काठमाडौँ । प्रदीपविक्रम राणा नेपालमा असुरक्षित भएको भन्दै भारत पुगेका छन् ।

पूर्वराजा ज्ञानेन्द्र शाहको स्वागतमा आइतबार काठमाडौँमा निकालिएको जुलुसमा भारत उत्तर प्रदेशका मुख्यमन्त्री तथा भाजपा नेता योगी आदित्यनाथको तस्बिर प्रदर्शन गरेका थिए । त्यसपछि उनी विवादमा परे ।

उनले भारतीय पत्रिका नवभारत टाइम्ससँग उक्त प्रकरणपछि प्रहरी आफ्नो पछि लागेकाले भारत पुगेको प्रतिक्रिया दिएका छन् ।

उक्त पत्रिकाका अनुसार ५८ वर्षीय राणा मंगलबार नेपालबाट भागेर भारतको गोरखपुर पुगेका हुन् । उनले आफ्नो ठेगाना काठमाडौँको वडा नम्बर १६ बताएका छन् ।

नेपाल प्रहरीले आफूमाथि भारत सरकार र योगीसँग मिलेर नेपालको वर्तमान सरकारविरुद्ध षड्यन्त्र गरिरहेको आरोप लगाएको बताएका छन् ।

उनले भने– ‘मैले भारत सरकार र योगीजीसँग मिलेर नेपालको वर्तमान सरकारविरुद्ध षड्यन्त्र गरिरहेको प्रहरीको विश्वास छ । यही कारणले प्रहरी मेरो पछि लागेपछि म भागेर भारत आउनुपर्‍यो । हाम्रा राजा ज्ञानेन्द्र विक्रम सिंह नेपाल फर्किए । उनलाई स्वागत गर्न हजारौंको संख्यामा विमानस्थलमा उपस्थित थिए । यस अवधिमा मैले राजा साहेब र उत्तर प्रदेशका मुख्यमन्त्री योगी आदित्यनाथको पोस्टर सँगै राखेको थिएँ । मलाई विश्वास छ कि योगी जी हिन्दू र हिन्दुत्वको लागि निरन्तर लडिरहेका छन्, उहाँ हामी सबैका विश्वव्यापी नेता हुनुहुन्छ । धार्मिक मान्यता अनुसार पनि म उहाँलाई असाध्यै मन पराउँछु ।’

राणाले आफूले न त योगी आदित्यनाथ न त भारतका कुनै राजनीतिज्ञलाई भेटेको दाबी गरेका छन् ।

‘म हाम्रा राजा ज्ञानेन्द्र विक्रम सिंह र योगी आदित्यनाथ जी को सम्मान गर्छु । सन् २००८ मा एउटा संशोधन मार्फत परिवर्तन भएको नेपाललाई हिन्दू राष्ट्रको हैसियतमा पुर्नस्थापित गराउने म दृढ समर्थक भएको छु ।’ उनले भने ।

आफूसँग पैसाको अभाव नभएकाले यसका लागि आफूलाई कसैले उक्साएको वा प्रायोजन नगरेको राणाले दाबी गरे । वर्तमान सरकार नहटिएसम्म आफू नेपाल नफर्किने उनले दाबी गरे ।