काठमाडौं । सशस्त्र प्रहरीका असई थमन बिक हत्या प्रकरणमा उच्च अदालतबाट दोषी ठहर भएका नेकपा एमालेका पूर्वसांसद लक्ष्मी महतोलाई कैद भुक्तानका लागि जलेश्वर कारागार पठाइएको छ।

महोत्तरीको गौशालाबाट बिहीबार पक्राउ परेका महतोलाई शुक्रबार जिल्ला प्रहरी कार्यालय महोत्तरीमा उपस्थित गराइएको थियो। त्यसपछि अदालतको आदेशअनुसार उनलाई कैद सजाय कार्यान्वयनका लागि जलेश्वर कारागार चलान गरिएको हाे ।

थमन बिक हत्या प्रकरणमा महोत्तरी जिल्ला अदालतले यसअघि महतोलाई सफाइ दिएको थियो। तर उच्च अदालत जनकपुरले उक्त फैसला उल्ट्याउँदै बुधबार उनलाई पाँच वर्ष कैद सजाय सुनाएको थियो।

उच्च अदालतको निर्णयपछि फरार रहेका महतोलाई प्रहरीले गौशाला क्षेत्रबाट नियन्त्रणमा लिएको थियो। पक्राउपछि आवश्यक कानुनी प्रक्रिया पूरा गरी उनलाई कारागार पठाइएको प्रहरीले जनाएको छ।