ललितपुर। नेपाली कांग्रेसका प्रवक्ता डा. प्रकाशशरण महतले जारी केन्द्रीय कार्यसमिति बैठकमा महामन्त्री गगनकुमार थापा र सहमहामन्त्री महेन्द्र यादवले छुट्टाछुट्टै प्रस्तुत गर्नुभएको केन्द्रीय महाधिवेशन कार्यतालिकाबारे छलफल जारी रहेको जानकारी दिनुभएको छ ।

पार्टीको केन्द्रीय समिति बैठकबाट बाहिरिने क्रममा सञ्चारकर्मीलाई बैठकको बारेमा जानकारी दिँदै डा.महतले दुवै प्रस्तावमाथि धारणा राख्नेक्रम जारी रहेको बताउनुभयो ।

उहाँले भन्नुभयो, “निर्वाचन अगाडि महाधिवेशन गर्न सक्ने तर्कसहित महामन्त्रीले एउटा प्रस्ताव पेस गर्नुभएको छ, सहमहामन्त्रीले निर्वाचनपछि महाधिवेशन गर्नेगरी अर्को प्रस्ताव राख्नुभएको छ, महामन्त्री र सहमहामन्त्रीले व्यक्तिगत रुपमा पेस गरेर छलफलमा आएको प्रस्ताव बाहेक अरुले पनि फरक मिति प्रस्ताव गर्न सक्छन्, छलफल जारी छ ।”

प्रवक्ता महले सङ्कटको समयमा मतभेद गरेर तिक्तता बढाउन नहुने बताउँदै संसद् पुनःस्थापना हुन्छ भनेर बस्नेभन्दा पनि निर्वाचन हुन्छ भनेर तयारी जारी राख्नुपर्नेमा जोड दिनुभयोे ।

पार्टीका कार्यबाहक सभापति पूर्णबहादुर खड्काको सभापतित्वमा आज सुरु भएको बैठकमा महामन्त्री गगनकुमार थापा, सहमहामन्त्री महेन्द्र यादव, कोषाध्यक्ष उमेश श्रेष्ठ, सदस्यहरू कृष्णप्रसाद सिटौला, डा चन्द्रकान्त भण्डारी, डा रणबहादुर रावल, कर्णबहादुर बुढा, दिलमान पाख्रिन, कुन्दनराज काफ्ले, राधा घले र शारदा पौडेलले धारणा राख्नुभएको पार्टीका मुख्यसचिव कृष्णप्रसाद पौडेलले जानकारी दिनुभयो ।

पार्टीको जारी केन्द्रीय समिति बैठक बुधबार बिहान ११ः३० बजे बस्नेगरी आजको बैठक स्थगित भएको मुख्यसचिव पौडेलले जानकारी गराउनुभयो । रासस

काठमाडौं। नेपाली कांग्रेसका प्रवक्ता डा. प्रकाशशरण महतले सोमबार सम्पन्न पार्टीको केन्द्रीय समिति बैठकमा मन्त्री फेर्नेबारे कुनै निर्णय नभएको स्पष्ट पारेका छन्।

बैठकपछि सञ्चारकर्मीसँग कुरा गर्दै उनले मन्त्रीहरूको कार्यसम्पादनको मूल्यांकन भने नेतृत्व स्तरमै हुने जानकारी दिए। ‘मन्त्री फिर्ता बोलाउने विषयमा बैठकले निर्णय गरेको छैन,’ महतले भने, ‘कार्यसम्पादनको आधारमा परिवर्तन गर्नुपर्ने हो या निरन्तरता दिनुपर्ने भन्ने विषयमा अन्तिम निर्णय नेतृत्वले लिन्छ।’

त्यस्तै, उनले पार्टीको महाधिवेशनबारे पनि अहिलेसम्म कुनै ठोस निर्णय नभएको जानकारी दिए। फरक प्रसंगमा बोल्दै प्रवक्ता महतले सत्तारुढ गठबन्धनमा कहिलेकाहीँ असहजता देखिए पनि दुई ठूला दलहरूबीच समन्वय गरेर अघि बढ्न सकिने अवस्था रहेको बताए।

‘दुई फरक विचारधाराका दलहरू सरकारमा छन्, तर समाधान नै हुन नसक्ने जस्तो परिस्थिति छैन,’ महतले भने, ‘संविधान र स्थायित्वको पक्षमा रहनु हाम्रो साझा जिम्मेवारी हो।’

उनले अस्थिरता आउने सम्भावनालाई टार्न गठबन्धनभित्र गम्भीर संवाद भइरहेको पनि स्पष्ट पारे।

म्याग्दी। नेपाली कांग्रेसका प्रवक्ता डा प्रकाशशरण महतले सरकारले संविधान संशोधन प्रक्रिया अघि बढाउन ढिलाइ गर्न नहुने बताउनुभएको छ ।

नेपाली कांग्रेस म्याग्दीले आज बेनीमा आयोजना गरेको भेटघाट तथा अन्तरक्रिया कार्यक्रममा प्रवक्ता महतले सहमतिअनुसार संविधान संशोधनको प्रक्रिया तत्काल थालनी हुनुपर्नेमा जोड दिनुभयो ।

एक वर्षअघि नेपाली कांग्रेसको समर्थनमा नेकपा (एमाले) का अध्यक्ष केपी शर्मा ओलीको नेतृत्वमा सरकार गठन गर्दा दुई दलबीच भएको सात बुँदे सहमतिअनुसार संविधान संशोधनको काम अघि बढाउनुपर्ने उहाँको भनाइ थियो ।

“सहमति बमोजिम काम नहुँदा कांग्रेस र एमाले सत्ताका लागि एक ठाउँमा आए भन्ने सन्देश जनतामा गएको छ,” उहाँले भन्नुभयो “कांग्रेस र एमालेको सरकार गठन गर्नुको औचित्य पुष्टि गर्नका लागि पनि सरकारले संविधान संशोधनको प्रक्रिया अघि बढाउन ढिलाइ गर्नुहुदैन् ।” सरकारले ल्याएको आगामी आर्थिक वर्षको बजेटमा केही सुधार गर्ने कोसिस भए पनि अझै ठोस् र स्पष्ट रूपमा आउन नसकेको प्रवक्ता डा महतको भनाइ थियो ।

पार्टीको नीति र सिद्धान्त उत्कृष्ट भए पनि व्यक्तिवादी चरित्र हाबी हुँदा केन्द्रदेखि टोलसम्म सङ्गठन कमजोर बनेको उहाँले बताउनुभयो । क्रियाशील सदस्यतालगायतका काम बाँकी रहेकाले कांग्रेसको महाधिवेशन आउने मङ्सिरमा सम्भव नहुने नेता डा महतले बताउनुभयो । कर्मचारीलाई मुद्दा लाग्दैमा भिजिट भिसा मुद्दामा गृहमन्त्री रमेश लेखकले राजीनामा दिन आवश्यक नरहेको उहाँले बताउनुभयो । रासस