काठमाडौं । राष्ट्रिय प्रजातन्त्र पार्टी (राप्रपा)का वरिष्ठ नेता धवलशमशेर राणासहित सयौँ नेता–कार्यकर्ताले एकैपटक पार्टी परित्याग गरेपछि पार्टी प्रवक्ता मोहन श्रेष्ठले सामाजिक सञ्जालमार्फत कडा प्रतिक्रिया दिएका छन्।

श्रेष्ठले धवलशमशेर राणालाई सम्बोधन गर्दै लेखेका छन्, “अनेक प्रयासका बाबजुद तपाईंलाई राप्रपामा जोगाउन सकिएन। अब नयाँ दल बनाउने घोषणा गर्नुभएको छ भने चुनाव बहिष्कार होइन, चुनाव लड्ने दल बनाउनुहोस्।”

उनले नयाँ दल निर्माणप्रति व्यंग्य गर्दै सरकार र सिंहदरबारप्रति आकांक्षा नराख्ने, आफ्नै चिन्हमा मतदान गर्ने नेता–कार्यकर्ता निर्माण गर्न सुझाव दिएका छन्। साथै, पार्टी अनुशासन र संगठनात्मक व्यवस्थाप्रति पनि कटाक्ष गरेका छन्।

श्रेष्ठले सक्रिय राजतन्त्रको एजेन्डा वर्तमान समयले स्वीकार नगर्ने दाबी गर्दै संवैधानिक राजसंस्थाको पक्षमा दल निर्माण गर्ने उद्देश्य भए पनि राणाले त्यस एजेन्डाप्रति नै धोका दिएको आरोप लगाएका छन्।

सामाजिक सञ्जालमार्फत उनले राणाको विगतको भूमिकामाथि पनि प्रश्न उठाउँदै उनले विगत र वर्तमानका नेतृत्वलाई सहज रूपमा काम गर्न नदिएको आरोप लगाएका छन्। साथै, राप्रपा र अध्यक्ष राजेन्द्र लिङ्देनमाथि लगाइएका आरोपभन्दा फरक ढंगले पार्टी सञ्चालन गरेर देखाउन चुनौतीसमेत दिएका छन्।

श्रेष्ठले लेखेका छन्, “पार्टीका बैठकहरूमा तपाईंको हास्यरसको अभाव महसुस भइरहनेछ। अरूलाई प्रश्न गरेर राजनीतिक जीवन बिताउनुभयो, अब प्रश्न तपाईंमाथि उठ्नेछन्।”

धवलशमशेर राणासहित सयौँ नेता–कार्यकर्ताले पार्टी छोडेपछि राप्रपाभित्रको राजनीतिक तरंग थप चर्किएको देखिएको छ।

काठमाडौं । राष्ट्रिय प्रजातन्त्र पार्टी प्रवक्ता एवं प्रचार विभाग प्रमुख मोहन श्रेष्ठले अधिनायकवाद बाजा बजाउॅदै नआउने जनाउनु भएको छ ।

सामाजिक संञ्जाल फेसबुकमा लेख्दै श्रेष्ठले संसदमा अहिलेसम्म नसुनिएको बोली खोजिरहेको बेला त्यसलाई अवमूल्यन र उपेक्षा गरिनु अनुपयुक्त भएको जनाउदै अधिनायकबादको आशंका गर्नुभएको हो ।

उहाँले लेख्नुभएको छ

संसद नियमावलीको नीति तथा कार्यक्रम सम्बन्धि कार्यविधिमा जुनसुकै कुरा लेखिएको भएपनि सार्वभौम संसदको सार्वभौम सांसदले आफ्नो प्रधानमन्त्रीको उपस्थिति, जवाफदेहिता र संसदमा अहिलेसम्म नसुनिएको बोली खोजिरहेको बेला त्यसलाई अवमूल्यन र उपेक्षा गरिनु अनुपयुक्त छ।
अधिनायकवाद बाजा बजाउॅदै आउदैन !

काठमाडौं । सरकार, राजनीतिक दल र जेन–जी प्रतिनिधिहरुको बैठकमा राप्रपालले राजा, राजनीतिक दल र जेन–जीका बीच नयाँ समझदारी गरेर निर्वाचनमा जानुपर्ने प्रस्ताव गरेको छ ।

राप्रपाले अहिलेको संविधान र प्रणालीबाट जेन–जीलेृ खोलेको परिवर्तन सम्भव नहुने भएकाले राजासहितको नयाँ समझदारी गर्नुपर्ने प्रस्ताव राखेको हो ।

बैठकमा राप्रपाका तर्फबाट महामन्त्री राजेन्द्र गुरुङ र प्रवक्ता मोहन श्रेष्ठ सहभागी थिए ।

बैठकपछि राप्रपाका प्रवक्ता श्रेष्ठले आफूहरुले राखेका प्रस्तावबारे सामाजिक सञ्जालमार्फत् जानकारी दिएका छन् ।

उनले सामाजिक सञ्जालमा लेखेका छन्–

सम्माननीय प्रधानमन्त्री सुशीला कार्कीले आज प्रधानमन्त्री निवास बालुवाटारमा सरकार, राजनीतिक दल र जेनजी प्रतिनिधिहरुको संयुक्त बैठक राख्नुभयो । बैठकमा राप्रपाको तर्फबाट महामन्त्री राजेन्द्र गुरुङ र म सहभागी भयौं ।

अघिल्लो बालुवाटार बैठक सरकार र राजनीतिक दलको बीच भएको थियो जहाँ राप्रपाको धारणा राखिएकै थियो । आज जेनजी प्रतिनिधिहरु समेत सहभागी भएको बैठकमा राप्रपाले,

१. यहि संविधान र प्रणालीबाट जेनजी पुस्ताले खोजेको परिवर्तन सम्भव नहुने भएकाले राजा, राजनीतिक दल र जेनजीका बीच नवीन समझदारी गरेर मात्र निर्वाचनमा जानुपर्ने धारणा राखेको छ। राप्रपाको केन्द्रीय कार्यसम्पादन समितिको बैठकले निर्णय गरे बमोजिमको राजनीतिक धारणा सरकार, राजनीतिक दल र जेनजीहरु सम्मिलित बालुवाटार बैठकमा औपचारिक रुपमा प्रवेश गराइएको छ।

२. विद्रोह अधुरो रहँदा पूर्ण विद्रोहको सम्भावना जीवित रहने भएकाले जेनजी विद्रोहमा उठेका राजनीतिक मुद्धाहरु, संविधान संशोधन र सुशासनसंग सम्बन्धित विषयहरुलाई सम्बोधन गरेर मात्र निर्वाचनमा जानुपर्ने धारणा राखिएको छ।

३. विगतको त्रुटिपूर्ण मार्गचित्रका कारण देशमा आजको अवस्था सिर्जना भएको र यो अवस्थामा सुधार नगरी पुरानो मार्गचित्रकै निरन्तरताले फेरी पनि गलत ठाऊँमै पुगिने अवश्यम्भावी छ। इतिहासले दिएको यो अवसरलाई कोर्स करेक्सनको अवसरको रुपमा सदुपयोग गर्न सरकार, राजनीतिक दल र जेनजी प्रतिनिधिको गम्भीर ध्यानाकर्षण गराइएको छ।

