चितवन । राष्ट्रिय स्वतन्त्र पार्टी (रास्वपा) को महाधिवेशनअन्तर्गत आजका लागि निर्धारित बन्द सत्र स्थगित गरिएको छ।

महाधिवेशन प्रतिनिधिको संख्या थपघट तथा मधेश प्रदेशमा देखिएको प्रतिनिधि चयनसम्बन्धी विवादका कारण बन्द सत्र निर्धारित समयमा सुरु हुन नसकेको हो।

रास्वपाका एक स्रोतका अनुसार विवादित विषयहरूमा सहमति जुटाउन र आवश्यक व्यवस्थापन मिलाउन आजका लागि बन्द सत्रका कार्यक्रम स्थगित गरिएको हो। पार्टी नेतृत्वले प्रतिनिधिसम्बन्धी देखिएका असन्तुष्टि र विवादलाई समाधान गरेर मात्र बन्द सत्र सञ्चालन गर्ने तयारी गरेको जनाएको छ।

बन्द सत्रमा सहभागी हुन देशभरबाट आएका महाधिवेशन प्रतिनिधिहरू बिहानैदेखि कार्यक्रमस्थलमा पुगेका थिए। तर दिनभर प्रतीक्षा गर्दा पनि सत्र सुरु हुन नसकेपछि अन्तिम समयमा स्थगनको निर्णय गरिएको हो।

पार्टीभित्र देखिएका विवाद समाधानका लागि नेतृत्व तहमा छलफल जारी रहेको र सहमति जुटेपछि बन्द सत्रको नयाँ समय तय गरिने बताइएको छ।