कर्णाली। नेपाल कम्युनिष्ट पार्टी (माओवादी केन्द्र) कर्णाली प्रदेशसभा दल नेता राजकुमार शर्माले दल नेताबाट राजीनामा दिनुभएको छ ।

नेकपा (माओवादी केन्द्र) कर्णाली प्रदेशसभा दलका नेता शर्माले दलका प्रमुख सचेतक कृष्णबादुर जिसीसमक्ष आज राजीनामा दिनुभएको हो ।

दलका प्रमुख सचेतक जिसीलाई उहाँले पत्रमार्फत सम्बोधन गर्दै लेख्नुभएको छ, “उपरोक्त सम्बन्धमा म राजकुमार शर्मा नेकपा (माओवादी केन्द्र) कर्णाली प्रदेशसभा दलको दल नेताको पदबाट राजीनामा दिएको व्यहोरा अवगत गराउँदछु ।”

कर्णाली प्रदेश सरकारका पूर्वमुख्यमन्त्रीसमेत रहनुभएका उहाँले हालै गठन भएको प्रगतिशील लोकतान्त्रिक पार्टीमा आबद्ध भएसँगै दलको नेताबाट राजीनामा दिएको जानकारी दिनुभयो ।

नेकपा (माओवादी केन्द्र) बिगठन भएर नेपाली कम्युनिष्ट पार्टी भएको छ । शर्माले राजीनामा दिएपछि नेपाली कम्युनिष्ट पार्टीका बाँकी १२ प्रदेशसभा सदस्यबाट दलको नेता चयन गर्ने बाटो खुला भएको प्रमुख सचेतक जिसीले जनाउनुभयो ।रासस

रुकुमपश्चिम। कर्णाली प्रदेशका पूर्वमुख्यमन्त्री राजकुमार शर्माले सङ्घीयताको प्रभावकारी कार्यान्वयन नहुँदा काम गर्न अप्ठेरा भइरहेको बताउनुभएको छ ।

आज जिल्ला अस्पताल विकास समिति रुकुम पश्चिमले आयोजना गरेको जिल्ला अस्पताल भवन अनुगमन तथा भेटघाट कार्यक्रममा उहाँले एकले अर्काको थाप्लोमा समस्या थुपारेर समस्याको समाधान नहुने बताउनुभयो ।

पूर्वमुख्यमन्त्री शर्माले नीतिको प्रभावकारी कार्यान्वयन नहुँदा, प्रशासकीयस्वरूप, निर्वाचन प्रक्रिया र राजनीतिक अस्थिरताले पनि विकास निर्माणमा प्रभाव पारिरहेको बताउनुभयो । “स्थानीय, प्रदेश सङ्घ तथा यसको व्यवस्थित परिचालनको अभावमा पनि अप्ठेरो भइरहेको छ । प्रदेश, सङ्घ र स्थानीय तहका फरकफरक योजना छन्, योजना जसमार्फत कार्यान्वयन भए पनि जनता नै लाभान्वित हुने हुन् भनेर काम गर्नुपर्छ । समन्वय र सहकार्यको माध्यमबाट योजना कार्यान्वयन गरिनुपर्छ”, उहाँले भन्नुभयो ।

देश विकासका लागि जनप्रतिनिधि, जनता र सबै सरोकार भएकाहरूको फराकिलो बुझाइ र त्यसको कार्यन्वनका लागि सहयोग गर्ने सोच हुन आवश्यक रहेको पूर्वमुख्यमन्त्री शर्माको भनाइ थियो ।रासस

काठमाडौँ । कर्णाली प्रदेशका मुख्यमन्त्री राजकुमार शर्माले राजीनामा दिएका छन् । प्रदेश सभा बैठकलाई सम्बोधन गरेर उनले राजीनामा दिएका हुन् ।

बैठकबाट विश्वासको मत लिने मुख्यमन्त्री शर्माको तयारी रहेपनि उनले राजीनामा दिएका हुन् ।

‘प्रदेश सभामा विश्वासको मत लिने तयारी थियो । तर, बदलिएको परिवेशसँगै र पछिल्लो राजनीतिक परिस्थितीमा म मुख्यमन्त्री पदमा रहिरहन उपयुक्त नदेखि आफ्नो पदबाट राजीनामा दिने निर्णय गरेको सभासमक्ष जानकारी गराउँछु ।’ उनले भने ।

