काठमाडौँ । आज प्रतिनिधिसभाको बैठकमा प्रधानमन्त्री पुष्पकमल दाहालसँग प्रश्नोत्तर कार्यक्रम हुँदैछ । विहान ११ बजे बस्ने बैठकको सम्भावित कार्यसूचीमा सांसदहरुले प्रधानमन्त्रीलाई प्रश्न सोध्ने कार्यक्रम राखिएकाे छ ।

यसका लागि हालसम्म २० जना सांसदले नाम टिपाइसक्नुभएको छ । तर त्यसमध्ये १५ जना सांसदले मात्रै प्रश्न सोध्न पाउनुहुनेछ । प्रतिनिधिसभा नियमावलीको परिच्छेद ९ अनुसार प्रधानमन्त्तीलाई प्रत्यक्ष प्रश्न गर्न इच्छुक सांसदले आफ्नो प्रश्नको विषयको लिखित जानकारी बैठक सुरु हुनु तीन दिनअघि सभामुखलाई गराउनुपर्ने छ । यो व्यवस्था अनुसार २० जना सांसदले सभामुखलाई आफ्नो प्रश्नबारे जानकारी गराएको संघीय संसद सचिवालयले जनाएको छ ।

‘प्रश्न गर्दा एक दिनको बैठकमा बढीमा १५ जनाले मात्रै प्रश्न सोध्न सक्नेछन् । एउटा सदस्यले सोधेको प्रश्नको जवाफ दिइसकेपछि क्रमशः अर्को प्रश्नकर्ता सदस्यको नाम बोलाइनेछ’, प्रतिनिधिसभा नियमावलीको नियम ५६ (५)मा उल्लेख छ ।