काठमाडौँ । इंग्लिस प्रिमियर लिग फुटबल अन्तर्गत लिभरपुल, चेल्सी र म्यान्चेस्टर सिटी तिनै क्लबले बराबरी खेलेका छन् ।

गएराति भएको खेलमा लिभरपुल नटिङहम फरेस्टसँग, चेल्सी बर्नमाउथसँग र सिटी ब्रेन्टफोर्डसँग बराबरीमा रोकिएको हो ।

नटिङहमको घरेलु मैदानमा लिभरपुल १-१ गोलको बराबरीमा रोकियो । नटिङहमका लागि खेलको आठौं मिनेटमा क्रिस वुडले गोल गरेका थिए भने ६६ औं मिनेटमा डिओगो जोटाले गोल गर्दै लिभरपुललाई हारबाट जोगाए ।

यस्तै, चेल्सी घरेलु मैदानमै बर्नमाउथसँग २-२ गोलको बराबरीमा रोकियो । चेल्सीका लागि कोल पाल्मेर र रिकी जेम्सले गोल गरे भने बर्नमाउथका लागि जस्टिन क्लिभर्ट(पेनाल्टी) र एन्टोनी सेमेन्योले गोल गरे ।

पाल्मेरले १३ औं मिनेटमा गोल गर्दै घरेलु टोलिलाई सुरुवाती अग्रता दिलाएका थिए । ५० औं मिनेटमा जस्टिनले पेनाल्टीमा गोल गर्दै बर्नमाउथलाई बराबरीमा ल्याए । त्यसपछि ६८ औं मिनेटमा एन्टोनीले गोल गर्दै बर्नमाउथलाई २-१ ले अघि बढाए । यता, इन्जुरी समयमा जेम्सले गोल गर्दै चेल्सीलाई हारबाट जोगाए ।

यस्तै, अर्को खेलमा ब्रेन्टफोर्डसँग म्यान्चेस्टर सिटी २-२ गोलको बराबरीमा रोकियो । ब्रेन्टफोर्डका लागि योआने वीसा र क्रिस्टियन नोर्डगार्डले गोल गरे भने सिटीका लागि दुबै गोल फिल फोडेनले गरे ।

यो नतिजापछि लिभरपुल २० खेलबाट ४७ अंकका साथ शीर्षस्थानमा यथावत छ । नटिङहम २१ खेलमा ४१ अंकका साथ दोस्रो स्थानमा छ । यस्तै, चेल्सी ३७ अंकका साथ चौंथो तथा सिटी ३५ अंकका साथ छैटौं स्थानमा छ भने बर्नमाउथ ३४ अंकका साथ सातौं तथा ब्रेन्टफोर्ड २८ अंकका साथ १० औं स्थानमा छ ।