काठमाडौं ।प्रधानमन्त्री वालेन्द्र शाहले भारतका प्रधानमन्त्री तथा पाकिस्तान राष्ट्रपति र प्रधानमन्त्रीप्रति कृतज्ञता ज्ञापन गर्दै उहाँहरूसँग निकट सम्पर्कमा रहेर सहकार्य गर्ने प्रतिबद्धता व्यक्त गर्नुभएको छ ।

प्रधानमन्त्री शाहले भारतका प्रधानमन्त्री नरेन्द्र मोदी, पाकिस्तानका राष्ट्रपति आसिफ अलि जर्दारी र प्रधानमन्त्री शेहेवाज शरिफबाट बेग्लाबेग्लै प्राप्त बधाई सन्देशका निम्ति सामाजिक सञ्जालमार्फत कृतज्ञता ज्ञापन गर्दै सहकार्यको प्रतिबद्धता व्यक्त गर्नुभएको हो ।

प्रधानमन्त्रीको कार्यालयको पोष्टमा भनिएको छ, PM@narendramodi, तपाईंको स्नेह र शुभकामनाका लागि धन्यवाद । हाम्रा दुई देशबीचको बहुपक्षीय सम्बन्धलाई आम जनताको समृद्धिका लागि अघि बढाउन म तपाईंसँग निकट रहेर सहकार्य गर्न इच्छुक छु ।”

त्यसैगरी, प्रधानमन्त्री शाहका तर्फबाट पाकिस्तानका सम्माननीय राष्ट्रपति, तपाईंको हार्दिक बधाइका शब्दको लागि धन्यवाद । म तपाईंको भावनाको प्रतिफलस्वरूप हाम्रो सम्बन्धलाई मैत्री र छिमेकीपना भावना अनुरूप अझ मजबुत बनाउने प्रतिबद्धता दोहोर्‍याउँछु @PresOfPakistan भनिएको छ ।

यसैगरी, Prime Minister @CMShehbaz तपाईंको हार्दिक बधाइको लागि धन्यवाद । हाम्रो द्विपक्षीय सम्बन्ध र क्षेत्रीय सहकार्य अझ मजबुत बनाउने उद्देश्यले सँगै काम गर्न म तत्पर छु, प्रधानमन्त्रीले भन्नुभएको छ ।

काठमाडौं । नवनियुक्त प्रधानमन्त्री बालेन्द्र शाह (बालेन) को पुख्र्यौली गाउँमा आज उत्सव मनाइएको छ । महोत्तरीको एकडारा गाउँपालिका–१ स्थित पुख्र्यौली गाउँ एकडारामा गाउँवासीले उत्सव मनाइएको हो ।

एकडारा गाउँपालिकाका अध्यक्ष दीपनारायण मण्डलले शाह देशकै प्रमुख कार्यकारी पद (प्रधानमन्त्री) मा नियुक्त हुँदा जिल्लामै खुसीयाली मनाइएको बताउनुभयो । “एकडारा–१ मात्र होइन् जिल्लावासीले नै खुसियाली साटासाट गर्दै उत्सव मनाइरहेका छन्”, उहाँले भन्नुभयो ।

राष्ट्रपति रामचन्द्र पौडेलले शाहलाई आज प्रधानमन्त्रीमा नियुक्त गर्नुभएसँगै एकडारावासी एकापसमा रङ, अबिर दलेर, फूलमाला लगाएर, एकापसमा अँगालो मारेर र शुभकामना तथा बधाई आदानप्रदान गरिरहेका एकडारा–१ का वडाध्यक्ष मनोज मण्डलले बताउनुभयो ।

वडाध्यक्ष मण्डलका अनुसार एकडाराको नाम इतिहासमा दर्ज भएको भन्दै पुख्र्यौली गाउँमा उत्सव मनाइएको छ । “आज एकडारावासी घरघरमा मीठो पकवान पकाएर खाने, खुवाउने गर्दैछन्, एकडारा गाउँभरि र बटुवालाई विभिन्न लड्डु, पेडा तथा मिठाइ बाँड्ने काम भइरहेको छ”, उहाँले भन्नुभयो ।

प्रधानमन्त्री शाहको घर एकडारा–१ मा पर्छ । उक्त घरमा हाल एकडारा गाउँपालिकाको कार्यालय सञ्चालनमा छ । आज साँझ एकडाराको घरघरमा दीपावली मनाउने कार्यक्रम रहेको गाउँपालिकाका अध्यक्ष मण्डलले बताउनुभयो ।

तस्बिरः रत्न श्रेष्ठ/रासस

काठमाडौं । नेपालको ४३औँ प्रधानमन्त्रीमा बालेन्द्र शाह (बालेन) नियुक्त हुनुभएको छ । राष्ट्रपति रामचन्द्र पौडेलले राष्ट्रिय स्वतन्त्र पार्टी (रास्वपा) का संसदीय दलका नेता शाहलाई प्रधानमन्त्रीमा नियुक्त गर्नुभएको हो ।

नेपालको संविधानको धारा ७६ (१) अनुसार बहुमतप्राप्त संसदीय दलको नेताका रुपमा राष्ट्रपति पौडेलले केहीबेरमा शाहलाई पद तथा गोपनीयताको शपथ गराउँदै हुनुहुन्छ ।

