काठमाडौँ। सर्वोच्च अदालतले नागरिक उन्मुक्ति पार्टी, नेपालका संरक्षक रेशमलाल चौधरीलाई कैलाली क्षेत्र नं १ बाट उम्मेदवार बन्न माग गर्दै दायर गरेको रिट निवेदनमा अन्तरिम आदेश दिन अस्वीकार गरेको छ ।

न्यायाधीशद्वय सारङ्गा सुवेदी र टेकप्रसाद ढुङ्गानाको इजलासले आज उक्त विवादमा सुनुवाइपछि अन्तरिम आदेश जारी गर्न अस्वीकार गरेको हो ।

आदेशमा भनिएको छ, “उक्त संवैधानिक एवं कानुनी व्यवस्थाको व्याख्या प्रस्तुत रिट निवेदनको अन्तिम सुनुवाइको बखत हुने हुँदा सुविधा सन्तुलनको दृष्टिबाट मागबमोजिम अन्तरिम आदेश जारी गर्नुपर्ने अवस्था देखिएन । नियमानुसार पेस गर्नू ।”

कैलाली क्षेत्र नं १ का निर्वाचन अधिकृतले उम्मेदवारी खारेज गर्ने निर्णयविरूद्ध चौधरीले सर्वोच्च अदालतमा रिट दायर गर्नुभएको थियो । रासस

काठमाडौँ । नाउपा नेपालका संरक्षक रेशम चौधरीको उम्मेदवार खारेजी विरुद्धको रिटमा अदालतले यसअघिको फैसलाको फाइल पेस गर्न आदेश दिएको छ ।

सर्वोच्च अदालतका न्यायाधीशद्वय बालकृष्ण ढकाल र नृपध्वज निरौलाको संयुक्त इजलासले उनको कर्तव्य ज्यान मुद्दासँग जोडिएको फैसलाको फाइल पूर्वआदेश अनुसार पेस गर्न आदेश दिएको हो ।

यसअघि न्यायाधीश बालकृष्ण ढकालको एकल इजलासले निर्वाचन आयोगसँग लिखित जवाफ माग्नुको साथै छलफलका लागि दुवै पक्षलाई बोलाएको थियो । यस्तै, चौधरीलाई आममाफीविरुद्ध शारदा कडायतले दायर गरेको रिट फाइल र निर्वाचन आयोगको निर्णयको प्रमाणित प्रतिलिपि झिकाउन आदेश दिएको थियो ।

यसअघि निर्वाचन आयोगले प्रतिनिधिसभा सदस्यको निर्वाचनका लागि कैलाली क्षेत्र नम्बर १ बाट रेशम चौधरीको उम्मेदवारी खारेज गरेको थियो ।

कैलाली क्षेत्र नं. १ लाई कसैले पनि स्वार्थ, षड्यन्त्र र सस्तो आरोपको अखडा ठानेर राजनीति गर्ने भूल नगरोस्। यहाँका जनताले धेरै देखेका छन्, धेरै भोगेका छन्, र कसले पीडाको राजनीति गर्‍यो र कसले जिम्मेवारी बोकेर काम गर्‍यो भन्ने कुरा राम्ररी बुझ्छन्।

२०७९ सालमा जनताले मलाई जनप्रतिनिधि बनाएपछि “के गरिस् ?” भनेर प्रश्न गर्नेहरूलाई म आज तथ्य र इतिहासका आधारमा जवाफ दिन चाहन्छु। म जुन एजेन्डा लिएर जनतामाझ गएको थिएँ, त्यो पूरा भयो कि भएन त्यसको जवाफ इमानदारीपूर्वक दिनुस्, हल्लाका आधारमा होइन।राजबन्दी रिहाइ कुनै संयोग थिएन, कुनै व्यक्तिगत सौदा थिएन।तत्कालीन प्रधानमन्त्री पुष्पकमल दाहाल ‘प्रचण्ड’को स्पष्ट राजनीतिक इच्छाशक्ति र म क्याबिनेट मन्त्रीको जिम्मेवारीमा रहँदा गरिएको ठोस पहल बिना त्यो निर्णय सम्भव नै थिएन।

जो आज सजिलै टिप्पणी गर्छन्, उनीहरूलाई सोध्न चाहन्छु—त्यो बेला तपाईंहरू कहाँ हुनुहुन्थ्यो ?हिजोको दिनमा थारू समुदायलाई योजनाबद्ध रूपमा हत्यारा सावित गर्न टेलिभिजन, रेडियो र मञ्च–मञ्चमा कराउनेहरूको इतिहास हामीले देखेकै हौँ। आज तिनै सोच बोकेकाहरू नयाँ शब्द र नयाँ आरोप लिएर फेरि देखापरेका छन्, तर इतिहास न मेटिन्छ, न मोडिन्छ।अब अझ स्पष्ट रूपमा अर्को आरोपको जवाफ दिन चाहन्छु।

