नेपालगञ्ज। बाँकेको खजुरामा चालु आर्थिक वर्षमा २२ हजारभन्दा बढी नागरिकले आयुर्वेद सेवा लिएका छन् ।

खजुरा गाउँपालिकाको नागरिक आरोग्य सेवा केन्द्रका अनुसार जेठ मसान्तसम्म २२ हजार ३९४ जनाले आयुर्वेद सेवा लिएका हुन् ।

आरोग्य सेवा केन्द्रद्वारा आज खजुरामा आयोजित पत्रकारका लागि आयुर्वेद सेवासम्बन्धी अभिमुखीकरण कार्यक्रममा सेवा केन्द्रका शाखा प्रमुख किरण खनालले हरेक वर्ष आयुर्वेद सेवा लिनेको सङ्ख्या बढ्दै गएको उल्लेख गर्नुभयो ।

सेवा केन्द्रले नियमित रूपमा भान्सा सुधार अभिमुखीकरण कार्यक्रम, योग सेवा, पूर्वकर्म तथा पञ्चकर्म, ज्येष्ठ नागरिक स्वास्थ्य जाँच, सुत्केरी महिलालाई दुग्धवर्द्धक औषधि (शतावरी चूर्ण) वितरण, विद्यार्थी र शिक्षकलाई अभिमुखीकरण कार्यक्रम सञ्चालन गर्दै आएको उहाँले जानकारी दिनुभयो ।

उहाँले सेवा लिनेहरूमा पुरुषभन्दा महिलाको सङ्ख्या बढी रहेको जानकारी दिनुभयो । खनालले आयुर्वेद उपचार पद्धतिप्रति नागरिकको आकर्षण बढ्दै गएको बताउँदै हाडजोर्नी, ग्यास्ट्रिक, पाइल्स, फिस्टुलालगायतका बिरामीले आयुर्वेद सेवा लिएको बताउनुभयो । उहाँले भन्नुभयो, “यसको असर र प्रभाव देखिन केही समय लाग्न सक्छ ।” सो अवसरमा सञ्चारकर्मीसहित विभिन्न व्यक्तिलाई सम्मान गरिएको थियो । पत्रकार खगेन्द्र दाहाल, चन्द्र बोहरालगायतलाई गाउँपालिका अध्यक्ष डम्बरबहादुर विकले सम्मान गर्नुभयो ।

खजुरा-३ का कार्यवाहक अध्यक्ष देउमाया थापा मगरको अध्यक्षतामा सम्पन्न कार्यक्रममा गाउँपालिका अध्यक्ष विकले अहिले नसर्ने रोग चुनौतीका रूपमा रहेको बताउँदै नसर्ने रोगका बारेमा जनचेतना बढाउनुपर्ने आवश्यकता औँल्याउनुभयो ।

उहाँले पछिल्लो समय बिस्तारै आयुर्वेद उपचार पद्धतितर्फ नागरिकको आकर्षण बढ्न थालेको बताउनुभयो । कार्यक्रममा गाउँपालिकाका प्रमुख प्रशासकीय अधिकृत दिलबहादुर पौडेल, नेपाल पत्रकार महासङ्घ बाँकेका अध्यक्ष नवीन गिरीलगायतले सचेतनामार्फत आयुर्वेदप्रतिको मानिसको धारणा परिवर्तन गराउनुपर्नेमा जोड दिनुभयो । रासस