काठमाडाैँ । भारत भ्रमणमा रहनुभएका राष्ट्रिय स्वतन्त्र पार्टी (रास्वपा) का सभापति रवि लामिछाने र भारतीय विदेशमन्त्री एस जयशङ्करबीच भेटवार्ता भएको छ ।

उहाँहरूबीच भएको छलफल भारत–नेपाल विकास साझेदारी तथा जनस्तरका सम्बन्धहरूमा केन्द्रित रहेको र यी सम्बन्धहरूले विकास र समृद्धिलाई प्रवर्द्धन गर्न महत्त्वपूर्ण भूमिका खेल्ने बताइएको छ ।

नयाँ दिल्लीमा आज रास्वपाका सभापति लामिछाने तथा उहाँको प्रतिनिधिमण्डलसँग भेट्न पाउँदा खुसी लागेको भारतका विदेशमन्त्री जयशङ्करले सामाजिक सञ्जालमार्र्फत उल्लेख गर्नुभएको छ ।

सभापति लामिछाने नेतृत्वको प्रतिनिधिमण्डल भाजपाको निमन्त्रणामा पाँच दिने भारत भ्रमणका लागि सोमबार नयाँ दिल्ली प्रस्थान गरेको हो । सभापति लामिछाने नेतृत्वको प्रतिनिधिमण्डलमा उहाँकी धर्मपत्नी निकिता पौडेल, रास्वापाका सहमहामन्त्री तथा प्रतिनिधिसभा सदस्य विपीनकुमार आचार्य, रास्वाका सचिवालय सदस्य तथा प्रतिनिधिसभा सदस्य दीपक बोहरा र स्वकीय सचिव प्रदीप आचार्य हुनुहुन्छ ।

काठमाडाैँ । सत्तारुढ राष्ट्रिय स्वतन्त्र पार्टी (रास्वपा) ले नेपालको पनि भारतको धेरै ठाउँ मिचेको छ भनि  दिएको अभिव्यक्तिले नेपाललाई अझ बलियो बनाएको टिप्पणी गरेको छ ।

मंगलबार संघीय संसद परिसरमा सञ्चारकर्मीहरुले राखेका जिज्ञासाको जवाफ दिने क्रममा उक्त पार्टीका महामन्त्री कविन्द्र बुर्लाकोटीले यस्तो प्रतिक्रिया दिएका हुन् । उनले नेपालको दशगजा क्षेत्रमा दुवै तर्फबाट भूउपयोगहरु भएको कुरा आएको भन्दै त्यसले सीमा सम्बन्धि विषयलाई छलफलका लागि अघि बढाउन बलियो बनाएको तर्क गरे ।

महामन्त्री बुर्लाकोटीले रास्वपाले मिचिएको नेपाली भूमि फिर्ता हुनुपर्छ भन्ने अडानमा स्पष्ट रहेको पनि बताए । उनले प्रधानमन्त्री साहले उक्त विषयमा समय आएपछि जवाफ दिने बताउँदै विपक्ष दलहरुले संसद बैठक अवरुद्ध पार्न नहुने पनि बताए ।

उनले भने, “अहिलेको जुन रिर्पोटहरु छ सामान्यतयाः । अब यो दशगजा क्षेत्रमा दुवै तर्फबाट भूउपयोगहरु भएको छ । त्यसलाई सीमा मिचेको भन्ने नभन्ने शब्द कस्तो प्रयोग गर्ने भन्ने एउटा पाटो रह्यो । र यो चाहीँ अन्तर्राष्ट्रिय हिसावमा पनि छलफल गरेर जानुपर्दछ भन्ने जुन प्रधानमन्त्रीज्युले राख्नुभएको छ । त्यसले हामीलाई अझ बलियो बनाएर अगाडि बढाएको छ । कि हाम्रो सीमाको समाधान अलि छिटो गर्नुपर्छ । कुटनीतिक तवरबाट पहल गर्नुपर्छ भन्ने छ । यो विषयमा पक्का पनि सरकारको तर्फबाट त आई नै हाल्छ । अव अर्कोलाई यो रिवर्स कूटनीति पनि हो । अर्कोतर्फ पार्टीले त यस अगाडि नै हामीले हाम्रो भूमि मिचिएको सन्दर्भमा त्यो भूमिहरु फिर्ता हुनुपर्दछ । र, भूमि फिर्ता लिनका लागि कूटनीतिक पहल गर्नुपर्छ भनेर स्पष्ट धारणा राखिसकेको छ । त्यो कारणले गर्दा पार्टीको धारणा स्पष्ट नै छ । र, यो विषय थप छलफलहरु अगाडि बढछ । यो तत्ठाउँहरुमा नै छलफल भएर अगाडि बढला । यो विषयमा मैले थप धारणा राख्नु भन्दा पनि पार्टीको धारणा स्पष्ट छ । हाम्रो भूमिहरु मिचिन दिनु हुँदैन । ती भूमिहरु फिर्ता ल्याउनका लागि कूटनीतिक पहलहरु गर्नुपर्छ भन्ने पार्टीको धारणा स्पष्ट छ । यही विषयमा हामी छलफल गरिराखेका छौ । प्रतिपक्ष दलहरुसँग हामीले यो विषयमा पनि छलफल गरिराखेका छौ । यो सदन सुचारु गरौ । त्यो विषयमा तत्अवस्थामा सरकारको तर्फबाट त्यसको कुराहरु आईनै हाल्छ भनेर हामीले यसरी राख्यौ । उहाँहरु यो विषय आएपछि मात्रै सदन अगाडि जान्छ भन्नु हुन्छ । त्यो उहाँहरुले राख्ने कुरा चाँही कस्तो छ भने त्यो आउँछ भनेपछि त्यसलाई अगाडि पनि बढाउनु प¥यो नि ।”