सत्ता गठबन्धनबीच भएको भागबन्डामा कर्णाली प्रदेशको मुख्यमन्त्री एमालेको भागमा परेको थियो । तर, माओवादी केन्द्रका संसदीय दलका नेता समेत रहेका शर्मा सरकार छाड्न तयार भएका थिएनन् ।

प्रदेश सभाबाट विश्वासको मत लिएपछि मात्र केन्द्रमा भएको सहमति कार्यान्वयन गर्ने माओवादी सांसदहरूको अडान थियो । प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डले फोनमार्फत एमालेलाई नेतृत्व हस्तान्तरण गर्न निर्देशन दिएपछि शर्माले राजीनामा दिएका हुन् ।

काठमाडौं । नेकपा माओवादी केन्द्रले नेतृत्व गर्दै आएको कर्णाली प्रदेश अब एमालेलाई छाडिदिनुपर्ने भएपछि अन्योल देखिएको छ । माओवादी केन्द्रको प्रदेश तहमा त एमाले र माओवादी केन्द्रको शीर्ष नेतृत्वबीच भएको सहमतिप्रति असन्तुष्टि नै देखिएको छ ।

मुख्यमन्त्री राजकुमार शर्माले आज विश्वासको मत लिने तयारी गरेका छन् । त्यसका लागि प्रदेशसभा सचिवालयमा पत्रसमेत दर्ता गराइसकेका छन् । तर अब शीर्ष नेताबीच कर्णालीको मुख्यमन्त्री एमालेले लिने सहमति भएपछि उनी अन्योलमा परेका छन् । जबकी माओवादीभित्र कर्णालीको मुख्यमन्त्री आफैंले लिनुपर्ने आवाज उठ्दै आएको छ । विशेष गरी माओवादी केन्द्रका उपमहासचिव जनादर्शन शर्माले कर्णाली प्रदेश छाड्न नहुने तर्क गर्दै आएका छन् ।

कर्णाली सरकारमा रहेका माओवादी केन्द्रका मन्त्रीहरुले केन्द्रबाट गलत निर्णय भएको दाबी गरेका छन् । उनीहरुले मुख्यमन्त्रीले कार्यसूचीअनुसार विश्वासको मत लिएरै छाड्ने बताएका छन् ।

संघमा भएको सहमति अनुसार अघि बढ्ने हो भने पनि विश्वासको मत पाएपछि मात्र प्रक्रिया अघि बढाउन सकिने माओावदी केन्द्रका नेताहरुको भनाइ छ । संवैधानिक प्रक्रिया अवलम्बन गरेर अघि बढिसकेपछि केन्द्रले निर्णय गर्दा प्रदेशको स्वायत्तता हरण हुने कतिपयको बुझाइ छ ।

मुख्यमन्त्रीले आज बिहान आफ्नो दलका नेताहरुको बैठक बोलाएका छन् । बैठकले गरेको निर्णयअनुसार अघि बढ्ने तयारी मुख्यमन्त्रीको छ । एमालेले भने अब गठबन्धनमा भएको सहमतिअनुसार अघि बढ्नु्पर्ने बताएको छ ।

केन्द्रीय गठबन्धन अनुसार एमालेको नेतृत्वमा सरकार बनेको खण्डमा मुख्यमन्त्री यामलाल कँडेल बन्नेछन् । २०७४ मै मुख्यमन्त्री बन्ने उद्देश्यसहित प्रदेश झरेका कँडेल त्यो बेला एमालेसँग २० सिट हुँदा पनि मुख्यमन्त्री बन्ने अवसरबाट चुकेका थिए । तत्कालीन नेकपा हुँदा बिचमा मुख्यमन्त्री बन्न उनले पटक–पटक विद्रोह पनि गरे । तर, बन्न सकेका थिएनन् ।

काठमाडौँ । कर्णाली प्रदेशका मुख्यमन्त्री राजकुमार शर्माले यही मंगलबार विश्वासको मत लिने भएका छन् । केन्द्रमा सत्ता समीकरण फेरिएसँगै कांग्रेसले विश्वासको मत फिर्ता लिएपछि मुख्यमन्त्री शर्माले विश्वासको मत लिने भएका हुन् ।

मुख्यमन्त्री शर्माले चैत २० गते मंगलबार विश्वासको मत लिने भनेर प्रदेशसभा सचिवालयलाई जानकारी गराइसकेका छन् ।

