काठमाडौँ । एक क्विन्टल सुन तस्करी प्रकरणमा पक्राउ परेका व्यवसायी रोहन अडुकिया रिहा भएका छन् ।

भारतको दिल्लीबाट एयर इन्डिगोमा काठमाडौँ आइपुगेका अडुकियालाई त्रिभुवन अन्तर्राष्ट्रिय विमानस्थलको अध्यागमनले शुक्रबार पक्राउ गरेको थियो ।

रोहन व्यापारी राकेश अडुकियाका छोरा हुन् । अध्यागम विभागले खोजेको बेला उपस्थित हुने सर्तमा उनलाई आज रिहा गरिएको छ जनाएको छ ।

सुन तस्करी प्रकरणमा अनुसन्धान गरिरहेका राजस्व अनुसन्धान विभाग र नेपाल प्रहरीको केन्द्रीय अनुसन्धान ब्युरो (सीआईबी) दुवैले बुझ्न नमानेपछि उनलाई रिहा गरिएको हो ।

सुन प्रकरणमा राजस्व अनुसन्धान विभागले त्रिभुवन विमानस्थल अध्यागमन कार्यालयलाई मौखिक रुपमा अडुकियालाई कालोसूचीमा राख्‍न भनेको थियो । सोही आधारमा विमानस्थल प्रहरीले उनलाई पक्राउ गरेको थियो ।

तर, सुन काण्डको अनुसन्धान भने हाल प्रहरीको केन्द्रीय अनुसन्धान ब्युरो (सीआइबी)ले गरिरहेको छ । सीआइबीले आफ्नो अनुसन्धानमा रोहनसँगको कनेक्सन नदेखिएको भन्दै जिम्मा लिन नमानेपछि उनलाई रिहा गरिएको हो ।