काठमाडौँ । नेपाली काँग्रेसका गण्डकी प्रदेश सभापति शुक्रराज शर्माले संवैधानिक राजतन्त्रलाई पुनःबहाली गर्न देशमा क्रियाशिल सबै शक्तिहरुसँग छलफल गर्नुपर्ने बताउनुभएको छ ।

मंगलवार नेपाली काँग्रेसको विशेष महाधिवेशनका क्रममा गण्डकी प्रदेशको तर्फबाट आफ्ना धारणा राख्नुहुँदै उहाँले यस्तो प्रश्ताव गर्नुभएको हो ।

राष्ट्रियता, प्रजातन्त्र, समाजवाद, सनातन धार्मिक स्वतन्त्रता, हिन्दु धर्म पुनःबहाली गर्न माग गर्नुभयो । गणतन्त्रै हो भनेपनि प्रतिक्रियावादीहरुले उठ्न नसक्ने गरी व्यवस्था गर्नुपर्ने उहाँले बताउनु भयो । उहाँले देश र जनता बचाउनु पहिलो काम भएको पनि बताउनु भयो । उहाँले देशमाथि परिरहेको संकटको समाधान गर्न नेपाली काँग्रेसको नेतृत्वको खोजि भइरहेको बताउनु भयो ।

उहाँले भन्नुभयो, ‘नेपाली काँग्रेस बचाउनु पहिलो काम हो । देशमाथि परेको संकटलाई समाधान गर्न पनि नेपाली काँग्रेसको नेतृत्व खोजेको छ । तसर्थ परिमार्जित, देश र जनताको सेवामा समर्पित नेतृत्व निर्माण गरी महाधिवेशनबाट चयन गरौँ । विशेष महाधिवेशनलाई ऐतिहासिक बनाउन माग गर्दछौँ । राष्ट्रियता, प्रजातन्त्र, समाजवाद, सनातन धार्मिक स्वतन्त्रता, हिन्दु धर्म पुनःबहाली गरौँ । संवैधानिक राजतन्त्रलाई पुनःबहाली गर्न देशमा क्रियाशिल सबै शक्तिहरुसँग विचार विमर्श गरौँ । गणतन्त्रै हो भनेपनि प्रतिक्रियावादीहरुले उठ्न नसक्ने गरी व्यवस्था गरौँ ।’

उहाँले देश विकासमा जुट्न अब ढिलो भइसकेको बताउनु भयो ।

काठमाडौं। नेपाली काँग्रेस गण्डकी प्रदेश सभापति शुक्रराज शर्माले पार्टी पङ्क्तिले जिम्मेवारी दिए राष्ट्रपतिमा जित्ने गरि लड्न आफू तयार भएको बताएका छन्। शुक्रबार बिहान सोल्टीमोड स्थित आफ्नै निवासमा काँग्रेस नेताहरुसँगको छलफलपछि अवसर दिएको खण्डमा राष्ट्रपतिको उम्मेदवारको रुपमा अघि बढ्न तयार रहेको शर्माले बताएका हुन्।

छलफलमा सहभागी नेताहरुले राष्ट्रपतिमा स्वच्छ छवि भएको नेतृत्व अपरिहार्य भएकोले काँग्रेसका पुराना नेता शर्मालाई अघि बढ्न आग्रह गरेका थिए। उक्त आग्रह पछि शर्माले त्यस कुरालाई आफूले गम्भिरता साथ लिएको बताएको छलफलमा सहभागी एक नेताले जानकारी दिए।

शर्माले भनाई उधृत गर्दै उनले भने, ‘साथीहरुले आग्रह गरिरहनु भएको छ। म सत्तामा कहिल्यै नभए पनि आम कार्यकर्ताको विश्वास म मा अझैँ छ। पार्टी पङ्क्तिले पनि शुक्रराज दाइ अघि बढ्नुस् भने नाइ भन्ने कुरा हुँदैन। ५४ वर्षको राजनितिक इतिहासको सुखद अन्त्य हुन्छ। सबैको सहयोग भए म उभिन्छु। काँग्रेसलाई जिताउन हिड्छु।’

संसदीय निर्वाचनमा जहिल्यै जीत विहिन भएका शुक्रराज काँग्रेसको अघिल्लो पुस्तामा सत्ता यात्रा नगरेका एक मात्र नेताका रुपमा चिनिन्छन्।