४० सदस्यीय कर्णाली प्रदेश सभामा बहुमतका लागि कम्तीमा २१ मत आवश्यक पर्दछ । सभामा गठबन्धनमा आवद्ध माओवादीका १३, एमालेका १० र एकीकृत समाजवादीको १ गरी २४ जना छन् । यस्तै, कांग्रेसका १५ र राप्रपाका एक सांसद छन् ।

सुर्खेत । कर्णाली प्रदेशका मुख्यमन्त्री राजकुमार शर्माले दोस्रोपटक विश्वासको मत प्राप्त गरेका छन् ।

प्रदेशसभाको शुक्रबार दिउँसो बसेको नवौँ बैठकमा मुख्यमन्त्री शर्माले बैठकमा उपस्थित ३९ सांसदमध्ये ३८ जनाले विश्वासको मत दिएका थिए । विश्वासको मतको विपक्षीमा १ मत परेको छ । १ सांसद अनुपस्थित थिए ।

उनी गत पुस २७ गते मुख्यमन्त्रीमा नियुक्त भएका थिए । शर्मालाई नेकपा एमाले, नेकपा माओवादी केन्द्र, राष्ट्रिय प्रजातन्त्र पार्टी र नेकपा एकीकृत समाजवादीसहित २५ जना सांसदले समर्थन गरेका थिए ।

राप्रपाले सरकारलाई दिएको समर्थन फिर्ता लिएपछि मुख्यमन्त्री शर्माले शुक्रबार प्रदेशसभामा पुन: विश्वासको मत लिएका हुन् ।

सुर्खेत । कर्णाली प्रदेशका मुख्यमन्त्री राजकुमार शर्मालाई नेकपा एमालेले विश्वासको मत दिने भएको छ । एमाले संसदीय दलका नेता यामलाल कँडेलले मुख्यमन्त्री शर्मालाई विश्वासको मत दिने निर्णय गरेका हुन्।

यस्तै, कांग्रेस संसदीय दलका नेता जीवनबहादुर शाहीले भने आवश्यक परेको अवस्थामा मात्रै मत दिने जनाए ।

गत माघ ६ गते एमाले, राष्ट्रिय प्रजातन्त्र पार्टी (राप्रपा) र नेकपा एकीकृत समाजवादीको समर्थनमा माओवादी संसदीय दलका नेता शर्माको नेतृत्वका कर्णाली सरकार बनेको थियो । तर, प्रदेश सरकारबाट राप्रपाले समर्थन फिर्ता लिएपछि मुख्यमन्त्री शर्माले दोस्रोपटक विश्वासको मत मागेका हुन् ।

सुर्खेत । सत्ता साझेदार दल राष्ट्रिय प्रजातन्त्र पार्टी (राप्रपा) ले समर्थन फिर्ता लिएपछि कर्णाली प्रदेशका मुख्यमन्त्री राजकुमार शर्माले प्रदेशसभाबाट आज पुन: विश्वासको मत लिँदै हुनुहुन्छ ।

प्रदेशसभाको बैठक आज दिउँसो ३ बजे बस्दै छ । शुक्रबार बिहानैदेखि मुख्यमन्त्री शर्मालाई विश्वासको मत दिने वा नदिनेबारे दलका शीर्ष नेताहरु प्रदेश राजधानी वीरेन्द्रनगरमा छलफलमा जुटेका छन् ।

उक्त प्रदेशमा नेपाली कांग्रेस सत्ता बाहिर छ भने नेकपा (एमाले) ले अहिलेसम्म सरकारलाई दिएको समर्थन फिर्ता लिएको छैन । एमाले प्रदेशसभा अध्यक्ष विनोदकुमार शाहले मुख्यमन्त्री शर्मालाई विश्वासको मत दिने वा नदिने भन्ने विषयमा संसदीय दलको बैठकले निर्णय गर्ने जानकारी दिनुभएको छ ।

प्रदेशसभामा सबैभन्दा ठूलो दल नेपाली कांग्रेसले पनि अहिलेसम्म कुनै निर्णय गरेको छैन । सरकारको नेतृत्व आफूले पाउनुपर्ने सो दलले दावी गर्दै आएको छ । शुक्रबार बिहानदेखि बसेको कांग्रेस प्रदेश कार्यसम्पादन समितिको बैठकले मुख्यमन्त्री शर्माको सरकारलाई विश्वासको मत दिने वा नदिने भन्नेबारे निर्णय गर्न प्रदेश संसदीय दलको बैठकलाई निर्देशन दिने बताइएको छ ।