नवनियुक्त प्रधानमन्त्री शाह गत फागुन २१ गते सम्पन्न प्रतिनिधिसभा सदस्य निर्वाचनमा झापा क्षेत्र नं ५ बाट निर्वाचित हुनुभएको थियो । उहाँले त्यस निर्वाचनमा नेकपा (एमाले) का अध्यक्ष केपी शर्मा ओलीलाई ठूलो मतान्तरले पराजित गर्नुभयो ।

नवनियुक्त प्रधानमन्त्री शाह आयुर्वेदिक चिकित्सक डा रामनारायण शाह र धु्रवादेवी शाहका सुपुत्र हुनुहुन्छ । उहाँको जन्म विसं २०४७ वैशाख १४ गते काठमाडौँको नरदेवीमा भएको हो । उहाँको पुख्र्यौली घर महोत्तरीको एकडारा हो ।

¥याप आर्टिस्ट’का रूपमा समेत ख्याति कमाउनुभएका शाहले भारतबाट एम टेक (संरचनागत इन्जिनियरिङ) र पूर्वाञ्चल विश्वविद्यालयबाट सिभिल इन्जिनियरिङमा स्नातक गर्नुभएको छ । विसं २०७९ को स्थानीय तह निर्वाचनमा शाह काठमाडौँ महानगरपालिकाको प्रमुखमा निर्वाचित हुनुभएको थियो ।

प्रतिनिधिसभा निर्वाचनमा उम्मेदवारी दिन उहाँले गत माघ ४ गते महानगर प्रमुख पदबाट राजीनामा दिनुभएको थियो । शाहले काठमाडौँको प्रमुख रहँदा पर्यटन र अर्थतन्त्र प्रवद्र्धनका लागि नेवा संरचनाको संरक्षणमा महत्वपूर्ण योगदान दिनुभयो ।

सहरी शासन र विकास कार्यक्रमको नेतृत्व, पूर्वाधार सुधार, सम्पदा संरक्षण र सेवा प्रवाहमा सुधारमासमेत उहाँको योगदान छ । महानगरपालिकाका अवैध संरचना हटाउन, फुटपाथ तथा सहरी व्यवस्थापन गर्न योगदान दिनुभयो ।

नेपालका विभिन्न क्षेत्रमा विशेषगरी भूकम्पपछिको पुनःनिर्माण र सहरी व्यवस्थापनमा उहाँले उल्लेखनीय योगदान गर्नुभएको छ । शाहले २०७२ सालको भूकम्पपछिको पुनःनिर्माणमा सक्रिय सहभागिता जनाउनुभएको थियो ।

पुल, सडक र भवन डिजाइन तथा निर्माणमा अनुभव आर्जन गर्नुभएका शाहले सम्पदा संरक्षण तथा संरचनागत संरक्षण, पर्यटनमार्फत आर्थिक विकास र परम्परागत नेवा वास्तुकलामा विशेष जोड दिनुभएको छ ।

दुई दर्जनभन्दा बढी ¥याप कम्पोज गर्नुभएका शाहका सिर्जना भ्रष्टाचारको विरोध तथा सुशासनको अपेक्षा, युवा तथा सामाजिक मुद्दामा बढी केन्द्रित छन् ।

उहाँका गीतमा बेरोजगारी, असमानता, राजनीतिक विकृतिका साथै राज्य प्रणालीमाथि प्रश्न गरिएको हुन्छ ।संविधानसभाको दोस्रो निर्वाचनपछि नै शाहले ‘म नेपाल हाँसेको हेर्न चाहन्छु’ गीत सार्वजनिक गर्दै देशप्रतिको आफ्नो चिन्ता व्यक्त गर्नुभएको थियो ।

गत भदौ २३ र २४ गते भएको जेनजी आन्दोलनमा समर्थन जनाउनुभएका शाहमाथि आन्दोलनको कार्यादेश पूरा गर्नुपर्ने अभिभारा आइलागेको छ । नयाँ पुस्ताको बेचैनी र विद्रोहलाई सम्बोधन गर्दैै परिवर्तनको चाहनालाई उहाँले पूरा गर्नुपर्नेछ ।

काठमाडौं। प्रधानमन्त्रीको शपथको तयारी गरेका राष्ट्रिय स्वतन्त्र पार्टीका वरिष्ठ नेता बालेन्द्र शाह (बालेन) ले प्रधानमन्त्री पदको शपथ लिनुअघि सार्वजनिक गरेको ‘जय महाकाली’ गीतले युट्युबमा छोटो समयमै नयाँ रेकर्ड कायम गरेको छ ।

चैत १२ गते बिहीबार साँझ रिलिज भएको उक्त गीतले चैत १३ गते शुक्रबार बिहानसम्म आइपुग्दा २३ लाख २४ हजार भन्दा बढी भ्यूज बटुल्न सफल भएको हो। यस्तै २ लाख ९८ हजार भन्दा बढीले युट्युबमा लाईक र ३५ हजार भन्दा बढीले कमेन्ट समेत गरेका छन् ।

यसअघि २४ घण्टाभित्र युट्युबमा सर्वाधिक हेरिने नेपाली गीतको रेकर्ड दुर्गेश थापा र सिसन बानियाँको कोल्याब गीत ‘जाने भए जाम माया’ सँग थियो । त्यो गीतलाई सोही अवधिससम्म १६ लाख ३६ हजार पटक हेरिएको थियो ।

उक्त गीत सार्वजनिक भएको मात्र २ घण्टा १२ मिनेटमै १० लाख भ्यूज पार गरेको गीतले पहिलो एक घण्टामै १ लाखभन्दा बढी दर्शक तानेको थियो। करिब ११ घण्टाको अवधिमै २१ लाख भ्यूज नाघ्नु नेपाली युट्युब ट्रेन्डमा दुर्लभ उपलब्धि मानिएको छ ।