४. प्रधानमन्त्री सुशीला कार्कीलाई इतिहासले दिएको कोर्स करेक्सनको यो अवसरलाई आवश्यक पहलकदमी लिन र इतिहासले सदा सम्मानपूर्वक सम्झने पात्रको रुपमा दर्ज हुन आग्रह गरिएको छ।

५. निर्वाचन जस्तो प्रजातान्त्रिक पद्धतिबाट राप्रपा अलग हुँदैन तर यथास्थितिमा हुने निर्वाचनले समाधान दिदैन भन्ने राप्रपाको व्याख्यात्मक धारणा राखिएको छ।

६. राप्रपाले उठाउदै आएको राजनीतिक, सामाजिक र सुशासनसंग सम्बन्धित विषयलाई बुँदागत रुपमा राखिएको छ।

७. जेनजीका कतिपय फरक फरक धारणाहरुलाई संश्लेषण गरी जेनजी विद्रोहको स्पिरिटसंग एकरुपता कायम गर्न आग्रह गरिएको छ।

काठमाडौं । राष्ट्रिय प्रजातन्त्र पार्टीका प्रवक्ता मोहन श्रेष्ठले नवनियुक्त प्रधानमन्त्री सुशीला कार्कीलाई आलोचनात्मक समर्थन गरेका छन् । उनले बलिदानीपूर्ण संघर्षका लागि जेन जी पुस्ताप्रति नमन व्यक्त गरेका छन् ।

प्रवक्ता श्रेष्ठले आज सामाजिक सञ्जालमा पछिल्लो राजनीतिक गतिविधिबारे आफ्नो धारणा सार्वजनिक गर्दै दलीय स्वार्थविरुद्ध जेन जी पुस्ताको संघर्ष अझै बाँकी रहेको बताएका छन् ।

उनले सामाजिक सञ्जालमा लेखेका छन्–

सरकार, संसद र संविधानको उपादेयता समाप्त भएको, सरकार आफै हेलिकप्टर चढेर भाग्न बाध्य भएको, संसद बिघटन भएको र लगभग कोमामा रहेको संविधानको धारामा टेकेर देशको बागडोर सम्हाल्न आइपुग्नु भएकी प्रधानमन्त्री पदमा नियुक्त श्रीमती सुशीला कार्कीलाई आलोचनात्मक समर्थन सहित हार्दिक बधाई । परिवर्तनका लागि बलिदानीपूर्ण संघर्षका लागि जेन जेड पुस्तालाई नमन ।

नरसंहार र त्रासदीपूर्ण वातावरणबाट सिर्जित तरल अवस्थामा रहेको देशलाई एउटा ट्रयाकमा लैजान नेपाली सेनाले खेलेको भूमिका प्रशंसनीय छ। समाजका सबै पक्षहरुका अपेक्षा थिए र छन् । देशको दीर्घकालीन भविष्यका लागि हिम्मतका साथ लिनुपर्ने निर्णयहरु पनि थिए, ति अधुरै छन्। सधैं दलीय र निजी स्वार्थका लागि लड्यौं, देशका लागि जेन जेड समेत हरेक पुस्ताको साझा संघर्ष अझै बॅाकी छ।

घरेलु शक्तिहरुका बीच नवीन समझदारी नगर्दासम्म देशको सार्वभौमिकता, स्वतन्त्रता, अखण्डता र सुन्दर भविष्यमाथि आशंकाका कालो बादल मडारिरहनेछ । एक हप्ता यता मात्रै पनि अनुभूत गरिएका र देखिएका परिदृश्यहरु छुट्टाछुट्टै हेर्दा त केही नदेखिएला, तर त्यसलाई एक ठाऊॅमा जोडेर हेर्दा देखिने आकृति भयानक र डरलाग्दा छन् ।

प्रजातन्त्र र अधिकारका लागि लामो संघर्ष गरेर आएका तर देश, जनता र देशको सुदुर भविष्यका लागि गलत नीति र गलत मार्गचित्र अबलम्बन गरेका दल र ति दलका नेताको अकर्मण्यताका कारण आजको परिस्थिति सिर्जना भएको हो । आफ्ना आफ्ना वाद, विचार, सिद्धान्त र स्वार्थलाई देश हितमा सदुपयोग गर्दै राष्ट्रिय एकता सहितको नवीन समझदारी गर्ने हो भने अझैपनि सम्हाल्न सकिन्छ। विदेशीकै स्वार्थ र आवश्यकता अनुसार विदेशीकै एजेण्डा बोक्ने र विदेशीकै गोटी बनिरहने हो भने त आगामी दिनहरु झनै कष्टकर देखिन्छन् ! सबैले सोचौं, जिम्मेवार बनौं, गम्भीर बनौं।

कवि भूपी शेरचनको कविताबाट :

हामी आफूखुशी कहिल्यै मिल्न नसक्ने

कसैले मिलाइदिनुपर्ने,

हामी आफूखुशी कहिल्यै छुट्टिन नसक्ने

कसैले छुट्टयाइदिनुपर्ने,

हामी आफूखुशी कहिल्यै अगाडि बढ्न नसक्ने

कसैले पछाडिबाट हिर्काउनुपर्ने, हिँडाउनुपर्ने

हामी रङ्ग–रोगन छुटेका,

टुटेका, फुटेका

पुरानो क्यारमबोर्डका गोटी हौं

एउटा मनोरन्जक खेलका सामग्री,

एउटा खेलाडीमाथि आश्रित,

आफ्नो गति हराएका

एउटा ‘स्ट्राइकर’ द्वारा संचालित

हो, हामी मानिस कम र बर्ता गोटी हौं ।

काठमाडौं । राष्ट्रिय प्रजातन्त्र पार्टीका प्रवक्ता मोहन श्रेष्ठले जेन–जी पुस्ताको निशानामा परेका र लखेटिएका पात्रसँग पारमर्श गरी वर्तमान संकटको निकास खोज्ने प्रयास गरिने धोखा भएको बताएका छन् ।

उनले लखेटिएका पात्रसँगको परामर्श, सल्लाह र निर्देशनमा वर्तमान संकटको समाधान नहुने दाबीसमेत गरेका छन् ।

सामाजिक सञ्जालमा आज आफ्नो धारणा सार्वजनिक गर्दै राप्रपाका प्रवक्ता श्रेष्ठले परम्परागत शैलीमा निकास खोज्ने प्रैयास गरिने नवयुवाको विद्रोह, ३४ युवा सहिदको बलिदान र हजारौं घाइतेको अपमान भएको समेत बताएका छन् ।

उनले सामाजिक सञ्जालमा लेखेका छन्–

GEN Z पुस्ताको निशानामा परेका र लखेटिएका पात्रहरुसंगको परामर्श, सल्लाह र निर्देशनमा वर्तमान संकटको समाधान र राजनीतिक निकास खोज्ने प्रयास गरिनु नवयुवाको विद्रोह, ३४ महान युवा शहीदको बलिदान र हजारौं घाइतेको अपमान हो, धोखा हो ।

No Compromise Gen Z.