महामन्त्री बुर्लाकोटीले बजेट पारित गर्न ढिलाई हुने भएकाले पनि विपक्ष दलहरुले संसद बैठक अवरुद्ध पार्न नहुने पनि बताए ।

काठमाडौं । राष्ट्रिय स्वतन्त्र पार्टीले आफ्नो ऐतिहासिक प्रथम राष्ट्रिय महाधिवेशनलाई व्यवस्थित, प्रभावकारी र सफल बनाउन मूल आयोजक समिति अन्तर्गत विभिन्न १८ वटा उपसमिति प्रस्ताव गरेको छ।

प्रस्तावित उपसमितिहरूमा कार्यक्रम सञ्चालन एवं व्यवस्थापन, गुनासो व्यवस्थापन, प्रतिवेदन तथा प्रस्ताव मस्यौदा, आर्थिक व्यवस्थापन, महाधिवेशन प्रतिनिधि व्यवस्थापन, कानुनी समन्वय, प्रचार–प्रसार तथा सञ्चार समन्वय, सुरक्षा तथा स्वयंसेवक परिचालन तथा सूचना प्रविधि उपसमिति रहेका छन्।

यस्तै, आवास तथा भोजन व्यवस्थापन, अतिथि सत्कार, हल तथा मञ्च व्यवस्थापन, स्वास्थ्य सेवा, सांस्कृतिक कार्यक्रम, यातायात व्यवस्थापन, स्थानीय समन्वय सहकार्य, अभिलेखीकरण तथा दस्तावेजीकरण तथा अनुशासन उपसमिति समेत प्रस्ताव गरिएको छ।

पार्टीले महाधिवेशनको तयारीलाई व्यवस्थित र प्रभावकारी बनाउन विभिन्न जिम्मेवारी विभाजनसहित उपसमितिहरू गठनको तयारी गरेको जनाएको छ।

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछाने को आह्वानमा पार्टी सचिवालयको बैठक भर्चुअल रूपमा बस्ने भएको छ।

महामन्त्री कविन्द्र बुर्लाकोटीले जारी गरेको सूचनाअनुसार बैठक २०८३ साल जेठ १७ गते बेलुकी ८:०० बजे जुममार्फत भर्चुअल रूपमा आयोजना गरिनेछ।

बैठकको मुख्य कार्यसूचीमा समसामयिक राजनीतिक अवस्था र पार्टी गतिविधिबारे छलफल गर्ने, विभिन्न आयोग तथा विभागहरूको मनोनयन, अनुशासनात्मक कारबाहीसम्बन्धी विषयहरू, तथा महाधिवेशन तयारीसँग सम्बन्धित विभिन्न कार्यविधि र संरचनात्मक विषयहरू रहेका छन्।

त्यसैगरी प्रदेश अधिवेशन कार्यविधि, महाधिवेशन मूल आयोजक समिति अन्तर्गतका उपसमितिहरू, निर्वाचन कार्यविधि, तथा पार्टी विधान संशोधनसम्बन्धी विषयहरूमा पनि छलफल हुने जनाइएको छ।

यसैगरी संघीय सांसदहरूको पार्टी जिम्मेवारी निर्धारण, जिल्ला अधिवेशन कार्यविधि संशोधन तथा प्रदेश, जिल्ला र पालिका तहका अधिवेशनमा प्रतिनिधित्वसम्बन्धी प्रावधानबारे समेत छलफल हुने कार्यसूचीमा उल्लेख छ।

