एजेन्सी । रूसको संस्थापनविरूद्ध विद्रोह गरेको सैन्य कम्पनी ‘वागनरु समूह’ का प्रमुख येवगेनी प्रिगोजिन विमान दुर्घटनामा मारिएको आशंका गरिएको छ ।

रूसको राजधानी मस्कोबाट सेन्ट पिटर्सबर्ग गइरहेको एउटा जहाज बुधबार राति दुर्घटनाग्रस्त भएको र त्यसमा येवगेनी प्रिगोजिन पनि सवार रहेको रूसी नागरिक उड्डयन प्राधिकरणले जनाएको छ ।

दुर्घटनाग्रस्त जहाजमा प्रिगोजिनसहित सात जना यात्रु र चालक दलका तीन जना सदस्य सवार रहेका प्राधिकरणले जनाएको छ । जहाज करिब आधा घन्टा उडेपछि जमिनमा खसेको र आगो लागेको बिबिसीले लेखेको छ । दुर्घटनाग्रस्त जहाजबाट अहिलेसम्म चार जनाको शव निकालिएको बताईएकाो छ ।

रूसका लागि युक्रेनसँग लडिरहेको वागनर समूहका प्रमुख प्रिगोजिनले गत असार महिनामा रूसकै विरूद्ध हतियार उठाएका थिए । उनले रूसको रोस्तोव सहरका सैन्य क्षेत्र र भरोनेजमा रहेको सैन्य क्षेत्र नियन्त्रणमा लिएका थिए । त्यसपछि उनको वागनर समूह रोस्तोवबाट मस्को पुगेका थिए ।

पछि प्रिगोजिनले बेलारूसका राष्ट्रपति लुकाशेन्कोसँग वार्ता गरे र उनकै अनुरोधमा बीचबाटै आधारशिविर फर्किएका थिए । लुकाशेन्कोकै मध्यस्थतामा प्रिगोजिनले विद्रोह रोकेर बेलारूसमा शरण लिएका थिए ।

उनी पुटिन जन्मिएको सहर सेन्ट पिटर्सबर्गका हुन् । चोरी मुद्दामा केही समय जेलसमेत बसेका उनले सेन्ट पिटर्सबर्गमा ‘हट डग’ बेच्ने काम गर्थे । केही वर्षमै व्यापार राम्रो हुन थालेपछि उनले महंगा रेष्टुरेन्टसमेत खोलेका बिबिसीले जनाएको छ ।

पछि उनको केटरिङ कम्पनीले राष्ट्रपति भवनमा खाना सप्लाई गर्न थालेको थियो । यही कारणले प्रिगोजिनलाई पुटिनको सेफको नाम दिइएको थियो।

पहिलोपटक सन् २०१४मा पहिचान भएको वागनर समूहलाई वर्षौंसम्म रूस सरकारले स्विकारेको थिएन । तर सन् २०२२ जुलाई २७ मा पूर्वी युक्रेनमा रूसका लागि लडिरहेको क्रेमलिनले स्वीकार गरेको थियो ।