मलाई र रेशमजीलाई “श्रीमान श्रीमतीको झगडा” भनेर दोष थोपर्नेहरूलाई। यदि साँच्चिकै हाम्रो व्यक्तिगत झगडा भएको भए, यदि यो घरायसी विवाद नै भएको भए, त्यो अंश मुद्दा, बहुविवाह मुद्दावा व्यक्तिगत कानुनी विवादका रूपमा देखिन्थ्यो होला। तर यस्ता कुनै पनि मुद्दा छैनन्। किनकि यहाँ व्यक्तिगत झगडा थिएन।राजनीतिक असहमति र परिस्थितिजन्य मतभेदलाईश्रीमान श्रीमतीको झगडामा झार्नुतर्कको होइन, राजनीतिक असफलता र कायरताको प्रमाण हो।आफ्नै जिम्मेवारीबाट पन्छिन अरूलाई दोष दिने काम नगरेकै राम्रो।

हिजो दाइ–भाउजू भन्दै हिँड्नेहरूलाई पनि सोध्न चाहन्छु— त्यो बेला मिलाउने, संवाद गराउने, जिम्मेवारी लिने ठाउँमातपाईंहरूले के भूमिका खेल्नुभयो ?अहिले परिस्थिति गाह्रो देख्दा आगोमा घ्यू हाल्न दौडिनु नैतिकता होइन।अब “रञ्जिता ले पद र कुर्सीको लागि थारू मुद्दा बिर्सिइन्” भन्नेहरूलाई पनि स्पष्ट जवाफ दिन्छु।रञ्जिता कुनै राजनीतिक पृष्ठभूमिबाट आएको व्यक्ति होइन।

म राजनीति गर्न जन्मिएकी होइन।म परिस्थितिले राजनीति गर्न बाध्य बनाएकी नारी हुँ।म त्यही नाबालक सम्हालेर बसेकी आमा हुँ,जसको बुवालाई २०७२ सालको टीकापुर घटनामा नहुनु पर्ने झुटो मुख्य आरोपी बनाइयो र देशबाहिर बस्न बाध्य पारियो। त्यो पीडाले मलाई राजनीतिमा ल्यायोकुर्सीको लोभले होइन,न्यायको खोजीले।राजनीतिक पार्टी दर्ता गरियो,मलाई अध्यक्षको जिम्मेवारी दिइयो,र त्यो जिम्मेवारी मैले सजिलो भनेर होइन,सबैभन्दा गाह्रो जिम्मेवारी भनेर स्वीकार गरेँ।

मैले पद खोजेकी होइन। मैले कुर्सी मागेकी होइन। मैले त झन् आफ्नो समय, श्रम, आत्मसम्मान र सहनशीलता दाउमा राखेर यो आन्दोलन जोगाएँ, अगाडि बढाएँ र सफल बनाएँ। यदि पदकै लोभ हुन्थ्यो भने यति आलोचना, यति चरित्र हत्या,
र नारी भएको कारण हरेक निर्णयमा प्रश्न खेपेर यो बाटो हिँडिरहनु पर्ने थिएन।

झुटा कथा बनाएर, झुटा मुद्दा थोपरेर एउटी नारी नेत्रीलाई बदनाम गराउने प्रयास केवल राजनीतिक अपराध होइन, यो नारीमाथिको योजनाबद्ध प्रहार हो। तर इतिहासले सधैँ एउटै कुरा देखाएको छ— झुटो प्रचारले केही समय हल्ला मच्चाउन सक्छ, तर अन्तिम फैसला समयले नै गर्छ।

समयसँग बहस कसैले जितेको इतिहास छैन। अन्त्यमा स्पष्ट भनिन्छ थारू मुद्दालाई प्रयोग गरेर नारीमाथि प्रहार नगर्नुस्। श्रीमान श्रीमतीको सम्बन्धलाई हतियार बनाएर राजनीति नगर्नुस्। जनताको पीडामाथि उभिएर सस्तो लोकप्रियता खोज्ने भ्रममा नबस्नुस्।

नागरिक उन्मुक्ति पार्टीबाट नेपाली कम्युनिस्ट पार्टीमा समायोजन भएकी नेतृ रञ्जिता श्रेष्ठले सामाजिक सञ्जालमा राख्नु भएको स्टाटस

काठमाडौं। नागरिक उन्मुक्ति पार्टी (नाउपा)का संस्थापक अध्यक्ष रेशम चौधरीले पार्टी छोडेका छन्।

आइतबार बिहान सामाजिक सञ्जाल फेसबुकमा लाइभ सन्देश जारी गर्दै उनले आफूले पार्टी छोडेको र नागरिक उन्मुक्ति पार्टी, नेपाल घोषणा गरेका जानकारी गराएका छन् ।

उनले भनेका छन् ‘आजसम्म नागरिक उन्मुक्ति पार्टीको संरक्षक मानिदिनु भएकोमा सम्पूर्णलाई धन्यवाद । आजदेखि भने म त्यो पार्टीबाट अलग भएको छु। नयाँ संगठन निर्माणमा आजैदेखि जुटेको छु।’

निर्वाचन आयोगले अध्यक्ष रञ्जिता श्रेष्ठलाई मान्यता दिएपछि चौधरीले नाउपा छाडेर नयाँ पार्टी गठन गरेका हुन्।