विभिन्न तहका अधिवेशनमा २५ प्रतिशतभन्दा बढी मत प्राप्त गर्ने उम्मेदवार एक तहमाथिको अधिवेशनमा प्रतिनिधि हुने व्यवस्था तथा उम्मेदवार नभई पनि एक तह माथिको अधिवेशनमा प्रतिनिधि हुने सम्बन्धी प्रस्ताव पनि बैठकमा छलफल हुने जनाइएको छ।

काठमाडाैँ । सत्तारुढ राष्ट्रिय स्वतन्त्र पार्टी (रास्वपा)ले प्रधानमन्त्रीको अनुपस्थितिमा पनि सरकारको नीति तथा कार्यक्रम छलफल हुनुपर्ने जिकिर गरेको छ ।

विपक्ष दलले प्रधानमन्त्री बालेन्द्र साहको अनिवार्य उपस्थितिको माग गर्दै संसद बैठक अवरुद्ध पारिरहँदा सत्तारुढ रास्वपाका प्रमुख सचेतक कविन्द्र बुर्लाकोटीले सो कुरा बताउनुभएको हो ।

उहाँले प्रधानमन्त्रीको सो प्रश्ताव मन्त्रीले प्रश्ताव गर्दा हुने तर सो विषय प्रधानमन्त्रीको उपस्थिति विना छलफल हुँदैन भन्नेकुरा हुनै नसक्ने बताउनु भयो । उहाँले संसदीय नियमावलीमा प्रधानमन्त्रीको उपस्थिति विना सो विषयमा छलफल गर्ननमिल्ने भन्नेकुरा नभएकोतर्फ पनि विपक्ष दलहरुको ध्यानाकर्षण गराउनु भयो ।

उहाँले भन्नुभयो,‘यो कुनै नियममा पनि प्रधानमन्त्री स्वयं यो छलफलमा आउनुपर्ने व्यवस्था छैन ।र प्रधानमन्त्रीले मन्त्रीलाई तोक्न सक्ने व्यवस्था छ भनेर हामी सहमती गरेर यो दोस्रो बैठकमा आयौ । त्यसो भएपछि कि त प्रधानमन्त्रीको अनुहार नै हेर्नेहो भन्ने हुनु प¥यो । अन्यथा टेबुलगरिसकेको कुरा छलफलमा जानुपर्छ, टेबुल गर्न दिने तर छलफलमा नजाने भन्नेकुरा हुँदैन । कुनैपनि नियमा यस्तो छैन । यो त भएन ।’

प्रमुख सचेतक बुर्लाकोटीले विपक्ष दलहरुले प्रधानमन्त्रीको अनुहार हेर्न चाहे जसरी कुरा गरेको भन्दै कटाक्ष पनि गर्नुभयो ।

काठमाडाैँ । राष्ट्रिय स्वतन्त्र पार्टी (रास्वपा) को केन्द्रीय कार्यसमितिको बैठकले पार्टीको प्रथम महाधिवेशन आगामी असार ६, ७ र ८ गते चितवनमा गर्ने निर्णय गरेको छ।

बैठकले संगठनात्मक विस्तार, नीति–कार्यक्रमको सुदृढीकरण तथा आगामी राजनीतिक रणनीतिसम्बन्धी तयारीलाई समेत प्राथमिकतामा राख्दै महाधिवेशनको मिति र स्थान तय गरेको हो।

चितवनमा हुने उक्त महाधिवेशनलाई पार्टीको ऐतिहासिक पहिलो महाधिवेशनका रूपमा लिइएको छ। महाधिवेशनमार्फत पार्टी नेतृत्व, नीति तथा आगामी कार्यदिशाबारे महत्वपूर्ण निर्णय हुने अपेक्षा गरिएको छ।

पार्टीका नेताहरूका अनुसार महाधिवेशनको तयारीलाई व्यवस्थित बनाउन विभिन्न उपसमितिहरू गठन गर्ने प्रक्रिया पनि अघि बढाइएको छ।

]]> https://newspolar.com/archives/433789/feed 0 https://newspolar.com/archives/431454 https://newspolar.com/archives/431454#respond Wed, 06 May 2026 04:42:22 +0000 https://newspolar.com/?p=431454 काठमाडौं । राष्ट्रिय स्वतन्त्र पार्टी (रास्वपा) ले मन्त्री र सांसदबीच नीति तथा कार्यक्रमबारे समन्वय बढाउने उद्देश्यसहित ‘पूर्व बजेट छलफल’ कार्यक्रम आयोजना गर्ने भएको छ। पार्टीका अनुसार आगामी आर्थिक वर्ष २०८३/०८४ को बजेट तर्जुमा अघि सुझाव संकलन र प्राथमिकता निर्धारण गर्न उक्त छलफल आयोजना गरिएको हो। छलफलमा अर्थमन्त्री स्वर्णिम वाग्ले र भौतिक पूर्वाधार मन्त्री सुनिल लम्साल […]]]>

