गोवा। साफ च्याम्पियपनसिपमा नेपाल दोस्रो पटक सेमिफाइनलबाट बाहिरिएको छ ।

सन् २०१० देखि सुरु भएको यस प्रतियोगितामा आज नेपाल बङ्गलादेशसँग पराजित भएको हो । यसअघि सन् २०१६ मा भएको साफ च्याम्प्यिनसिपको सेमिफाइनलमा नेपाल भारतसँग पराजित भएको थियो ।

गोवास्थित पण्डित जवाहारलाल नेरु रङ्गशालामा आज भएको पहिलो सेमिफाइनल खेलमा बङ्गलादेशले नेपाललाई २–१ गोलअन्तरले पराजित गरेको हो ।

खेलमा पहिलो अग्रता नेपालले लिएको थियो । नेपालको लागि गीता रानाले खेलको २३ औँ मिनेटमा गोल गरिन् । दीपा शाहीले प्रहार गरेको कर्नर किकमा गीताले डि बक्स एरियाबाट गोल गर्न सफल भएकी हुन् ।

नेपालको एक शून्य गोलको अग्रता लामो समयसम्म टिक्न सकेन । खेलको पहिलो हाफको अतिरिक्त समयमा बङ्गलादेशले गोल गर्दै खेल बराबरीमा फर्कायो ।

बङ्गलादेशको लागि रितु पोर्ना चक्माले गोल गरिन् । त्यसपछि खेलको दोस्रो हाफको अतिरिक्त समयमा बङ्गलादेशकी सागुरिकाले थप एक गोल गर्दै बङ्गलादेशको जित सुनिश्चित गरिन् ।

काठमाडौं । बङ्गलादेशको पद्मा नदीमा बस खस्दा २३ जनाको मृत्यु हु्नुका साथै धेरै घाइते भएको अधिकारीहरूले बताएका छन् ।

प्रहरी निरीक्षक रसेल मोल्लालाई उदृत गर्दै एएनआईलाईले दुर्घटना रातीको समयमा भएकाले उद्धार कार्य केहि समयका लागि रोकियर उज्यालो भए पछि पुनः सुरु भएको बताए ।

उनले अहिले सम्म २३ जनाको शव बरामद गरेको उल्लेख गर्दै त्यहाँ अझै कोहि बेपत्ता हुन सक्ने बताउनु भएको छ । राति उद्धार अभियान केही हदसम्म रोकियता पनि सेना ,अग्नी नियन्त्रण सेवा प्रहरी लगायतको समूहहरूले संयुक्त उद्धार अभियान चलाइरहेको उनले बताए ।

करिब ४० जना यात्रु बोकेको बस राजबारीबाट ढाका जाँदै गर्दा ढाकाबाट १२८ किलोमिटर टाढा छदौलतदियाको “फेरी टर्मिनल” नम्बर –३ अगाडिबाट साँझ ५ः०० बजे पद्मा नदीमा खसेको जनाइएको छ ।

ढाका ट्रिब्यूनका अनुसार बुधबार साँझ राजबारीको दौलतदिया नजिक पद्मा मदीको किनारमा पारिवारिक वियोगका कारण शोकाकुल आफन्तहरू भेला भएका थिए, उद्धार टोलीहरूले यात्रु बस र नदीमा खसेका मानिसहरूको खोजी गरिरहेको थियो ।

काठमाडौँ । बंगलादेशमा विद्यार्थी आन्दोलनको करिब डेढ वर्ष भयो । सो आन्दोलनले यस्तो राजनीतिक परिवेस ल्याइदियो कि प्रधानमन्त्री नै हेलिकोप्टर चढेर विदेश भाग्नुपर्यो । त्यहाँकी तत्कालीन प्रधानमन्त्री शेख हसिना सोही आन्दोलनका कारण भागेर अहिलेसम्म पनि भारतमै छिन् । यसरी उनी भारतमा शरण लिन पुगेको घटना दक्षिण एसियाकै राजनीतिमा एउटा उदाहरणका रुपमा लिन थालियो ।

त्यो आन्दोलनका बाछिटा नेपालमा पनि परेकै हुन् । जब बंगलादेशबाट हसिना भागिन् त्यसपछि नेपालमा हुने सभा सम्मेलन तथा संसद आदिमा बंगलादेशको हालत नेपालमा पनि दाहोरिन सक्छ भन्ने आवाज गुञ्जिन थालेको हो । कतिपय नेताहरुले त बंगलादेशका प्रधानमन्त्री जस्तै हेलिकोप्टरमा भाग्ने तयारी गर्न तत्कालीन प्रधानमन्त्री केपी ओलीलाई चुनौती दिने गरेका थिए ।

हुन पनि परिस्थिति त्यस्तै बन्यो भदौको अन्तिम साता । आन्दोलन नेपालमा पनि त्यस्तै भित्रियो र एक प्रकारले भन्ने हो भने आँधीबेहरी नै आयो । बंगलादेशमा विद्यार्थी आन्दोलन थियो र यता पनि जेनजीहरुले नै जेहाद छेडे । त्यसपछि भदौ २४ गते यस्तो दिन आयो, प्रधानमन्त्री हेलिकोप्टरमै भाग्नुपर्ने अवस्था आयो ।

त्यो अन्दोलनको करिब डेढबर्षपछि त्यहाँ निर्वाचन भयो । तर निर्वाचनको परिणाम भने त्यो आन्दोलनको जस्तो आएन । जसरी आन्दोलनले युवा बर्गको माग स्थापित गर्यो र उनीहरुकै नेतृत्वको आन्दोलनले देशमा क्रान्ति गर्यो, तर आज त्यस्तै अवस्था रहेन ।

पछि बंगलादेशमा हालै आम निर्वाचन भयो । निर्वाचनमा कुल ३०० मध्ये २१२ सिट जित्दै बंगलादेश नेसनलिस्ट पार्टी (बीएनपी) विजयी भयो । यो दुई तिहाइ भन्दा बढी सिट हो । र, बिएनपी नयाँ अथवा जेनजीहरुको नभएर त्यहाँको पुरानै पार्टी हो ।

