काठमाडौं । विसं २०६१ सालदेखि हरेक वर्ष निरन्तर रुपमा गाईजात्रे प्रस्तुति बजारमा ल्याइहनुभएका ‘जोगिन्दर’ को उपनामले चर्चित हास्य कलाकार शिवशङ्कर रिजालले यस वर्ष २१औँ गाईजात्रे कोसेली ‘लुछाचुँडी’ सार्वजनिक गर्नुभएको छ ।

हास्य कलाकारहरूले मनाउने ठूलो पर्वको रौनकता पछिल्लो समय कम भइरहेको सन्दर्भमा रिजालले भने निरन्तर गाईजात्राको कोसेली बजारमा ल्याउने गर्नुभएको छ । “मेरो कलाकारिता यात्रामा गाईजात्राको ठूलो भूमिका छ । यसका लागि तयार गरिने सामग्री र प्रहसनले मलाई अगाडि बढाएको थियो । मैले हरेक वर्ष आफ्नो प्रहसन र प्यारोडी गीतसहितको प्रस्तुति ल्याउने गरेको छु”, हास्य कलाकार रिजालले भन्नुभयो । पहिले क्यासेटमा आउने सामग्री भिसिडी हुँदै अहिले युट्युबमा आउने गरेको छ ।

विशुद्ध मनोरञ्जन दिने उद्देश्यले तयार गरिएको ‘लुछाचुँडी’ मा देशमा सबैको चासो र चिन्ताको विषय रहेको भ्रष्टाचारलाई चिरफार गर्दै व्यङ्ग्य गरिएको उहाँले जानकारी दिनुभयो । उहाँलाई प्यारोडी गीत गायनमा प्रकाश ओझा, कर्णराज गिरी र राधिका हमालले साथ दिनुभएको छ ।

प्रहसनमा घनश्याम गौतम ‘नक्कली प्रचण्ड’, सुरेश तिमिल्सेना ‘नक्कल ओली’, गोपाल नेपाल ‘नक्कली देउवा’, राधिका हमाल, साबित्रा लामिछाने, अर्जुन गिरी, ज्ञानदेव गिरी, प्रेम शर्मा पौडेल, शिवराम कार्की लगायतले अभिनय गर्नुभएको छ ।

हास्यकलाकार रिजालले गाईजात्राको कोसेलीमार्फत व्यङ्ग्य गरेर चेतना बढाउने काम गरिएको बताउनुभयो । उहाँले भन्नुभयो, “जनताको मत पाएको बन्नुभएका प्रतिनिधि र कर्मचारीले गरिरहनुभएको गलत कार्यलाई व्यङ्ग्य गरेको छु । यसले उहाँहरूलाई पनि आफ्नो गल्ती बुझ्न मद्दत गर्छ भन्ने हो । साथै, मनोरञ्जन यसमा भरपुर छ ।” रासस

काठमाडौँ । टेलिभिजनमार्फत ‘जोगिन्दर’को उपनामले परिचित हास्यकलाकार शिवशङ्कर रिजालले नयाँ नाम ‘मुखियाजी’ पाउनुभएको छ । विशेषत: तराईमा अध्यक्षलाई मुखिया भन्ने गरिन्छ । जोगिन्दर र पानवाला भनेर चिनिनुभएका हास्य कलाकार रिजालले मुखियाको नाममा नयाँ टेलिभिजन शो बनाउनु भएपछि दर्शकबाट नयाँ उपनाम पाएको बताउनुभयो ।

“महोत्सवमा सहभागी हुँदा जोगिन्दर भनेर सम्बोधन गर्नुहुन्छ । विशेषत: तराईमा जाँदा मुखियाजी भन्नुहुन्छ । यी नामले सम्बोधित हुँदा खुसी लाग्छ । किनकी यी पात्रलाई बनाउन निकै मेहनत लागेको छ”, उहाँले रिजालले भन्नुभयो ।

जोगिन्दरको उपनाम उहाँले छोटो चलचित्रमार्फत पाउनुभएको हो । निर्देशक आशिफ शाहले निर्देशन गर्नुभएको एक छोटो चलचित्रमा उहाँले पान पसलेको भूमिका निर्वाह गर्नुभएको थियो । “महोत्सवमा त्यो छोटो चलचित्र प्रथम भयो । मेरो भूमिका रुचाइयो । त्यसपछि मैले त्यही चरित्रलाई टेलिभिजन शो र महोत्सवमा प्रयोग गरेँ”, उहाँले भन्नुभयो ।

सर्लाहीका बासिन्दा हास्य कलाकार रिजालले तराईकै पात्रलाई आफूमार्फत प्रस्तुत गर्ने गर्नुहुन्छ । उहाँले भन्नुभयो, “मैले गर्ने प्रहसनले मनोरञ्जनसँगै सन्देश पनि दिन्छ । जे जस्तो चरित्रलाई हेर्दै हुर्किएँ त्यसलाई नै प्रस्तुत गर्ने गरेको छु ।”

तराईमा मुखियाको आफ्नो छुट्टै मानसम्मान हुन्छ । “पात्रलाई टेलिभिजनसँगै बाहिर पनि प्रयोग गरिरहेको छु । यद्यपि जोगिन्दरलाई पनि छाडेको छैन ।” जोगिन्दरको चरित्रलाई जीवित राख्दै मुखियाजीमार्फत कला यात्रालाई अगाडि बढाउने योजनामा रहेका हास्य कलाकार रिजालले विज्ञापन, म्युजिक भिडियो र चलचित्रमा अभिनय गर्नुभएको छ । रासस