काठमाडौं । राष्ट्रिय प्रजातन्त्र पार्टीका प्रवक्ता मोहन श्रेष्ठले पूर्वराष्ट्रपति विद्यादेवी भण्डारीलाई राजनीतिका सक्रिय नहुने एमालेले गरेको आग्रहप्रति टिप्पणी गर्नुभएको छ ।

प्रवक्ता श्रेष्ठले आज सामाजिक सञ्जालमार्फत् राजालाई राजनीतिमा आउन चुनौती दिनेले राष्ट्रपति भइसकेको व्यक्तिलाई बन्देज लगाउनु विरोधाभास भएको बताउनुभएको हो ।

उहाँले जीवनको अन्तिमसम्म जसरी पनि नेतृत्वमा रहने र आफू नेतृत्वमा रहन अनेकन जालझेल गर्ने प्रवृत्ति बदल्नुपर्नेसमेत बताउनुभएको छ ।

नेता श्रेष्ठले लेख्नुभएको छ–

॰ कहिल्यै दलमा नरहने राजालाई राजनीतिमा आउन, चुनाव लड्न चुनौति दिनेहरुले दलबाट राष्ट्रपति भइसकेको व्यक्तिलाई राजनीतिमा आउन बन्देज लगाउनु हदैसम्मको विरोधाभाष हो !

॰ नयाँका पुस्तामा नेतृत्व रुपान्तरणको अध्याय हामी राप्रपाले प्रारम्भ ग-यौ, दुई कार्यकाल पनि हामी नै कार्यान्वयन गर्छौं, यसमा हामी दृढ छौं । जीवनको अन्तिम समयसम्म जसरी भएपनि नेतृत्वमा रहने, आफू नेतृत्वमा रहन अनेकन जालझेल गर्ने र नेतृत्व निर्माणको प्रक्रिया अवरुद्ध गर्ने विषयलाई ठूला, मझौला र साना सबै दलले बदल्न जरुरी छ ।

काठमाडौँ । राष्ट्रिय प्रजातन्त्र पार्टीका प्रवक्ता मोहन श्रेष्ठले नवराज सुवेदीलाई लोकलाजको ख्याल गर्न आग्रह गरेका छन् ।

प्रवक्ता श्रेष्ठले सामाजिक सञ्जाल फेसबुकमार्फत सुवेदीको पछिल्लो राजनीतिक निर्णयप्रति असन्तोष व्यक्त गरेका हुन् ।

सार्वजनिक रुपमा चैत ४ गते राप्रपा परित्यागको घोषणा गरेका सुवेदी फेरि निर्वाचन आयोगमा राप्रपामै रहेको पुष्टि गर्न जान लागेको सुनेको भन्दै श्रेष्ठले सामाजिक सञ्जालमा लेखेका छन्, ’लोकलाजको ख्याल गर्नुस् बा, जीवनको उत्तराद्र्धमा इमान नछाड्नुस् ।’

राप्रपाका अध्यक्ष राजेन्द्र लिङ्देनले सुवेदीलाई अनुशासन समितिको अध्यक्षबाट हटाएर रोशन कार्कीलाई मनोनित गरेपछि पार्टीमा विवाद बढेको छ ।

हिजो बसेको इतर पक्षको बैठकले लिङ्देनको कदम विधानविपरीत भएको जिकिरसहित सुवेदी निर्वाचन आयोगमा जाने निर्णय भएको थियो । सोहीअनुसार उनी बिहान आयोग पुग्ने बताइएको छ ।

काठमाडौं । राष्ट्रिय प्रजातन्त्र पार्टी (राप्रपा) का प्रवक्ता मोहन श्रेष्ठले राजावादी आन्दोलनप्रति ऐक्यवद्धता अभियान चलाउन आह्वान गर्नुभएको छ ।

प्रवक्ता श्रेष्ठले सामाजिक सञ्जालमार्फत् आज जो जहाँ हुनुहुन्छ त्यहीँबाट ऐक्यवद्धता अभियान चलाउन आह्वान गर्नुभएको हो ।

राजतन्त्र पुनस्र्थापना र हिन्दू राज्यको घोषणाको माग गर्दै राप्रपासहितका राजावादीहरुले प्रदर्शन गर्दै आएका छन् । आज काठमाडौंको नक्सालस्थित नारायण चौरमा प्रदर्शन गर्ने तयारी छ ।

राप्रपाका प्रवक्ता श्रेष्ठ सामाजिक सञ्जाल फेसबुकमा लेख्नुहुन्छ–

जो जहॅा हुनुहुन्छ ऐक्यबद्धता अभियान चलाऔं : काठमाण्डौंका सडकमा यतिबेला भइरहेको देशभक्तिपूर्ण राष्ट्रवादी आन्दोलन विशिष्ट प्रकृतिको छ- साथ, सहयोग र समर्थन गरौं, सहभागी बनौं ।

– प्रायस: आन्दोलनहरु सरकार, सरकारको गलत नीति र सरकारको ज्यादती विरुद्ध हुने गर्छन् तर यसपटकको आन्दोलन व्यवस्था विरुद्धको आन्दोलन हो ।

– २००७ साल, २०४६ साल र २०६२-६३ को आन्दोलन व्यवस्था परिवर्तनको आन्दोलनको रुपमा रहेको छ।

– नेपालमा हरेक १० वर्षमा राजनीतिक उथलपुथल भएको इतिहास छ । २००७ सालमा प्रजातन्त्र आयो, २०१७ मा पन्चायती व्यवस्था, पन्चायतभित्रको प्रजातान्त्रिकीकरणको दुइ दशकको बहसपछि २०३६ सालमा जनमत संग्रह, ०४६ मा पन्चायती व्यवस्थाको अन्त्य भइ बहुदलीय व्यवस्थाको स्थापना, बहुदलीय व्यवस्थाका विरुद्ध माओवादीले ०५२ मा सशस्त्र विद्रोहको थालनी गरेपछि ०६२र६३ को आन्दोलन मार्फत् नयॅा राजनीतिक परिवर्तन र गणतन्त्रको आधार तयार, ०७२ मा गणतान्त्रिक संविधान, ०८२ मा देशभक्त राष्ट्रवादी शक्तिहरुद्वारा गणतन्त्र विरुद्ध जनआन्दोलनको घोषणा । जनआन्दोलनको पक्षमा व्यापक जनमत र जनसहभागिता बढ्दै ।

– गणतन्त्र, गणतान्त्रिक व्यवस्था र यसको मार्गचित्र, गणतन्त्रको आवरणमा लादिएको सर्वसत्तावाद, कुशासन, अव्यवस्था, समग्र बेथिति र यसको प्रयोगबाट आम जनतामा पैदा भएको सामुहिक निराशाको जगमा नयॅा आन्दोलनको बलियो आधार तयार भइरहेको छ।

व्यवस्था परिवर्तनको विगतका तीन आन्दोलनहरुको आधार कि त विदेशी भूमिमा तयार भएका छन्, कि त विदेशीको उपस्थितिमा भएका छन् । कुनै न कुनै रुपमा विदेशीको साथ, सहयोग, समर्थन र प्रायोजनमा भएका छन् । यसका बारे धेरै प्राज्ञिक बहसहरु भइसकेका छन् र यद्यपि भइरहेका छन्।

व्यबस्था बदल्ने यसपटकको आन्दोलनको घोषणा नेपालका देशभक्त, राष्ट्रवादी शक्तिहरुले गरेका छन्। कुनै विदेशीको संलग्नता र प्रायोजन नभएको यो आन्दोलन नेपालमा हालसम्म नभएको विशिष्ट प्रकृतिको छ। नेपाली भूमिमा, नेपाली जनताद्वारा, नेपाल र नेपालीका लागि भइरहेको यो आन्दोलन यथास्थितिबाट मुक्ति चाहनेहरुको साझा आन्दोलन हो ।