त्यस लगत्तै बंगलादेशको यही चुनावी नतिजालाई लिएर नेपालमा पनि राजनीतिक चर्चा परिचर्चा सुरु भइरहेको छ । बंगलादेशमा आन्दोलनको बलमा भएको चुनावबाट पुरानै शक्ति उदाएपछि यहाँ नयाँ भनिएका शक्तिहरुमा चिसो पसेको देखिन्छ । अनि नेपालका पुराना दलहरू नेपाली कांग्रेस, नेकपा एमाले, नेपाली कम्युनिस्ट पार्टी (नेकपा) लगायतहरु भने अहिले नै हौसिन थालेको देखिएको छ ।

दुई दिनअघि झापा पुगेका एमाले अध्यक्ष केपी शर्मा ओलीले त नेपालमा पनि बंगलादेशकै जस्तो चुनावी अवस्था हुने जिकिर गरे । बंगलादेशमा आन्दोलनबाट उदाएको दलले ६ सिट मात्र हात पारेको उदाहरण दिँदै उनले यहाँ पनि त्यही अवस्था दोहोरिने तर्क अघि सरेका थिए । चुनावमा पुरानै दल बलियो भएर आएकोमा ओली उत्साहित देखिएका थिए ।

उता रुकुम पूर्वमा नेकपाका संयोजक पुष्पकमल दाहाल प्रचण्डले पनि नेपालमा बंगलादेश जस्तै अवस्था हुने धारणा राखेका थिए । आगजनी र हिंसात्मक गतिविधि फैलाउनेहरूलाई जनताले अस्वीकार गरेको सन्देश बंगलादेशको चुनावले दिएको जिकिर उनको थियो । प्रचण्डले फेसबुकमा लोकप्रिय हुँदैमा चुनाव जित्न सकिँदैन भन्दै सामाजिक सञ्जालमा ७५ लाख फलोअर्स भएका व्यक्ति नै हारेको उदाहरण दिएका थिए ।

यता जनमत पार्टीका अध्यक्ष डा सीके राउतको सन्देश अझ स्पट थियो । उनले भनेका थिए कि विध्वंश मच्चाउँदै राजनीतिमा स्थापित हुन आएका युवालाई बंगलादेशका मतदाताले अस्वीकार गरेजस्तै नेपालमा पनि गर्नेछन् ।

यस्तै भनाई राख्दै हिले नेपालका पुराना दलका नेताहरुले अब नेपालमा पनि फागुन २१ गतेको निर्वाचनले देश जलाउने, लुट्ने र ठग्ने सिद्धान्तविहीन, नैतिकताविहीन, संघीयताविरोधी आदिलाई सफाया गर्ने बताउन थालेका छन् ।

बीएनपी बंगलादेशको पुरानै पार्टी हो, तर जुलाईमा भएको त्यहाँको क्रान्तिलाई भने यसले समर्थन गरेको थियो । आन्दोलनको नेतृत्व गरेका केही विद्यार्थीहरूले बनाएको नेसनल सिटिजन्स पार्टी (एनसीपी) ले इस्लामवादी दल जमात–ए–इस्लामीसँग गठबन्धन गरेर पनि ६ सिट मात्र जितेको छ ।

बीएनपी ४७ वर्ष पुरानो पार्टी हो । उक्त पार्टीले चार पटक सरकारको नेतृत्व गरिसकेको छ । शेख हसिना नेतृत्वको अवामी लिग र खालिदा जिया नेतृत्वको बीएनपीबिच सुरुदेखि नै प्रतिस्पर्धा थियो । अहिले पनि बंगलादेशमा त्यही अवस्था आएको टिप्पणी भइरहेको छ । बंगलादेशमा लामो समय आलापालो यी दुवै दलले नेतृत्व गर्दै आएका थिए ।

अघिल्लो चुनावमा भने अवामी लिग पार्टीलाई निर्वाचनमा भाग लिन प्रतिबन्ध लगाइएको थियो । त्यसैले निर्वाचन परिणामलाई लिएर शेख हसिना प्रश्न उठाएकी छिन् । बीएनपी र अवामी लिगबिच तात्विक फरक देखिँदैन । यसपटक बीएनपीको नेतृत्व नयाँ नेता तारिक रहमानको हातमा पुगेको छ । उनी पूर्वप्रधानमन्त्री खालिदा जियाका छोरा हुन् ।

अर्काे कुरा के पनि छ भने प्रधानन्त्री नियुक्त तारिकमाथि भ्रष्टाचारको आरोप छ । आमा प्रधानमन्त्री भएको बेला त्यसको गलत फाइदा लिएको टिप्पणीहरु उनीमाथि प्रायः भइरहेकै हुन्छ । खालिदा जियाको केही महिनाअघि निधन भएको थियो । संसदमा दुईतिहाइ सिटका साथ तारिक बंगलादेशको नयाँ प्रधानमन्त्री बनिसकेका छन् ।

उस्तै आन्दोलन, उस्तै सन्देश बोेकेको बंगलादेश र नेपालको तुलना गर्दा पुरानै दलले नेपालमा पनि चुनाव जितेर आउँदा नेपालमा के होला भन्ने चर्चा अहिले आएर सुरु भएको छ । यता मतदाताले नयाँ कि पुरानै पार्टीलाई पत्याउलान् त भन्ने चर्चा केही दिनयता सुरु भएको छ । त्यसैले फेसबुकबाटै चुनाव लडिरहेका र पुरानै शैली र ढर्रामा गाउँ गाउँ र निर्वाचनको मोर्चामा लडिरेहका पार्टी र उम्मेदबारबीच बंगलादेशको निर्वाचनको सन्देश पुगेकै छ । तर त्यसको परिणाम के होला भन्ने दुविधा भने यो चुनावले झनै बढाइदिएको देखिन्छ ।

ढाका। बंगलादेशको अवामी लिगले शेख हसिनाविरुद्ध लगाइएका ‘झुटा मुद्दा’ र देशमा धार्मिक अल्पसंख्यकमाथि भइरहेको उत्पीडनको विरोधमा आमहडताल र राष्ट्रव्यापी नाकाबन्दीलगायत राजनीतिक कार्यक्रमको घोषणा गरेको छ।

