्डरसनले २ विकेट लिए । तेस्रो दिन भारतले आफ्नो दोस्रो इनिङ्स २८/० को स्कोरमा अघि बढाएको थियो ।

एजेन्सी । आईपीएल २०२४ को लिलामी अघि गुजरात टाइटन्समा ठूलो परिवर्तन देखिएको छ । गुजरात टाइटन्सले ओपनिङ ब्याट्सम्यान शुभमन गिललाई कप्तान बनाएको छ । हालै गुजरात टाइटन्स फ्रान्चाइजी निर्देशक विक्रम सोलंकीले यो जानकारी दिएका छन् ।

आइतबार रिटेन्सन डेमा सबै फ्रेन्चाइजीहरूले रिटेन र रिलिज गरिएका खेलाडीहरूको सूची सार्वजनिक गरेका थिए जसमा गुजरात टाइटन्सले पहिला हार्दिक पाण्ड्यालाई रिटेन गरेको थियो तर केही समयपछि मुम्बई इन्डियन्सले उनलाई आफ्नो टोलीमा समावेश गर्ने निर्णय गरेको थियो ।

गुजरात टाइटन्स फ्रान्चाइजी निर्देशक विक्रम सोलंकाले भने कि शुभमन गिलले पछिल्लो दुई वर्षमा जसरी प्रदर्शन गरेका छन्, अब समय आएको छ कि उनलाई ब्याट्सम्यानको रूपमा मात्र नभई एक लिडरको रूपमा हेरिनेछ ।

यससँगै शुभमन गिलले गुजरात टाइटन्सको कप्तान बनेपछि आफ्नो भावना व्यक्त गरेका छन् । गिलले भने – ‘म गुजरात टाइटन्सको कप्तानी सम्हाल्न पाउँदा खुसी र गौरवान्वित छु । यस्तो राम्रो टोलीको नेतृत्व गर्न मलाई विश्वास गरेकोमा फ्रेन्चाइजलाई धन्यवाद । हामीले दुईवटा सिजन राम्रोसँग बिताएका छौं र म हाम्रो रोमाञ्चक ब्रान्डको साथ टोलीको नेतृत्व गर्न उत्सुक छु ।’

युवा ओपनर गिलले वर्ष २०१८ मा आईपीएल डेब्यू गरे । केकेआरले उनलाई सन् २०१८ मा समावेश गरेको थियो । आईपीएलमा उत्कृष्ट प्रदर्शन गरेपछि गिलले भारतका लागि एकदिवसीय क्रिकेटमा डेब्यू गरे । गिलले सन् २०१९ मा न्युजिल्याण्डविरुद्ध एकदिवसीय क्रिकेटमा डेब्यू गरेका थिए ।

यसपछि उनले सन् २०२० मा अष्ट्रेलियाविरुद्ध टेस्ट डेब्यू गरेका थिए । केकेआरले गिललाई २०२२ मा रिलिज गरेपछि गुजरात टाइटन्सले उनलाई टोलीमा भित्र्यायो । गिलले २०२२ को आईपीएल सिजनमा १६ खेल खेल्दै ४८३ रन बनाएका थिए जसमा उनको उच्च स्कोर ९६ रन थियो । सन् २०२३ मा शुभमन गिलले १७ खेल खेलेर कुल ८९० रन बनाएका थिए ।

एजेन्सी । एकदिवसीय ब्याट्सम्यानको वरियतामा ठूलो परिवर्तन भएको छ । आईसीसी एकदिवसीय विश्वकप २०२३ मा टीम इन्डियाका ओपनर शुभमन गिललाई बम्पर फाइदा भएको छ ।

गिल पाकिस्तानका कप्तान बाबर आजमलाई पछि पार्दै विश्वको नम्बर १ ओडिआई ब्याट्सम्यान बनेका छन् ।

योसँगै बाबर आजमको ९५० दिनको शासन पनि सकिएको छ । शुभमन गिल आईसीसी एकदिवसीय वरीयतामा नम्बर वान ब्याट्सम्यान बन्ने भारतका लागि सबैभन्दा कान्छा ब्याट्सम्यान बनेका छन् । यस मामिलामा उनले महान क्रिकेटर सचिन तेन्दुलकरलाई पनि पछि पारे ।