काठमाडौं । राष्ट्रिय स्वतन्त्र पार्टी (रास्वपा) ले मन्त्री र सांसदबीच नीति तथा कार्यक्रमबारे समन्वय बढाउने उद्देश्यसहित ‘पूर्व बजेट छलफल’ कार्यक्रम आयोजना गर्ने भएको छ।

पार्टीका अनुसार आगामी आर्थिक वर्ष २०८३/०८४ को बजेट तर्जुमा अघि सुझाव संकलन र प्राथमिकता निर्धारण गर्न उक्त छलफल आयोजना गरिएको हो। छलफलमा अर्थमन्त्री स्वर्णिम वाग्ले र भौतिक पूर्वाधार मन्त्री सुनिल लम्साल को सहभागिता रहने जनाइएको छ।

उक्त कार्यक्रम आज (बुधवार) दिउँसो ४ बजे सिंहदरबारस्थित रास्वपा संसदीय दलको कार्यालयमा हुने तय गरिएको छ।

कार्यक्रममार्फत बजेट निर्माण प्रक्रियामा सांसदहरूको धारणा समेट्दै प्रभावकारी नीति निर्माणमा योगदान पुग्ने अपेक्षा गरिएको पार्टीले जनाएको छ।

काठमाडौं। राष्ट्रिय स्वतन्त्र पार्टी (रास्वपा) ले पार्टीभित्र जिम्मेवारी हेरफेर गर्दै दुई नेतालाई नयाँ जिम्मेवारी दिएको छ।

पार्टीको सचिवालय बैठकले नवप्रवर्तन विभाग प्रमुख भुवन केसी र प्रचारप्रसार विभागका सदस्य आनन्द कुमार मिश्रलाई केन्द्रीय निर्वाचन आयोगको सदस्यको जिम्मेवारी दिने निर्णय गरेको हो।

रास्वपाका अनुसार पार्टी संरचना सुदृढ गर्दै आन्तरिक व्यवस्थापनलाई प्रभावकारी बनाउन जिम्मेवारी हेरफेर गरिएको हो। नयाँ जिम्मेवारीसँगै दुवै नेताले पार्टीको निर्वाचनसम्बन्धी गतिविधिलाई थप व्यवस्थित र सुदृढ बनाउने अपेक्षा गरिएको छ।

काठमाडौं । राष्ट्रिय स्वतन्त्र पार्टी (रास्वपा) ले मुलुकभर विद्यमान अव्यवस्थित बसोबासको समस्या समाधानका लागि सरकारले गठन गर्न लागेको अधिकार सम्पन्न प्राधिकरणलाई प्रभावकारी रूपमा अघि बढाउनुपर्नेमा जोड दिएको छ ।

पार्टी सचिवालयको आज बसेको बैठकले अव्यवस्थित बसोबास, भूमिहीन तथा सुकुम्बासीको समस्या समाधानलाई प्राथमिकतामा राख्दै वास्तविक भूमिहीन नागरिकको हकमा मात्र समाधान केन्द्रित गर्नुपर्ने निष्कर्ष निकालेको हो ।

बैठकले असुरक्षित रूपमा बसोबास गर्दै आएका नागरिकको सुरक्षालाई प्राथमिकतामा राख्दै अन्य अवस्थामा भने प्राधिकरणको प्रतिवेदन नआएसम्म कुनै पनि प्रकारको कारबाही अघि नबढाउन सरकारलाई सुझाव दिने निर्णय गरेको छ ।

त्यसैगरी, स्थानीय तहहरूले आफ्ना क्षेत्राधिकार प्रयोग गरी संरचना भत्काउने कार्य भइरहेको सन्दर्भलाई ध्यानमा राख्दै रास्वपाले त्यस्ता गतिविधि रोक्न र व्यवस्थापनमा एकरूपता कायम गर्न स्थानीय सरकारलाई अनुरोध गर्ने निर्णय पनि गरेको छ ।