पार्टीले मंगलबार राति एक विज्ञप्ति जारी गर्दै आफ्नो आगामी आन्दोलनको कार्यक्रम र मागको खाका प्रस्तुत गर्दै यदि अधिकारीहरूले उनीहरूको गतिविधिमा बाधा पुर्‍याउने प्रयास गरेमा कडा कदम चाल्ने बताएको छ ।

पार्टीको आधिकारिक वक्तव्यअनुसार, कार्यक्रमहरू निम्नानुसार सञ्चालन गरिनेछः शनिबार (फेब्रुअरी १) देखि बुधवार (फेब्रुअरी ५) सम्म पार्टी सदस्यहरूले पर्चाहरू वितरण गर्नेछन् भने बिहीबार (फेब्रुअरी ६) मा विरोध प्रदर्शन र जुलुस निकालिनेछ ।

फेब्रुअरी १० मा दोस्रो विरोध प्रदर्शन तथा जुलुश गर्ने र फेब्रुअरी १६ मा पार्टीले देशव्यापी नाकावन्दी गर्नेछ; र फेब्रुअरी १८ मा बिहानैदेखि साँझसम्म ‘आम हडताल’ गरिनेछ । ‘देशका जनताको राजनीतिक र लोकतान्त्रिक अधिकार प्राप्तिका लागि यी कार्यक्रमहरूमा कुनै प्रकारको अवरोध आएमा थप कडा कार्यक्रम घोषणा गरिने’ अवामी लिगले चेतावनी दिएको छ ।

मुख्यतया शेख हसिनाविरुद्ध लगाइएका कानुनी मुद्दाहरू फिर्ता लिन माग गर्दै पार्टीको विरोध प्रदर्शन घोषणा गरिएको हो । आन्दोलनका कार्यक्रममा पूर्व प्रधानमन्त्री शेख हसिनाविरुद्ध दायर गरिएको ‘झूट्टा हत्या मुद्दा’, र ‘अवैध आईसीटी न्यायाधिकरणलगायत सबै प्रकारका गैरकानुनी’ मुद्दाहरू खारेज गर्न भनिएको छ ।

यसबाहेक, अवामी लिगले विशेष गरी “हिन्दू–बौद्ध–इसाईहरू सहित धार्मिक अल्पसंख्यकहरूको आक्रमण र नरसंहार र विभिन्न धार्मिक तीर्थस्थलहरूमा आक्रमण र तोडफोड“ लाई सङ्केत गर्दै आफ्नो आन्दोलनलाई बङ्गलादेशमा धार्मिक अल्पसङ्ख्यकहरूको हिंसा र उत्पीडनको प्रतिक्रियाको रूपमा तयार पारेको बताएको छ ।

पार्टीले वर्तमान् प्रशासनद्वारा भइरहेका भनिएका हत्या रोक्न र सबै नागरिकको सुरक्षा सुनिश्चित गर्न पनि माग गरेको छ । गत अगस्ट ५ मा शेख हसिनालाई सत्ताच्युत गरेपछि अवामी लिगको यो पहिलो ठूलो सडक परिचालन हो । यद्यपि, पार्टीले यी विरोध प्रदर्शनहरू कार्यान्वयन गर्न महत्त्वपूर्ण तार्किक र राजनीतिक चुनौतीहरूको सामना गरिरहेको छ।

आवामी लिगका धेरै नेता र कार्यकर्ताहरू कानुनी कारबाही र लक्षित आक्रमणको डरका कारण हाल देशभित्र वा विदेशमा विस्थापित बनेका छन् । सदस्यहरूको ठूलो सङ्ख्या विस्थापित बनेको अवस्थामा घोषित प्रदर्शनहरूमा सहभागिता र तिनीहरूको प्रभावकारिता अनिश्चित छ । रासस

काठमाडौँ । बंगलादेशको अन्तरिम सरकारले राजधानी ढाका र देशका अन्य ठाउँमा बढ्दो वायु प्रदुषणका कारण व्यक्तिगत स्वास्थ्य जोखिम भएका मानिसहरूलाई घरभित्रै बस्न आग्रह गरेको छ ।

नागरिकलाई बाहिर निस्किँदा मास्क लगाउन सल्लाह दिएको छ । वातावरण, वन तथा जलवायु परिवर्तन मन्त्रालयले ढाकामा एक विज्ञप्ति जारी गर्दै ढाका र आसपासका क्षेत्रमा वायुको गुणस्तर अस्वस्थकर रहेको जनाएको छ । विश्व स्वास्थ्य संगठन (डब्लुएचओ) का अनुसार वायु प्रदुषणले हरेक वर्ष विश्वभर ७० लाख मानिसको ज्यान लिन्छ ।

जसको मुख्य कारण स्ट्रोक, मुटु रोग, क्रोनिक अब्सट्रक्टिभ पल्मोनरी डिजिज, फोक्सोको क्यान्सर र तिब्र श्वासप्रश्वास संक्रमणबाट हुने मृत्युदरमा वृद्धि भएको छ ।

काठमाडौं । नेपालको बिजुली आजदेखि बंगलादेशमा निर्यात हुने भएको छ ।

भारतको केन्द्रीय विद्युत् नियमन आयोग (सीईआरसी) ले नेपाललाई बंगलादेशमा विद्युत् निर्यात गर्न अनुमति दिएसँगै नेपालबाट बंगलादेशमा विद्युत् निर्यात हुने भएको हो ।

शुक्रबार मध्याह्न १२:४५ बजेबाट ४० मेगावाट विद्युत् निर्यात हुने नेपाल विद्युत् प्राधिकरणका प्रवक्ता चन्दन घोषले जानकारी दिए । उनले भने, ‘भोलिबाट नेपालको बिजुली बंगलादेश निर्यात हुने छ । भोलि १२ः४५ बजेबाट ४० मेगावाट विद्युत् निर्यात गर्ने छौं।’

