काठमाडौँ । एक्सट्रिम इनर्जी ड्रिंक्स र नेपाल क्रिकेट संघ (क्यान) बीचको साझेदारीअन्तर्गत एक्सट्रिम इनर्जी ड्रिंक्सको लोगोंकित नेपाली राष्ट्रिय महिला क्रिकेट टोलीको नयाँ जर्सी सार्वजनिक गरिएको छ ।

क्यान र एक्सट्रिम इनर्जी ड्रिंक्सबीच जर्सी प्रायोजनसम्बन्धी दुई वर्षे सम्झौता माघ २ गते शुक्रवार सम्पन्न भएको थियो । सोही सम्झौताअनुसार तयार गरिएको नयाँ जर्सी राष्ट्रिय खेलकुद परिषद् (राखेप) का सदस्यसचिव रामचरित्र मेहता र क्यानका सचिव पारस खड्काले बुधवार संयुक्त रूपमा सार्वजनिक गरेका हुन् ।

उक्त कार्यक्रममा नेपाल क्रिकेट संघका पदाधिकारी, राष्ट्रिय महिला क्रिकेट टोलीका खेलाडी, एक्सट्रिम इनर्जी ड्रिंक्सका प्रतिनिधि तथा सञ्चारकर्मीहरूको उपस्थिति रहेको थियो । कार्यक्रममा एक्सट्रिम इनर्जी ड्रिंक्सले नेपाली क्रिकेट, विशेषगरी महिला क्रिकेटको दीर्घकालीन विकासमा सहकार्य गर्ने प्रतिवद्धता व्यक्त गरेको छ । जर्सी प्रायोजनले खेलाडीहरूलाई प्रोत्साहन, आत्मविश्वास र व्यावसायिक वातावरण प्रदान गर्ने विश्वास व्यक्त गरिएको छ।

यस सहकार्यले टोलीको तयारी, मनोबल र अन्तर्राष्ट्रिय प्रतिस्पर्धात्मक क्षमतामा सकारात्मक प्रभाव पार्ने अपेक्षा गरिएको छ। राष्ट्रिय खेलकुद परिषद्का सदस्यसचिव मेहताले निजी क्षेत्रबाट प्राप्त सहयोगले नेपाली क्रिकेटको समग्र विकासमा महत्वपूर्ण योगदान पुग्ने बताएका छन् । सार्वजनिक गरिएको नयाँ जर्सीले नेपाली महिला क्रिकेट टोलीको पहिचानलाई थप सशक्त बनाउने र अन्तर्राष्ट्रिय मञ्चमा नेपालको उपस्थिति अझ बलियो बनाउने विश्वास पनि व्यक्त गरिएको छ ।

यस अवसरमा एक्सट्रिम इनर्जी ड्रिंक्सले भारत र श्रीलङ्कामा संयुक्त रूपमा आयोजना हुने आइसिसी पुरुष टी ट्वान्टी विश्वकप क्रिकेटमा नेपालको खेल हेर्न मैदान पुग्ने समर्थकहरूका लागि वाङखडे स्टेडियममा दुई हजार थान नेपाली क्रिकेट टोलीको जर्सी निःशुल्क वितरण गर्ने जानकारी दिएको छ ।

काठमाडौं । नेपाली महिला राष्ट्रिय क्रिकेट टोलीको कप्तानमा अलराउन्डर इन्दु वर्मा नियुक्त भएकी छिन् ।

नेपाल क्रिकेट संघ (क्यान) ले बिहिबार हङकङ टुरको लागि इन्दुलाई कप्तानको जिम्मेवारी दिएको हो । क्यानले यसअघि टोलीको कप्तान रहेकी रुविना क्षेत्रीलाई हटाएर इन्दुलाई नया कप्तानको घोषणा गरेको हो । यस्तै, बायाँ हाते ब्याटर विन्दु रावललाई उपकप्तान बनाइएको छ ।