यससँगै टीम इन्डियाका फास्ट बलर मोहम्मद सिराजले पनि पछिल्लो ओडीआई बलरको वरियतामा पहिलो स्थान हासिल गरेका छन् ।

सिराजले शाहिन शाह अफ्रिदीलाई पछि पारे । यो विश्वकपमा भारतीय टोलीको उत्कृष्ट प्रदर्शनपछि ब्याटिङ र बलिङ दुवै ओडीआई शीर्ष स्थानमा परिवर्तन भएको हो ।

गत खेलमा गिलले श्रीलंकाविरुद्ध ९२ रन र दक्षिण अफ्रिकाविरुद्ध २३ रनको इनिङ खेलेका थिए र यस प्रतियोगितामा अहिलेसम्म ६ खेलमा २१९ रन बनाएका छन् । योसँगै विराट कोहली आईसीसी एकदिवसीय ब्याट्सम्यानको वरीयतामा चौथो स्थानमा पुगेका छन् ।

एजेन्सी । भारतीय टोलीका ओपनर शुभमन गिललाई डेंगुको संक्रमण भएपछि चेन्नईको अस्पतालमा भर्ना गरिएको थियो । जानकारीका अनुसार गिलको प्लेटलेट काउन्ट एक लाखभन्दा तल झरेको थियो, त्यसपछि उनलाई अस्पतालमा भर्ना गरिएको थियो । हाल उनी अस्पतालबाट डिस्चार्ज भएका छन् । गिल सोमबार साँझ अस्पतालबाट डिस्चार्ज भएका हुन् ।

तर, भारतीय टोलीको चिन्ता अझै हटेको छैन । शुभमन गिललाई अक्टोबर १४ मा कट्टर प्रतिद्वन्द्वी पाकिस्तानविरुद्धको खेल खेल्न गाह्रो देखिन्छ । बीसीसीआईले यसअघि नै शुभमनले अफगानिस्तानविरुद्धको खेलमा भाग नलिने जानकारी दिएको थियो ।

शुभमन गिललाई चेन्नईको प्रख्यात मल्टि केयर स्पेशलिटी अस्पताल कावेरीमा भर्ना गरिएको थियो । उनको प्रगति हेर्न भारतीय टोलीका डाक्टर रिजवान उनीसँगै बसेका थिए ।

पाकिस्तानविरुद्धको हाई भोल्टेज खेलमा करिब ९६ घण्टा बाँकी छ । तर भारतीय टिम व्यवस्थापनका लागि गिलको स्वास्थ्य महत्वपूर्ण छ । यसलाई ध्यानमा राखी थप निर्णय लिइनेछ ।

डेंगुका कारण शुभमन गिल अस्ट्रेलियाविरुद्धको पहिलो खेल खेल्न सकेनन् । उनको स्थानमा इशान किशनले रोहित शर्मासँग इनिङ्स सुरु गरेका थिए । यी दुवै ब्याट्सम्यान फ्लप भए र खाता नखोलेर पेभिलियन फर्किए । शुभमन गिल जतिसक्दो चाँडो निको होस् भन्ने कामना भारतीय फ्यान र अधिकारीहरुले गरेका छन् ।

एजेन्सी । भारतीय क्रिकेट टीमका दायाँ हाते ब्याट्सम्यान शुभमन गिल चेन्नईको एक अस्पतालमा भर्ना भएका छन्।

डेंगु सङक्रमण भएका युवा ओपनिङ ब्याट्सम्यान गिलको प्लेटलेट काउन्टमा कमि आएपछि उनलाई कावेरीस्थित मल्टि केयर स्पेशलिटी अस्पताल भर्ना गरिएको हो ।

भारतीय क्रिकेट कन्ट्रोल बोर्ड (बीसीसीआई) को मेडिकल टोलीले पनि उनको अवस्थाको अनुगमन गरिरहेको आजतक रिपोर्टले जनाएको छ। गिलको प्लेटलेट काउन्ट गर्दा ७०,००० भएपछि उनलाई अस्पताल लगिएको बीसीसीआई स्रोतले पीटीआईलाई भनेको छ ।

डेंगु सङक्रमणका कारण गिलले आईसीसी विश्वकप २०२३ मा अष्ट्रेलियाविरुद्धको पहिलो खेल गुमाएका थिए । बीसीसीआईले उनलाई निको हुन समय लाग्ने भएकोले अक्टोबर ११ मा अफगानिस्तानविरुद्धको खेल पनि गुमाउने बताएको थियो ।