बैठकले आगामी स्थानीय तह निर्वाचनका लागि उम्मेदवार छनोट प्रक्रिया व्यवस्थित गर्न “स्थानीय निर्वाचन उम्मेदवार छनोट रूपरेखा–२०८३” पारित गरेको छ । उक्त रूपरेखा प्रभावकारी रूपमा कार्यान्वयन गर्न सहमहामन्त्री विपिनकुमार आचार्यको संयोजकत्वमा “उम्मेदवार छनोट रूपरेखा कार्यान्वयन तथा समन्वय समिति” गठन गरिएको पार्टीले जनाएको छ ।

त्यसैगरी, पार्टीको संसदीय दलको संशोधित विधान अनुमोदन गर्नुका साथै प्रथम महाधिवेशन सम्पन्न गर्न “महाधिवेशन कार्यविधि–२०८३” पनि पारित गरिएको छ ।
बैठकले बागमती प्रदेश समितिको सिफारिसअनुसार रसुवा जिल्ला समिति विघटन गरी नयाँ प्रक्रियाबाट पुनः समिति गठन गर्ने निर्णयसमेत गरेको छ ।

प्रवक्ता मनिष झाका अनुसार बैठकका सबै निर्णयहरू पार्टी संगठनलाई सुदृढ बनाउने र आगामी राजनीतिक तथा निर्वाचन तयारीलाई व्यवस्थित गर्ने उद्देश्यले गरिएको हो ।

काठमाडौँ। राष्ट्रिय स्वतन्त्र पार्टी (रास्वपा)को सचिवालय बैठक आज पार्टी केन्द्रीय कार्यालय वनस्थलीमा सुरु भएको छ।

बैठकको प्रमुख एजेन्डामा स्थानीय तहका उम्मेदवार छनोटको रुपरेखा २०८३, पार्टीको महाधिवेशन कार्यविधि २०८३, तथा संसदीय दलको विधान संशोधनलगायतका महत्वपूर्ण विषयहरू रहेका छन्। यी विषयहरूलाई व्यवस्थित रूपमा अघि बढाउने उद्देश्यसहित सचिवालय स्तरमा प्रारम्भिक छलफल हुने जनाइएकाे छ ।

पार्टीका अनुसार आगामी निर्वाचन तथा संगठन सुदृढीकरणलाई केन्द्रमा राखेर नीति तथा संरचनागत सुधारका विषयमा समेत गहन छलफल हुने अपेक्षा गरिएको छ।

काठमाडौं । राष्ट्रिय स्वतन्त्र पार्टी (रास्वपा) ले यही वैशाख १७ गते रुकुम पूर्वबाट रोल्पा जिल्लाको थवाङ गाउँपालिका–जलजलातर्फ जाँदै गरेको जीप दुर्घटनामा परी ज्यान गुमाउनु भएकाप्रति दुःख व्यक्त गर्दै श्रद्धाञ्जली अर्पण गरेको छ ।

प्रवक्ता मनिष झाले आज शोक विज्ञप्तिमार्फत धेरै मानवीय क्षति भएको यो पीडादायी घटनाले स्तब्ध र मर्माहत बनाएको उल्लेख गर्नुभएको छ ।

साथै उहाँले यस असह्य क्षणमा शोकसन्तप्त परिवारजनप्रति समवेदना व्यक्त गर्दै, घाइतेको शीघ्र स्वास्थ्यलाभको कामना गर्नुभएको छ । प्राप्त विवरणअनुसार लु१ज ४१६७ नम्बरको जीप रोल्पा जिल्लाको थवाङ गाउँपालिका–१ को भिरालो क्षेत्रमा दुर्घटनामा परेको हो । करिब ७००–८०० मिटर गहिरो भिरमा खसेको उक्त दुर्घटनाले अपूरणीय क्षति पु¥याएको छ ।

“विकट भौगोलिक अवस्था र चुनौतीपूर्ण परिस्थितिका बाबजुद सुरक्षा निकाय तथा उद्धार टोलीहरूले देखाएको साहस, समर्पण र मानवीयताको हामी उच्च सम्मान गर्दछौँ”, विज्ञप्तिमा उल्लेख छ ।

रास्वपाले यस दुःखद् घटनाले फेरि एकपटक सडक सुरक्षाको अवस्थाबारे गम्भीर प्रश्न उठाएको उल्लेख गर्दै यस्ता दुर्घटनाहरू तथ्याङ्क मात्रै होइनन् यी नागरिकको जीवनसँग जोडिएका संवेदनशील वास्तविकता हुन् भन्नेमा सचेत रहेको जनाएको छ ।