काठमाडाैँ । मुलुकले चैत १३ गते नयाँ प्रधानमन्त्री पाउने भएको छ। राष्ट्रिय स्वतन्त्र पार्टीका वरिष्ठ नेता बालेन्द्र शाह (बालेन) शुक्रबार प्रधानमन्त्री पद तथा गोपनीयताको शपथ ग्रहण गर्ने भएका छन्।

शपथ ग्रहण कार्यक्रम मध्याह्न १२:३४ बजेका लागि तय गरिएको बताइएको छ। समारोहलाई विशेष बनाउन विभिन्न धार्मिक तथा सांस्कृतिक विधिहरू समेत समावेश गरिएको छ।

कार्यक्रममा सात वटा शंखबाट शंखनाद गरिने, १०८ जना बटुकद्वारा स्वस्ती शान्ति वाचन गरिने तथा १६ जना बौद्ध भिक्षुबाट अष्टमंगल पाठ गरिने तयारी रहेको छ।

शपथ ग्रहणपछि प्रधानमन्त्री शाहले दिउँसो करिब सवा २ बजे सिंहदरबारस्थित प्रधानमन्त्री तथा मन्त्रिपरिषद्को कार्यालयमा पदबहाली गर्ने कार्यक्रम रहेको जनाइएको छ।

काठमाडौँ । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र साह (बालेन)ले आसन्न प्रतिनिधि सभा सदस्य निर्वाचनबारे पार्टीका उम्मेदवारहरुसँग रणनीतिक छलफल गर्नुभएको छ ।

आफ्नो निर्वाचन क्षेत्रबाट काठमाडौं फर्किनुभएका नेता साहले आईतवार चुनावी रणनीतिबारे उपत्यकाभित्रका पार्टीका उम्मेदवारसँग छलफल गर्नुभएको हो । नेता साहले उम्मेदवारहरुसँग चुनावी अभियानबारे ब्रिफिङ लिनुभएको भेटमा संलग्न नेताहरुले बताउनु भयो ।

भेटपछि सञ्चारकर्मीहरुसँग कुरा गर्दै ललितपुर–३ की उम्मेदवार समेत रहनुभएको नेतृ तोषिमा कार्कीले भेटमा चुनावी अभियानबारे नेता शाहले जानकारी लिनुभएको बताउनु भयो । उहाँले भेटमा चुनावी रणनीतिबारे समेत छलफल भएको उल्लेख गर्नुभयो । उहाँकाअनुसार नेता साहले उम्मेदवारहरुलाई आफूहरुको स्पष्ट बहुमतको सरकार बन्ने भन्दै जनता समस्या बुझ्ने कार्यमा गम्भीरतापूर्वक लाग्न आग्रह गर्नुभएको छ ।

उहाँले भन्नुभयो, ‘उहाँले हामीहरुसँग अपडेट लिनुभएको हो । अर्को, चुनावी रणनीतिको बारेमा थोरै छलफल भयो । उहाँले स्पष्ट रुपमा भन्नुभएको छ–सरकार हाम्रो बन्दैछ । ढुक्क भएर जनताको घर घरमा जानुस्, समस्या सुन्नुस् । उहाँहरुको समस्या समाधान गर्छौं, हाम्रो स्पष्ट बहुमतको सरकार बन्दैछ ।’

पार्टीकी नेतृ रञ्जु दर्शनाले चुनावी रणनीतिबारे छलफल भएको जानकारी दिनुभयो ।

उहाँले भन्नुभयो, ‘उहाँले ढुक्क भएर आफ्नो चुनावी क्याम्पेङ गरेर अगाडि बढ्नुस् भन्नुभयो । अन्य चुनावी रणनीतिको बारेमा पनि केही छलफल भयो ।’

रास्वपा नेता तथा काठमाडौं–३ का उम्मेदवार राजुनाथ पाण्डेले निर्वाचन क्षेत्रमा भइरहेको गतिविधिबारे जानकारी गराउन नेता साहसँग भेट भएको बताउनु भयो । उहाँले भेटमा चुनावी रणनीतिबारे छलफल भएको उल्लेख गर्नुभयो । उहाँले आफूहरु सौहाद्र्रपूर्ण वातावरणमा जनताको घरदैलोमा गइरहेको उल्लेख गर्दै नागरिकले परिवर्तनलाई आत्साथ गरेको पाइएको पनि बताउनु भयो ।

उहाँले भन्नुभयो, ‘काठमाडौं क्षेत्र नम्बर ३ मा के भइरहेको छ भन्नेबारे रिपोर्टिङको लागि म आएको थिएँ । हामी सौहार्द्रपूर्ण वातावरणमा जनताको घरदैलोमा गएका छौँ । नागरिकले देशमा विकसित राजनीतिक परिवर्तनलाई आत्मसाथ गरेको देखिन्छ । हामीलाई बहुमतले अनुमोदन गर्नुहुन्छ भन्ने विश्वास छ ।’

आगामी २१ फागुनमा हुने प्रतिनिधि सभा निर्वाचनका लागि नेता साहले झापा–५ बाट उम्मेदवारी दिनुभएको छ ।

काठमाडौँ । राष्ट्रिय स्वतन्त्र पार्टी (रास्वपा)का वरिष्ठ नेता तथा झापा–५ बाट उम्मेदवार बालेन्द्र शाह (बालेन)ले चढ्ने गाडीलाई लिएर सामाजिक सञ्जालमा चर्को चर्चा सुरु भएको छ।