हङकङ टुरको लागि क्यानले घोषणा गरेको टोलीमा कन्चन श्रेष्ठ, सोमु विष्ट र सोनी पाख्रिन नयाँ खेलाडी रहेका छन् ।

नेपालले हङकङमा चार देश सम्मिलित टि–२० सिरिज खेल्दैछ । उक्त प्रतियोगितामा नेपालसँगै तान्जानिया, जापान र हङकङले पनि खेल्नेछन् । नेपालले कार्तिक २९ गते तान्जानिया, कार्तिक ३० गते हङकङ र मंसिर २ मा जापानसँग खेल्नेछ । प्रतियोगिताबो फाइनल र तेस्रो स्थानको खेल मंसिर ३ मा हुनेछ ।

नेपाली टोली:

इन्दु वर्मा (कप्तान), विन्दु रावल (उपकप्तान), रुविना क्षेत्री, सिता रानामगर, अश्मिना कर्मचार्य, काजोल श्रेष्ठ, रोमा थापा, संगीता राई, सम्झना खड्का, खुसी डंगोल, पुजा महतो, कन्चन श्रेष्ठ, सोमु विष्ट, सोनी पाख्रिन ।

काठमाडौं । महिला विश्वकप २०२४ को ग्लोबल छनोटका लागि नेपालले आज शुक्रबार थाईल्यान्डसॅंग प्रतिस्पर्धा गर्दैछ ।

महिला विश्वकपको एसिया छनोटको सेमिफाइनल अन्तर्गत नेपालले टस जितेर बलिङ रोजेको छ ।

यस खेलको विजेता टोलीले ग्लोबल छनोटमा स्थान बनाउने छ । नेपाल पहिलो पटक ग्लोबल छनोटमा स्थान बनाउने लक्ष्यमा रहेको छ ।

सन् २०१३ देखि सुरु भएको ग्लोबल छनोटमा नेपालले हालसम्म स्थान बनाउन सकेको छैन । नेपालको विश्वकप यात्रा एसिया छनोटसम्म मात्रै सिमित रहँदै आएको छ ।

यस पटक भने नेपाल थाईल्यान्डलाई हराउँदै इतिहास रच्न चाहन्छ ।

काठमाडौँ । पूर्व भारतीय क्रिकेटर देवीका पाल्सिकर नेपाली राष्ट्रिय महिला क्रिकेट टोलीको ब्याटिङ प्रशिक्षकमा नियुक्त भएकी छिन्।

नेपाल क्रिकेट संघ (क्यान) ले ४४ वर्षीया पालशिकरलाई नेपालको सिनियर राष्ट्रिय महिला टोलीको ब्याटिङ प्रशिक्षकमा नियुक्त गरेको हो ।

पालशिकर नेपालको राष्ट्रिय महिला क्रिकेट टोलीको प्रशिक्षकका रुपमा नियुक्त हुने पहिलो विदेशी हुन् । अलराउन्डर पाल्सिकरले भारतको सिनियर राष्ट्रिय टोलीबाट टेस्ट र एकदिवसीय दुबै प्रतियोगिता खेलेकी छन् ।

पछिल्लो १० वर्षयता प्रशिक्षकको भूमिकामा सक्रिय रहेकी पालशिकरको ब्याटिङ प्रशिक्षकमा नेपाली खेलाडीको क्षमता अभबृद्धिमा मद्दत पुग्ने क्यानले विश्वास लिएको छ ।

पछिल्लो समय नेपालले टी–२० विश्वकपको एसियाली छनोटको तयारी गरिरहेको छ। अगस्त २८ देखि सेप्टेम्बर ६ तारिखसम्म मलेसियामा आयोजना हुने उक्त प्रतियोगितामा नेपालसहित ११ राष्ट्रको सहभागिता रहने छ ।

काठमाडौँ । मलेसियामा जारी टी–२० शृङ्खलाको पहिलो खेलमा नेपाली महिला क्रिकेट टिमले मलेसियाबिरुद्ध लज्जास्पद हार बेहोरेको छ । खराब ब्याटिङ प्रदर्शन गरेको नेपाल मलेसियासँग ५ विकेटले पराजित भएको छ ।

