एजेन्सी । भारतीय क्रिकेट बोर्ड (बीसीसीआई)ले २०२२–२३ सिजनका लागि खेलाडीहरुसँग केन्द्रीय सम्झौता घोषणा गरेको छ । रविन्द्र जडेजा आइतबार राति जारी भएको सम्झौतामा बढुवा भएका छन् ।

उनी कप्तान रोहित शर्मा, विराट कोहली र जसप्रित बुमराहको ए प्लस ग्रेडमा सामेल भएका छन् । उनीहरुले ७–७ करोड रुपैयाँ पाउनेछन् । यो सम्झौता अक्टोबर २०२२ देखि सेप्टेम्बर २०२३ सम्म जारी गरिएको हो ।

यसैगरी, हार्दिक पाण्ड्या, रविचन्द्रन अश्विन, मोहम्मद शामी, ऋषभ पन्त र अक्षर पटेल ए ग्रेडमा परेका छन् । ती सबैले वार्षिक ५–५ करोड रुपैयाँ पाउनेछन् ।

हार्दिक पाण्ड्या यही ग्रेडमा फर्किँदा अक्षर पटेललाई बढुवा गरिएको छ । यस्तै, रविचन्द्रन अश्विन, मोहम्मद शामी, ऋषभ पन्त यही ग्रेडमा आफ्नो स्थान कायम राख्न सफल भएका छन् । ओपनर केएल राहुल घटुवा हुँदै बी ग्रेडमा झरेका छन् ।

ओपनर शुभमन गिल र सूर्यकुमार यादव ग्रेड बी मा बढुवा भएका छन् । शार्दुल ठाकुरलाई बी बाट सी मा धकेलिएको छ । बी ग्रेडका खेलाडीले वार्षिक ३ करोड पाउँछन् भने सी ग्रेडका खेलाडीले १ करोड पाउँछन् ।

टेस्ट स्पेशलिस्ट ब्याट्सम्यान अजिंक्य रहाणे, फास्ट बलर इशान्त शर्मा, भुवनेश्वर कुमार र मयंक अग्रवाल केन्द्रीय सम्झौताबाट बाहिरिएका छन् ।