बिहीबार बेलुकादेखि महँगो (चार करोड) बढी मूल्य पर्ने कालो रंगको ल्यान्ड रोभर डिफेन्डरको तस्बिर व्यापक रूपमा भाइरल भएपछि गाडीको स्वामित्वबारे प्रश्न उठेका हुन्।

सामाजिक सञ्जालमा गाडी बालेनकै हो वा कसैले प्रयोगका लागि दिएको हो भन्ने विषयमा विभिन्न अड्कलबाजी भइरहेका बेला उनी भने केही दिनदेखि यही गाडी प्रयोग गर्दै आएका थिए। चुनावी कार्यक्रमका लागि गत आइतबार जनकपुर पुगेका बेला पनि उनी यही गाडीमा देखिएका थिए।

यातायात व्यवस्था कार्यालय स्रोतका अनुसार उक्त ल्यान्ड रोभर डिफेन्डर रुपन्देहीको तिलोत्तमा नगरपालिका–१५, कोटिहवामा अवस्थित त्रिमूर्ति इन्डस्ट्रिज प्रालिको नाममा दर्ता छ। त्रिमूर्ति इन्डस्ट्रिज करेन्ट मसला उत्पादन गर्ने कम्पनी हो, जसका एक लगानीकर्ता कमल मालपानी हुन्।

मालपानीको स्वामित्वमा तिलोत्तमामै यसोदा फुड्स प्रालि पनि रहेको छ, जसले करेन्ट चाउचाउ, लाली चाउचाउ र करेन्ट चिजबल उत्पादन गर्दै आएको छ। त्यस्तै, बुटवल उपमहानगरपालिकामा अवस्थित श्रीराम टोबाको प्रालि पनि मालपानीकै उद्योग हो, जहाँ भोला गुट्खा र जित सुर्ती उत्पादन हुने गर्छ।

काठमाडौं । राष्ट्रिय स्वतन्त्र पार्टीका वरिष्ठ नेता बालेन शाह चुनावी अभियान अन्तर्गत इलाम पुगेका छन्।

आज बिहानै झापाबाट इलाम पुगेका बालेनले पार्टीका उम्मेदवारहरूसँग छलफल गरे।

रास्वपाबाट इलाम १ मा विमल गदाल र २ मा गोकुलबहादुर राई चुनावी मैदानमा छन्। उनीहरूसँग भेटेर बालेनले त्यहाँको अवस्थाबारे जानकारी लिएका हुन्।
तस्बिरः मिलन लिम्बु

काठमाडौँ। काठमाडौं महानगरपालिकाका पूर्वमेयर तथा राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र साह (बालेन) झापा निर्वाचन क्षेत्र नम्बर ५ बाट उम्मेदवारी मनोनयन दर्ता गर्न दमक पुगेका छन्।

मंगलबार सयौँ समर्थकका साथ बालेन निर्वाचन कार्यालय पुगेका हुन्। समर्थकहरूले नाराबाजी र झाँकीसहित उनलाई निर्वाचन कार्यालयसम्म पुर्‍याएका थिए।

झापा–५ मा बालेनको उम्मेदवारीसँगै चुनावी प्रतिस्पर्धा थप रोचक बनेको छ। रास्वपाले भावी प्रधानमन्त्रीका रूपमा प्रस्तुत गर्दै आएका बालेन र एमाले अध्यक्ष तथा पूर्वप्रधानमन्त्री केपी शर्मा ओलीबीच मुख्य प्रतिस्पर्धा हुने अनुमान गरिएको छ।

यसैबीच, नेकपाले झापा–५ मा पूर्व विद्यार्थी नेता रञ्जित तामाङलाई उम्मेदवार बनाएको छ।

काठमाडौँ । राष्ट्रिय स्वतन्त्र पार्टीका वरिष्ठ नेता बालेन्द्र साह बालेनले रास्वपाले संघीयतालाई अझ बलियो बनाएर लैजाने बताउनुभएको छ ।

जनपुरधाममा पार्टीले आयोजना गरेको कार्यक्रमलाई सम्बोधन गर्दै उहाँले यस्तो बताउनुभएको हो । उहाँले प्रदेशको काम अझ राम्रो र बलियो बनाउने आफूहरुको उद्देश्य रहेको बताउनु भयो । जनकपुर मधेस प्रदेशको राजधानी भएपनि अधिकारका लागि काठमाडौं धाउने गरेको आफूले देखेको र महानगरको प्रमुख हुँदा मुकदर्शक मात्रै बनेको बताउनु भयो । उहाँले काठमाडौं अधिकार माग्न नभइ घुम्न मात्रै जाने स्थिति निर्माण आफूहरुले गर्ने बताउनु भयो ।

उहाँले भन्नुभयो, ‘म जनकपुर आएपछि धेरैले भने राष्ट्रिय स्वतन्त्र पार्टीको संघीयताप्रतिको धारणा के हो ? प्रदेश अझै बलियो बनाउँछौँ । प्रदेशको काम अझ राम्रो बनाउनेछौँ । जनकपुर प्रदेशको राजधानी हो । काठमाडौं कामका लागि किन धाउने ? संघीयतालाई अझ बलियो बनाउने गरी हामी लाग्नेछौँ । काठमाडौं अधिकार माग्न जाने होइन, घुम्न जाने हो । अधिकार माग्नका लागि काठमाडौं जानुपर्ने बाध्यता हटाउनुपर्छ ।’