गिल अस्पताल नै भर्ना हुनुपरेपछि अक्टोबर १४ मा हुने बहुप्रतिक्षित भारत र पाकिस्तानबीचको खेलमा सहभागी हुनेछन् कि छैनन् भन्नेमा शंका छ ।

गिलको अनुपस्थितीमा भारतले अष्ट्रेलियाविरुद्धको पहिलो खेलमा कप्तान रोहित पौडेलसँग इशान किशनलाई ओपनिङमा पठाएको थियो । तर, अष्ट्रेलियन बलर मिचेल स्टार्कको आउटगोइंग बलमा इशान गोल्डेन डकमा पेभिलियन फर्किएका थिए ।

एजेन्सी । विश्वकप २०२३ को भारत र अष्ट्रेलियाबीचको खेल चेन्नईको एमए चिदम्बरम स्टेडियममा भइरहेको छ । यस खेलमा टीम इन्डियाले आफ्ना युवा ओपनर शुभमन गिलको उपलब्ध पाएको छैन । शुभमन गिल चेन्नई पुग्नेबित्तिकै डेंगुबाट प्रभावित भएका थिए र अहिलेसम्म उनी निको भएका छैनन् ।

उनी टोलीसँगै होटलबाट रंगशालासम्म पनि नआएको जानकारी प्राप्त भएको छ । शुभमन गिल आफ्नो होटलको कोठामा बसेर निको हुन व्यस्त छन् । स्मरण रहोस् कि भारतीय कप्तान रोहित शर्माले अष्ट्रेलिया विरुद्धको खेल अघि पत्रकार सम्मेलनमा भनेका थिए कि उनको टोलीले शुभमन गिललाई आउट गर्ने विचार नगरेको कारण खेल सुरु हुन समय लाग्यो ।

टसको क्रममा खुलासा
भारतीय कप्तान रोहित शर्माले टसका क्रममा शुभमन गिल खेलको समयसम्म निको नभएको र आजको खेलबाट बाहिरिएको खुलासा गरेका छन् । टसपछि भारतीय कप्तानले भने, ‘दुर्भाग्यवश शुभमन गिल समयमै रिकभर हुन सकेनन् । हामीले आज बिहानसम्म पर्ख्यौं, तर उनी निको भएनन् । उनको स्थानमा इशान किशन खेलिरहेका छन् ।’

गिलको उत्कृष्ट २०२३ वर्ष
गिलले सन् २०२३ मा एकदिवसीय क्रिकेटमा राम्रो प्रदर्शन गरेका छन् । उनले मात्र २० ओडीआईमा १२३० रन बनाएका छन्, जसले गर्दा उनी यस वर्ष यो ढाँचामा सर्वाधिक रन बनाउने खेलाडी बनेका छन् । शुभमन गिलले यो वर्ष पाँच शतक र पाँचै अर्धशतक बनाएका छन् ।

भारतको प्लेइङ ११
रोहित शर्मा (कप्तान), इशान किशन, विराट कोहली, श्रेयस अय्यर, केएल राहुल, हार्दिक पाण्ड्या, रविन्द्र जडेजा, रविचन्द्रन अश्विन, जसप्रित बुमराह, कुलदीप यादव र मोहम्मद सिराज ।

एजेन्सी । भारतीय क्रिकेट टिमका ओपनिङ ब्याट्सम्यान शुभमन गिललाई डेङ्गु संक्रमण भएको छ। गिललाई उच्च ज्वरो आएपछि डेङ्गु परीक्षण गर्दा पोजेटिभ देखिएको बताईएको छ ।

चेन्नईमा आएदेखि नै उनलाई उच्च ज्वरो आएकाले डेङ्गु परीक्षण गर्दा पोजेटिभ देखिएको बिसिसिआई स्रोतलाई उद्धृत गर्दै समाचार एजेन्सी एएनआईले उल्लेख गरेको छ।

डेंगीका कारण गिलले आइतबार हुने अष्ट्रेलियाविरूद्धको खेल गुमाउन सक्ने सम्भावना रहेको छ। डेङ्गुको संक्रमण निको हुन कम्तीमा दुई साता लाग्छ।

