काठमाडौँ : आज भएको मनाङ एयरको हेलिकोप्टर दुर्घटनामा परी गम्भीर घाइते हुनुभएका पाइलट प्रकाश सेढाईँलाई थप उपचारका लागि भारतको मुम्बई लगिने भएको छ ।

सेढाईँको उपचार भइरहेको ह्याम्स अस्पतालले आज साँझ विज्ञप्ति जारी गर्दै थप उपचारका लागि नेसनल बर्न सेन्टर मुम्बईमा लैजाने तयारी भएको जानकारी दिएको हो । अस्पतालका अनुसार आज राति विमानमार्फत थप उपचारका लागि भारत लैजाने तयारी भइरहेको छ ।

आज बिहान लुक्लाबाट लोबुचे (सोलुखुम्बु) उडेको हेलिकोप्टर दुर्घटनामा गम्भीर घाइते सेढाईँलाई उद्धार गरी उपचारका लागि ह्याम्स अस्पताल ल्याइएको थियो । उहाँको उपचार इमर्जेन्सी कक्षमा सुरु गरी भेन्टिलेटरमा राखेर उपचार गरिएको डा सबिन कोइरालाद्वारा हस्ताक्षरित विज्ञप्तिमा उल्लेखे छ ।

“उहाँको मुखको भाग, हातखुट्टालगायत ४५ देखि ५० प्रतिशत शरीर जलेको अवस्था छ । साथै फोक्सो, मेरुदण्डको हड्डी तथा किड्नीमा पनि समस्या छ । उहाँको शरीर र हातको उपचारका लागि अपरेसन कक्षमा डेब्रिडेमेन्ट र इस्कराटोमी गरी उपचार भएको छ”, विज्ञप्तिमा भनिएको छ ।

हाइ अल्टिच्युडमा रहेका यात्रु ल्याउन शनिबार बिहान ७ः१३ मिनेटमा उडेको हेलिकोप्टर बिहान ७ः२४ मिनेटमा दुर्घटना भएको थियो ।रासस

काठमाण्डौ । इजरायलको राजधानी तेल अविवदेखि होस् या अफगानिस्तानको राजधानी कावुलमा अलगअलग समयमा भएका छुट्टाछुट्टै आतंककारी हमलामा मृत्यु र घाइते भएका नेपालीलाई उद्धार गर्ने काममा नेपाल एयरलाइन्सका सिनियर क्याप्टेन पाइलट ‘रिजाल दाजुभाई’को चर्चा हुने गरेको छ ।

उद्धार कार्यमा दाई सिनियर क्याप्टेन पाइलट सुवाश रिजाल र भाई श्रवण रिजालको योगदान अतुलनीय पनि रहेको नेपाल वायुसेवाको भनाई छ । आफ्नो विमान उडानको समय सकिएता पनि या ‘ड्युटी अफ्’ अर्थात विदा भएपनि रिजाल दाजुभाई उद्धार कार्यमा सँधै अघि सर्दै आएका छन् ।

कोभिड—१९ संक्रमणताका पनि पिपिई लगाएर सिनियर क्याप्टेन दाजुभाई सुवाश र श्रवण रिजालले संगसंगै नेपाल वायुसेवाको चार्टर्ड फ्लाइट उडाएर स्विटजरल्याण्डदेखि चीन र हंगकङ्गदेखि कोरोना विरुद्धको औषधि ल्याउने काम गरेका थिए ।

‘देश र देशवासीको लागि केही गरौं’ भन्ने भावना भएका उनीहरु कुनै राजनैतिक दलसंग आवद्ध नभएको कारण सरकारले उनीहरुलाई यथोचित कदर गरेको भने पाइँदैन ।

अपवादको रुपमा एकै परिवारका बाबु सिनीयर क्याप्टेन गंगाप्रसाद रिजाल र तीन छोरा क्याप्टेन पाइलटहरु सुवाश, सुदिप र श्रवण एकताका शाही नेपाल वायुसेवा निगमको बोइङ्ग ७७७ विमान उडाउँथे । बाबु गंगा र तीनजना छोरा सुवाश, सुदिप र श्रवण गरि चारै जनाले विमान उडाएर असी हजारभन्दा बढी घण्टा आकाशमा बिताईसकेका छन् ।

असोज २० गते प्यालेस्टाइनी हमलाबाट इजरायलमा रहेका १० जना नेपाली विद्यार्थीको मृत्यु भयो भने केही घाइते भए । सुदुरपश्चिम विश्वविद्यालयमा कृषि विषय पढेर ‘लर्न एण्ड अर्न’ अर्थात पढाई र कमाई संगसंगै कार्यक्रम अन्र्तगत गएको भदौमा मात्रै नेपाली विद्यार्थी इजरायल पुगेका थिए ।

पराराष्ट्र मन्त्री एनपि साउदसहित इजरायल गएको सरकारी उद्धार टोलीले घाइतेहरु साथै स्वदेश फर्किन चाहने नेपालीमध्ये पहिलो चरणमा २५४ जनालाई ६ दिनपछि शुक्रबार एकाविहानै सकुशल नेपाल फिर्ता ल्याएको थियो ।

उनीहरुलाई लिन नेपाल सरकारले चार्टर्ड गरेको नेपाल वायुसेवाको ए३३० एयरबस लिएर नेपाल वायुसेवा निगमको अपरेशन विभागका निर्देशक सिनियर क्याप्टेन श्रवण रिजालको नेतृत्वमा विमान चालक र चालक दलका सदस्य इजरायल गएका थिए ।

