लन्डन: यस वर्षको पुरुष एकलतर्फको विम्बल्डन टेनिस प्रतियोगिता स्पेनी युवा खेलाडी कार्लोस अल्काराजले हात पारेका छन् । उनले डिफेन्डिङ च्याम्पियन नोभाक जोकोभिचलाई ३–२ सेटले पराजित गरी महत्वपूर्ण ग्रान्डस्लाम उपाधि जितेका हुन् ।

गएराति भएको निकै प्रतिस्पर्धात्मक खेलमा अल्काराजले १–६, ७–६, ६–१, ३–६, ६–४ सेटले जोकोभिचलाई परास्त गरेका थिए । पहिलो र चौथो सेटमा पराजित भएका अल्काराजले अन्तिम सेटमा सहजै ६–४ ले जितेर सनसनीपूर्ण नतिजा ल्याएका थिए ।

२० वर्षीय किशोर अल्काराजको यो पहिलो विम्बल्डन उपाधि हो । ३६ वर्षीय जोकोभिच भने लगातार पाँच विम्बल्डन उपाधि जित्ने उच्च फर्मका साथ मैदानमा उत्रेका थिए । यस्तो लाग्थ्यो, उनी नै यस प्रतियोगिताको सहज विजेता हुनेछन् । जोकोभिचले यसअघि २३ वटा ग्रान्डस्लाम जितिसकेका छन् ।

खेल जितेपछि प्रतिक्रिया दिँदै अल्काराजले आफ्नो सपना सत्य सावित भएको बताएका छन् । उनको यो दोस्रो ग्रान्डस्लाम उपाधि हो । यसअघि उनले गतवर्ष युएस ओपनको उपाधि हात पारिसकेका छन् ।

शनिबार राति भएको महिला तर्फको एकल उपाधिमा पनि मार्केटा एन्ड्रोसोभाले खेल जितेर अप्रत्यासित नतिजा प्राप्त गरेकी थिइन् । यस खेलमा उपाधि जित्ने प्रबल सम्भावना ठानिएकी ओन्स जाबेर सोझो २ सेटमा पराजित भएकी थिइन् । एपी

Carlos Alcaraz new Wimbledon Champion, Novak Djokovic loses match.

यस वर्षको विम्बल्डन ग्रान्डस्लाम प्रतियोगिता अन्तर्गत महिला एकल तर्फको उपाधि चेकोस्लोभाकियाकी टेनिस स्टार मार्केटा एन्ड्रोसोभाले जितेकी छन् ।

शनिबार भएको यस खेलमा बिना वरियताकी २४ वर्षीया मार्केटाले उपाधि जित्ने प्रबल दाबेदार मानिएकी ओन्स जाबेरलाई सोझो सेटमा पराजित गरिन् । मार्केटाले प्रतियोगिता ६–४, ६–४ ले जितेर जाबेरलाई निराश पारिन् ।

छैटौं वरियताकी २८ वर्षीया जाबेर तीन पटक ग्रान्डस्लाम प्रतियोगिताहरुमा फाइनलमा पुगेर पनि पराजित भएकी छन् । ग्रान्डस्लाम जित्ने सपना बुनेर आएकी उनी विम्बल्डनको घाँसे कोर्टमा पराजित भएसँगै कोर्टमै रोएकी थिइन् ।

मार्केटाले यसअघि सन् २०१९ मा फ्रेन्च ओपनको फाइनलसम्मको यात्रा तय गरेकी थिइन् तर फाइनलमा उनी अस्ट्रेलियाकी आश्ले बार्टीसँग पराजित भएकी थिइन् । तर त्यसपछि उनी पटक पटक घाइते हुँदै खेल जीवनलाई नियमित रुपमा अघि बढाउन सकेकी थिइनन् । गत सिजनमा उनी विम्बल्डन खेल हेर्न आएकी थिइन् ।