काठमाडौं । नागरिक उन्मुक्ति पार्टीकी अध्यक्ष रञ्जिता श्रेष्ठ र संरक्षक रेशम चौधरीबीचको मनमुटाव अझै साम्य भएको छैन । दुवै जना श्रीमान–श्रीमती भए पछि एकले अर्कोमाथि आक्षेप लगाउन र खण्डन गर्न माहिर मानिन्छन् । सामाजिक सञ्जालमा उनीहरुबीचको जुहारी चलिरहेको हुन्छ ।

चौधरीले भनेको एउटा विषयलाई लिएर श्रेष्ठले कटाक्ष गरेकी छन् । एक कार्यक्रममा रेशम चौधरीले आफूले बनाएको ‘बाबा तुहार छोरा जेलम्परलवा’ बोलको गीतकै कारण १६ सांसद जितेको दाबी गरेका थिए ।

कारागारमा पार्टी स्थापना गरेको, निर्वाचनका लागि पैसा नभएपछि गीत तयार गरेर सांसद जिताएको उनको भनाइ थियो । ‘थारु कलाकार बैनीहरूलाई बोलाएँ । गीत रेकर्ड गरेँ । गाउन पठाएँ । कसैले केही प्रचार गर्नु परेन । मात्र त्यही गीत बजाइदिँदा यत्रो जनताको विश्वास र भरोसाले १६ सांसदले चुनाव जिते,’ रेशमले भनेका थिए ।

पार्टी अध्यक्ष रञ्जिताले भने त्यसको खण्डन गरेकी छन् । उनले गीतकै आधारमा पार्टीले सिट नजितेको बताएकी छन् ।

रञ्जिताले सामाजिक सञ्जालमा लेखेकी छन्–

२०७२ सालको पीडादायी घटनापछि थारु समुदायले अपार घाउ बोकेका छन्। निर्दोष दाजुभाइ र दिदीबहिनीहरू जेलमा थुनिनु, विस्थापित हुनु, घर–परिवार टुट्नु—यी पीडाहरू अझै पनि ताजा छन्। यस्ता संवेदनशील घटनालाई हल्का पार्ने शैलीमा प्रस्तुत गर्नु केवल पीडित परिवारलाई होइन, सम्पूर्ण थारु समाजलाई आहत पार्ने कुरा हो ।

आज हामीले १६ सांसद जित्नु कुनै ‘गीत बजाएर’ वा क्षणिक मनोरञ्जनको कारण होइन। यो त थारु समुदायको साहस, आँसु, बलिदान र राजनीतिक चेतनाको प्रतिफल हो। यससँगै, हाम्रो प्रत्येक कार्यकर्ता साथीहरूको अथक परिश्रम र निरन्तर समर्पणले यो सम्भव भएको हो। म सबै कार्यकर्तालाई हृदयदेखि आभार व्यक्त गर्दछु ।

यस जितमा केवल थारु मात्र होइन, पहाडी समुदायको पनि विश्वास, साथ र आशीर्वाद जोडिएको छ। थारु र पहाडी दुवैलाई समान रूपमा धन्यवाद छ—हामी सबै मिलेर अघि बढ्ने साझेदार हौँ। हामी भाइ–भाइ हौँ। जातीयता भडकाउने हरेक प्रवृत्तिको घोर विरोध गर्छु ।

हामीलाई जनताले दिएको जित गीतले होइन, जनताको विश्वासले सम्भव भएको हो। गीत, नाराबाजी वा प्रचार त माध्यम मात्र हुन्—तर मूल शक्ति भनेको जनताको भरोसा, माया र त्याग हो। यसमा थारु समाजसँगै पहाडी समुदायले पनि विश्वास र साथ दिनुभएको छ, त्यसका लागि हृदयदेखि आभार व्यक्त गर्दछु ।

राजनीतिमा शब्दको वजन हुन्छ। असावधानीपूर्वक गरिएको अभिव्यक्ति केवल व्यक्ति होइन, सम्पूर्ण समुदायलाई आहत पार्छ। त्यसैले जिम्मेवार स्थानमा रहँदा अझ संवेदनशीलता आवश्यक हुन्छ ।”

राजनीति भनेको विभाजन होइन, एकताको भाषा हो। शब्दहरूको तौल हुन्छ। असावधानीपूर्वक बोलेका शब्दहरूले समुदायबीच विभाजन सिर्जना गर्न सक्छन्। त्यसैले जिम्मेवार स्थानमा रहेका प्रत्येक व्यक्तिले आफ्ना अभिव्यक्तिमा संवेदनशीलता, इमानदारी र सम्मानको भावना राख्नु अत्यावश्यक हुन्छ ।”

जय नागरिक ।

काठमाडौं । २०७९ सालको निर्वाचनमा अप्रत्यासित नतिजा हात पारेको नागरिक उन्मुक्ति पार्टीमा अहिले विवाद उत्कर्षमा पुगेको छ । कुनै पनि बेला दल विभाजन हुने जोखिममा छ ।