सकेसम्म आफैं उपस्थित भएर जारी आन्दोलनमा योगदान गरौं । आफू उपस्थित हुन नसकेको अवस्थामा आफ्नो परिवार, नातागोता, आफन्त, छिमेकी र साथीसंगीहरुलाई सहभागी हुन भनौं । जो जहॅा हुनुहुन्छ, जसरी हुन्छ दबाव सिर्जना गरौं, सामाजिक सन्जालको भरपुर उपयोग गरौं, जनमत बढाऔं ।

सबैभन्दा माथि देश, देशभन्दा माथि कोही छैन ।

काठमाडौं । राष्ट्रिय प्रजातन्त्र पार्टीका प्रवक्ता मोहन श्रेष्ठले वैदेशिक रोजगारीमा जानेहरुका लागि विना धितो ऋण उपलब्ध गराउने व्यवस्थाप्रति आपत्ति जनाउनुभएको छ ।

नेपाल राष्ट्र बैंकले हालै सार्वजनिक गरेको मौद्रिक नीतिमा वैेदेशिक रोजगारीमा जानेलाई विना धितो ऋण उपलब्ध गराउने व्यवस्था गरिएको थियो । यस्तो व्यवस्थाले युवा पलायन हुने भन्दै प्रवक्ता श्रेष्ठले यसलाई हचुवाको निर्णयको संज्ञा दिनुभएको छ ।

श्रेष्ठले आज सामाजिक सञ्जालमार्फत् प्रतिक्रिया दिँदै सरकार र सरकार मातहतका निकायका केही अपवादबाहेकका अधिकांश निर्णय हचुवा, अदूरदर्शी र उल्टो बाटो नहिँडेको भए देशको आजको जस्तो दुर्गति हुने थिएन भन्ने टिप्पणी पनि गर्नुभएको छ ।

उहाँले सामाजिक सञ्जालमा लेख्नुभएको छ–

सरकार र सरकार मातहतका निकायका केही अपवाद बाहेकका अधिकांश निर्णयहरु हचुवा, अदूरदर्शी र उल्टो बाटो नहिडेको भए देशको आजको जस्तो दुर्गति हुने थिएन । देशको नवनिर्माणको अभियानमा साथमा लिनुपर्ने युवालाई वैदेशिक रोजगारका लागि बिना धितो ऋण उपलब्ध गराउने भन्ने हालै सार्वजनिक निर्णय सुन्दा कर्णप्रिय र लोकप्रिय लागेपनि यो निर्णय युवा शुन्य अवस्थामा देशलाई पुरÞ्याउने, स्वदेशमा रोजगारी सिर्जनालाई निरुत्साहित तुल्याउने, संगठित र जुझारू सत्ता विरोधी जनमतलाई शिथिल पार्ने, उत्पादनतर्फ ध्यान नदिइ रेमिट्यान्सको भरमा देश चलाउने र कालान्तरमा देशलाई वृद्धाश्रम बनाउने युवा विरोधी नीति हो ।

०६२/६३ पछि परिवर्तनको संवाहक भनिने दलहरुले नै वैदेशिक रोजगार प्रवर्द्धन बोर्ड बनाएर युवालाई वैदेशिक रोजगारमा प्रोत्साहित गर्ने नीति लिए । फलस्वरुप पचासौं लाख युवाहरु आज वैदेशिक रोजगारीमा पुगेका छन् । दुबइ, कतार, मलेसिया, साउदी अरब र खाडीका देशहरु बनाउन सक्ने युवालाई आफ्नो देश बनाउने अवसरबाट वन्चित गरिएको छ । युरोप, अमेरिका, अष्ट्रेलिया लगायतका विकसित देशहरुमा आफ्नो सुन्दर भविष्यको खोजी गर्दै गएका युवाहरु अधिकांश फेरि नेपाल फर्कने र नेपालमै केही गर्ने आशा त्यागेर ति देशहरुमा स्थायी रुपमा कसरी सबल र सेटल हुन सकिन्छ भनेर संघर्षरत छन् । देशको वर्तमानको यो दुरावस्था भविष्यका लागि धेरै हिसाबले कहालिलाग्दो होइन ? एकछिन गम्भीर भएर सोचौं त !

सबै टल्कने वस्तु हिरा हककुदैन तर नेपाली जनताले यी टल्किएका नक्कली हिरालाई सक्कली हिरा ठान्ने भूल र पटकपटक भूल गर्दैगर्दा आज देशलाई युवा शुन्य अवस्थामा लैजाने फेरि अर्को गलत नीति लिइएको छ जुन दूर्भाग्यपूर्ण छ । झट्ट सुन्दा युवालाई बिना धितो ऋण दिने कुराको विरोध गरेजस्तो सुनिएला तर जुन निर्णय देशको हितमा छैन, युवाको हितमा छैन त्यस्तो निर्णयको विरोध हुनैपर्छ, विरोध गरिनैपर्छ ! एक्लै किन नभइयोस् !

काठमाडौं । राप्रपा प्रवक्ता तथा प्रचार विभाग प्रमुख मोहन श्रेष्ठले माओवादी केन्द्रका सांसद माधव सापकोटालाई बोलीमा लगाम लगाउन सुझाव दिनु भएको छ ।

आइतबार बसेको प्रतिनिधिसभा बैठकमा सांसद सापकोटाले संविधान र व्यवस्थाविरुद्ध बोल्न नपाइने बताएपछि राप्रपा प्रवक्ता श्रेष्ठले बोलीमा लगाम लगाउन सुझाव दिनु भएको हो ।

श्रेष्ठले सामाजिक संञ्जालमा लेख्नु भएको छ-

‘हेलो माननीय माधव सापकोटाजी, बोलीमा लगाम लगाउनुपर्यो । दुनियालाई थाहा भएको तर तपाईलाइ थाहा छैन कि क्या हो १ राप्रपा वर्तमान संविधानकाप्रति आलोचनात्मक दृष्टिकोण राख्छ, संविधानका आधारभूत विषयमाथि हाम्रो बिमती छ। जनसमर्थनका आधारमा शान्तिपूर्ण ढंगबाट आफ्नो मान्यता स्थापित गर्न सकिन्छ भनेर घोषित रुपमै प्रयासरत पनि छौं। जुन अधिकार संविधानले हामीलाई मात्र होइन सबैलाई प्रदान गरेको पनि छ। आवश्यकता अनुसार कुन रणनीति प्रयोग गर्ने हाम्रो आन्तरिक मामिला हो । सडक, संसद र सरकार हामी हाम्रो आवश्यकता अनुसार उपयोग गर्छौं। बोल्दा मर्यादा राख्नोस्,’

आइतबारको बैठकमा राप्रपालाई इंगित गर्दै सांसद सापकोटाले भन्नुभएको थिया ‘यही संविधानले दिएको लोगो र यसले परिकल्पना गरेको चुनावमा भाग लिएर सांसद हुने । लोगो लगाएर सारा सेवा भोग गर्ने, पाइहाले मन्त्री पनि पड्काउने । प्रदेशतिर गएर सभामुख पनि लिने, तर फेरि यो संविधानलाई विरोध गर्ने रु संविधान र व्यवस्थाको विकल्प किमार्थ राजा र राजतन्त्रवादी हुन सक्दैन ।’