१७ असोजमा नेपालबाट भारतको बाटो हुँदै ४० मेगावाट विद्युत् बंगलादेश निर्यात गर्ने विषयमा तीन देशका कम्पनीबीच सम्झौता भएको थियो । नेपाल विद्युत् प्राधिकरणले प्रतियुनिट करिब ८ रुपैयाँ ६४ पैसा (६.४ अमेरिकी सेन्ट) का दरले बंगलादेशलाई विद्युत् निर्यात गर्ने सम्झौतामा उल्लेख छ ।

काठमाडौँ । बंगलादेशमा अल्पसंख्यक समुदायमाथि भइरहेको आक्रमण र अत्याचार तत्काल बन्द गर्न लगायतका विषयमा ध्यानाकर्षण गराउँदै नेपालस्थित बंगलादेशी राजदुतावास अगाडि प्रदर्शन भएको छ ।

२०८१ साउन २८ गते दिउँसो मानव अधिकार तथा शान्ति समाजद्वारा काठमाण्डौ बसुन्धारास्थित बंगलादेशी राजदुतावास अगाडि आधा घण्टा प्रदर्शन गरेको हो ।

प्रदर्शनमा मानव अधिकार उल्लंघनका घटनामा निष्पक्ष छानविन गरि दोषीलाई कारबाही गर, शान्ति र सद्भाव कायम गर, अल्पसंख्यक समुदायमाथि आक्रमण र अत्याचार बन्द गर, सद्भाव बिथोल्नेलाई दण्डित गर, स्वतन्त्र निष्पक्ष निर्वाचनमार्फत लोकतन्त्रको रक्षा गर, बंगलादेश स्वतन्त्रता बिरोधी कट्टरपन्थीहरुको कृडास्थल नबनोस, बंगलादेश: उदार लोकतान्त्रिक धारा अवलम्वन गर, अल्पसंख्यकको सुरक्षा गर लेखिएका प्लेकार्ड प्रदर्शन गरिएको थियो ।

प्रदर्शनपछि शान्ति समाजका तर्फबाट बंगलादेशको अन्तरिम सरकारका प्रमुख सल्लाहकार मोहम्मद यूनुसलाई लेखिएको ज्ञापनपत्र नेपालस्थित बंगलादेशी राजदुत सलाहुद्धिन चौधरीलाई हस्तान्तरण गरिएको थियो । पत्रमा–हालै बंगलादेशमा भएको आन्दोलनको परिणाम स्वरुप गठित अन्तरिम सरकारले घृणा र प्रतिशोधको दुष्चक्रबाट बंगलादेशलाई मुक्त राख्दै सद्भावयुक्त, हिंसामुक्त र लोकतान्त्रिक मार्गमा योगदान गर्न र आन्दोलनका दौरान भएका मानव अधिकार उल्लंघनका जघन्य घटनाको निष्पक्ष छानविन गरि दोषीहरुलाई कारबाही सुनिश्चित गर्न आग्रह गरिएको छ ।

बंगलादेशमा हिंसा र अराजकता नरोकिएको घटनाप्रति चिन्ता व्यक्त गर्दै सद्भाव बिथोल्ने र अल्पसंख्यकहरु माथिको आक्रमणका घटनाको निन्दा गरिएको छ । अल्पसंख्यकहरुमाथि भइरहेको आक्रमण र अत्याचार शिघ्र रोक्न, अल्पसंख्यक लगायत सबै बंगलादेशी नागरिकहरुको सुरक्षाको प्रत्याभूति गर्न र शान्ति एवं सद्भाव कायम गर्ने दिशामा ठोस कदम चाल्न शान्ति समाजका तर्फबाट अन्तरिम सरकारलाई आग्रह गरिएको छ ।

प्रदर्शनमा शान्ति समाजका सभापति रामकृष्ण बराल, सल्लाहकार उत्तम पुडासैनी, पूर्व सभापति होमकान्त चौलागाई, महासचिव रेनुका पौडेल, सचिवद्वय रामप्रसाद जोशी र चन्द्रमणी बञ्जारा, कोषाध्यक्ष किरण ढकाल, केन्द्रीय सदस्यद्वय नम्रता खरेल र दिवाकर पुडासैनी, काठमाण्डौ शाखा सभापति भगवान पुडासैनी, ललितपुर शाखा सभापति मनबहादुर थापा, अधिकारकर्मीहरु उमा गौतम, रविना धमला, कल्पना थापा, मुना ढुंगाना, बटुकृष्ण ढुंगेल लगायत दर्जनौ अधिकारकर्मीहरुको सहभागिता थियो ।

काठमाडौँ । बंगलादेशमा आरक्षण विरोधी आन्दोलनले हिंसात्मक रुप लिएपछि प्रधानमन्त्री शेख हसिनाले सोमबार राजीनामा दिएकी छन् ।

सेना प्रमुख जनरल वकार–उज–जमानले यसको पुष्टि गरेका छन् । ढाकामा पत्रकार सम्मेलन गर्दै उनले अब सेनाले अन्तरिम सरकार बनाउने बताए । अर्कोतर्फ ढाकामा स्थिति नियन्त्रण बाहिर छ । सेना प्रमुखले जनतालाई शान्ति कायम गर्न अपिल गरेका छन् । स्थिति नियन्त्रणमा ल्याउने बताए ।

सेना प्रमुख जनरल जमानले हत्याको न्याय दिइने बताएका छन् । ‘हामीले सबै दलसँग कुरा गर्यौं । हामीबीच राम्रो कुराकानी भयो । प्रधानमन्त्री शेख हसिनाले राजीनामा दिएकी छन् । अब हामी सरकार बनाउँछौ, अन्तरिम सरकार । सम्पत्ति नोक्सान भइरहेको छ । मलाई जिम्मेवारी दिनुहोस्, म सबै काम गर्छु ।’ उनले भने ।

करिब ४ लाख मानिस सडकमा छन् । राजधानीका विभिन्न स्थानमा तोडफोड भइरहेको छ । प्रधानमन्त्री शेख हसिना प्रधानमन्त्री निवासबाट निस्किएकी छन् ।