नाउपाले अध्यक्ष रञ्जिता श्रेष्ठ चौधरीलाई हटाएर लालवीर चौधरीलाई अध्यक्ष बनाएको छ । तर, रञ्जिताले पार्टीको आधिकारिक अध्यक्ष आफू नै रहेको दाबी गरेकी छन् ।

रञ्जिता र उनका श्रीमान् तथा पार्टी संरक्षक रेशम चौधरीबीच द्वन्द्व बढ्दा पार्टी फुटको स्थितिमा आइपुगेको हो ।

यसैबीच रञ्जिताले ‘नजिर’ शीर्षकमा एउटा कविता लेखेर फेसबूकमा पोस्ट गरेकी छन् । उनले यो कवितामा अहंकारले बनाएको दरबार चुडिँने तर्क गरेकी छन् ।

आफ्ना श्रीमान रेशम लक्षित यो कवितामा कस्तो त छ ?

‘’नजिर”

गलत नजिर बसायो जसले,

सत्यलाई कुहिरोमा लुकायो जसले —

एक दिन त्यो नाटकको पर्दा च्यातिन्छ,

र संचित पापको भारीले नै आफैँ झुकेको पाइन्छ ।

खन्दै थियो जो अरूका लागि खाल्डो,

उसैको पाइला डगमगाउँछ त्यहीँ

यो नियतिले कहिल्यै साथ दिँदैन,

अहंकारले बनाएको दरबार चुँडिन्छ, टिक्दैन ।

हामी त उभिएका छौँ विवेकको छायाँमा,

न आँधीले हल्लाउने, न लोभको मायामा ।

सत्ता त सधैं रहँदैन एउटै हातमा,

समय आफैँले लेख्छ फैसला, न्यायको रातमा ।

‘बिचरा’ भन्नुको पनि अर्थ गहिरो छ यहाँ,

त्यो शक्ति होइन, अन्तर्मनको गहिराइमा पया ।

जो पीडा बुझ्दैन, उ ठूला आसनमा भए पनि सानो छ,

तर जसले सहन गर्छ, ऊ नै असल इतिहासको गाथा बनाउने मानो हो ।

काठमाडौँ । नागरिक उन्मुक्ति पार्टीका संरक्षक रेशम चौधरीले संघीय लोकतान्त्रिक मोर्चा अब विघटन हुनु नहुने बताउनुभएको छ ।

आईतवार मोर्चाले काठमाडौंमा आयोजना गरेको कार्यक्रमलाई सम्बोधन गर्दै उहाँले यस्तो बताउनुभएको हो ।

उहाँले अब ठोस निर्णय गरेर जनताका लागि संघीय लोकतान्त्रिक मोर्चा बनेको हो भन्ने सन्देश दिन जरुरी रहेको बताउनु भयो । उहाँले सबैतिरबाट लालच राख्यो भने लालचकै पोखरीमा डुब्ने बाहेक केही नहुने बताउनु भयो । अवहेलनाका बीचमा कसरी सम्मानित हुने भन्ने सोच्नुपर्ने बताउनु भयो । पहिला आफू सच्चिने र जनताका लागि त्याग गर्न सकिन्छ की सकिँदैन भन्ने सोच्न आग्रह गर्नुभयो ।

उहाँले भन्नुभयो, ‘हामीले अब ढिलो गर्नुहुन्न । निर्णय लिएपछि ठोस निर्णय लिनुपर्छ । सबैतिरबाट लालच नै राख्यो भने लालचकै पोखरीमा डुब्छौँ । अन्ततोगत्वा त्यसले हामीलाई मृत्यु मात्रै दिन्छ । हामी अब धेरै अपहेलित भइसक्यौँ । मोर्चाका साथीहरुले विशेषतः सोच्नुपर्छ । हामी यो अवहेलनाका बीचमा सम्मानित कसरी हुने धेरै महत्वपूर्ण निर्णय गर्नुपर्छ । जनताले पत्याउने कसरी बन्ने त्यसमा अघि बढ्नुपर्छ । पहिला आफू सच्चिएर जनताका निम्ति त्याग गर्नुपर्छ । जिन्दगीभर जनतालाई न्याय दिन तयार छौँ की छैनौँ यसको हेक्का राख्नुपर्छ । अब हुने चुनावमा पनि देखिन्छ कत्तिको जनताले पत्याउँछन् । धेरै पछि एउटै मोर्चामा हामी उनिएका छौँ । अहिले जुटेका छौँ । फेरि छुट्ने, फुट्ने प्रयत्न नगरौँ । एक भएर अघि बढ्ने प्रयत्न गरौँ ।’

उहाँले मोर्चाको नीति र सिद्धान्त एक बनाएर अघि बढ्नुपर्ने बताउनु भयो ।

काठमाडौँ । नागरिक उन्मुक्तिका संस्थापक रेशम चौधरीले पूर्वप्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहालप्रति लक्षित गर्दै मान्छे मारेको स्वीकार गर्नेहरुलाई केही नगरिएको टिप्पणी गर्नुभएको छ ।