सांसद सापकोटाको सोही अभिव्यक्तिप्रति आपत्ति जनाउँदै राप्रपा प्रवक्ता श्रेष्ठले राप्रपाले संविधानका आधारभूत विषयमाथि विमती राखेको स्मरण गराउदै शान्तिपूर्ण ढंगबाट आफ्नो मान्यता स्थापित गर्ने अधिकार संविधानले सबैलाई प्रदान गरेको जनाउनु भएको छ ।

काठमाडौं । राप्रपा प्रवक्ता मोहन श्रेष्ठले समाजवादी मोर्चा र गठबन्धनको बैठक प्रधानमन्त्रीको सरकारी निवास बालुवाटामा बसेकोप्रति आपत्ति जनाउनुभएको छ । आज मोर्चाको बैठक बालुवाटारमा बसेपछि प्रवक्ता श्रेष्ठले आपत्ति जनाउनुभएको हो ।

श्रेष्ठले फेसबुकमा लेख्नुभएको छ, ‘समाजवादी मोर्चाको बैठक वा कुनै पनि दलीय बैठकहरु प्रधानमन्त्रीको सरकारी निवासमा गरिनु आपत्तिजनक छ। देशको प्रधानमन्त्री बस्ने, जनताको पैसाबाट चल्ने सरकारी निवासलाई कुनै दल विशेषको, मोर्चाको सम्पर्क कार्यालय जस्तो बनाइनु हुँदैन । यो मुलतः नैतिकताको विषय हो।’

देशको प्रधानमन्त्री बस्ने ठाउँलाई मोर्चाको सम्पर्क कार्यालय जस्तो बनाइन नहुने प्रवक्ता श्रेष्ठको भनाइ छ । मोर्चामा माओवादी केन्द्र, नेकपा एकीकृत समाजवादी, जसपा र विप्लव नेतृत्वको नेकपा संलग्न छन् ।

काठमाडौं। राप्रपाका प्रवक्ता तथा प्रचार विभाग प्रमुख मोहन श्रेष्ठले सरकारको एक बर्ष दिशाविहिन भएको टिप्पणी गर्नुभएको छ ।  प्रवक्ता श्रेष्ठले सरकार कम्पास हराएको पानीजहाज जस्तो भएको मुल्याङ्कन गर्नुभएको छ ।

प्रवक्ता श्रेष्ठले सामाजिक संञ्जाल मार्फत सरकारको मुल्याङ्कन गर्दै समग्रमा यो एक वर्ष निराशाजनक रहेको र सुनकाण्ड, नक्कली भुटानी शरणार्थी काण्ड, एनसेल काण्ड जस्ता काण्डहरुमा देखिएका तमासा, उच्च राजनीतिक नेतृत्वको संलग्नता, जोगाउने र फसाउने गोलचक्करमै एक वर्ष व्यतित भएको जनाउनु भयो ।

उहाँले लेख्नु भएको छ –

प्रचण्ड नेतृत्वको सरकारले एक वर्ष पूरा गरेको छ। निर्वाचनपछि बनेको सरकारसंग सुशासन, रोजगारी सिर्जना, चलायमान अर्थतन्त्र, महंगी नियन्त्रण, विकासका प्रयासहरुदेखि कमसेकम गरिखान पाउने वातावरणको निर्माण जनताका न्युनतम अपेक्षा थियो। तर समग्रमा यो एक वर्ष निराशाजनक रह्यो ।

सुनकाण्ड, नक्कली भुटानी शरणार्थी काण्ड, एनसेल काण्ड जस्ता काण्डहरुमा देखिएका तमासा, उच्च राजनीतिक नेतृत्वको संलग्नता, जोगाउने र फसाउने गोलचक्करमै एक वर्ष व्यतित भएको छ। घरेलु शक्तिबीचको एकताबाट निर्माण गरिएको समीकरण भत्काएर विदेशी शक्ति रिझाउने गरी बनाइएको गठबन्धनले कसको स्वार्थ पूरा गऱ्यो वा गर्नेछ त्यो क्रमशस् देखिदै जाला तर सरकारको एक वर्षे अवधिमा नेपाल र नेपाली जनताले उज्यालो महशुस गर्न भने सकेनन्, पाएनन् !

दिशाविहिन सरकार- कम्पास हराएको पानीजहाज जस्तो !

काठमाडौं। क्रिसमस मनाउन मकवानपुरको राक्सिराङ्ग गाउँपालिकाले तीन दिन बिदा दिएकोमा राप्रपाले आपत्ति जनाएको छ।

राप्रपाका प्रवक्ता तथा प्रचार विभाग प्रमुख मोहन श्रेष्ठले क्रिसमस मनाउन भनेर राक्सिराङ्ग गाउँपालिकाले तीन दिन सार्वजनिक बिदा दिनु अनुचित र विडम्बनापूर्ण रहेको जनाउनु भयो ।

प्रवक्ता श्रेष्ठले यस अवस्थामा पनि नेपालको बहुसंख्यक सनातन समाज मौन रहनु र चुपचाप सुनिरहेनु अनौठो भएको जनाउनु भयो । उहाँले हाम्रो संवेदना किन मरेको यसरी भन्दै पटकपटक चिमोट्दा पनि नदुख्नु डरलाग्दो रोगको लक्षण होइन र भन्दै प्रश्न गर्नुभएको छ ।

श्रेष्ठले सामाजिक सञ्जालमा लेख्नुभएको छ-

क्रिसमस मनाउन भनेर मकवानपुरको राक्सिराङ्ग गाउँपालिकाले तीन दिन सार्वजनिक बिदा दिनु अनुचित र विडम्बनापूर्ण छ। सनातन धर्मप्रति भ्रम फैलाउने र आयातित धर्मको प्रवर्द्वन गर्ने ०६२/६३ को आन्दोलनको उद्धेश्य र ०७२ को संविधानको मर्म थिएन।

तर दुर्भाग्य, धर्मनिरपेक्षताको आडमा नेपालको मौलिक संस्कृति र सनातन धर्ममाथि निरन्तर प्रहार भइरहेको छ। धर्म निरपेक्षको वकालत गर्ने देशको एकजना मन्त्री नै क्रिस्चियन धर्मको प्रचार गर्दैछन् र “हामी सर्पले जस्तै बिस्तारै निल्दैछौं” भनेर खुलेआम भनिरहेका छन् ।

तर नेपालको बहुसंख्यक सनातन समाज मौन छन्, चुपचाप सुनिरहेका छन् । हाम्रो संवेदना किन मरेको यसरीरु पटकपटक चिमोट्दा पनि नदुख्नु डरलाग्दो रोगको लक्षण होइन र ?