समाचार एजेन्सी एएफपीले स्रोतलाई उद्धृत गर्दै प्रधानमन्त्री ढाका छोडेर सुरक्षित स्थानमा सरेको जनाएको छ । उनकी बहिनी रेहाना पनि उनीसँगै छिन् ।

यसै क्रममा हसिना सैन्य हेलिकप्टरबाट भारत पुगेको केही मिडिया रिपोर्टमा दाबी गरिएको छ । उनी पश्चिम बंगालमा रहेको खबर छ । तर, यो पुष्टि हुन सकेको छैन ।

काठमाडौँ । बंगलादेशमा आरक्षण विरोधी आन्दोलन सोमबार चर्किएको छ । हजारौं प्रदर्शनकारी प्रधानमन्त्री शेख हसिनाको प्रधानमन्त्री निवासमा प्रवेश गरेका छन् । यसैबीच, प्रधानमन्त्री हसिनाले प्रधानमन्त्री निवास छाडेको दाबी भइरहेको छ ।

समाचार एजेन्सी एएफपीले स्रोतलाई उद्धृत गर्दै प्रधानमन्त्री ढाका प्यालेस छोडेर सुरक्षित स्थानमा सरेको जनाएको छ । केही सञ्चारमाध्यमले प्रधानमन्त्री हसिना र उनकी बहिनी रेहानाले देश छोडेर सैन्य हेलिकप्टरबाट भारत पुगेका दाबी गरिरहेका छन् ।

बंगलादेशी पत्रिका प्रथम आलोका अनुसार धेरै ठाउँमा प्रदर्शनकारी र प्रहरीबीच झडप भएको छ । जसमा ६ जनाभन्दा बढीको मृत्यु भएको छ ।

आन्दोलनकारीले टङ्गाइल र ढाकाका महत्वपूर्ण राजमार्गहरू कब्जा गरेका छन् । करिब ४ लाख जनता हसिना सरकारविरुद्ध सडकमा उत्रिएका समाचारमा जनाइएको छ ।

बंगलादेशमा प्रहरी र विद्यार्थी प्रदर्शनकारीबीच हिंसात्मक झडप भइरहेको छ । आन्दोलनरत विद्यार्थीहरूले विवादास्पद आरक्षण प्रणाली खारेज गर्न माग गरिरहेका छन् ।

यसअन्तर्गत सन् १९७१ मा बंगलादेशको स्वतन्त्रताका लागि लडेका स्वतन्त्रता सेनानीका परिवारका लागि ३० प्रतिशत सरकारी जागिर आरक्षित गरिएको छ ।

तस्बिर: एपी/एएफपी

काठमाडौँ । बंगलादेशमा आरक्षण कोटाको बिरोधमा आन्दोलन चर्किएपछि बंगलादेशमा अध्ययनरत नेपाली विद्यार्थी स्वदेश फर्किएका छन् ।

आईतवार बिहान उनीहरु त्रिभूवन अन्तर्राष्ट्रिय विमानस्थल हुँदै स्वदेश फर्किएका हुन् । अहिलेसम्म करिव ८ सय विद्यार्थी विमानस्थल र स्थलमार्ग हुँदै स्वदेश फर्किएको सरकारले बताएको छ । बंगलादेशमा जारी आन्दोलनका कारण ३५ जना भन्दा बढीको मृत्यु भइसकेको छ । बंगलादेशमा सरकारी सेवामा रहेको कोटा प्रणाली खारेजीको माग गर्दै भएको आन्दोलनका कारण समस्या उत्पन्न भएको हो ।

आन्दोलन थप भड्किएपछि बंगलादेश सरकारले शनिवारदेखि नै कफ्र्यू आदेश जारी गरेको छ । बंगलादेशमा रहेका अन्य नेपालीहरुलाई सुरक्षित स्थानमा रहन र बाहिर ननिस्किन आग्रह गरिएको छ । बंगलादेशबाट आज नेपाल फर्किएका विद्यार्थी सदीक्षा बस्नेतले आफूहरु एमबिबिएस पढ्न ३ महिनाअघि मात्रै गएको बताउनु भयो । उहाँले अहिले बंगलादेशकी प्रधानमन्त्री शेख हसिना पनि देश छोडेर स्पेन भागेको खबर पाएको बताउनु भयो ।

उहाँले भन्नुभयो, ‘एमबिबिएस पढ्न ३ महिनाअघि मात्रै गएका थियौँ । यस्तो अवस्था आएपछि हामी तीन चार दिनअघि देखि नै आउन खोजेका थियौँ । ढाकाको कलेज हो हाम्रो । हामीले कम्युनिकेसनबाट टाढा गरेको थियो । त्यहाँको प्रधानमन्त्री भागेर स्पेन गइसक्नुभएको छ । हामीलाई नोटिस आएको दिनदेखि नै धेरै नै साथी फर्किसक्नुभएको छ । हामीलाई कलेजले सेभ छ भनिरह्यो ।’

त्यस्तै अर्का दुई विद्यार्थीले आफूहरुकै छेउछाउमा मानिसहरु मरिरहेको जानकारी पाएपछि आफूहरु त्रस्त बनेको बताए । उनीहरुले आफूहरुलाई एम्बेसीको सवारीसाधनले विमानस्थलसम्म छोडेको बताए । उहाँले भन्नुभयो, ‘हाम्रै छेउछाउमा मानिसहरु मरिरहेका थिए । बाटोमा पुलिस थिए । ठाउँ ठाउँमा बसिरहेका थिए । एम्बेसीको गाडीले ल्याइदिएको हो । नेपाल जाने भनेपछि सहजै ल्याइदिनु भयो ।’

त्यस्तै अर्की विद्यार्थी आदना सुवेदीले एम्बेसीले स्वदेश फर्काउन कुनै सहयोग नगरेको भन्दै आक्रोश व्यक्त गर्नुभयो । उहाँले फोन गर्दा समेत बंगलादेशस्थित नेपाली दुतावासले नउठाएको बताउनु भयो । उहाँले भन्नुभयो, ‘एम्बेसीले सहयोग गरेन । गाडी पठाएन । एम्बेसीले फोन पनि उठाएन ।’