रास्वपाले आगामी दिनमा यस्ता दुःखद् घटनाको पुनरावृत्ति हुन नदिन सवारीसाधन दुर्घटना न्यूनीकरणका लागि नीतिगत सुधार, सडक अनुशासनको कडा कार्यान्वयन तथा आवश्यक पूर्वाधार विकासमा दृढताका साथ अघि बढ्ने प्रतिबद्धता व्यक्त गरेको छ ।

काठमाडौं । राष्ट्रिय स्वतन्त्र पार्टी (रास्वपा) को संसदिय दलको अनौपचारिक बैठकमा सभापति रबि लामिछानेले सांसदहरूको भूमिकादेखि सरकारको कार्यशैली, सेवा प्रवाह, सुशासन र समसामयिक नीतिगत विषयमा विस्तृत सुझाव तथा निर्देशन दिएका छन्।

बैठकमा सांसद र मन्त्रीबीच नियमित अन्तरक्रिया आवश्यक रहेको उल्लेख गर्दै मन्त्रालयगत सचिवको समेत सहभागितामा निश्चित समय अन्तरालमा छलफल गर्ने व्यवस्था मिलाइने जानकारी दिए। सार्वजनिक सेवा र सत्ता सञ्चालनको संस्कार परिवर्तन गर्नु अहिलेको प्रमुख प्राथमिकता रहेको बताउँदै पुराना शैलीभन्दा फरक अभ्यास आवश्यक भएको धारणा राखे ।

सभापति लामिछानेले पार्टीलाई “सेवक र सहजकर्ता” को रूपमा चित्रण गर्दै व्यक्तिगत स्वार्थ वा शक्ति प्रदर्शन गर्ने प्रवृत्तिलाई स्वीकार्य नहुने स्पष्ट पारे। सरकारको गुनासो व्यवस्थापन प्रणालीलाई अझ प्रभावकारी बनाउन तथा हेलो सरकारमार्फत आएका उजुरीहरूको प्रगति ट्र्याक गर्न सकिने प्रणाली विकास भइरहेको जानकारी पनि दिए ।

सांसदहरूको भूमिकाबारे बोल्दै उनले सबै तहसँग समन्वय गर्नुपर्ने भए पनि मूल दायित्व कानुन निर्माण नै रहेको र त्यस क्रममा सांसद आफैं कानून बन्ने प्रवृत्तिबाट टाढा रहनुपर्नेमा जोड दिए।

समाजमा देखिएको विभेद र अन्तर्जातीय विवाहसँग सम्बन्धित घटनालाई संवेदनशील रूपमा सम्बोधन गर्न आवश्यक रहेको उल्लेख गर्दै, घटनास्थलमा भावनात्मक प्रतिक्रियाभन्दा जिम्मेवार र मर्यादित व्यवहार अपनाउन सांसदहरूलाई निर्देशन दिइएको छ।

बैठकमा खाडी क्षेत्रको द्वन्द्वका कारण बजार मूल्यमा परेको असरबारे सरकार जानकार रहेको र त्यसको व्यवस्थापनमा गम्भीरतापूर्वक काम भइरहेको पनि उल्लेख गरियो।

संगठन निर्माणलाई सुदृढ बनाउन सबै तहका सदस्यहरूलाई जिम्मेवारीपूर्वक सक्रिय हुन आग्रह गरिएको छ। साथै, जोखिमपूर्ण क्षेत्रमा बसोबास गरिरहेका सुकुम्बासीहरूको व्यवस्थापनका लागि सूचना दिएर सुरक्षित स्थानमा स्थानान्तरण भइरहेको, र देशभरका यस्ता समस्या समाधान गर्न विशेष आयोग गठनको तयारी भइरहेको जानकारी दिइयो।

सभापति लामिछानेले सुकुम्बासीलाई घरबारविहीन बनाउने सरकारको कुनै योजना नभएको स्पष्ट पार्दै उनीहरूको गास, बास, कपास र रोजगारीको सुनिश्चिततामा सरकार जिम्मेवार रहने बताए। तर, यस्ता विषयलाई राजनीतिकरण गर्ने प्रवृत्तिप्रति सचेत रहन पनि आग्रह गरिएको छ।

अध्यादेशका विषयमा बोल्दै विगतमा भएका दलगत हस्तक्षेप र गलत नियुक्तिहरू सच्याउनुपर्ने आवश्यकता औंल्याइयो। हालका अध्यादेशहरू कसैलाई क्षति पुर्‍याउने वा फाइदा दिने उद्देश्यले नभई आवश्यक सुधारका लागि ल्याइएका र कानुनी प्रक्रियाअनुसार अघि बढाइएका बताइयो।