आजदेखि सुरु भएको प्रतियोगितामा नेपालले मलेसियासँग ५ खेलको सिरिज खेल्नेछ । नेपालले यसअघि मलेसियासँग टि२० आईमा तीन खेल खेल्दा सबैमा जित निकालेको थियो ।

जितको लागि नेपालले दिएको ५१ रनको सामान्य विजयी लक्ष्य मलेसियाले १३.२ ओभरमा ५ विकेट गुमाउँदै पूरा गर्यो । मलेसियाको जितमा ओपनर वान जुलिया वान मोहम्मद रोस्दीले २ चौकासहित १३ रनको योगदान दिइन् । यस्तै, आइना हामिजाह हशिम १२ रनमा नट आउट रहिन् ।

बलिङतर्फ नेपालकी सीता रानामगरले ४ ओभरमा १ मेडनसहित १३ रन खर्चेर २ विकेट लिइन् । कप्तान रुविना क्षेत्री बेलबासेले ४ ओभरमा ७ रन खर्चेर २ विकेट लिइन् भने कविता कुँवरले २ ओभरमा ४ रन खर्चेर १ विकेट लिइन् ।

त्यसअघि टस हारेर पहिला ब्याटङको निम्तो पाएको नेपालले १६.५ ओभरमा ५० रन बनाएर अल आउट भएको थियो । नेपालको लागि डेब्यू खेल खेलेकी सम्झना खड्काले सर्वाधिक १३ रन बनाइन् । यस्तै, ज्योति पाण्डे ११ रन जोडिन् । लज्जास्पद ब्याटिङ गरेका नेपालका अन्य ९ खेलाडीले भने दोहोरो अंकमा रन बनाउन सकेनन् ।

एक समय ४१-३ को अवस्थामा रहेको नेपालले ५० रनमा सबै विकेट गुमाएको थियो । नेपालले अन्तिम ९ रनमा ७ विकेट गुमाएपछि ५० रनमै अल आउट हुन पुगेको थियो।

मलेसियाकी निक नुर डीनले ४ ओभरमा १ मेडनसहित ९ रन खर्चेर सर्वाधिक तीन विकेट लिइन् । ऐश्या एलिसा २ ओभरमा ९ रन खर्चेर २ विकेट लिइन् । हमिजाह र महिराह इश्लामीले पनि समान २ विकेट लिइन् ।

नेपालले अब दोस्रो खेल भोली खेल्नेछ । जेठ १८ मा (जुन १) मा नेपालले तेस्रो खेल खेल्नेछ । जेठ २० र २१ (जुन ३ र ४) मा नेपालले चौथो र पाँचौं खेल खेल्नेछ।

काठमाडाैंः आईसीसी यु–१९ महिला विश्वकप अन्तर्गत एशिया छनोटका लागि मलेसिया जाने नेपाली यु–१९ टोलीलाई मंगलवार बिदाई गरिएको छ ।

नेपाल क्रिकेट संघ (क्यान) ले मंगलवार एक कार्यक्रमको आयोजना गरेर बुधवार मलेसियातर्फ जाने किशोरी टोलीको बिदाई गरेको हो । टोलीलाई क्यानका अध्यक्ष चतुरबहादुर चन्द, कोषाध्यक्ष रोशन सिंह लगायतको टोलीले बिदाई गरेको छ । बिदाईपछि बोल्दै नेपाली टोलीकी कप्तान कीर्तिका मरासीनिले शीर्ष टोली भएर विश्वकपमा स्थान बनाउने लक्ष्यकासाथ तयारी गरेको र लक्ष्यमा पुग्ने प्रतिक्रिया दिनुभयो ।

