लमजुङ। ७६ औँ अन्नपूर्ण हिमाल आरोहण दिवसको अवसरमा लमजुङमा तीन जना पर्वतारोहीलाई सम्मान गरिएको छ ।

लमजुङ जिल्लाको दोर्दी गाउँपालिकामा जेठ २० र २१ गते सञ्चालन भइरहेको पर्यटन प्रवर्द्धन कार्यक्रममा गोरखाकी पर्वतारोही पूर्णिमा श्रेष्ठ, लमजुङको राइनास नगरपालिका नरेन्द्र शाही र मानराज गुरुङ सम्मानित भएको दोर्दी गाउँपालिकाका अध्यक्ष युवराज अधिकारीले जानकारी दिनुभयो ।

ट्रेकिङ एजेन्सिज एसोसिएसन अफ नेपाल (टान) गण्डकीको आयोजना तथा उद्योग तथा पर्यटन मन्त्रालय, गण्डकी प्रदेश सरकार, नेपाल पर्यटन बोर्ड, दोर्दी गाउँपालिका र अन्नपूर्ण संरक्षण आयोजना (एसीएपी) को सहकार्यमा कार्यक्रम आयोजना गरिएको टान गण्डकीका अध्यक्ष कृष्णप्रसाद आचार्यले जानकारी दिनुभयो ।

पूर्णिमा श्रेष्ठः फोटो पत्रकारितादेखि विश्व कीर्तिमानी पर्वतारोहीसम्म

पूर्णिमा श्रेष्ठ नेपालको पर्वतारोहण क्षेत्रमा छोटो समयमै असाधारण सफलता हासिल गर्ने महिला आरोहीमध्ये एक हुनुहुन्छ । गोरखाको आरुघाटमा जन्मिएकी पूर्णिमा पेसाले फोटो पत्रकार हुनुहुन्छ । सन् २०१७ मा एभरेस्ट म्याराथनको समाचार सङ्कलनका क्रममा हिमालसँग नजिकिने अवसर पाएपछि उहाँले पर्वतारोहणलाई आफ्नो जीवनको लक्ष्य बनाउनुभएको हो ।

सन् २०१८ मा पहिलोपटक सगरमाथा आरोहण गरेपछि उहाँले लगातार विश्वका अग्ला हिमालहरूमा सफलता हासिल आउनुभएको छ । उहाँले अन्नपूर्ण, धौलागिरि, मनास्लु, कञ्चनजङ्घा, मकालु, ल्होत्से र केटु लगायत आठ हजार मिटरभन्दा अग्ला आठ वटा हिमाल सफलतापूर्वक आरोहण गरिसक्नुभएको छ ।

सन् २०२१ मा उहाँ अन्नपूर्ण हिमाल आरोहण गर्ने पहिलो नेपाली महिला टोलीको सदस्य बन्नुभयो भने सोही वर्ष पासाङ ल्हामु शेर्पा अकितासँग मिलेर धौलागिरि हिमाल सफल आरोहण गर्ने पहिलो नेपाली महिला बनेर नयाँ इतिहास रच्नुभयो ।

पूर्णिमाले सन् २०२४ मा विश्वकै सर्वोच्च शिखर सगरमाथा १३ दिनभित्र तीन पटक आरोहण गर्दै विश्व इतिहासमा नयाँ कीर्तिमान कायम गर्नुभएको छ । उहाँ एकै आरोहण सिजनमा तीन पटक सगरमाथा चढ्ने विश्वकै पहिलो महिला हुनुहुन्छ । यस उपलब्धिका लागि उहाँको नाम गिनिज वल्र्ड रेकर्डमा दर्ता भएको छ ।

सन् २०२५ मा पाँचौँ तथा सन् २०२६ मा छैटौँ पटक सगरमाथा सफल आरोहण गर्दै उहाँले आफूलाई नेपालको अग्रणी महिला पर्वतारोहीका रूपमा स्थापित गराउनुभएको छ ।

उहाँको साहसिक उपलब्धिलाई अन्तरराष्ट्रिय सञ्चारमाध्यमहरूले पनि उच्च मूल्याङ्कन गरेका छन् । सन् २०२४ मा सगरमाथा तीन पटक आरोहण गरेको उपलब्धिपछि उहाँलाई सीएनएनले विश्वका सीमाना तोड्ने उत्कृष्ट ‘एक्स्ट्रिम एथ्लेट’हरूको सूचीमा समावेश गरेको थियो । आज पूर्णिमा श्रेष्ठ केवल एक सफल पर्वतारोही मात्र नभई नेपाली महिलाको साहस, दृढता र आत्मविश्वासको प्रतीकका रूपमा परिचित हुनुहुन्छ ।