शनिवार काठमाडौंमा आयोजित दलित, पिछडावर्ग, थारु, आदिवासी र अल्पसंख्यकहरुको राष्ट्रिय भेलामा बोल्दै उहाँले यस्तो टिप्पणी गर्नुभएको हो ।

उहाँले आफूलाई अहिले पनि टिकापुर हत्याकाण्ड गरिस् भनेर गाली गर्ने गरेको बताउनु भयो । उहाँले तर आफू टिकापुर घटनामा घटनास्थलमै नरहेको भएपनि सबैभन्दा ठूलो हत्याको बिल्ला भिराइएको बताउनु भयो । उहाँले मान्छे नमार्ने थारुहरु हत्यारा भएको तर मान्छे मार्नेहरु सरकारमा सँगै रहेर पनि मान्छे मारेको स्वीकार गर्नेहरुलाई यत्तिकै छोडिएको बताउनु भयो । नेपाल न्याय मरेको देश भएको टिप्पणी गर्नुभयो ।

संस्थापक चौधरीले भन्नुभयो, ‘म मेरो सामाजिक सञ्जालमा कहिले कहीँ हेर्छु । मार गाली गर्छन् मलाई । टिकापुर घटनामा मान्छे छैन, सबैभन्दा ठूलो हत्याको बिल्ला भिरेको छु । बच्चाको बाउ, आमा मसँग बिहान बेलुका हुनुहुन्छ । मेरो परिवारको बच्चा म-यो, मलाई भन्छन् बच्चाको हत्याारा, हत्यारा, हत्यारा हँ । हामी मान्छे नमार्ने थारुहरु हत्यारा भयौँ । मान्छे मार्नेहरु उनैसँग छन् फेरि । सँगसँगै छन् । उनले मा¥यौँ पनि भन्छन् । बडा पीडा छ दाई । न्याय मरेको देश । अब बिद्रोह गरौँ, केका लागि विद्रोह गर्ने ? कसलाई मार्नलाई विद्रोह गर्ने ?  ’

संस्थापक चौधरीले मानिसहरु अब धेरै टाढिसकेको भन्दै विदेशको नागरिकता लिएर उतै बसेका मानिसहरुसँग आगामी चुनावमा हारिएला भनेर विदेशीहरुको भोट चलाउने प्रपञ्च भइरहेको बताउनु भयो ।

काठमाडौँ । नागरिक उन्मुक्ति पार्टीका संरक्षक रेशम चौधरीलाई पक्राउ गर्न ‘अनधिकृत’ पत्र लेख्ने सर्वोच्च अदालतका शाखा अधिकृत महिमानसिंह विष्टलाई धरौटीमा छाड्न अदालतले आदेश दिएको छ ।

काठमाडौँ जिल्ला अदालतका न्यायाधीश दिनबन्धु बरालले उनलाई १ लाख धरौटीमा छाड्न आदेश गरेका हुन् ।

विष्टले रेशमलाई पक्राउ गरेर डिल्लीबजार कारागार चलान गर्न पत्र लेखेका थिए । त्यसपछि पत्र लिएर उनी आफैं जिल्ला प्रहरी परिसर काठमाडौं पुगेका थिए ।

उनीविरुद्ध प्रहरीले लिखत किर्ते कसुरमा अनुसन्धान गरेर प्रतिवेदन बुझाएको थियो । अनुसन्धान प्रतिवेदनको आधारमा सरकारी वकिलले काठमाडौँ जिल्ला अदालतमा अभियोग पत्र दायर गरेको थियो ।

काठमाडौँ । गृहमन्त्री रमेश लेखकले नागरिक उन्मुक्ति पार्टी (नाउपा)का संरक्षक रेशम चौधरीको पक्राउ प्रकरणमा कुनै पूर्वाग्रह नभएको स्पष्ट पार्नुभएको छ ।

बिहीवारको प्रतिनिधि सभा बैठकमा सांसदहरुले उठाएका प्रश्नहरुको जवाफ दिँदै उहाँले चौधरीको पक्राउबारे स्पष्ट पार्नुभएको हो ।

उहाँले सर्वोच्च अदालतका एक कर्मचारीले विवेक गुमाउँदा यो घटना हुन पुगेको बताउनु भयो । उहाँले यसअघि सर्वोच्च अदालतबाट हुने गरेको पत्राचारलाई प्रहरी प्रशासनले तत्काल कार्यान्वयन गरेझै उक्त घटनामा पनि सही नियतले कानूनको कार्यान्वयन गर्ने मनशायबाहेक कुनै पूवाग्रह नरहेको बताउनु भयो । उहाँले भविष्यमा यस्ता घटना नदोहोरिनेतर्फ सबैलाई सजग र सचेत बनाएको समेत जिकिर गर्नुभयो । साथै, अनधिकृत रुपमा पत्र लेख्ने शाखा अधिकृत महिमानसिंह विष्टमाथि झुटो जानकारी दिन नहुने, आदेशको अवज्ञा गर्न नहुने र कीर्ते गर्न नहुने मुद्दामा अनुसन्धान भइरहेको उहाँले जानकारी गराउनु भयो ।

