काठमाडौं । संवैधानिक राजतन्त्रसहितको हिन्दू राज्य स्थापनाको माग गर्दै आन्दोलनमा होमिएको राष्ट्रिय प्रजातन्त्र पार्टीले आज काठमाडौंमा निषेधित क्षेत्र तोड्ने भएको छ । चैत १५ गते पक्राउ परेका राप्रपाका वरिष्ठ उपाध्यक्ष रविन्द्र मिश्र र महामन्त्री धवलशमशेर राणाको रिहाइको मागसमेत राप्रपाको छ । उसले दिउँसो १२ बजे राजावादीहरुलाई बिजुलीबजारमा भेला हुन आह्वान गरेको छ ।

राप्रपाले बिहीबार बसेको केन्द्रीय कार्यसम्पादन समितिको बैठकको निर्णयअनुसार नै आज निषेधित क्षेत्रमा विरोध प्रदर्शन गर्न लागेको हो । सरकारले निषेधित क्षेत्र घोषणा गरेको ठाउँमा कुनै पनि प्रदर्शन गर्न पाइँदैन । तर राप्रपाले त्यहि ठाउँमा प्रदर्शन गरेर सरकारलाई दबाब दिने निर्णय गरेको हो ।

बिजुलीबजारमा भेला भएर राप्रपाका नेता तथा कार्यकर्ता नाराबाजी गर्दै नयाँ बानेश्वरमा पुगेर निषेधित क्षेत्र तोड्ने प्रयास गर्ने छन् । संसद् भवन भएकाले बानेश्वर आसपासमा कुनै पनि प्रदर्शन गर्न निषेध गरिएको छ । बिजुलीबजारबाट राप्रपाका अध्यक्ष राजेन्द्र लिङ्देनले नै जुलुसको नेतृत्व गर्ने बताइएको छ ।

यसैगरी राप्रपाले सिंहदरबार अगाडि भद्रकाली र प्रधानमन्त्री निवास बालुवाटारमा पनि प्रदर्शन गर्ने तयारी गरेको छ ।

राप्रपाका प्रदर्शनलाई राजसंस्था पुनस्र्थापना संघर्ष समितिले समर्थन गरेको छ । राप्रपाको प्रदर्शनलाई मध्यनजर गरेर बिहानैदेखि काठमाडौंको सुरक्षा व्यवस्था कडा पारिएको छ ।

सरकारको कडा चेतावनी

राप्रपाले काठमाडौंको बिजुलीबजारमा निषेधित क्षेत्र तोड्ने भनेपछि गृह मन्त्रालयले ध्यानाकर्षण जनाएको छ ।

मन्त्रालयका प्रवक्ता रामचन्द्र तिवारीले शनिबार साँझ विज्ञप्ति जारी गरी राप्रपाले निषेधित क्षेत्र तोड्ने भनी सार्वजनिक भएका अभिव्यक्तिहरूप्रति गम्भीर ध्यानाकर्षण भएको जानकारी दिएका हुन् ।

मन्त्रालयले त्यस्ता गतिविधि भए कानुन अनुसार कारबाही हुनेबारे सचेत गराएको छ ।

मन्त्रालयले संविधानको ठाडो उल्लंघन गर्न प्रोत्साहन गर्ने र समाजमा अराजकता फैलाउने कुनै पनि गतिविधि सह्य नहुने चेतावनी दिएको छ ।

’यस्तो गतिविधिमा संलग्न हुने जोसुकैलाई कानुन बमोजिम कारबाही हुने ब्योहरा सूचित गरिन्छ। साथै समाजमा हिंसा फैलाउने कुनै पनि अराजक, उत्तेजक र गैरकानुनी क्रियाकलापमा संलग्न नहुन समेत गृह मन्त्रालय सबैमा अनुरोध गर्दछ,’ विज्ञप्तिमा भनिएको छ ।

काठमाडौं । सरकारले काठमाडौंको माइतीघरदेखि बानेश्वरसम्म कायम निषेधित क्षेत्र हटाइएको छ। जिल्ला प्रशासन कार्यालयले आज एक सुचना प्रकाशित गर्दे निषेधित क्षेत्र हटाएको हो ।

गृहमन्त्री रवि लामिछानेले नयाँ बर्ष संगै तीन सुरुवात गरेको जानकारी गराउनु भएको छ । उहाँका अनुसार काठमाडौंको माइतीघरदेखि बानेश्वरसम्म कायम निषेधित क्षेत्र हटाइएको छ।

यसैगरी ठमेल र दरवारमार्ग क्षेत्र व्यापारिक प्रयोजनका लागि स्पष्ट मापदण्ड, आचारसंहिता र पूर्ण सुरक्षा प्रत्याभूतिसहित नयाँ वर्ष २०८१ सँगै २४ सै घण्टा खुल्दै छ।

गृहमन्त्री  लामिछानेले लेख्नु भएको छ- शान्तिपूर्ण आन्दोलन गर्न पाउने अधिकारप्रति सम्मान छ। यो लोकतन्त्रको सौन्दर्य हो। तर, आन्दोलनको क्रममा सार्वजनिक सम्पत्ति तोडफोड गर्न पाइँदैन।त्यसैले, आन्दोलनका क्रममा भएको वा हुने क्षतिको भर्पाईका लागि आयोजक (व्यक्ति, संस्था वा दल)लाई बिल पठाउने र सरकारी बाँकी सरह उठाउने निर्णय भएको छ। मैले कार्यकाल सुरु गरेपछिका प्रदर्शनका क्रममा भएका सार्वजनिक क्षतिको विवरण संकलन भइरहेको छ। बिल चाँडै पठाइने छ।

काठमाडौं । माईतीघर मण्डलालाई निषेधित क्षेत्र घोषणा गर्ने जिल्ला प्रशासन कार्यालयको निर्णयविरुद्ध सर्वोच्च अदालतमा रिट निवेदन पेश भएको छ ।

अधिवक्ता स्वागत नेपालले जिल्ला प्रशासन कार्यालयलको उक्त निर्णयले नेपालको संविधानको धारा १६, धारा १७ र धारा १८ ले प्रत्याभूत गरेको नागरिकको मौलिक हकमा आघात पुगेको भन्दै रिट दायर गर्नुभएको छ ।

रिटमा माइतीघर मण्डलामा शान्तिपूर्ण रुपमा विरोध प्रदर्शन गर्न निषेध गर्ने गरी जारी भएको सूचना उत्प्रेषण परमादेश लगायतको आदेशले बदर गर्न र मुद्दाको अन्तिम टुंगो नलागेसम्म उक्त सूचना कार्यान्वयन नगर्नु नगराउनु भनी अन्तरिम आदेश माग गरिएको छ ।

जिल्ला प्रशासन कार्यालय काठमाडौंले सुरक्षा संवेदनशीलताको कारण देखाउँदै सोमबार देखि आगामी ३० दिनसम्म माईतीघर–नयाँ बानेश्वरसम्म निषेधाज्ञा क्षेत्र घोषणा गरेको थियो ।