उहाँले चार वर्ष काठमाडौं महानगरपालिकाको मेयर भएर काम गर्दा भषण दिने फुर्सद नभएको बताउनु भयो ।

काठमाडौं । राष्ट्रिय स्वतन्त्र पार्टी (रास्वपा)का वरिष्ठ नेता तथा काठमाडौं महानगरपालिकाका मेयर बालेन शाहले मेयरको जिम्मेवारी सम्हाल्दा पनि जनताका गम्भीर समस्या समाधान गर्न नसकेको स्वीकार गरेका छन्।

सोमबार जनकपुरमा आयोजित रास्वपाको सभालाई सम्बोधन गर्दै उनले काठमाडौंमा उखु किसानदेखि मिटरब्याज पीडितसम्मले माइतीघर मण्डलामा आन्दोलन गर्दा पनि आफू मुकदर्शक बनेर बस्न बाध्य भएको बताए।

‘म करिब चार वर्ष काठमाडौंको मेयरको रूपमा बसेँ। कोही मान्छेको भेट पनि गरिनँ। दैनिक माइतीघर मण्डलामा उखु किसानको आन्दोलन भयो, मिटरब्याज पीडितको आन्दोलन भयो। तर हामी मुकदर्शक भएर बस्नुपरेको थियो,’ बालेन शाहले भने।

उनले त्यस समय काठमाडौं महानगरपालिकाको नेतृत्वमा रहेर धेरै कुरा गर्न नसकेको खुलेर स्वीकार गरे। यद्यपि, मेयरको हैसियतमा देशभरका ३५ पालिकामा एम्बुलेन्स पुर्‍याउन सफल भएको उल्लेख गर्दै संघीय सरकारको नेतृत्वमा पुगेमा अझ धेरै काम गर्न सकिने दाबी गरे।

‘काठमाडौंको मेयरको रूपमा केही गर्न सकिएन। अब गरेर देखाउँछु। काठमाडौंमा रहेर ३५ पालिकामा एम्बुलेन्स पुर्‍याउन सकेँ भने संघ सरकारमा गएँ भने कति सकिएला ?’ भन्दै उनले प्रश्न गरे।

काठमाडौं । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र साह (बालेन) पहिलोपटक पार्टी कार्यालयमा प्रवेश गरेका छन् ।

भर्खरै उनी बनस्थलीस्थित केन्द्रीय कार्यालयमा पुगेका हुन् । कार्यकर्ताहरुले उनको भव्य स्वागत गरे । उनीसँगै जेनजी अगुवा तथा हामी नेपाल नामक संस्थाका संयोजक सुदन गुरुङ पनि सहभागी छन् ।

गत पुस १३ गते एक सम्झौतामा हस्ताक्षर गर्दै बालेन रास्वपामा प्रवेश गरेका थिए । उनलाई दोस्रो वरीयतामा रहनेगरी पार्टीको वरिष्ठ नेता तोकिएको थियो ।

तर, काठमाडौं महानगरप्रमुखको जिम्मवारीमा रहेका कारण बालेन पार्टीका गतिविधिहरुमा सहभागी भएका थिएनन् । उनको औपचारिक पार्टी प्रवेश पनि भएको थिएन ।

आज बालेन पहिलोपटक रास्वपाको केन्द्रीय समिति बैठकमा भाग लिने छन् । आज केन्द्रीय समिति बैठक पनि बस्दैछ ।

यस्तै, आजै साँझ ५ बजे रास्वपा सभापति रवि लामिछाने र बालेनसहितको टोली चुनावी अभियानको सुरुवात गर्न जनकपुर प्रस्थान गर्ने कार्यक्रम रहेको छ ।

रास्वपाले बालेनलाई भावी प्रधानमन्त्रीको उम्मेदवारका रूपमा अघि सारेको छ । उनी झापा ५ बाट उम्मेदवार बन्दैछन् ।

काठमाडौँ । काठमाडौं महानगरपालिकाका मेयर बालेन साहले पदबाट राजीनामा दिएका छन् ।

मेयर शाहले उपप्रमुख सुनिता डंगोलसमक्ष राजीनामा बुझाएका हुन् । बालेन रास्वपाको कार्यालयमा प्रवेश गर्दैछन् ।

काठमाडौँ । काठमाडौँ महानगरपालिकाका मेयर बालेन शाहले माघे संक्रान्तिको अवसरमा शुभकामना व्यक्त गर्दै यो पर्व प्रकृति फेरिने दिन मात्र नभई नेपाली विविधताको संगम भएको बताएका छन्।

मंगलबार सामाजिक सञ्जाल फेसबुकमार्फत शुभकामना सन्देश दिँदै मेयर शाहले नेपालको बहुसांस्कृतिक एकतालाई जोड दिएका हुन्। उनले चर्चित गीतको अंश ‘सय थरि बाजा एउटै ताल, सय थरि गोडा एउटै चाल, सब हो एउटै हामी नेपाली, एउटै हाम्रो देश नेपाल’ उद्धृत गर्दै नेपालीपनको भाव प्रस्तुत गरेका छन्।

शाहले माघ १ गते सूर्य धनु राशिबाट मकर राशिमा प्रवेश गर्ने भएकाले यस दिनलाई मकर संक्रान्ति, तिलुवा संक्रान्ति वा माघीका रूपमा मनाइने उल्लेख गरेका छन्। साथै, नेपालका विभिन्न समुदायले यस दिनलाई आ–आफ्नै सांस्कृतिक परम्पराअनुसार मनाउने तथ्यसमेत समेटेका छन्।