संवैधानिक आयोग तथा निकायहरूमा रिक्त पदहरू लामो समयदेखि खाली रहँदा कामकाज प्रभावित भएको उल्लेख गर्दै तत्काल निर्णय क्षमतामा सुधार आवश्यक रहेको धारणा राखियो। जनअपेक्षाअनुसार काम गर्न केही सक्रिय र व्यावहारिक राजनीतिक दृष्टिकोण आवश्यक रहेको पनि बताइयो।

बैठकमा नियमित छलफल जारी रहने जनाउँदै सांसदहरूलाई आफ्ना समस्या तथा सुझाव लिखित रूपमा राख्न र आवश्यक परे नेतृत्वसँग प्रत्यक्ष समन्वय गर्न सकिने जानकारी दिइयो।
समग्रमा बैठकले पार्टी संगठन, सरकारको कार्यशैली, नीति निर्माण र सामाजिक संवेदनशीलतासम्बन्धी विविध विषयमा स्पष्ट मार्गदर्शन दिएको छ।

काठमाडौं । राष्ट्रिय स्वतन्त्र पार्टी (रास्वपा) को संसदीय दलको अनौपचारिक बैठक जारी रहेको छ।

बैठकमा हालसम्म भएका छलफलका विषयहरूबारे पार्टीभित्र आन्तरिक अनुशासन, संगठनात्मक एकरूपता र आगामी निर्वाचनको तयारीलाई केन्द्रमा राखेर निर्देशनहरू जारी गरिएको छ।

प्रवक्ता मनिष झाका अनुसार सांसदहरूलाई आफ्नो लेटरहेड, परिचयपत्र तथा अन्य आधिकारिक कागजातमा एकरूपता अपनाउन स्पष्ट निर्देशन दिइएको छ। साथै, कुनै पनि आधिकारिक कागजातमा माननीय भन्ने सम्बोधन प्रयोग नगर्न समेत निर्देशन गरिएको छ।

त्यस्तै, पार्टीले आन्तरिक सिकाइ र क्षमता विकासलाई प्राथमिकता दिँदै सांसदहरूलाई मेन्टर तथा सल्लाहकारहरूसँगको अभ्यासलाई निरन्तरता दिन आग्रह गरेको छ। सकेसम्म धेरै सुझाव र मार्गदर्शन लिनुपर्नेमा जोड दिइएको बैठकमा सहभागीहरूले बताएका छन्।

आगामी निर्वाचनलाई लक्षित गर्दै वैशाख २० गतेदेखि ‘क्यान्डिडेट क्लब’ कार्यक्रम सञ्चालन गर्ने तयारी गरिएको छ। उक्त कार्यक्रममार्फत सम्भावित उम्मेदवारहरूको छनोट प्रक्रिया र निर्वाचन पूर्व प्रशिक्षण सञ्चालन गरिनेछ।

बैठकमा कुनै पनि नेताले आगामी निर्वाचनका लागि टिकट वा उम्मेदवारी सम्बन्धी व्यक्तिगत प्रतिबद्धता व्यक्त नगर्न कडा निर्देशन दिइएको छ। यदि यस्तो अभ्यास कहीँ भेटिएमा अनुशासनात्मक कारबाही हुने चेतावनीसमेत दिइएको छ।

पार्टी नेतृत्वले संगठनलाई संस्थागत, अनुशासित र प्रक्रियामुखी बनाउन यस्ता अभ्यासहरूलाई महत्व दिएको बताइएको छ।

काठमाडौं । राष्ट्रिय स्वतन्त्र पार्टी (रास्वापा)ले प्रत्यक्ष निर्वाचनमा आफूले विजय प्राप्त गर्न नसकेका निर्वाचन क्षेत्रहरूका लागि समानुपातिक सांसदको सूचीबाट जिम्मेवारी तोकेको छ ।

रास्वपाले त्यसका लागि कोशी प्रदेशमा ११ जना, मधेस प्रदेशमा दुई, बागमतीमा दुई, गण्डकीमा तीन, लम्बिनी प्रदेशमा पाँच, कर्णालीमा ११ र सुदूरपश्चिम प्रदेशमा छ जना सांसदलाई जिम्मेवारी तोकेको महामन्त्री कविन्द्र बुर्लाकोटीले जानकारी दिए ।

ती जिम्मेवारी तोकिएका सांसदहरुले ती क्षेत्रका समसामयिक समस्याका विषयमा समन्वय गर्ने छन् ।

काठमाडौं । राष्ट्रिय स्वतन्त्र पार्टी (रास्वपा) को केन्द्रीय समितिको बैठक आज काठमाडौँमा सुरु भएको छ।