उठौं, जागौं र जुटौं ।

हाम्रो नेपाललाई अस्थिर बनाउन र फेरि द्वन्दमा धकेल्न चाहनेहरुको गोटी नबनौं ।

आज संसदीय निर्वाचन भएको एक वर्ष पूरा भएको छ। राजनीतिक दलहरुले चुनावी दौरानमा जनताको माझमा जाँदा गरेका बाचा र प्रतिबद्धताहरुको सम्झना र समिक्षा गरुन् ।हामी पनि समिक्षा गर्छौं।

निर्वाचनपछि बनेको सरकारमा सहभागी भएर राप्रपाले एउटा प्रयोग गऱ्यो, ४० दिन नपुग्दै नाटकीय रुपमा सत्तामा संकट देखिएपछि सबैभन्दा पहिले सरकारबाट बाहिरियौं । जति दिन सरकारमा रह्यौं राम्रो गर्ने प्रयास गऱ्यौं, नराम्रो गरेनौं ।

त्यसपछि सरकार सञ्चालनका क्रममा संघ र प्रदेशमा यो एक वर्षमा देखिएका रमिता, कुकृत्य गणतन्त्रका गहनाका रुपमा स्थापित भए । तथाकथित परिवर्तन राम्रो हो, उत्कृष्ट छ भनेर छाती खोली नागरिकका सामु भन्ने अट यतिबेला कसैको छैन ।

बन्द कोठाभित्र लाभ लिएका केही तरमाराहरुले गणतन्त्र ठिक छ भन्नु आफैंमा लज्जाको विषय बनिरहेको छ। दिनहुँ हजारौं नौजवान युवाहरु लावालस्कर देश छाडेर परदेश लागिरहेका छन्, अर्थतन्त्र शिथिल र दबाबमा छ, भूराजनीतिक सन्तुलनमा गडबडी देखिदैछ। केही मुठ्ठीभर बाहेक आम जनता निराश छन्, जनजीवन त्रस्त छ।

यो अवस्था कहिलेसम्म लम्ब्याउने ? अब पनि नागरिक नजागे, नउठे कहिले उठ्ने? देशले अवलम्बन गरेको मार्गचित्र गलत र त्रुटिपूर्ण छ भनेर हामीले आज मात्र होइन, हिजोका कठिन र जटिल दिनमा समेत भन्यौं, निरन्तर भन्दै आइरहेका पनि छौं । आफ्नो एजेण्डामा सतिसाल झैं उभिएको राप्रपाको एजेण्डा क्रमश: सहि साबित हॅुदै गएको छ।

हिजो कुनै बेला हाम्रा एजेण्डा लुकेर सुनाउनुपर्ने, कथित अग्रगमनकारीको निशानामा पर्नुपर्ने अवस्थाबाट आज खॅाटी गणतन्त्रवादी कहलिएका, गणतन्त्रबाट लाभ लिएकाहरुले समेत सगर्व बोकेर हिडिरहेको देख्दा सन्तोष र गर्वको अनुभूति हुन्छ।
नेपाल यतिबेला ‘कोर्स करेक्सन’को सम्मुखमा छ।

यथास्थितिबाट देश अघि बढ्न सक्दैन भन्ने कुरा हामीले भनिरहन पर्दैन, यो अवस्था र व्यवस्थाका संवाहक शक्तिहरुले समेत भनिरहेको र स्विकारेको कुरा हो। यथास्थितिमा सुधार ल्याउने विकल्प छ र विकल्प राप्रपाले मात्रै दिएको छ।

राप्रपाले अघि सारेको विकल्पमा छलफल गर्न कसैले हिनताबोध गर्नु पर्दैन। गल्ती चेतनशील प्राणीबाट नै हुने हो, गल्ती सच्याएर नेपालको माटो र परिवेश सुहाँउदो नवीन व्यवस्थाका लागि हातेमालो गर्न राजनीतिक दलहरु, विभिन्न विचार समुह, स्वतन्त्र नागरिक सबैको ध्यानाकर्षण गराउॅदछु ।

राजसंस्था फर्काउने कुरा प्रतिगमन होइन, कतिपयले प्रतिगमनको भाष्य निर्माण गरिरहेका छन्, त्यो गलत छ । नेपालको लागि राजसंस्था अहिले भन्दा अघि बढ्ने अग्रगमनकारी उत्कृष्ट बाटो हो । नागरिकलाई अधिकारसम्पन्न बनाउने विभिन्न पाटोहरुमा छलफल हुन नसक्ने भन्ने छैन । आउनुहोस्, नवीन र सार्थक बहस प्रारम्भ गरौं ।
सबैभन्दा माथि देश, देशभन्दा माथि कोही छैन ।

श्रेष्ठ राष्ट्रिय प्रजातन्त्र पार्टीका प्रवक्ता हुनुहुन्छ ।

काठमाडौं । राष्ट्रिय प्रजातन्त्र पार्टी (राप्रपा) ले सरकारले आजदेखि माघ १५ गतेसम्म सरकारी कार्यालयहरू बिहान १० देखि अपरान्ह ४ बजेसम्म मात्रै खुलाउने भनी गरेको निर्णय अनुचित र गलत भएको जनाएको छ ।

राप्रपा प्रवक्ता एवं प्रचार विभाग प्रमुख मोहन श्रेष्ठले कार्यलय समय घटाउने सरकारको निर्णय अनुचित रहेको बताउनुभयो । उहाँले भन्नुभयो घडीको सुइॅ हेरेर देशले भोगिरहेको विद्यमान संकटबाट मुक्त हुन सकिन्न ।

श्रेष्ठले विभिन्न बहानामा दिइने अधिक सार्वजनिक बिदाको मार खेपिरहेको देशमा चिसो र दिन छोटो हुने अर्को बहानामा सरकारी कार्यालयको समय घटाएर ६ घण्टा मात्रै कायम गरिनु उपयुक्त नहुने भन्दै निर्णयमा पुनर्विचार गर्न आग्रह गर्नुभयो ।

काठमाडौं । देशको ठूलो पार्टी नेपाली कांग्रेसका सभापति शेरबहादुर देउवाले दिनहॅुजसो सयौं र हजारौंको संख्यामा युवा र विद्यार्थी विदेश पलायन भइरहेको भएपनि “रहर पुगेपछि फर्कने” भनी दिनुभएको अभिव्यक्ति गैरजिम्मेवारपूर्ण छ।

सत्ता साझेदार दलको प्रमुख नेताले युवा पलायनको गम्भीर विषयमा हल्काफुल्का जवाफ दिनु अशोभनीय छ। युवा पलायन वर्तमानको मात्रै होइन, भावी नेपालका लागि समेत चिन्ताको विषय हो। अहिले नै गाऊॅ गाऊॅमा युवा रित्तिएका छन्, ५० लाखभन्दा बढी युवा विदेशीएका छन्, ति मध्ये केही युवा फर्केलान् तर अधिकांशको फर्कने टुंगो छैन ।

युवाको अत्यासलाग्दो ढंगबाट भइरहेको विदेश पलायन र स्वदेशमै रहेका युवालाई रोक्ने, सम्मानजनक काम र अवसर सिर्जना गर्ने, विदेशीएका युवालाई स्वदेश फर्काउने, नेपाल निर्माणको साझेदार बनाउनेबारे देशभित्रका शक्तिहरुले साझा राष्ट्रिय संकल्प लिनुपर्ने बेलामा जिम्मेवार दलको जिम्मेवार नेताले दिनुभएको यस्तो अभिव्यक्तिले मलाइ चाहिॅ पीडाबोध गराएको छ।