उनका अनुसार नेवार समुदायले यस पर्वलाई ‘घ्यः चाकु संल्हू’ का रूपमा मनाउँछन् भने किरात समुदायले नयाँ वर्षका रूपमा ‘येले संवत्’ मनाउँछ। त्यसैगरी, थारू समुदायको मौलिक संस्कृतिले भरिएको सबैभन्दा ठूलो पर्व माघी भएको पनि उनले स्मरण गराएका छन्।

चाडपर्व मनाउने नाम र शैली फरक भए पनि सबै नेपालीको भावना एउटै रहेको उल्लेख गर्दै मेयर शाहले विविधताबीचको एकता नै नेपाली समाजको शक्ति भएको बताए। उनले सबै नेपाली जोडिने, रमाउने र उत्सव मनाउने तरिका फरक भए पनि अन्ततः सबै एकै भएको सन्देश दिँदै नयाँ सुरुवात, एकता र समृद्धिको कामना गरेका छन्।

काठमाडौँ । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र साह बालेनले डडेलधुरामा सागर ढकाललाई पार्टीको उम्मेदवार बनाउने घोषणा गरेका छन्।

डडेलधुराका पार्टी प्रतिनिधिहरूसँगको छलफलमा साहले सागर ढकाललाई उम्मेदवारका रूपमा अघि सारेका हुन्। यद्यपि, रास्वपाले अहिलेसम्म देशभर कतै पनि औपचारिक रूपमा उम्मेदवारको टुंगो लगाइसकेको छैन। पार्टीले गठन गरेको सिफारिस समितिले उम्मेदवार सिफारिस गर्न बाँकी नै छ।

पार्टीको औपचारिक निर्णयअघि नै वरिष्ठ नेताबाट उम्मेदवार घोषणा भएपछि ढकाल खुसी देखिएका थिए। यसअघि पनि ढकाल बालेन साहकै कोटाबाट रास्वपाको केन्द्रीय सदस्य बनिसकेका छन्।

यसअघि पनि डडेलधुराबाट चुनाव लडिसकेकाले ढकाललाई ‘टुरिस्ट उम्मेदवार’ भन्न नमिल्ने बालेन साहको तर्क छ। यसपटक सरकार बनाउने सम्भावना बोकेको पार्टीबाट उम्मेदवार बनेकाले ढकाल स्वतः जित्ने आधारमा रहेको बालेनको ठम्म्याईँ छ।

ढकालतर्फ इङ्गित गर्दै बालेनले भने,“उहाँ डडेलधुराबाट उम्मेदवार हुन्छ कि हुँदैन भन्नेमा कन्फ्युजन होइन। रास्वपाले डडेलधुराको उम्मेदवार सागर ढकाल पाउँछ कि पाउँदैन भन्ने चाहिँ कन्फ्युजन हो। उहाँ आफैँले नाइँ भन्नु भएन भने उहाँ नै डडेलधुराको उम्मेदवार हुनुहुन्छ।”

बालेनको भनाइपछि ढकालको अनुहारमा मुस्कान छाएको थियो भने उपस्थितहरूले ताली बजाएर समर्थन जनाएका थिए।

बालेनले थपे, “पहिले उहाँसँग पार्टी थिएन, सरकार बनाउने ग्यारेन्टी थिएन। अहिले पार्टी छ, सरकार बनाउने सम्भावना छ। संसदमा पुगेपछि बोल्ने मात्र होइन, काम गर्न पनि सक्नुहुन्छ, यो सबैभन्दा महत्त्वपूर्ण कुरा हो।”

डडेलधुरा नेपाली कांग्रेस सभापति शेरबहादुर देउवाको गृहजिल्ला हो, जहाँको एक मात्र निर्वाचन क्षेत्रबाट देउवाले निरन्तर चुनाव जित्दै आएका छन्।

अघिल्लो निर्वाचनमा ढकालले स्वतन्त्र उम्मेदवारी दिएका थिए। उक्त चुनावमा देउवाले २५ हजार ५३४ मत ल्याएर विजयी हुँदा ढकालले १३ हजार ४३ मतसहित दोस्रो स्थान हासिल गरेका थिए।

काठमाडौँ । बालेन शाहले आगामी माघ ४ गते काठमाडौं महानगरपालिकाको मेयर पदबाट राजीनामा दिने तयारी गरेका छन्। आगामी प्रतिनिधिसभा निर्वाचनमा उम्मेदवार बन्ने तयारीमा रहेका शाहले त्यसअघि पद त्याग्न लागेका हुन्।

निर्वाचन आयोगका अनुसार माघ ६ गते प्रतिनिधिसभा निर्वाचनको प्रत्यक्षतर्फ उम्मेदवारी दर्ता गर्ने दिन तोकिएको छ। सो मितिभन्दा अघि नै मेयर पदबाट राजीनामा दिने तयारी गरिएको शाह निकट स्रोतले जनाएको छ।

स्रोतका अनुसार शाहले माघ ४ गते औपचारिक रूपमा मेयर पदबाट राजीनामा दिनेछन्। त्यसपछि उनी भोलिपल्ट रास्वपाको केन्द्रीय कार्यालय घण्टीघर पुग्ने कार्यतालिका रहेको बताइएको छ।