गत पुस १० गते एमालेसहितको गठबन्धनमा नेकपा (माओवादी केन्द्र), राप्रपा र नेकपा (एकीकृत समाजवादी) केन्द्रका २५ सांसदको समर्थनमा शर्मा मुख्यमन्त्री बन्नुभएको थियो । तर केन्द्रमा सत्ता समीकरणमा फेरबदल आएसँगै राप्रपाले प्रदेश सरकारकालाई दिएको समर्थन फिर्ता लिएको थियो ।

कर्णाली प्रदेशमा एकल सरकार बनाउन कुनै पनि दललाई स्पष्ट बहुमत नभएकाले एमाले र माओवादी केन्द्र मिलेर सरकार चलाइरहेका छन् । मुख्यमन्त्री शर्माले सरकारबाट एमालेबाट सहभागी भएका मन्त्रीहरुलाई बर्खास्त गर्ने मनसाय बनाउनुभएको देखिएको छैन ।

त्यसैले एमाले सत्ताबाट नबाहिरिएको र कांग्रेस आफैँले नेतृत्व पाउनुपर्ने दावी गरिरहेको अवस्थामा कर्णाली प्रदेशमा कस्तो प्रकारको राजनीतिक समीकरण बन्छ भन्ने अवस्था देखिएको छैन ।

कूल ४० प्रदेशसभा सदस्य रहेको कर्णालीमा स्पष्ट बहुमतका लागि कम्तीमा २१ प्रदेशसभा सदस्यको समर्थन आवश्यक पर्छ । कर्णाली प्रदेशसभामा कांग्रेसका १४, माओवादी केन्द्रका १३, एमालेका १० (सभामुखसहित), तथा राप्रपा, एकीकृत समाजवादी र स्वतन्त्र गरी एक/एक जना सदस्य रहेका छन् ।

सुर्खेत । कर्णाली प्रदेशका मुख्यमन्त्री राजकुमार शर्माले शहीदका सपना पूरा गर्ने गरी आफूहरुले नीति र कार्यशैली अघि बाढइरहेको बताउनुभएको छ ।

शहीद दिवसका अवसरमा आन्तरिक मामिला तथा कानुन मन्त्रालयले सुर्खेतको वीरेन्द्रनगर–४को भैरव सामुदायिक वनस्थित प्रादेशिक शहीदपार्क तथा वनस्पति उद्यानमा आयोजना गरेको कार्यक्रममा उहाँले हाम्रा कार्यशैली र गतिविधिलाई शहीदका सपना पू्रा गर्ने गरी अघि बढाउनु नै शहीदप्रतिको सच्चा श्रद्धाञ्जलि हुनेमा जोड दिनुभयो ।

मुख्यमन्त्री शाहीले शहीदका सपना पूरा गर्न, सबै प्रकारका भेद्भाव अन्त्य गर्न र सुखी तथा खुशी समाज निर्माण गर्न सङ्कल्प गर्नुपर्ने आवश्यकता औँल्याउनुभयो । रासस

कर्णाली । कर्णाली प्रदेशका मुख्यमन्त्री राजकुमार शर्माले विश्वासको मत प्राप्त गर्नुभएको छ ।

कर्णाली प्रदेशसभाका सभामुख नन्दा गुरुङले आज बसेको प्रदेशसभाको पहिलो अधिवेशनका छैटौँ बैठकमा मुख्यमन्त्री शर्मालाई आफूमाथि प्रदेशसभाको विश्वास छ भन्ने प्रस्ताव राख्न समय दिनुभयो । उहाँले नेपालको संविधानको धारा १८८ बमोजिम आफूमाथि प्रदेशसभाको विश्वास छ भन्ने कुराको स्पष्ट गर्न प्रदेशसभा समक्ष विश्वासको मतका लागि प्रस्ताव राख्नुभयो ।

मुख्यमन्त्री शर्माले उक्त प्रस्ताव सभामा राखेसँगै तत्काल प्रदेशसभा सदस्यमा कायम रहेको ४० सदस्य सङ्ख्यामा २५ सदस्यले उहाँको पक्षमा विश्वासको मत दिएका थिए । जहाँ ३९ प्रदेशसभा सदस्य बैठकमा उपस्थिति थिए । १४ सदस्यले विश्वासको मतको प्रस्तावको विपक्षमा मतदान गरेका थिए ।