काठमाण्डौबाट दुबई हुँदै इजरायलको तेल अविवमा विहीबार पुगेर सो विमान २५४ जना नेपालीको उद्धार गरि पुन: दुबई हुँदै शुक्रबार एकाविहानै काठमाण्डौको त्रिभुवन विमानस्थलमा उत्रेको थियो ।

तेल अविवदेखि दुबईसम्म तिनै अपरेशन विभागका निर्देशक, सिनियर क्याप्टेन रिजालले ए३३० एयरबस चलाएका थिए भने दुवईदेखि काठमाण्डौसम्मको यात्रा अर्का सिनियर क्याप्टेन सञ्जय पौडेल र रमण घिमिरेको टोलीले ।

काठमाण्डौदेखि विहीबार एकाविहान २ बजे दुबई हुँदै इजरायलको तेल अविवसम्म र तेल अविवदेखि पुन: दुबईसम्म ए ३३० एयरबसको लामो समय उडानको थकानपछि वरिष्ठ क्याप्टेन रिजाल दुबईमा आराम गर्न बसेपछि अर्का क्याप्टेन पौडेल र घिमीरेले नेपाल ल्याएका थिए ।

त्यसो त २०७३ साल असारमा अफगानिस्तानको राजधानी काबुलमा आतंकवादी संगठन तालिवानले बम आक्रमण गरि काबुलस्थित क्यानेडियन राजदूतावासमा सुरक्षासम्वन्धि काम गर्दै आएका १२ जना नेपालीको ज्यान लिएका थिए भने अरु ७ जना नेपाली घाइते भएका थिए ।

ती १२ नेपालीको शव र ७ जना घाइते सहित २४ नेपालीको उद्धारको लागि त्यतिखेर पनि नेपाल वायुसेवा निगमको ए३३० एयरबसका सिनियर क्याप्टेन रिजाल दाजुभाई सुवाश र श्रवण रिजाल काबुल गएका थिए ।

अहिलेपनि सिनियर क्याप्टेन रिजाल दाजुभाई अहिलेपनि नेपाल वायुसेवाको एयरबस ए३३० चलाउँदै आएका छन् । दुईपटक अपरेशन विभागको निर्देशक भईसकेका सिनियर क्याप्टेन सुवाश रिजालले अहिले नेपाल वायुसेवाको कुनै विभागको जिम्मेवारी नलिएतापनि नयाँ पाइलटहरुलाई प्रशिक्षण दिने र एयरबस ए३३० उडाउने काम गर्दै आएका छन् ।

काठमाडौं । नेपालमै पाइलट उत्पादन गर्ने उद्देश्यले दुई फ्लाइङ स्कुलले अनुमति पाएका छन् ।

संस्कृति, पर्यटन तथा नागरिक उड्डयनमन्त्री सुदन किरातीका अनुसार शुभम् एभिएसन प्रालि र चन्द्र सूर्य एभिएसन प्रालिले फ्लाइङ स्कुल स्थापनाको अनुमति पाएका हुन् ।

कार्यविधिमा आवश्यक संशोधन गर्दै दुई फ्लाइङ स्कुललाई अनुमति प्रदान गरिएको हो । प्रक्रिया पूरा गरी आउने अन्य संस्थालाई पनि इजाजत प्रदान गरिने पर्यटनमन्त्रीेले उल्लेख गर्नुभएको छ । नेपालमा पाइलट उत्पादन गर्ने संस्था नहुँदा नेपालीले अहिले फिलिपिन्स, अमेरिकासहितका मुलुकमा गएर पाइलट कोर्ष पूरा गर्ने गर्छन् । रासस

काठमाडौं । नेपाल नागरिक उड्डयन प्राधिकरण (क्यान) ले नेपाल वायुसेवा निगमका पाँच जना पाइलटलाई निलम्बन गर्न निर्देशन दिएको छ । नेपाल नागरिक उड्डयन प्राधिकरण (क्यान) का प्रवक्ता जगन्नाथ निरौलाले नियम पालना नगर्ने निगमका पाँच पाइलटलाई निलम्बन गर्न निर्देशन दिएको बताउनुभयो ।

उहाँका अनुसार नेपाल एयरलाइन्सको जहाज हङकङ विमानस्थलमा अवतरण गर्नेक्रममा त्यहाँको एटीसीको इन्स्ट्रक्सन नमानेपछि पाइलट उद्धव घिमिरे, राजेश कुशवाह र नरबहादुर विश्वकर्मा तथा काठमाडौँबाट जापान उड्ने क्रममा स्टान्डर अप्रेशनल प्रोस्युड्युल पालना नगरेकाले प्रशन्न राना र वाइपी जुवारचनलाई निलम्बन गर्न प्राधिकरणले निर्देशन दिएको हो ।

जहाज विमानस्थलमा अवतरण गर्दा एटीसीको नियम पालना गर्नुपर्ने तथा उसैको निर्देशनअनुसार अवतरण गर्नुपर्ने हुन्छ । नेपाल वायुसेवा निगमका पाइलटले त्यसलाई फलो नगरेको पाइएपछि कारबाहीका लागि निर्देशन दिइएको प्राधिकरणले जनाएको छ ।

प्राधिकरणको निर्देशनसँगै निगमले पाँचै पाइलटलाई निलम्बन गर्नुपर्ने र त्यसपछि, प्राधिकरणले ती पाइलटलाई बोलाएर सोधपुछ गरेपछि निलम्बन लम्ब्याउने वा नलम्ब्याउने विषयमा निर्णय हुने प्रवक्ता निरौलाले जानकारी दिनुभयो । रासस