हरेक युवामा उहॅाले आफ्नो छोरा जयवीर सिंह देउवाको छवि देख्न नसक्नु डरलाग्दो कमजोरी हो । दुबइ, कतार, मलेशिया, सिंगापुर जस्ता देशहरु बनाउन सक्ने नेपाली युवाले आफ्नो देश पनि बनाउन सक्छन्।

आफ्नो देश बनाउनबाट तिनलाई कसले वञ्चित गरायो ? यो प्रश्नको जवाफ खोज्न ०६२/६३ को परिवर्तन, गणतन्त्र, गणतन्त्रपछि राज्य सञ्चालनको तौरतरिका र गणतन्त्रका नेताहरुलाई धारेहात लगाउनुपर्ने हुन्छ। हामीले मात्रै एकोहोरो भनिरहॅदा विरोध गरेजस्तो मात्रै हुने, संसार देखेका, भोगेका र बुझेका युवाले अब जवाफ खोजुन् ।

-मोहन श्रेष्ठ राप्रपाका प्रवक्ता हुनुहुन्छ।

काठमाडौं । राष्ट्रिय प्रजातन्त्र पार्टीका प्रवक्ता मोहन श्रेष्ठले प्रधानमन्त्री पुष्पकमल दाहालले बिगतका गलत क्रियाकलापको लागि पशुपतिनाथमा क्षमा पुजा गर्न सुझाब दिनुभएको छ ।

भारत भ्रमणका रहनु भएका प्रधानमन्त्री पुष्पकमल दाहाल प्रचण्डले मध्य प्रदेश पुगेर महाकालेश्वर मन्दिरमा गेरुवस्त्र सहित ज्योतिर्लिङ्गमा पूजा अर्चना गरेपछि प्रवक्ता श्रेष्ठले यस्तो सुझाब दिनु भएको हो ।

सामाजिक संञ्जाल मार्फत श्रेष्ठले बिगतमा समाजलाई विभाजित गर्ने, भ्रम फैलाउने हर्कतहरु भए समयक्रममा ति सबै मिथ्या साबित भएको जनाउनु भएको छ ।

उहाँले लेख्नुभएको छ ।

हिजो राजसंस्था, हिन्दु धर्म लगायतका विषयमा जुन जुन कुरा भनेर मान्छे उचाल्ने, उत्तेजित तुल्याउने, समाजलाई विभाजित गर्ने, भ्रम फैलाउने हर्कतहरु भए समयक्रममा ति सबै मिथ्या साबित हुँदैछन् । दिवंगत रानी ऐश्वर्यलाई पम्फादेवीको उपनाम दिएर स्विस बैंकमा अर्बौं रुपैयाँ राखिएको भन्दै बदनाम गरियो, समयक्रममा ति मिथ्या साबित भए । सशस्त्र द्वन्द्वका बखत ०५८ मा आजकै दिन भएको दरबार हत्याकाण्डमा राजा ज्ञानेन्द्रलाई जोडेर गाउँ गाउँसम्म दुष्प्रचार गर्ने काम भयो, डा।बाबुराम भट्टराईले त लेख समेत लेखेर कोतपर्व भन्न भ्याए, राजा ज्ञानेन्द्र जोडिएको भए यिनले बाँकी राख्ने थिएनन्, त्यो पनि भ्रम फैलाइएको मात्रै थियो ।

हिन्दु धर्म, संस्कृति र परम्परा विरुद्ध त यिनले गर्नुसम्म गरे, मन्दिर भत्काए, पुजारी मारे, अग्रज भागवत वाचक पण्डित नारायण पोखरेलको हत्या गरे, काजकिरियामा बसेकालाई समेत छाडेनन् । धर्मान्तरणलाई प्रश्रय दिए, चर्चका पैसा ल्याएर राजनीति धाने, चर्चकै पैसाले चुनाव खर्च जुटाए।हिन्दुराष्ट्रको पहिचान समाप्त पारिदिए । समाजमा स्थापित सामाजिक, सांस्कृतिक मुल्य मान्यताको ध्वंस गर्ने कामको अगुवाइ गरेका मात्रै होइन अभियान नै चलाएका सशस्त्र द्वन्द्वको मुल नेतृत्व जीवनको उत्तरार्द्धमा ूभगवानू को शरणमा पुग्नुपर्ने दिन आएको छ। आज उहाँले सार्वजनिक रुपमा भारतको उज्जैनमा महाकालेश्वर भगवानको पुजा आराधना गर्नुभएको छ।

ढिलै भएपनि यो सकारात्मक र स्वागतयोग्य कुरा हो । भारत वर्ष भारत खण्डका तिर्थाटनपछि भगवान पशुपतिनाथको मन्दिरमा पुजा आराधना गरेपछि फल प्राप्त हुन्छ भन्ने विश्वास रहिआएको छ। पशुपति क्षेत्र विकास कोषका संरक्षक समेत रहनुभएका प्रधानमन्त्रीले फल प्राप्तिका लागि गर्नुपर्ने कर्म गर्नुहुनेछ भन्ने आशा लिएको छु । हिन्दु धर्म, संस्कृति, परम्पराको खिलाफमा लाग्न उहाँबाट शिक्षित, दीक्षित र प्रेरित भएकाहरूले एकपटक पश्चाताप गरुन्, गलत शिक्षा र गलत कर्म गरेकोमा क्षमापुजा गरुन् र सहि बाटो, सहि विचारको अनुसरण गरुन् ।
वादे वादे जायते तत्व बोध…

फागुन ७, प्रजातन्त्र दिवस । यस अवसरमा सबैमा शुभकामना । तत्कालीन कठोर अवस्थामा मुलुकलाई अध्याँरोबाट उज्यालोतर्फ लैजाने सबै आदरणीय छन्, स्तुत्य छन् । हार्दिक नमन ।

प्रजातन्त्रको उपभोग गर्दै जाँदा यसलाई राजा र दलहरूले आफ्नो अनुकूल सदुपयोग र दुरुपयोग गरेको नमिठो विगत छ। जसका कारण कहिले एउटाले अर्को पक्षलाई त कहिले अर्कोले अर्को पक्षलाई निषेध गर्ने राजनीति स्थापित हुँदै गएको छ। सबै शक्ति एकताबद्ध भइ विकासको मुलप्रवाहमा समेटिन नसक्दा देश जतिखेर पनि अस्थिर, अन्यौल र कुनै न कुनै प्रकारको द्वन्द्वमा जकडिरहेको छ।

हामीभन्दा धेरै पछाडि प्रजातन्त्रको उपभोग थालेका मुलुक सबल, सक्षम र समृद्ध बनिसकेका छन् । हामी अझै कांग्रेसले प्रजातन्त्रको नाममा देखाउने दादागिरी र कम्युनिस्टको राष्ट्रिय स्वाधीनताको रक्षा भन्दै आत्मसमर्पणवादको निकृष्ट नमुना हेर्न विवश छौं।

दुई दशकदेखि नेपाल राष्ट्र निर्माणको महत्त्वपूर्ण पक्ष राजसंस्थालाई मुलप्रवाहमा निषेध गरिएको छ, प्रजातन्त्रलाई गणतन्त्रमा रुपान्तरित गर्दैगर्दा नेपाली समाजमा धिपधिपे उज्यालो देखिएपनि वास्तविक उज्यालो पुगेको छैन र पुग्ने लक्षण पनि छैन । मुठ्ठीभर मानिसका लागि गणतन्त्र स्वर्णतन्त्र हुन पुगेको छ, आम मानिस त युरोप, अमेरिका, अष्ट्रेलिया वा खाडीमा पुगिसकेका छन्, जान बाँकीको धेरै समय कसरी जाने, कहाँ जाने, कहिले जाने सोच्दै र योजना बनाउँदै बितिरहेको छ।

देशलाई बृद्धाश्रम बनाउने, आर्थिक रुपमा कमजोर र जर्जर बनाउने, परिवर्तनको लागि भनेर आन्दोलन वा क्रान्तिमा होमिएकालाई निराश बनाउने, राष्ट्रिय स्वाभिमान कमजोर बनाउने, समग्रमा देशलाई धोका दिने, पटकपटकका असफलहरुको हातमा देशको बागडोर पुग्ने व्यवस्था र संरचनाले निकटमै कुनै कायापलट हुने सम्भावना देखिन्न !