सभामुख गुरुङले मुख्यमन्त्रीले आफूलाई प्रदेशसभामा विश्वास छ भनी राख्नुभएको प्रस्तावमा प्रदेशसभामा तत्काल कायम रहेको सदस्य सङ्ख्यामा २५ सदस्यले पक्षमा मत दिनुभएको र उक्त सङ्ख्या उपस्थित सदस्यको बहुमत भएकोले सो प्रस्ताव बहुमतले पारित भएको घोषणा गर्नुभयो । अर्को सूचना नभएकासम्मका लागि बैठक स्थगित गरिएको उहाँले जानकारी दिनुभयो ।

कर्णाली । कर्णाली प्रदेश सरकारका मुख्यमन्त्री राजकुमार शर्माले आज पद तथा गोपनीयताको शपथ लिनुभएको छ । आज अपराह्न ४ बजे कर्णाली प्रदेश प्रमुख तिलक परियारसमक्ष नेपालको संविधानको धारा १७२ बमोजिम नवनियुक्त मुख्यमन्त्री शर्माले पद तथा गोपनीयताको शपथ लिनुभएको हो ।

मुख्यमन्त्रीले शपथ लिएसँगै उहाँको नेतृत्वमा गठित तीन सदस्यीय मन्त्रिपरिषद् सदस्यमा नियुक्त मन्त्री मङ्गलबहादुर शाही र विनोदकुमार शाहले पनि प्रदेश प्रमुखसमक्ष पद तथा गोपनीयताको शपथ लिनुभएको छ ।

नेकपा (माओवादी केन्द्र) र नेकपा (एमाले) कर्णाली प्रदेश कमिटीको बुधबार बसेको बैठकबाट दुवै दलले आधा÷आधा कार्यकाल आलोपालो सरकारको नेतृत्व गर्ने, मुख्यमन्त्रीसहित चार मन्त्रालय माओवादी तथा तीन मन्त्रालय एमालेले लिने र आठ मन्त्रालय रहेको कर्णाली प्रदेशमा एउटा घटाएर सात मन्त्रालय कायम गर्ने सहमति भएको थियो ।

काठमाडौँ । कर्णाली प्रदेशको मुख्यमन्त्रीमा नेकपा माओवादी केन्द्रका राजकुमार शर्मा नियुक्त भएका छन् । उनलाई प्रदेश प्रमुख तिलक परियारले मुख्यमन्त्रीमा नियुक्त गरेका हुन् ।

४० सदस्य रहेको कर्णाली प्रदेशसभामा बहुमतका लागि २१ सांसद आवश्यक पर्छ । शर्मालाई मुख्यमन्त्री नियुक्तिका लागि माओवादी केन्द्र, एमाले, राप्रपा, र नेकपा एस गरी २५ सांसदको समर्थन छ ।

आलोपालो सहमतिअनुसार कर्णालीमा पहिलो चरणमा साढे २ वर्ष शर्मा र दोस्रोमा एमालेका यामलाल कँडेलले नेतृत्व गर्ने सहमति भएको छ । माओवादी पोलिटव्युरो सदस्य रहेका शर्मा रुकुमपश्चिम प्रदेशसभा (२) बाट निर्वाचित भएका हुन् ।

शर्माले भोलि पद तथा गोपनीयताको शपथ लिनेछन् ।

कर्णालीमा सबैभन्दा ठूलो दल नेपाली कांग्रेसका १४, माओवादी केन्द्रका १३, नेकपा एमालेका १०, राप्रपा, एकीकृत समाजवादी र स्वतन्त्र सांसद एक–एक जना छन् ।

काठमाडौँ । कर्णाली प्रदेशको मुख्यमन्त्रीमा नेकपा (माओवादी केन्द्र)का राजकुमार शर्माले दाबी पेश गरेका छन् ।

२५ सांसदको हस्ताक्षरसहित उनले प्रदेश प्रमुख तिलक परियार समक्ष दाबी पेश गरेका हुन् ।

सातदलीय गठबन्धनको शीर्ष तहमा कर्णालीको मुख्यमन्त्री माओवादीलाई एकलौटी दिने निर्णय भएपनि प्रदेशस्तरमा एमालेसँग आलोपालो गर्ने सहमति भएपछि मुख्यमन्त्रीको दाबी पेश गरिएको हो ।

शर्मालाई माओवादी केन्द्रका १३, एमालेका १० र राप्रपाका १ गरी २५ सांसदको समर्थन रहेको छ ।

माओवादी पोलिटव्युरो सदस्य समेत रहेका शर्मा रुकुमपश्चिम प्रदेशसभा (२)बाट निर्वाचित सांसद हुन् ।