नरेन्द्र शाही: पाँच पटक सगरमाथा आरोहणदेखि उद्धारसम्मको प्रेरणादायी यात्रा

नरेन्द्र शाही नेपाली पर्वतारोहण क्षेत्रमा पछिल्लो दुई दशकदेखि एकछत्र प्रभाव जमाउन सफल नाम हो । उहाँ नरेन शाही ठकुरीको नामले समेत परिचित हुनुहुन्छ । लमजुङको राइनस नगरपालिकामा जन्मिएर हिमालको काखमा आफ्नो भविष्य खोजिरहेका शाही केवल एक आरोही मात्र नभई अन्तरराष्ट्रिय स्तरका माउन्टेन गाइड, प्रशिक्षक र कुशल उद्धारकर्ताको रूपमा स्थापित हुनुहुन्छ ।

सन् २००५ मा मेरा पिक आरोहणबाट आफ्नो साहसिक यात्रा सुरु गर्नुभएका शाहीले सन् २०१७ देखि २०२४ सम्मको छोटो अवधिमा विश्वको सर्वोच्च शिखर सगरमाथाको पाँच पटक सफल आरोहण गर्नुभएको छ । उहाँको नाममा सन् २०१७ मा टोबसार पिक (६,१०० मि)को पहिलो आरोहण गर्ने कीर्तिमान समेत रहेको छ ।

नरेन्द्र शाहीको अनुभव नेपालका हिमालहरूमा मात्र सीमित छैन । उहाँले युरोपका आइसल्याण्ड, फ्रान्स, स्विजरल्याण्ड, इटाली र रुसका चुनौतीपूर्ण चुचुराहरूमा समेत सफल आरोहण गरिसक्नुभएको छ । सन् २०२४ मा मात्रै उहाँले सगरमाथा, आइसल्याण्डको हभन्नाडाल्सन्जुकर र लाबुचे पिकजस्ता शिखरहरूको सफल आरोहण गर्नुभएको छ । उहाँको यो निरन्तरको सक्रियताले नेपाली पर्वतारोहीहरूको व्यावसायिकतालाई विश्व बजारमा थप उचाइमा पु¥याएको छ ।

आरोहणका साथै उहाँले चीन र नेपालमा विभिन्न माउन्टेन गाइड कोर्सहरूमा ‘एजुकेसन चिफ’ र ‘अब्जर्भर’ को रूपमा रहेर नयाँ पर्वतारोहीहरूलाई समेत प्रशिक्षण दिँदै आउनुभएको छ । नेपाल राष्ट्रिय माउन्टेन गाइड एसोसिएसनको पूर्वप्राविधिक निर्देशक र गण्डकी अल्पाइन क्लबका संस्थापक अध्यक्षसमेत रहेका शाही हिमालयन उद्धार सङ्घको उद्धार समितिमा रहेर काम गरिसक्नुभएको छ । त्रिभुवन विश्वविद्यालयबाट स्नातक तहसम्मको शिक्षा र पर्वतारोहणमा डिप्लोमा हासिल गर्नुभएका उहाँले ‘नोल कोर्स’ र ‘हेलिकप्टर लङ लाइन रेस्क्यु’ जस्ता उच्चस्तरीय तालिमसमेत लिनुभएको छ ।

मनराज गुरुङः पर्वत, प्रज्ञा र परोपकारको सङ्गम

नेपाली पर्वतारोहण र साहसिक पर्यटनको क्षेत्रमा ‘बौद्धिक आरोही’को पहिचान बनाउनुभएका मन राज गुरुङ पछिल्लो समय एक प्रेरणादायी नाम बनेको छ । लमजुङको राइनस नगरपालिका प्यारजुङमा जन्मिनुभएका गुरुङले १५ मे २०२५ मा विश्वको सर्वोच्च शिखर सगरमाथाको सफल आरोहण गरेर आफ्नो १५ वर्ष लामो साहसिक यात्रालाई नयाँ उचाइ दिनुभएको छ ।

केवल पर्वतारोही मात्र नभई अन्तरराष्ट्रिय माउन्टेन गाइडसमेत रहनुभएका उहाँले हिमलुङ हिमाल, आमादब्लम, मेरा पिक, र अफ्रिकाको सर्वोच्च शिखर माउन्ट किलिमन्जारोजस्ता दर्जनौँ स्वदेशी तथा विदेशी हिमालको सफल आरोहण गरिसक्नुभएको छ । साहसिक पर्यटनलाई व्यवसाय र आध्यात्मिकतासँग जोड्दै उहाँले ‘बोधी एडभेन्चर्स’ मार्फत नेपालको पर्यटन क्षेत्रमा विशिष्ट योगदान पु¥याउँदै आउनुभएको छ ।