उहाँले भन्नुभयो, ‘पहिलोपटक आयोजना हुन लागेको प्रतियोगितामा सहभागी हुँदैछौं । एक महिना लामो अभ्यास अन्तर्गत हामीले राम्रो तयारी गरेका छौं । राम्रो खेलेर छनोट हुने लक्ष्य राखेका छौं ।’

यसअघि क्यानले छनोटका लागि कृतिका मरासिनीको कप्तानीमा १४ सदस्सीय टोलीको घोषणा गरिसकेको छ । एक महिना लामो अभ्यास गरेको टोलीले राम्रो नतिजा निकाल्नेमा मुख्य प्रशिक्षक महेश रिजाल विश्वस्त हुनुहुन्छ । ६ टिमले सहभागिता जनाएको प्रतियोगितामा शीर्ष टोली बन्दै नेपाल विश्वकपमा छनोट हुने मुख्य प्रशिक्षक रिजालले बताउनु भयो ।

‘एक महिना लामो अभ्यासमा हामीले गर्नुपर्ने मिहिनेत हामीले गरेका छौं । राम्रो नतिजा निकाल्नेमा आशावादी छौं । ६ टिमले सहभागिता जनाएको प्रतियोगितामा अग्र स्थानमा रहँदै छनोट हुने हाम्रो लक्ष्य छ ।’

मलेसियामा आयोजना हुने छनोटमा आयोजक मलेसियासहित नेपाल, संयुक्त अरब इमिरेट्स (युएई), थाइल्याण्ड, भुटान र कतारले सहभागिता जनाउँदै छन् । नेपालले पहिलो खेल कतारसँग जुन ३ मा खेल्दै छनोटको सुरुवात गर्नेछ । नेपालले दोस्रो खेलमा युएईविरुद्ध जुन ४ मा प्रतिष्पर्धा गर्ने तालिका रहेको छ भने भुटानविरुद्ध जुन ६ मा खेल्नेछ । त्यस्तै नेपालले जुन ७ मा थाइल्याण्ड र जुन ९ मा मलेसियाविरुद्ध खेल्नेछ । शीर्ष स्थानमा रहने टोलीले दक्षिण अफ्रिकामा हुने ट्वान्टी–२० विश्वकपमा स्थान बनाउनेछ ।

काठमाडौंः युगान्डाले नेपाली राष्ट्रिय महिला क्रिकेट टोली विरुद्धको टी–ट्वान्टी अन्तर्राष्ट्रिय शृंखला जितेको छ । बिहीबार भएको शृंखलाको तेस्रो खेलमा युगान्डाले नेपाललाई ६ विकेटले पराजित गरेको हो ।

त्रिवि क्रिकेट मैदानमा नेपालले जितका लागि दिएको १०० रनको लक्ष्य पछ्याएको युगान्डाले १८.२ ओभरमा ४ विकेट गुमाएर १०१ रन बनायो ।

युगान्डाका लागि केभिन विनोले सर्वाधिक ४२ रनको योगदान गरिन् । त्यस्तै जनेत बाबाजीले २७ रन बनाइन् ।

बलिङतर्फ नेपालका लागि कविता कुँवरले दुई विकेट लिइन् । त्यस्तै रुबिना क्षेत्री र इन्दु बर्माले एक–एक विकेट लिए । यसअघि टस जितेर पहिले ब्याटिङ गरेको नेपालले निर्धारित २० ओभरमा ८ विकेट गुमाएर ९९ रन मात्र बनाएको थियो ।

नेपालका लागि ज्योति पाण्डेले सर्वाधिक ४७ रनको योगदान गरिन् । ५४ बल खेलेकी उनले ५ चौका प्रहार गरिन् । नेपालका लागि कप्तान रुविना क्षेत्रीले १६ रन बनाइन् भने सीता रानामगरले १२ रनको योगदान गरिन् ।

यो जितसँगै युगान्डाले पाँच खेलको शृंखला दुई खेल अगावै ३–० ले जितेको छ । दुई टोली बीचको चौथो टी–ट्वान्टी भोलि शुक्रबार हुनेछ ।