यदि गिल अष्ट्रेलियाविरुद्धको खेलमा रिकभर नभएमा भारतले ओपनिङमा कप्तान रोहित शर्माको साथमा इशान किशन वा केएल राहुललाई विकल्पमा पठाउन सक्छ ।

गिलले यस वर्षको सुरुमा न्युजिल्यान्डविरुद्ध उत्कृष्ट दोहोरो शतक बनाएका थिए । उनी इन्डियन प्रिमियर लिगमा ८९० रन बनाएर सर्वाधिक रन बनाउने खेलाडी बनेका थिए । यस्तै, हालै सम्पन्न एसिया कपमा पनि उनले ३०२ रन बनाएर ब्याटिङमा शीर्ष स्थानमा थिए। पछिल्लो खेलमा उनले भारतको लागि १०४, ७४, २७, १२१, १९, ५८ र ६७ स्कोर बनाएका छन्।

एजेन्सी । एसिया कप क्रिकेटको सुपर फोर अन्तर्गत भारतका ओपनर शुभमन गिलले अर्धशतक बनाएका छन् ।

कोलम्बोस्थित आर प्रेमदासा मैदानमा टस हारेर ब्याटिङ थालेको भारतका लागि गिलले ३७ बलमा अर्धशतक बनाएका हुन् ।

उनले १० चौका प्रहार गरे । उनको यो लगातार दोस्रो अर्धशतक हो ।

यो समाचार तयार पार्दासम्म भारत १२.३ ओभरमा विकेट नगुमाई ८० रनको स्थितीमा छ । हाल क्रिजमा गिलसँगै कप्तान रोहित शर्मा छन् ।

एजेन्सी । १६ औं संस्करणको इन्डियन प्रिमियर लिग (आईपीएल)ले विजेता पाएको छ । डिफेन्डिङ च्याम्पियन गुजरात टाइटन्सलाई हराउँदै चेन्नई सुपर किंग्सले पाँचौं पटक उपाधि जितेको हो । सोमबार रिजर्भ डेमा अहमदाबादमा भएको फाइनलमा चेन्नई ५ विकेटले विजयी भएको थियो । अन्तिम २ बलमा रविन्द्र जडेजाले एक छक्का र एक चौका प्रहार गर्दै टोलीलाई जित दिलाए ।

उपाधि जितेकोमा चेन्नईले २० करोड रुपैयाँ (भारु) पुरस्कार पाएको छ । जबकि उपविजेता गुजरात टाइटन्सले १२.५० करोड जित्यो । तेस्रो स्थानमा रहेको मुम्बई इन्डियन्सले ७ र चौथो स्थानको लखनउ सुपर जाइन्ट्सले ६ करोड ५० लाख रुपैयाँ पाए ।

फाइनलका प्लेयर अफ म्याच डेभोन कोनवेले ५ लाख प्राप्त गरे । अर्कोतर्फ फाइनलमा पराजित गुजरात टाइटन्सका ३ खेलाडीले व्यक्तिगत ९ मध्ये ६ अवार्ड जितेका छन् । शुभमन गिलले अधिकतम ४ अवार्ड जितेका छन् भने अवार्डसँगै उनले ४० लाख रुपैयाँको पुरस्कार पनि जितेका छन् ।

जान्नुहोस् पुरस्कार विवरणः
ओरेन्ज क्याप (१० लाख)
शुभमन गिल
खेल – १७
रन – ८९०

पर्पल क्याप (१० लाख)
मोहम्मद शामी
खेल – १७
विकेट – २८

क्याच अफ दी सिजन (१० लाख)
राशिद खान (लखनउविरुद्धको क्याच)

सर्वाधिक चौका (१० लाख)
शुभमन गिल (८५ चौका)

लामो छक्का प्रहार (१० लाख)
फाफ डु प्लेसिस (११५ मिटर लामो छक्का, लखनउविरुद्ध)

इलेक्ट्रिक स्ट्राइकर अफ दि सिजन (१० लाख)
ग्लेन म्याक्सवेल
खेल – १४
रन – ४००
स्ट्राइक रेट – १८३.४८