उहाँले भन्नुभयो, “अनधिकृत रुपमा पत्र लेख्ने सर्वोच्च अदालतका शाखा अधिकृत महिमानसिंह विष्टलाई जिल्ला प्रहरी परिसर काठमाडौंले तत्काल पक्राउ गरी झुटो जानकारी दिन नहुने, आदेशको अवज्ञा गर्न नहुने र कीर्ते गर्न नहुने मुद्दाका शिर्षकहरुमा सम्मानीत अदालतबाट म्यान लिइ अनुसन्धान भइरहेको छ । यसअघि सर्वोच्च अदालतबाट हुने गरेको पत्राचारलाई प्रहरी प्रशासनले तत्काल कार्यान्वयन गरेझैं यो घटनामा पनि सही नियतले कानुनको कार्यान्वयन गर्ने मनसायबाहेक कुनै पूवाग्रह नरहेको सदनमार्फत अनुरोध गर्न चाहन्छु । भविष्यमा यस्ता घटना नदोहोरिनेतर्फ सबैलाई सजग र सचेत बनाएको व्यहोरा म सम्मानीत सदनमा निवदेन गर्न चाहन्छु ।”

उहाँले उक्त घटनाले चौधरी, परिवारमा पर्न गरेको असहजताप्रति क्षमा माग्नुभयो ।

काठमाडौं। नागरिक उन्मुक्ति पार्टीका संरक्षक रेशम चौधरी रिहा भएका छन् छन्।

सर्वोच्च अदालतबाट अनधिकृत पत्रका आधारमा पक्राउ परेका चौधरीलाई सर्वोच्चले अर्को पत्र पठाएपछि डिल्लीबजार कारागारमा रहेका चौधरी रिहा भएका हुन् ।

प्रज्ञा भवनमा नागरिक उन्मुक्ति पार्टी र जनमत पार्टीबीच एकताका लागि कार्यक्रम सुरु हुन लाग्दा चौधरी पक्राउ परेका थिए ।

काठमाडौं– सर्वोच्च अदालतले रेशम चौधरीलाई रिहा गर्न कारागार व्यवस्थापन विभागलाई पत्र पठाएको छ ।

पत्र लेख्ने सर्वोच्चका कर्मचारी महिमानसिंह विष्टलाई प्रहरीको जिम्मा लगाएको छ । बिष्टलाई हिरासतमा राखिएको छ ।

काठमाडौं । नागरिक उन्मुक्ति पार्टीका अध्यक्ष रञ्जिता श्रेष्ठले पक्राउ परेका रेशम चौधरी छिट्टै छुट्ने जानकारी गराउनु भएको छ ।

जनमत पार्टी –नागरिक उन्मुक्ति पार्टी एकताको घोषणा स्थल प्रज्ञा भवनबाटै चौधरी आजै पक्राउ परेका थिए । पक्राउ पछि रञ्जिताले सामाजिक संञ्जालमा लेख्नु भएको छ ‘रेशमजी छिट्टै छुट्दै हुनुहुन्छ। सम्पूर्णमा विश्वस्त रहन आग्रह गर्दछु।’

पक्राउ परेका रेशम चौधरीलाई हाल डिल्लीबजार कारागार राखिएको छ।

सर्वोच्च अदालतको पत्रका कारण पक्राउ परेको भनिएको मा पत्रको आधिकारितकालाई लिएर प्रश्न उठेको छ । पत्रका बारेमा सर्बोच्चमा आन्तरिक छलफल भै रहेको छ ।

काठमाडौं: नागरिक उन्मुक्ति पार्टी (नाउपा) का संरक्षक रेशम चौधरी पक्राउ परेका छन् ।

२०७२ भदौ ७ गते ८ सुरक्षाकर्मी र १ दुधे बालकको ज्यान लिने गरी भएको टीकापुर हत्याकाण्डमा दोषी ठहर भएका चौधरीले न्यूनतम सजाय भुक्तान नगरेकाले अदालतको आदेश अनुसार उनलाई पक्राउ गरेको प्रहरीले जनाएको छ ।

जिल्ला प्रहरी परिसर काठमाडौँका प्रवक्ता अपिलराज बोहराले न्यूजपोलारसंग भन्नुभयो टीकापुर घटनाकै कैद भुक्तान बाँकी रहेकाले अदालतको आदेशअनुसार पक्राउ गरिएको हो ।

चौधरीलाई जिल्लादेखि सर्वोच्च अदालतले जन्मकैद सजाय तोकेको थियो तर, सरकारको सिफारिसमा राष्ट्रपति रामचन्द्र पौडेलले उनलाई गत जेठ १५ गते गणतन्त्र दिवसको अवसर पारेर कैद माफ दिनु भएको थियो ।

माफी दिने राष्ट्रपतिको निर्णयविरुद्ध टीकापुर घटनामा मारिएका इन्सपेक्टर केशव बोहोराकी पत्नी शारदा कडायतले सर्वोच्च अदालतमा रिट दायर गर्नुभएको थियो ।