पर्वतारोहण जस्तो शारीरिक रूपमा चुनौतीपूर्ण क्षेत्रमा रहेर पनि उहाँले प्राज्ञिक क्षेत्रमा आफूलाई अब्बल प्रमाणित गरिसक्नुभएको छ । उहाँले शङ्करदेव क्याम्पसबाट व्यावसायिक अध्ययनमा स्नातकोत्तर र लुम्बिनी बौद्ध विश्वविद्यालयबाट बौद्ध धर्म र हिमाली अध्ययनमा स्नातकोत्तर गर्नुभएको छ ।

आरोहण र व्यवसायबाहेक गुरुङको पहिचान एक कुशल प्रशिक्षक र परोपकारी व्यक्तित्वको रूपमा पनि उत्तिकै बलियो छ । उहाँले नेपाली सेनाको कैशाङ ग्लेशियर ट्रेनिङ स्कुलमा हिमाल सफाइ अभियान, नेपाल प्रहरीको विपद् व्यवस्थापन तालिममा रोप रेस्क्यु प्रशिक्षण, र विभिन्न राष्ट्रिय सङ्घसंस्थाहरूमा माउन्टेन रेस्क्यु तथा नेभिगेसन प्रशिक्षकको रूपमा पनि काम गरिसकेका छन् । अन्तरराष्ट्रियस्तरमा तान्जानिया, केन्या, रुवान्डा, जापान, र चीनलगायतका देशहरूको भ्रमण गरिसकेका छन् । रासस

गोरखा, ३ वैशाखः तेह्र दिनमा तीनपटक सगरमाथा आरोहण गरेर ‘गिनिज बुक अफ वर्ल्ड रेकर्ड’मा नाम लेखाउनुभएकी कीर्तिमानी आरोही पूर्णिमा श्रेष्ठ छैटौँ पटक सगरमाथा आरोहण गर्न आधार शिविर पुग्नुभएको छ । हाल आफू आधार शिविरमा रहेको र केही दिनमा पहिलो शिविरतर्फ जाने तयारीमा रहेको उहाँले जानकारी दिनुभयो ।

श्रेष्ठ यसअघि विसं २०८१ को वैशाख ३०, जेठ ६ र १२ गते सगरमाथाको सफल आरोहण गर्नुभएको थियो । दुई हप्ताको छोटो अवधिमा तीनपटक सगरमाथा आरोहण गरेपछि गिनिज बुक अफ वर्ल्ड  रेकर्डमा उहाँको नामअङ्कित भएको थियो ।

तेह्र दिनभित्रै तीनपटक सगरमाथा आरोहण गरेर विश्व रेकर्ड कायम गरेको भन्दै सन् २०२४ मा सिएनएन एथ्लेट्सको उत्कृष्ट सूचीमा आफ्नो नाम अङ्कित गरिएको उहाँले जानकारी दिनुभयो । “पहिलो पटक २०७५ जेठमा सगरमाथा आरोहण गरेकी थिए, त्यसपछि २०८२ जेठ ४ गते पाँचौँ पटक आरोहण गरेँ”, श्रेष्ठले भन्नुभयो ।

उहाँले आठ हजार मिटरभन्दा अग्ला सगरमाथा, केटु, कञ्चनजङ्घा, ल्होत्से, मकालु, अन्नपूर्ण १, धौलागिरि र मनास्लु हिमाल पटक पटक गरी १४ पटक आरोहण गरेर विभिन्न शीर्षकमा कीर्तिमान कायम गरिसक्नुभएको छ ।

आरोही श्रेष्ठ गोरखाको आरुघाट गाउँपालिका–९ आरुटार निवासी हुनुहुन्छ । रासस

काठमाडौँ । एकै सिजनमा तीन पटक सर्वोच्च शिखर सगरमाथा आरोहण गरी विश्व कीर्तिमान राख्न सफल पर्वतारोही तथा सञ्चारकर्मी पूर्णिमा श्रेष्ठलाई काठमाडौँमा स्वागत गरिएको छ ।

सोमबार लुक्लाबाट काठमाडौँ आएकी कीर्तिमानी श्रेष्ठलाई  त्रिभुवन अन्तरराष्ट्रिय विमानस्थलमा  स्वागत तथा बधाईज्ञापन गरिएको हो ।

पूर्णिमाले यो सिजनमा तीन पटक र सन् २०१८ मा एक पटक गरी चार पटक सगरमाथाको आरोहण गरेकी छिन् । यो याममा उनले मे १२ तारिखमा पहिलो पटक तथा मे १९ मा दोस्रो पटक र मे २५ शनिबार बिहान तेस्रो पटक सगरमाथाको चुचुरोमा पाइला टेकेर कीर्तिमान बनाएकी हुन् ।

विश्वका आठ हजार मिटरभन्दा माथिका १४ हिमाल आरोहण अभियानमा रहेकी पूर्णिमाले गत वर्ष पाकिस्तानस्थित विश्वकै दोस्रो अग्लो हिमाल के–टुको आरोहण गरेकी थिइन् ।