जनकपुरधाम । मधेश सरकारले जनकपुरधाममा निर्माणधीन अन्तर्राष्ट्रिय रामजानकी रंगशालालाई पूर्णता दिने भएको छ ।

प्रदेश सरकारले यसका लागि दुई अर्ब रुपैयाँ दिने घोषणा गरेको छ । मुख्यमन्त्री सरोजकुमार यादवले बुधार जनकपुर उपमहानगरपालिका–१४ रजौलस्थित निर्माणाधीन उक्त रंगशालाको स्थलगत निरीक्षण गर्दै उक्त घोषणा गर्नुभएको हो ।

मुख्यमन्त्री यादवका अनुसार भारतीय प्रधानमन्त्री नरेन्द्र मोदी जनकपुर आएको बेला घोषाणा गरेको एक अर्ब र मधेश प्रदेश सरकारले थप एक अर्ब गरी रु दुई अर्ब लगानी गरी रंगशालालाई पूर्णता दिइनेछ ।

उहाँले रंगशालालाई मुलुककै सुविधासम्पन्न बनाइने र अन्तर्राष्ट्रिय प्रतियोगिता गर्ने जानकारी दिनुभयो ।

राष्ट्रिय खेलकुद परिषद् (राखेप) ले २०७४ सालमा तीन वर्षभित्र जनकपुरधाममा सुविधासम्पन्न रंगशाला बनाउने बताएको थियो । सो प्रयोजनका लागि उसले लक्ष्मण मन्दिरको १७ बिघा जग्गा ३० वर्षका लागि गुठी संस्थानसँग भाडामा लिएको थियो ।

राखेपले त्यतिबेला उक्त जग्गामा फुटबल स्टेडियम, क्रिकेट स्टेडियम र हक्की स्टेडियमका साथै बहुउद्देश्यीय इन्डोर कभर्डहल, कबड्डी, खोखो र कुस्तीको ट्रेनिङ सेन्टर निर्माण गर्ने भनेको थियो तर अहिलेसम्म कुनै काम भएका छैनन् ।