परराष्ट्र मन्त्रालयले एक सूचना जारी गर्दै बङ्गलादेशमा रहनुभएका नेपाली विद्यार्थीहरू सम्बन्धमा अनलाइन निवेदन दिन अभिभावकसँग अनुरोध गरेको छ ।

काठमाडौं । बंगलादेशमा आरक्षणविरोधी आन्दोलनका क्रममा हिंसा भड्किएपछि त्यहाँ रहेका नेपाली विद्यार्थी धमाधम स्वदेश फर्किन थालेका छन् ।

हिंसात्मक आन्दोलन सुरु भएपछि करिब ८ सय नेपाली स्वदेश फर्किएको परराष्ट्र मन्त्रालयले जनाएको छ । परराष्ट्र मन्त्रालयले आज राति सामाजिक सञ्जालमार्फत् ती विद्यार्थी स्वदेश फर्किएको जनाएको हो ।

उनीहरु हवाइ र स्थलमार्ग हुँदै नेपाल आएको मन्त्रालयले जनाएको छ ।

‘हालसम्म झन्डै ८०० नेपाली विद्यार्थीले हवाई तथा स्थलमार्ग हुँदै बंगलादेश छाडेका छन्’ मन्त्रालयले भनेको छ, ‘ढाकास्थित नेपाली दूतावासले अधिकांश विद्यार्थीसँग बंगलादेशका विभिन्न स्थानहरूबाट ढाका विमानस्थल तथा सम्बन्धित सीमा नाकाहरूमा सुरक्षित यात्राका लागि समन्वय गरेको छ ।’

यसैगरी ढाकास्थित दूतावासले बंगलादेशका विश्वविद्यालयहरू, सम्बन्धित निकाय र कानुन प्रवर्तन एजेन्सीहरूसँग समन्वय गर्दै आएको पनि मन्त्रालयले जनाएको छ । नेपाल सरकार सबै नेपाली विद्यार्थीहरूको सुरक्षा सुनिश्चित गर्न प्रतिबद्ध रहेको मन्त्रालयले जनाएको छ ।

बंगलादेशमा सरकारी सेवामा रहेको कोटा प्रणाली खारेजीको माग गर्दै भएको आन्दोलन हिंसात्मक बन्दै गएपछि अन्य देशले पनि आफ्ना नागरिक धमाधम स्वदेश फर्काउँदै आएका छन् ।

काठमाडौं । सरकारले हिंसाग्रस्त बंगलादेशमा अध्ययनरत १७ जना नेपाली विद्यार्थीलाई उद्धार गरी भोलि काठमाडौं ल्याउने भएको छ ।

बंगलादेशमा आरक्षण कोटाको विरोधमा आन्दोलन चर्किँदै गएपछि त्यहाँ अध्ययनरत नेपाली विद्यार्र्थीलाई काठमाडौं फर्काउन लागिएको हो । विद्यार्थीका परिवारको माग बमोजिम १७ जना विद्यार्थीहरुलाई काठमाडौँ फर्काईंदै छ ।

प्रधानमन्त्री केपी शर्मा ओलीले राति १० बजे सामाजिक सञ्जालमार्फत् विद्यार्थीलाई फर्काउन लागिएको जानकारी दिनुभएको हो ।

विद्यार्थीका अभिभावकहरुले आज प्रधानमन्त्री ओलीसँग भेट गरी विद्यार्थीको उद्धार गरिदिन आग्रह गरेका थिए । त्यही आग्रहबमोजिम भोलि उनीहरुलाई नेपाल फर्काउन लागिएको हो ।

प्रधानमन्त्री ओलीले सामाजिक सञ्जालमा लेख्नुभएको छ– बंगलादेशको इनाम मेडिकल कलेजमा पढ्ने १७ जनालाई भोलि बिहान ४ बजे ढाका एयरपोर्टमा ल्याएर त्यसपछि काठमाडौं फर्काउने प्रबन्ध गरिएको छ । नेपाल फर्कन चाहने अन्य विद्यार्थीको सहजीकरणका लागि परराष्ट्र मन्त्रालयले अनलाइन फारम भर्न सूचना जारी गरेको छ ।’

एजेन्सी । टी–२० विश्वकपअघि बंगलादेशसँगको टी–२० सिरिज जितेर अमेरिकाले आफूलाई बलियो साबित गरेको छ । ह्युस्टनस्थित प्रेरी भ्यू क्रिकेट कम्प्लेक्समा भएको दोस्रो टी–२० खेलमा अमेरिकाले बंगलादेशलाई ६ रनले पराजित गरेको छ ।

योसँगै अमेरिकाले तीन खेलको टी–२० सिरिजमा २–० को अग्रता बनाएको छ । अमेरिकाले बंगलादेशलाई कुनै पनि फर्म्याटको सिरिजमा हराएको यो पहिलो पटक हो । टस हारेर पहिले ब्याटिङ गरेको अमेरिकाले ६ विकेट गुमाएर १४४ रन बनाएको थियो । जवाफमा ब्याटिङ गरेको बंगलादेश १९.३ ओभरमा अलआउट हुँदै १३८ रन मा समेटिएको थियो ।

अमेरिकाका ओपनर स्टिभन टेलर र कप्तान मोनांक पटेलले टोलीलाई राम्रो सुरुवात दिँदै पहिलो विकेटका लागि ४४ रनको साझेदारी गरेका थिए । रिशाद हुसेनको बलमा तान्जिद हसनले क्याच आउट गरेपछि टेलर आउट भए । उनले २८ बलको सामना गर्दै ३१ रन बनाए । कप्तान मयंक पटेलले ३८ बलमा ४२ रनको इनिङ खेले ।

टेलरपछि कप्तान पटेलले आरोन जोन्ससँग ५६ बलमा ६० रनको साझेदारी गर्दै टोलीको स्कोरलाई सम्मानजनक स्तरमा पुर्‍याउन योगदान दिए। जोन्सले ३४ बलमा ३५ रन बनाए ।