गेम चेन्जर अफ दि सिजन (१० लाख)
शुभमन गिल

प्लेयर अफ दि टुर्नामेन्ट (१० लाख)
शुभमन गिल

इमर्जिङ प्लेयर अफ दि सिजन (१० लाख)
यशस्वी जैसवाल
खेल – १४
रन – ६२५

एजेन्सी । केही समय अघिसम्म बलिउड अभिनेत्री सारा अली खान र क्रिकेटर शुभमन गिलको अफेयरको चर्चा थियो । दुवैको गोप्य भेटघाटको भिडियो सार्वजनिक भएपछि उनीहरुको प्रेम सम्बन्धको चर्चा सुरु भएको थियो ।

यद्यपि, दुबैले यसबारेमा आधिकारिक धारणा भने दिएका छैनन् । अहिले दुवैले सामाजिक सञ्जालमा एकअर्कालाई अनफलो गरेको सुनिएको छ ।

टेलि चक्करमा प्रकाशित रिपोर्ट अनुसार यो जोडीले इन्स्टाग्राममा एकअर्कालाई अनफलो गरेका छन् । यससँगै दुवैले फेरि एकपटक फ्यानको ध्यान तानेका छन् । यस्तो युगमा जहाँ सेलिब्रेटीहरूको कमेन्ट र लाइकले उनीहरूको सम्बन्धको न्याय गर्छ । त्यहाँ दुबै सेलिब्रेटीले एकअर्कालाई अनफलो गरेकोले फ्यानको दिमागमा धेरै प्रश्न खडा गरिरहेको छ । सामाजिक सञ्जालमा धेरै प्रयोगकर्ताहरूले दुवैलाई यसबारे प्रश्न पनि गरेका छन् ।

व्यक्तिगत जीवनको कुरा गर्ने हो भने शुभमनको नाम सधैं सारा अली खान र सचिन तेन्दुलकरकी छोरी सारा तेन्दुलकरसँग जोडिने गरेको छ । कतिपयले अभिनेत्री साराका लागि सारा तेन्दुलकरसँग ब्रेकअप गरेको ठान्छन् । जबकि कतिपय विश्वास गर्छन् कि शुभमन दुवैसँग स्वस्थ र मित्रवत सम्बन्ध राख्छन् ।

शुभमन र सारा अली खानको सम्बन्ध गत वर्ष सोनम बाजवाको टक शो ‘दिल दिया गल्लन’ मा पुगेपछि चर्चामा आएको थियो । उनले सारालाई बलिउडको सबैभन्दा फिट अभिनेत्री भने । यति मात्र होइन, जब उनलाई सम्बन्धको बारेमा सोधिएको थियो, उनले भने, ‘साराको सारा सत्य कुरा गर्दैछु, हुनसक्छ पनि, सायद होइन पनि…’ त्यसयता उनीहरुको सम्बन्धको चर्चा चलेको थियो । अर्कोतर्फ साराको वर्कफ्रन्टको कुरा गर्ने हो भने, उनी अहिले आफ्नो आगामी फिल्म ‘जरा हटके जरा बचके’ को प्रमोशनमा व्यस्त छिन् ।

काठमाडौं । भारतीय ओपनर शुभमन गिलले पुर्व कप्तान विराट कोहलीको कीर्तिमान तोडेका छन् ।

बुधबार न्युजिल्यान्डविरुद्ध भएको टी–ट्वान्टीमा सानदार शतक बनाउदै गिलले कोहलीले चार महिना अघि बनाएका कीर्तिमानी तोडेका हुन् ।

गिलले उक्त खेलमा ६३ बलमा १२ चौका र ७ छक्कासहित १ सय २६ रनमा अविजित रहेका थिए । गिलको शतकको सहयोगमा भारतले २ सय ३४ रन बनाएको थियो ।

गिलको यो टी–ट्वान्टी आई करिअरको पहिलो शतक हो । उनी भारतबाट टी–ट्वान्टी आईमा एकै इनिङमा सर्वाधिक रन बनाउने ब्याटर  बनेका छन् । गिलले उक्त कीर्तिमानीमा पुर्व कप्तान कोहलीलाई पछि पारेका हुन् । कोहलीले गत बर्षको सेप्टेम्बरमा यूएईमा भएको एसिया कपमा अफगानिस्तानविरुद्ध १ सय २२ रनको अविजित शतकीय इनिङ खेलेका थिए ।

यससँगै गिल भारतबाट टी–ट्वान्टी आईमा कम उमेरमा शतक हान्ने खेलाडी पनि बनेका छन् । उनले सुरेश रैनाको कीर्तिमानी तोडेका हुन् ।