एजेन्सी । बलिउडका दिग्गज अभिनेता नसिरुद्दीन शाहले फेरि एकपटक भारतीय फिल्म उद्योगलाई निशाना बनाएका छन् । नसीरले एक अन्तर्वार्तामा हिन्दी सिनेमाको वर्तमान अवस्थाबाट आफू निराश भएको बताएका छन् ।

एक कार्यक्रममा नसीरले हिन्दी सिनेमाको इतिहास सय वर्ष पुरानो भएको बताउन पाउँदा गर्व लागेको तर अहिले हिन्दी फिल्म हेर्न छाडेको बताए । उनका अनुसार अहिले चलचित्रकर्मीले यस्तै चलचित्र बनाउन थालेका छन् ।

७३ वर्षीय नसीर हालै एक कार्यक्रममा सहभागी भएका थिए । सञ्चारकर्मीसँग कुरा गर्दै उनले भने, ‘भारतीय फ्यानहरूले आफ्नो जरा र जन्मभूमिसँग जोडिएको महसुस गर्ने भएकाले मात्रै हिन्दी फिल्महरू विश्वभर हेरिन्छन् । तर यी कुराहरू जसरी चलिरहेका छन्, त्यसरी नै चलिरह्यो भने सबैलाई छिट्टै अल्छी लाग्छ ।’

नसीरले थपे, ‘निर्माताले फिल्मलाई पैसा कमाउने माध्यम मात्रै हेर्न नछाड्दासम्म सुधार हुँदैन । गम्भीर चलचित्र बनाउन चाहनेहरुको दायित्व आजको यथार्थलाई आफ्नो चलचित्रमा देखाउनु हो । यद्यपि, उनीहरूले यो काम यसरी गर्नुपर्नेछ कि उनीहरूविरुद्ध कसैले फतवा नजाओस् र ईडीले उनीहरूको ढोका ढकढकाउन नपरोस् ।’

नसीर फिल्मभन्दा वेब सिरिजमा बढी सक्रिय छन्
नसीरको अन्तिम फिल्म गत वर्ष रिलिज भएको ‘कुट्टे’ थियो । यसअघि उनी २०२२ मा दीपिका पादुकोण अभिनित फिल्म ‘गहराईं’ मा देखिएका थिए । आजकाल नसीर फिल्मभन्दा वेब सिरिजमा बढी देखिन्छन् । गत वर्ष उनका तीनवटा वेब सिरिज ‘ताज’, ‘सास, बहू और फ्लेमिङ्गो’ र ‘चार्ली चोपडा एण्ड द मिस्ट्री अफ सोलाङ भ्याली’ रिलिज भएका थिए ।

एजेन्सी । बलिउडका दिग्गज अभिनेता नसिरुद्दीन शाहले बलिउडमा पाएको अवार्डलाई लिएर आलोचना गरेका छन् ।

नसिरुद्दीन शाहले मुम्बईमा फार्महाउस बनाएका छन् । त्यहाँका ढोकाहरूमा भएका ह्यान्डलहरू उनले प्राप्त गरेको ट्रफीबाट बनेका हुन् । यस सम्बन्धमा शाहलाई प्रश्न गरिएको थियो ।

उनले भने, ‘अब मेरा लागि यी अवार्डको कुनै अर्थ छैन । मैले फिल्मफेयर अवार्डमा पाएको ट्रफी वाशरूमको ह्यान्डलको रूपमा प्रयोग गर्छु । जब कोही मेरो घरको नुहाउने कोठामा पस्छ, उसले ढोकामा ह्यान्डलको रूपमा दुईवटा फिल्मफेयर ट्रफी झुण्डिएको भेट्टाउनेछ ।’

‘अब मेरा लागि यी अवार्डको कुनै अर्थ छैन । यसअघि यी अवार्ड जितेपछि खुशी लाग्थ्यो । बिस्तारै यस्ता धेरै अवार्डहरु भए ।’ एक मिडिया हाउससँग कुरा गर्दै उनले भने– ‘केही समयपछि थाहा भयो कि यी अवार्ड लबिङको परिणाम हुन् । ती व्यक्तिहरूले पुरस्कार पाउन थाले जो यसको हकदार छैनन् । त्यसपछि मात्र मैले यी अवार्डहरूसँग सम्बन्ध तोड्न थालें ।’

नसिरुद्दीन शाह भन्छन् – मैले यी अवार्डहरूको अवधारणा बुझिनँ । सबै कलाकारहरूले कडा परिश्रम गर्छन्, तर वर्षको उत्कृष्ट अभिनेताको ट्रफी एक अभिनेताले मात्र पाउँछन् । यो सही होइन । म पछिल्ला दुई अवार्ड लिन गएको पनि छैन । त्यसैले मैले एउटा फार्महाउस बनाए र यी अवार्डहरू त्यहाँको शौचालयमा राख्ने निर्णय गरें ।’