काठमाडौँ । जनता समाजवादी पार्टी, नेपालका सांसद प्रकाश अधिकारीले देशमा सुशासन बिग्रिएको बताउनुभएको छ ।

बुधवार राज्य व्यवस्था समितिको बैठकमा नेपाल प्रहरी सम्बन्धी कानूनलाई संशोधन गर्न बनेको विधेयक माथि सैद्धान्तिक छलफलमा भाग लिँदै उहाँले यस्तो बताउनुभएको हो ।

उहाँले जनतामा विश्वास डग्मगाएको बताउनु भयो । भातको गाँस खाँदा पनि सुरक्षा निकायको आवश्यकता महशुस गरिएको ठाउँमा सुरक्षाका निकायप्रति जनताले विश्वास गुमाउँदै जाने परिस्थिति निर्माण हुनु दुःखद् भएको बताउनु भयो । संघीयताको आधारमा देश नचल्ने हो भने अहिलेका विकृति नहट्ने बताउनु भयो ।

सांसद अधिकारीले भन्नुभयो, ‘देशमा सुशासन बिग्रिएको छ । जनतामा विश्वास डग्मगाएको छ । प्रहरी आज, सुरक्षा निकायको आवश्यकता भातको गाँस खाँदा पनि प्रहरीको आवश्यकता छ । हाम्रो जीवन त्यस्तो भएको छ । घरमा श्रीमान श्रीमतीको झगडामा पनि प्रहरीको आवश्यकता छ । सामाजिक अवस्था यसरी विकास भएको छ । ढिलो गरी विधेयक आयो तर आएकोमा राम्रो भएको छ । अब ढिलाइ हुनु हुँदैन । हामी संघीय लोकतान्त्रिक पद्धतिमा प्रवेश गरेका छौँ । संघीयताको आधारमा नचल्ने हो भने अहिलेका बेथिति हट्दैनन् । यि बेथितिहरु सिर्जना भएको यसै कारणले हो ।’

सांसद अधिकारीले कानूनको अभावले प्रहरी निकाय नै चेपुवामा परेको बताउनु भयो । जनतामा विश्वास पैदा गराउनु आवश्यक रहेको बताउनु भयो ।

काठमाडौँ । जनता समाजवादी पार्टी, नेपालका सांसद प्रकाश अधिकारीले तराईलाई मरुभूमिकरण हुनबाट रोक्न सरकारले ध्यान दिनुपर्ने बताउनुभएको छ ।

बुधवार प्रतिनिधि सभाको बैठकमा बोल्दै सांसद अधिकारीले तराईमा जल सतह ४०० फिटभन्दा तल गइसकेको भन्दै यसले तराईलाई मरुभूमि बनाउँदै लगेको बताउनु भयो । उहाँले तराई/मधेसलाई मरुभूमीकरण हुनबाट जोगाउन सरकारले यथोचित प्रयास गर्नुपर्ने बताउनु भयो । उहाँले चुरेमा तस्करहरुले गिट्टी, बालुवा उत्खनन् समेत गरिरहेका भन्दै चुरे विनाश हुँदै गइरहेको बताउनु भयो । चुरे बचाउन सरकारले ध्यान दिनुपर्ने उहाँले बताउनु भयो ।

उहाँले भन्नुभयो – ‘तराई मरुभूमि हुने अवस्थामा छ । त्यहाँ जल सतह धेरै तल गइसकेको छ । हिजो सय फिटमा पानी प्राप्त हुन्थ्यो भने अहिले ४०० फिटभन्दा पनि मुनी गएको छ । हिउँद लाग्दादेखि नै यो हाहाकार शुरु भएको छ । यस्तो अवस्था सिर्जना भएको छ । त्यसको सरकारको ध्यान यथोचित रुपमा पुगेको छैन । सरकारले मधेशलाई, चुरेलाई बचाएर, मधेशलाई मरुभूमीकरण हुनबाट जोगाउन, त्यहाँको उत्पादन शक्तिलाई घट्न नदिन गम्भिर प्रयास गर्नुपर्ने हुन्छ । गिट्टी, बालुवा उत्खनन् गर्ने ऐन ल्याउने सरकारले निर्णय गर्‍यो । त्यो ऐनको सरासर प्रभाव परिराखेको छ । ठाउँ ठाउँमा उत्खनन् गरेर चुरे नास गर्ने, चुरेलाई मरुभूमिकरण गर्ने योजनामा तस्करहरु लागिसकेका छन् । यसलाई रोक्ने कि नरोक्ने ? यो मधेशको लागि ठूलो समस्याको रुपमा देखापरेको छ । मधेशलाई मरुभुमि बनाए नेपालले के भोग्नुपर्ने हो ? यतातर्फ ध्यानाकर्षण गराएँ ।’

उहाँले सरकारले सन्तुलित रुपमा बजेट नदिएको भन्दै त्यसले सन्तुलित विकासमा समेत असर परेको बताउनु भयो । उहाँले सरकारले बजेटमा मधेसलाई अन्याय गरेको पनि बताउनु भयो ।