नेपाली जनताले एकपटक र अन्तिमपटक प्रयास गरेर हेर्न बाँकी छ । ००७ को परिवर्तनले राणालाई निषेध गर्‍यो, राजा महेन्द्रको ०१७ को कदमले ३० वर्षसम्म दलहरूलाई निषेध गर्‍यो, ०४६ को परिवर्तनमा माओवादी लामो समय सन्तुष्ट भएर रहन सकेन, हतियार उठायो र ०६२र६३ को परिवर्तन हुन पुग्यो, त्यसले राजसंस्थालाई निषेध गर्‍यो मात्रै होइन गरिरहेको छ।

गणतन्त्रका जतिसुकै पक्षपातीले समेत गणतन्त्र सहि रुपमा अघि बढिरहेको छ भन्ने स्विकार गर्न गार्‍हो हुने गरी देश नयाँ अन्यौलमा फसिरहेको छ। कसैले कसैलाई निषेध नगर्ने नयाँ बाटो देशले ढिलोचाँडो तय गर्नैपर्छ ।

जनताले धैर्य गर्दासम्म मात्रै हो, नत्र यथास्थितिमा देश अघि बढ्न सक्दैन कि ! ७३ औं प्रजातन्त्र दिवस मनाउँदै गर्दा सबैले उपरोक्त विषय मनन गरुन्शु- भकामना ।

-श्रेष्ठ राप्रपाका प्रवक्ता एवं प्रचार विभाग प्रमुख हुनुहुन्छ ।

काठमाडौँ । राष्ट्रपति निर्वाचनको विषयले राजनीतिक सरगर्मी बढिरहेका बेला राष्ट्रिय प्रजातन्त्र पार्टी(राप्रपा)का प्रवक्ता मोहन श्रेष्ठले राष्ट्रप्रमुख राजा हुनुपर्ने प्रतिक्रिया दिएका छन् ।

प्रवक्ता श्रेष्ठले सामाजिक सञ्जाल फेसबुकमार्फत राष्ट्रप्रमुखको रुपमा राजा हुनुपर्छ भन्ने पक्षमा निरन्तर आवाज उठाइरहेको स्मरण गराउँदै राप्रपाले दस्तावेजमै सो कुरा उल्लेख गरेको बताएका हुन् ।

उनले फेसबुकमा लेखेका छन्, ‘हामी राप्रपा त राष्ट्रप्रमुखको रूपमा राजा हुनुपर्छ भन्ने पक्षमा निरन्तर आवाज उठाइरहेका मात्रै छैनौं दस्तावेजमै उल्लेख गरेका पार्टी हौं, के हाम्रा दलहरू आफ्नो देशको राष्ट्रप्रमुख छान्न सक्षम छैनन् वा सक्षम नभएकै हुन् ?’

उनले राष्ट्रपतिमा बाह्य हस्तक्षेपको विषयमा आइरहेको चर्चालाई लिएर दलहरूले राष्ट्रप्रमुख छान्न सक्षम नभएको भन्दै आलोचना समेत गरेका छन् ।

‘आसन्न राष्ट्रपति निर्वाचनका सम्भावित उमेदवारमा अमुक राष्ट्रको यो रुचि र यो लबिङ छ भन्ने खालका पात्र समेत तोकिएका समाचारले हाम्रो निर्णायकत्व कमजोर रहेको प्रत्याभूत गराउँदछ । उनले भनेका छन्, ‘सार्वजनिक सञ्चारमाध्यमले त्यस खालका समाचार निरुत्साहित गर्नुपर्नेमा झन् प्रोत्साहित गर्दैगर्दा आन्तरिक मामिलामा वैदेशिक हस्तक्षेपलाई स्विकार गरेको मात्रै होइन हस्तक्षेपलाई आमन्त्रण गरेको प्रतित भइरहेको छ ।’

यस्तै, संविधान र संवैधानिक व्यवस्थासँग सहकार्य गर्ने राप्रपाको घोषित नीति रहेको प्रस्ट पार्दै श्रेष्ठले राष्ट्रपतिको निर्वाचनमा पार्टीको धारणा उपयुक्त समयमा सार्वजनिक गर्ने बताएका छन् ।

काठमाडौं । राजनीतिक स्थिरताका लागि राप्रपाले सरकार निर्माणमा सहयोग गरेको जनाएको छ ।

प्रवक्ता मोहन श्रेष्ठका अनुसार सरकारमा सहभागीताबारे पार्टीमा कुनै छलफल नभएको र कुनै औपचारिक शर्त नराखेको जनाउनु भएको छ । सामाजिक संञ्जाल नेता तथा कार्यकर्ता र सुभेच्छुकहरु बाट जिज्ञासा आएपछि पार्टी प्रवक्ता श्रेष्ठले सामाजिक सञ्जाल मार्फत स्पष्टिकरण दिनु भएको छ ।

उहाँले लेख्नुभएको छ-

केही साथीहरूको प्रश्न छ- सरकार गठनको दाबीका लागि १६९ को समर्थन छ, राप्रपाको १४ नहुँदा के फरक पर्थ्यो ? चार बजेसम्म (७८ं-३२ं-२०ं-१४-१४-४) मात्रै थियो । राष्ट्रपतिले दिनुभएको समयसीमा साँझ पाँच बजेसम्ममा १६९ पुगेको हो । त्यसअघि नै चारवटा दलको हस्ताक्षर भइसकेको थियो । पार्टीको आधिकारिक निर्णय लिएर राष्ट्रपति कार्यालय गइसकेपछि ल भइगयो, तपाईहरुको पुग्यो, हामी सहभागी हुँदैनौं भन्नु राजनीतिक एवं नैतिक हिसाबले अनुचित हुने थियो।

अर्को कुरा जति धेरै संख्याको सहभागीता भयो त्यसले बलियो सरकार निर्माण गर्दछ । बलियो सरकारले राजनीतिक स्थिरताको सुनिश्चितता गर्दछ । एउटा जिम्मेवार राजनीतिक दलको रुपमा राप्रपा अस्थिरताको पक्षमा थिएन, छैन ।

राजनीतिक स्थिरताका लागि राप्रपाले सरकार निर्माणमा सहयोग गरेको हो । सरकारमा सहभागीताबारे पार्टीमा कुनै छलफल भएकै छैन, हामीले कुनै औपचारिक शर्त राखेकै छैनौं ।