बंगलादेशका लागि शोरिफुल इस्लाम, मुस्ताफिजुर रहमान र रिशाद हुसेनले २–२ विकेट लिए ।

१४५ रनको लक्ष्य पछ्याउने क्रममा बंगलादेशको सुरुवात निकै खराब रह्यो । ओपनिङ ब्याट्सम्यान सौम्या सरकार खाता नखोलेर १ रन बनाएर पेभिलियन फर्किए । त्यसपछि बंगलादेशको दोस्रो विकेट पनि ३० रनमा खसेको थियो । तान्जिद हसन पनि १९ रन बनाएर पेभिलियन फर्किए ।

कप्तान नजमुल शान्तोले इनिङ्स सम्हालेका थिए । पहिले उनले तान्जिद हसनसँग २२ बलमा २९ रनको साझेदारी गरे । त्यसपछि उनले तौहिद हडेसँग ३७ बलमा ४८ रनको साझेदारी गर्दै टोलीलाई जित दिलाउन सक्दो प्रयास गरे पनि सफल हुन सकेनन् । शान्तोले ३४ बलमा ३६ रन बनाए ।

उनको आउट भएपछि तौहिद हुदे र शकिब हसनले इनिङ्स सम्हाल्ने प्रयास गरेका थिए । तौहिदले २१ बलमा २५ रन र शकिब हसनले २३ बलमा ३० रन बनाए ।

अमेरिकाका लागि अली खानले सर्वाधिक विकेट लिए । उनले ३.३ ओभरमा २५ रन दिएर ३ विकेट लिए । सौरभ नेत्रावलकरले ३ ओभरमा १५ रन दिएर २ विकेट लिए भने शाडले भानले २ विकेट लिए । जसदीप सिंह र कोरी एन्डरसनले पनि १–१ विकेट लिए ।

एजेन्सी । बंगलादेशको एक रेस्टुरेन्टमा भिषण आगलागी भएको छ ।

बिहीबार राति राजधानी ढाकास्थित एक रेस्टुरेन्टमा भिषण आगलागी हुदा ४३ जनाको मृत्यु भएको बीबीसीले जनाएको छ । ज्यान गुमाउनेमा महिला र बालबालिका समेत छन् ।

सात तलाको भवनमा लागेको आगो चाँडै फैलिदा दर्जनौं मानिस आगलागीमा फसेका थिए । आगलागीमा परेका ७५ जनालाई उद्धार गरी अस्पताल लगिएको छ ।

आगलागी दुई घण्टापछि नियन्त्रणमा आएको र कारणबारे अनुसन्धान भइरहेको बीबीसीले जनाएको छ ।

एजेन्सी । दक्षिण एशियाकै पहिलो पानीमुनि निर्माण गरिएको सुरुङ सञ्चालनमा आएको छ ।

शनिवारबाट बंगलादेशमा पानीमुनि निर्माण गरिएको सुरुङमार्ग यातायातका लागि सञ्चलनमा ल्याइएको हो । बंगलादेशकी प्रधानमन्त्री शेख हसिनाले सुरुङमार्गको उद्घाटन गर्नुभयो । बंगबन्धु शेख मुजिबुर रहमान सुरुङमार्गको उद्घाटन समारोहमा हसिना र चिनियाँ राजदुत याओ वेन पनि सहभागी हुनुहुन्थ्यो । राजधानी ढाकाबाट करिव २४२ किलोमिटर दक्षिणपूर्वमा रहेको सुरुङ बंगलादेश र चीन सरकारको संयुक्त लगानीमा निर्माण गरिएको हो ।

यो दुई पक्षका जनता, व्यापार र पर्यटनका लागि ठूलो अवसर भएको बंगलादेश निवासीहरु बताउँछन् । यो चीन र बंगलादेशको लागि सहकार्य झनै बढाउने अवसर भएको स्थानीय आनन्द बरुआ बताउनु हुन्छ ।

सुरुङले प्रश्तावित एशियाली राजमार्गलाई ढाका–चट्टोग्राम–कक्सबजार राजमार्गसँग जोड्नेछ । चट्टोग्रामदेखि दक्षिणपूर्वी तटीय शहर कक्स बजारसम्मको दूरी ४० किलोमिटर घटाउने छ ।

बंगलादेशमा चीनले निरन्तर सहयोग गरिरहेको उहाँको भनाइ छ ।

काठमाडौँ । बंगलादेशमा चीनद्वारा निर्मित पद्या पुल हुँदै बनेको मेगा रेल्वे अर्को महिना उद्घाटन हुने भएको छ ।

चीनद्वारा निर्मित यात्रुवाहक डिब्बासहितको रेल्वे सेवा नवनिर्मित रेल लाइनमा सञ्चालन गरी परीक्षण गरिएको हो । बेल्ट एण्ड रोड इनिसिएटिभ (बिआरआई) अन्तर्गतको १७२ किलोमिटर लामो रेलमार्ग चाइना रेल्वे ग्रुप लिमिटेड (सिआरईसी) ले निर्माण गरेको हो ।

यसमा एक्सपोर्ट—इम्पोर्ट बैंक चाइनाको लगानी छ । रेलमा बंगलादेशका रेलमन्त्री नुरुल इस्लाम सुजन, वरिष्ठ अधिकारी, सांसद र पत्रकारहरु सवार थिए । बंगालादेश र चीन बीचको आर्थिक सम्बन्ध राम्रँे रहेको र भविष्यमा अझै सहयोग हुने अपेक्षा गरेको बंगाली सांसद सैफुज्जमान शिखरले बताउनु भयो ।

उहाँले बंगलादेशका लागि यो क्षण ऐतिहासिक भएको भन्दै विगतको सपना अहिले पूरा भएको बताउनु भयो ।