काठमाडौं । नागरिक उन्मुक्ति पार्टी (नाउपा)का संरक्षक रेशम चौधरी पक्राउ परेपछि जनमत पार्टी र नाउपाको पार्टी एकता घोषणा कार्यक्रम स्थगित भएको छ ।

जनमत पार्टीका अध्यक्ष सिके राउतका अनुसार चौधरीलाई नेपाल प्रहरीले कार्यक्रमस्थलमा नै पक्राऊ गरेर पुरानो फैसला कार्यान्वय गर्नका लागि डिल्ली बजार जेल पठाएको जानकारी गराउनु भएको छ ।

उहाँको सचिवालले सामाजिक संञ्जालमा लेखेको छ –पार्टी एकीकरण प्रज्ञा प्रतिष्ठानमा घोषणा हुन लाग्दै श्री रेशमलाल चौधरीलाई नेपाल प्रहरीले कार्यक्रमस्थलमा नै पक्राऊ गरेर पुरानो फैसला कार्यान्वय गर्नका लागि डिल्ली बजार जेल पठाएको खबर प्राप्त भएको छ। यसको हामी घोर भर्त्सना गर्दछौं। यस कारणले आजको एकीकरण कार्यक्रम स्थगित गरिएको छ र सम्पूर्ण नेता कार्यकर्ताहरूलाई आ(आफ्नो घर जान आग्रह गरिएको छ। बैठक बसेर अर्को सूचना हामी शीघ्र दिनेछौं।

२०७२ भदौमा भएको टीकापुर नरसंहारको आरोपमा चौधरीले जन्मकैदको सजाय पाएका थिए । चौधरीलाई सरकारको सिफारिसमा राष्ट्रपतिले २०८० सालको गणतन्त्र दिवसका दिन आममाफी दिएपछि जेठ १५ मा डिल्लीबजार कारागारबाट रिहा भएका थिए ।

काठमाडौं । नागरिक उन्मुक्ति पार्टीका संरक्षक रेशम चौधरी पक्राउ परेका छन् ।

नागरिक उन्मुक्ति पार्टी र जनमत पार्टीको एकताका लागि आयोजना गरिएको कार्यक्रमस्थलबाट चौधरीलाई सादा पोशाकका प्रहरले पक्राउ गरेका हुन् । रेशम पक्राउपछि एकता घोषणा कार्यक्रम अन्यौलमा परेको छ ।

काठमाडौं । नागरिक  उन्मुक्ति पार्टीका अध्यक्ष रन्जिता चौधरी श्रेष्ठको मटुमा समस्या भएको छ । श्रेष्ठकाे गंगालाल अस्पतालमा आज  शल्यक्रिया हुदैछ ।

रन्जितालाई  शल्यक्रियाका लागि शल्यक्रियाकक्षमा लगेपछि उनका श्रीमान तथा पार्टीका नेता रेशम चौधरीले भाबुक स्टाटस लेखेका छन् ।

उनले लेखेका छन् -भकारी रित्तिएपछि मुसाले त घर छोडेर जान्छन् आमा ! तिमी आफन्तको कुरा गर्‍छौ । संजोग आज यस्तै भयो  -तिम्रो मुटु अपरेसन कक्ष बाहिर हामी आफन्त सिवाय कोहि छैनन् ।

नेता रेशम चौधरीले लेखेका छन्-

हाम्रो नागरिक उन्मुक्ति पार्टीको संस्थापक अध्यक्ष तथा मेरो श्रीमती रन्जिता श्रेष्ठ चौधरीलाई मुटु अपरेसन कक्षमा लगिएको छ । उहाँको सिघ्र स्वास्थ लाभको कामना । अपरेसन सफल होस् ।

अस्ति तिम्रो स्टाटस आएको थियो,भकारी रित्तिएपछि मुसाले त घर छोडेर जान्छन् आमा ! तिमी आफन्तको कुरा गर्‍छौ । संजोग आज यस्तै भयो – तिम्रो मुटु अपरेसन कक्ष बाहिर हामी आफन्त सिवाय कोहि छैनन् ।

काठमाडौं । नागरिक उन्मुक्ति पार्टीका सल्लाहकार रेशम चौधरीले पार्टी अध्यक्ष रञ्जिता श्रेष्ठप्रति गुनासै गुनासा गरेका छन् ।

प्राइम टाइम्स टेलिभिजिनको कार्यक्रम जनता जान्न चाहन्छन् कार्यक्रममा नागरिक उन्मुक्ति पार्टीका सल्लाहकार रेशमले रञ्जिताको पार्टी सञ्चालन विधिप्रति असन्तुष्टि जनाएका हुन् । उनले भनेका छन्– ‘मैले नै राजनीतिमा डोहोर्‍याएर ल्याएको मान्छेले अहिले मलाई नै अप्ठ्रायो पार्ने काम भयो’, उनले अगाडि भनेका छन्– ‘रञ्जिताले पार्टी सञ्चालन गर्न जानिनन् ।’