त्यसपछि शाह मधेश प्रदेशतर्फ जाने र मधेशसहित देशका विभिन्न स्थानमा राजनीतिक सक्रियता बढाउने तयारीमा रहेको उनी निकटस्थहरूले बताएका छन्।

मेयर शाहले राष्ट्रिय स्वतन्त्र पार्टी (रास्वपा)सँग सहकार्य गर्दै अघि बढ्ने र आफू प्रधानमन्त्रीको रूपमा निर्वाचनमा जाने सहमति भइसकेको बताइएको छ।

काठमाडौँ । पछिल्लो समय नेपाली राजनीतिमा चर्चाको विषय बन्यो काठमाडौँ महानगरपालिकाका प्रमुख बालेन्द्र शाह (बालेन) र राष्ट्रिय स्वतन्त्र पार्टी (रास्वपा) सभापति रवि लामिछानेबीचको सहयात्रा ।

विभिन्न अड्कल, टिप्पणी र ‘अदृश्य शक्ति’को आरोपबीच, यो सहकार्य कसरी सम्भव भयो भन्ने विषयमा राससले यस सहयात्राको संवादको भूमिकामा रहनुभएका प्रतिनिधिसभाका पूर्व सांसद एवं रास्वपाका नेता असिम शाहसँग संवाद गरेको छ ।

फरक पृष्ठभूमि, फरक स्वभाव र फरक राजनीतिक यात्राका दुई पात्र बालेन्द्र शाह र रवि लामिछानेको एकै राजनीतिक सहयात्रा सुरु भइसकेको छ । सोही सहयात्राको पहलका लागि ‘पोस्टम्यान’को भूमिका आफूले खेलेको पूर्व सांसद शाहले बताउनुभयो ।

संवादका क्रममा उहाँले दुवै पक्षको मनस्थिति बुझ्ने, सन्देश आदानप्रदान गर्ने र भेटवार्ताको वातावरण बनाउन आफू र अर्का सहकर्मी, आफनै दाजु आसिफ शाहले गरेको पहल स्मरण गर्नुभयो । औपचारिक वार्ताले मात्र नभइ विश्वासले एकता सम्भव भएको उहाँको तर्क छ । उहाँकाअनुसार राजनीतिक गणितले नभएर व्यक्तिगत विश्वास र सम्बन्धले सहमति सम्भव भएको हो ।

“अदृश्य शक्ति होइन, दृश्य शक्ति नै हामी दुई जना हौँ”, उहाँले भन्नुभयो, “सहयात्रा सहज थिएन । रवि लामिछानेको जेल बसाइ, अदालती प्रक्रिया, प्रमुख बालेनको पारिवारिक शोक, धेरै अवरोध आए । अन्तत सभापति रिहा हुनुभयो । पुस ७ गते भेट सम्भव भयो । कति समय मिडियाबाट जोगिँदै, स्थान परिवर्तन गर्दै राति गरिएको भेटले नयाँ राजनीतिक समीकरणको आधार तयार ग¥यो ।”

यस सहयात्रा चुनावी रणनीति मात्र हो कि दीर्घकालीन राजनीतिक परिवर्तनको सङ्केत हो भन्ने प्रश्नमा नेता शाहले भन्नुभयो, “सातरआठ घण्टासम्मको गहिरो संवाद, आपसी समझदारी र देश विकासको समान लक्ष्यले यो सहयात्रालाई दीर्घकालीन बनाएको छ ।”

शाह मन र दिमाग दुवै मिलेर भएको एकता भएको बताउनुहुन्छ । यो सहयात्रा लामो समयसम्म जाने विश्वास उहाँको छ । वैकल्पिक शक्ति छरिएर हैन एकजुट हुनुपर्ने आवश्यकता बोध भएपछि दाजु आसिफ र आफूले पहल थालेको उहाँको भनाइ थियो । रास्वपाले जेनजी आन्दोलनपछि बदलिएको राजनीतिक परिस्थितिमा वैकल्पिक शक्ति एक ठाउँमा उभिने क्रमलाई जारी राखेको बताउनुभयो ।

“छरिएर रहेका वैकल्पिक शक्ति एउटै प्लेटफर्म, एउटै भाँडो आवश्यक थियो । आजको मितिमा त्यो प्लेटफर्म रास्वपा नै हो,” उहाँले भन्नुभयो । निर्वाचनअघि नै कतिपयले रास्वपा प्रधानमन्त्री र सरकार बनाउन हतार गरेको भन्ने प्रतिक्रियामा आफूहरु स्पष्ट रहेको उहाँले बताउनुभयो ।

उहाँकाअनुसार सहयात्राको मुख्य राजनीतिक सन्देश नै दुई तिहाइको सरकार र बालेन शाह प्रधानमन्त्री हो । अहिले रास्वपाले संसदीय दलको नेताका रूपमा बालेनलाई अघि सारिसकेको छ । “एक महिना अघि देश चुनावतर्फ जान्छ कि जाँदैन भन्ने अनिश्चितता थियो । संसद् पुनःस्थापनाको चलखेल र सरकार ढाल्ने प्रयास चलिरहेका थिए । तर बालेन र रवि एक ठाउँमा आएपछि देश चुनावतर्फ होमिएको छ”, उहाँले भन्नुभयो, “बालेन पक्ष चुनावका लागि अत्यन्तै निर्णायक छ । देशभर फैलिएको ऊर्जाले चुनाव टार्ने तत्वहरूलाईसमेत पछि हट्न बाध्य बनाएको छ ।”