त्यस्तै साढे ५ वर्ष पछिको मेहनतबाट आयोजना सफल भएकोमा पद्या रेल लिंक परियोजनाका परियोजना निर्देशक शि युआनले खुशी व्यक्त गर्नुभयो । उहाँले शनिवार रेलमार्ग परीक्षण गरेको र अर्को महिनाबाट उद्घाटन हुने बताउनु भयो । शनिवार ६ सय यात्रु बोकेर रेल गन्तव्यमा पुगेको थियो । १७२ किलोमिटर पार गर्न करिव २ घण्टा लाग्ने बताउनु भयो ।

रेल्वे सञ्चालनपछि बंगलादेशको आर्थिक विकासलाई बढावा दिने विश्वास उनीहरुको छ ।

एजेन्सी । बंगलादेशमा भीषण वर्षापछि भएका विपद्जन्य घटनाबाट प्रभावितहरुको उद्धारका लागि सैनिकहरू परिचालन गरिएको छ ।

बंगलादेशको राजधानी ढाकाबाट करिव २४० किलोमिटर दक्षिणपूर्वमा रहेको देशको चट्टोग्राम क्षेत्रमा भीषण वर्षापछि प्रभावित क्षेत्रमा उद्धार तथा राहतका लागि सैनिकहरु परिचालन गरिएको हो । चट्टोग्रामको कोक्स बजार जिल्लामा सोमवार यता भएको वर्षापछिका विपद्का कारण ६ जनाको ज्यान गइसकेको जनाइएको छ । उक्त क्षेत्र अहिले पहाडको भिरालोमा बसोवास गरिरहेका करिव १० लाख रोहिंग्या शरणार्थीहरूको घर हो ।

बंगलादेशका शरणार्थी, राहत र स्वदेश फिर्ता कमिश्नर (आरआरआरसी) मोहम्मद मिजानुर रहमानले भन्नुभयो, ‘सोमवारदेखिको भारी वर्षाका कारण दुईवटा छुट्टाछुट्टै पहिरोमा परी चार रोहिंग्याको मृत्यु भएको छ, र दुई जना घाइते भएका छन् ।’

कक्सबजार जिल्लाको दुर्गम पहाडी क्षेत्रमा पहिरोले घरको पर्खाल भत्किँदा दुई बालबालिकाको पनि मृत्यु भएको बताइएको छ । बाढी प्रभावित क्षेत्रमा आपतकालीन राहत र चिकित्सा सहायतासहितको उद्धार कार्य जारी रहेको रक्षा मन्त्रालयअन्तर्गतको अन्तरसेवा जनसम्पर्कले जनाएको छ । वर्षाका कारण बढी आश्रयस्थलहरू पूर्ण वा आंशिक रूपमा क्षतिग्रस्त भएका छन् भने बंगलादेशको बन्दरगाह शहर चट्टोग्रामलाई पनि क्षति पुर्‍याएको छ । तराईका क्षेत्रहरू डुबानमा परेका छन् र सडक यातायात अवरुद्ध भएको छ ।

देशको प्रमुख बन्दरगाह शहर चट्टोग्रामका केही भागमा सडक, लेन र बाइलेन घुँडा मुनिसम्म पानी जम्मा भएकाले चट्टोग्रामका तल्लो क्षेत्रका बासिन्दाले दिनदेखि जलमग्नताको सामना गरिरहेका छन्, जसले यात्रुहरूलाई ठूलो सास्ती खेप्नु परेको छ । बंगलादेशको पहाडी क्षेत्रहरूमा प्राय: जुनदेखि सेप्टेम्बरसम्म चल्ने मनसुनको समयमा पहिरो जाने गर्छ । किनभने सो क्षेत्रमा जमिनमा बाली उब्जाउन र नयाँ घरहरू बनाउनको लागि ठूलो मात्रामा वन विनाश भएको छ ।

काठमाडौं । भारतले आफ्नो संसद् भवनमा राखेको विवादास्पद ‘अखण्ड भारत’को नक्सालाई लिएर बंगलादेशले भारतीय विदेश मन्त्रालयसँग स्पष्टीकरण माग गर्न निर्देशन दिएको छ ।

ढाकामा पत्रकारसँग कुरा गर्दै बंगलादेशका विदेश मामिला राज्यमन्त्री शहरियार आलमले उक्त नक्साको विषयमा भारतसँग स्पष्टीकरण माग्ने प्रक्रियामा रहेको बताए ।

उनले प्राचीन भारतको साम्राज्य पूर्वदेखि पश्चिम फैलिएको देखिएको उक्त नक्सामा नेपाल र पाकिस्तानमा समेत विरोध भइरहेको जनाउदै बंगलादेशको स्वतन्त्रता र सार्वभौमिकताको लागि पनि खतरा भएकोले स्पष्टीकरण लिनुपर्ने बताए।

विदेश राज्यमन्त्री आलमको भनाइलाई उद्धृत गर्दै ढाका ट्रिब्यूनले लेखेको छ ,‘नक्सालाई लिएर व्यापक आक्रोश देखिएको छ । यसको स्थापनामा कुनै शंका छैन । यद्यपि, थप स्पष्टीकरणको लागि, हामीले दिल्लीस्थित मिसनलाई भारतको आधिकारिक धारणा के हो भनेर बुझ्नको लागि त्यहाँको विदेश मन्त्रालयसँग कुरा गर्न भनेका छौं’।

२८ मे मा भारतको नयाँ संसद भवनमा प्रधानमन्त्री नरेन्द्र मोदीले उक्त नक्सा उदघाटन गरेपछि त्यसको नेपाल र पाकिस्तानमा पनि चर्को विरोध भइरहेको छ ।

चार दिने भ्रमणमा भारत पुगेका प्रधानमन्त्री पुष्पकमल दाहाल प्रचण्डले उक्त विषयलाई नउठाएको भन्दै संसदमा प्रतिपक्षी दल नेकपा एमालेले आलोचना गरिरहेको छ । यद्यपी भारतको संसद भवनमा राखिएको उक्त नक्सा अखण्ड भारतको सांस्कृतिक नक्सा भएको र समकक्षी मोदीसँग आफूले यस विषयमा कुरा उठाएको प्रधानमन्त्रीले स्पष्टिकरण दिएका थिए ।