नागरिक उन्मुक्ति पार्टीको जात, लिंग र वर्ण रञ्जितालाई थाहै नभएको दाबी उनले गरेका छन् । उनले सत्ता लिप्साको दलदलले रञ्जितालाई डुवाउन सक्ने भविष्यवाणिसमेत गरेका छन् ।

रेशमले आफ्नो अन्तरवार्तामा नयाँ राजनीतिक दल गठनको समेत संकेत गरेका छन् । निर्वाचन आयोगप्रति गुनासै गुसाना गरेका उनले एउटा बच्चा जन्माउने आमाले अर्को बच्चा जन्माउन सक्छ भन्दै उनले नयाँ राजनीतिक दलसमेत गठन गर्न सक्ने संकेत गरेका हुन् ।

सुदूरपश्चिम प्रदेश सरकार संविधान विपरितको रहेको तर्क उनको छ । उनले ३० जनाको विश्वासको मत लिएर प्रदेश प्रमुखसमक्ष पुगेका लक्ष्मण चौधरीलाई सत्ता बाहिर राखेर २४ जनाको समर्थन लिएर गएका दीर्घबहादुर सोडारीलाई मुख्यमन्त्री बनाइएको आपत्ति जनाएका हुन् ।

काठमाडौँ । नागरिक उन्मुक्ति पार्टीका नेता रेशम चौधरीले टिकापुर घटनामा जबरजस्ती दोषी बनाइएका थारुहरुलाई उचित क्षतिपूर्तिसहित राज्यले माफी माग्नुपर्ने बताउनुभएको छ ।

बुधवार काठमाडौंमा नेपाल समाजवादी पार्टीको स्थापना दिवस महाधिवेशनलाई सम्बोधन गर्दै उहाँले यस्तो बताउनुभएको हो । उहाँले घाइतेलाई रिक्सामा हालेर अस्पताल पुर्‍याउनु अपराध हो ? भन्दै प्रश्न गर्नुभयो । उहाँले टिकापुर घटना गराउनेको नाम सार्वजनिक गर्ने बेला भइसकेको बताउनु भयो । उहाँले कसले घटना गरायो भन्नेकुरा लाल आयोगलाई सोध्न आग्रह गर्नुभयो । उहाँले साढे १० हजार जनप्रतिनिधि र १ लाख ३९ हजार थारुहरु जम्मा भएको नागरिक उन्मुक्तिको महाधिवेशनलाई निर्वाचन आयोगले अवैध ठहर गर्नु दु:खको कुरा भएको बताउनु भयो ।

उहाँले भन्नुभयो, ‘सबैभन्दा पहिला टिकापुर घटनामा जबरजस्ती दोषी बनाइएका थारुहरुलाई उचित क्षतिपूर्तिसहित राज्यले माफी माग्ने बन्दोबस्त मिलाउनुपर्छ । हाम्रो के अपराध थियो । जसले घाइतेलाई रिक्सामा हालेर अस्पताल पुर्‍यायो त्यो साढे ८ वर्ष जेल बस्नुपर्ने ? घाइतेलाई उठाएर उपभार गर्नेले आठ वर्षसम्म जेलको कालकोठीमा सड्नुपर्ने ? अब जाक्नेवालाको खोजिनीति गर्नुस् । घटना कसले गरायो हामीलाई नसोध्नुस् । लाल आयोगलाई सोध्नुस् । मान्छेको नाम भन्नुपर्छ भने हामी भनिदिन्छौँ । टिकापुरको अब नाम भन्ने बेला आएको छ । साढे १० हजार जनप्रतिनिधि र १ लाख ३९ हजार थारुहरु जम्मा भएको नागरिक उन्मुक्तिको महाधिवेशनलाई निर्वाचन आयोगले अवैध भनिदिने ? महाधिवेशन नै नगर्ने पार्टीहरु वैध, पुसको कठ्याङ्ग्रिने जाडोमा जनताहरु आएर गरेको महाधिवेशन अवैध ?’

उहाँले अहिलेको शासन पद्धतिबाट आफूहरु आजित भएको बताउनु भयो ।

काठमाडौं ।  नागरिक उन्मुक्ति पार्टीका संरक्षक रेशम चौधरीले अध्यक्ष रञ्जिता श्रेष्ठविरुद्ध दायर मुद्दाको आज सुनुवाइ हुँदैछ ।

न्यायाधीशद्वय आनन्दमोहन भट्टराई र विनोद शर्माको इजलासमा उक्त मुद्दाको पेशी तोकिएको छ ।

टीकापुरमा सम्पन्न पहिलो महाधिवेशनबाट अध्यक्षमा निर्वाचित भएका रेशम चौधरीलाई निर्वाचन आयोगले अद्यावधिक गर्न अस्वीकार गरेको थियो ।

निर्वाचन आयोगले अध्यक्षमा रञ्जिता श्रेष्ठलाई नै सदर गरेपछि रेशम चौधरी निर्वाचन आयोग र रन्जितालाई विपक्ष बनाएर उत्प्रेषणको आदेश जारी गरिपाऊ भने रिट दायर गरेका थिए ।