काठमाडौँ । अन्तर्राष्ट्रिय समाचार संस्था रोयटर्सले काठमाडौँ महानगरपालिकाका मेयर बालेन शाह अब नेपालको प्रधानमन्त्री बन्ने दौडमा रहेको उल्लेख गरेको छ।

फागुन २१ गतेका लागि तय भएको निर्वाचनअघि बालेन राष्ट्रिय स्वतन्त्र पार्टी (रास्वपा)मा आबद्ध हुन सहमत भएका छन्। यससँगै रास्वपाले उनलाई संसदीय दलको नेता तथा प्रधानमन्त्रीको उम्मेदवार बनाउने निर्णय गरेको छ।

तीन दशकदेखि सत्तामा प्रभाव जमाउँदै आएका परम्परागत दलहरूलाई चुनौती दिन बालेन शाह र रास्वपाका सभापति रवि लामिछाने बीच गठबन्धन तय भएको हो। रोयटर्सले रास्वपा–बालेन सहमतिअनुसार चुनावमा रास्वपाले बहुमत हासिल गरेमा ३५ वर्षीय बालेन शाह प्रधानमन्त्री बन्ने सम्भावना रहेको उल्लेख गरेको छ। लामिछाने भने पार्टी सभापतिकै भूमिकामा रहनेछन्।

समाचारमा पूर्व टेलिभिजन प्रस्तोता लामिछाने र र्‍यापरबाट राजनीतिमा आएका बालेन शाहको सहकार्यलाई नेपाली राजनीतिमा रणनीतिक मोडका रूपमा व्याख्या गरिएको छ। यो गठबन्धन गत सेप्टेम्बरमा भएको युवाहरूको ठूलो प्रदर्शनको पृष्ठभूमिमा बनेको बताइएको छ।

भ्रष्टाचारविरुद्ध भएको उक्त आन्दोलनका क्रममा ७७ जनाको मृत्यु भएको र त्यसपछि तत्कालीन प्रधानमन्त्री केपी शर्मा ओली ले राजीनामा दिएको रोयटर्सले लेखेको छ। आन्दोलनका अघोषित नेताका रूपमा बालेन शाहलाई प्रस्तुत गर्दै, उनको सहयोगमा निर्वाचन सम्पन्न गराउन पूर्वप्रधानन्यायाधीश सुशीला कार्की को नेतृत्वमा अन्तरिम सरकार गठन भएको पनि समाचारमा उल्लेख छ।

विश्लेषक विपिन अधिकारीले रोयटर्ससँग भनेका छन्, “बालेन र उनका युवा समर्थकहरूलाई आफ्नो पक्षमा ल्याउनु रास्वपाको निकै स्मार्ट कदम हो। पुराना दलहरू आफ्ना युवा मतदाता गुम्ने डरले अहिले चिन्तित देखिन्छन्।”

यस्तै, सोमबार मात्रै कुलमान घिसिङ संरक्षक रहेको उज्यालो नेपाल पार्टीसमेत रास्वपामा समाहित हुने सहमति भएको छ। यससँगै रास्वपा वैकल्पिक राजनीतिक शक्तिको बलियो धारका रूपमा उदाएको रोयटर्सको विश्लेषण छ।

काठमाडौँ। गत भदौ २३ र २४ गते सम्पन्न ‘जेनजी आन्दोलन’ सम्बन्धमा काठमाडौँ महानगरपालिकाका मेयर बालेन्द्र (बालेन) शाहले सोमबार राष्ट्रिय मानव अधिकार आयोगमा उपस्थित भई बयान दिएका छन् ।

आयोगले उक्त आन्दोलनका क्रममा भएका गतिविधिबारे धारणा बुझ्न भन्दै मेयर शाहलाई बोलाएको थियो । सोही अनुरूप आयोग पुगेका उनले आन्दोलनसँग सम्बन्धित विषयमा आफ्नो भनाइ राखेको बताइएको छ ।

यद्यपि आयोगमा मेयर शाहले दिएको बयानको विस्तृत विवरणबारे उनका सचिवालयले कुनै आधिकारिक जानकारी सार्वजनिक गरेको छैन । आयोगले भने आवश्यक अध्ययनपछि थप प्रक्रिया अघि बढाउने जनाएको छ ।

काठमाडौँ। नेकपा (एमाले) निकट युवा संघ नेपालले काठमाडौं महानगरका मेयर बालेन्द्र साह (बालेन)ले सामाजिक सञ्जालमा प्रयोग गरेको अश्लील शब्दविरुद्ध साइबर ब्युरोमा उजुरी दिने तयारी गरेको छ।

संघका अध्यक्ष क्षितिज थेबेका अनुसार बालेनले गत शनिबार विभिन्न दल र शक्ति राष्ट्रविरुद्ध आपत्तिजनक शब्द प्रयोग गरी देशको इज्जतमाथि धावा उठाएको र समाजमा घृणा फैलाएको आरोप छ।

थेबेले बालेनको स्टाटसले मित्र राष्ट्रहरूलाई चिढाउने र नेपालको प्रतिष्ठामा आघात पु‍र्‍याउने भएकाले कारबाहीको माग गरिएको बताए। संघले आज दिउँसो २ बजे भोटाहिटीस्थित साइबर ब्युरोमा उजुरी दिने जनाएको छ।

बालेनले शनिबार राति आपत्तिजनक स्टाटस पोस्ट गरी एक घण्टा नपुग्दै हटाए पनि त्यसपछि चौतर्फी विरोध भइरहेको छ।