पार्टी सभापति रवि लामिछानेको निर्देशनअनुसार बोलाइएको उक्त बैठक पार्टी केन्द्रीय कार्यालय, घन्टीघर, वनस्थलीमा दिउँसो ३ बजेदेखि सुरु भएको हो। बैठकमा केन्द्रीय समितिका पदाधिकारी तथा सदस्यहरूको अनिवार्य उपस्थिति रहेको पार्टी  जनाएको छ।

बैठकमा समसामयिक राजनीतिक परिस्थिति, पार्टी संगठन सुदृढीकरण, आगामी राजनीतिक कार्यदिशा तथा आन्तरिक व्यवस्थापनका विषयमा छलफल हुने अपेक्षा गरिएको छ।

साथै, हाल देशमा विकसित राजनीतिक घटनाक्रमलाई लिएर पार्टीको धारणा र रणनीति तय गर्ने विषय पनि एजेन्डामा समेटिएको बुझिएको छ।

काठमाडौं । राष्ट्रिय स्वतन्त्र पार्टी (रास्वपा) को केन्द्रीय समितिको बैठक आज बस्ने भएको छ ।

रास्वपाका प्रवक्ता मनिष झाले आज दिउँसो ३ः०० बजे बनस्थलीस्थित पार्टी केन्द्रीय कार्यालयमा बैठक बस्न लागेको  जानकारी दिए । उक्त बैठकमा अनिवार्य उपस्थितिका लागि रास्वपाले पार्टीका पदाधिकारी एवम् सदस्यलाई अनुरोध गरेको छ ।

यसैबीच, आइतबार रास्वपाको सचिवालय बैठक पनि बसेको थियो । बैठकमा प्रतिनिधिसभा सदस्यको सङ्गठनात्मक जिम्मेवारी र संसदीय दलका लागि प्राविधिक सहायता एवं ‘लेवी’लगायत विषयमा पनि छलफल भएको थियो ।

आजको बैठकले सचिवालयले प्रस्ताव गरेका बुँदालाई छलफल गरेर अनुमोदन गर्नेछ ।

आइतबारको सचिवालय बैठकमा जिल्ला अधिवेशन कार्यविधि, केन्द्रीय आयोग, सल्लाहकार परिषद्, सङ्घीय नेतृत्व मञ्च र विभागको मनोनयन, महाधिवेशन कार्यविधि मस्यौदा समिति गठनलगायत विषयमा छलफल भएको थियो ।

काठमाडौं । राष्ट्रिय स्वतन्त्र पार्टीले केन्द्रीय समितिको बैठक बोलाएको छ।

पार्टी सभापति रवि लामिछानेको निर्देशनअनुसार बैठक आगामी वैशाख ७ गते बस्ने जनाइएको छ।

बैठक दिउँसो ३ बजे पार्टी केन्द्रीय कार्यालय घण्टीघर, वनस्थली, काठमाडौंमा आयोजना हुने बताइएको छ। बैठकमा केन्द्रीय समितिका सबै सदस्यलाई अनिवार्य उपस्थितिका लागि निर्देशन दिइएको पार्टीले जनाएको छ।

पार्टीका समसामयिक विषय, संगठन विस्तार तथा आगामी रणनीतिबारे छलफल हुने अपेक्षा गरिएको छ।

काठमाडाैँ । राष्ट्रिय स्वतन्त्र पार्टी (रास्वपा)का उपसभापति डोलप्रसाद अर्यालले प्रतिनिधि सभाका सभामुखका लागि उम्मेदवारी दिएका छन् ।
शुक्रवार सिंहदरवारस्थित संघीय संसद सचिवालयमा पुगेर महासचिव पदम पाण्डेलाई सभामुख पदको उम्मेदवारीका लागि मनोनयनपत्र बुझाएका हुन् ।

सो अवसरमा पार्टीका सभापति रवि लामिछाने, कानून, न्याय तथा संसदीय मामिलामन्त्री सोविता गौतम, रास्वपाका सांसदहरु सहभागी भएका थिए । राष्ट्रिय स्वतन्त्र पार्टीसँग प्रतिनिधिसभामा करिव दुई तिहाई मत १ सय ८२ सिट रहेकाले उपसभापति अर्याल सभामुख बन्ने निश्चित छ ।

यसअघि उनले सभापति लामिछाने सहकारी ठगी प्रकरणमा पक्राउ परेका बेला पार्टीको नेतृत्व सम्हालेका थिए भने श्रम, रोजगार तथा सामाजिक सुरक्षा मन्त्रीको भुमिका पनि निर्वाह गरेका थिए ।