काठमाडौँ। नेपालीहरूको महान् चाड बडादशैँ २०८२ को अवसरमा नेपाली सेनाद्वारा मिति १३ आश्विनमा सैनिक मञ्च टुँडिखेलमा आयोजना हुने फूलपाती बढाई समारोहको अन्तिम तयारीको निरीक्षण प्रधान सेनापति महारथी अशोक राज सिग्देलले आज (१० आश्विन) सम्पन्न गर्नुभएको छ।

निरीक्षणपछि प्रधान सेनापतिले हवाई सुरक्षा तालिम शिक्षालयलाई युनिट झण्डा हस्तान्तरण गर्नुभएको थियो। साथै, आर्थिक वर्ष २०८१/८२ मा सञ्चालन गरिएको युद्धकार्य तयारीपन निरीक्षण–२०८१ तथा विभिन्न युद्धकार्य र पेसागत प्रतियोगितामा उत्कृष्ट प्रदर्शन गर्ने फर्मेशन र युनिटहरूलाई पुरस्कार तथा कदरपत्र प्रदान गरिएको थियो।

उक्त अन्तिम निरीक्षण कार्यक्रममा रथीवृन्द, सकलदर्जा, सैनिक परिवारका सदस्य तथा सर्वसाधारणको उल्लेख्य उपस्थिति रहेको थियो।