काठमाडौँ । जारी प्रधानमन्त्री कप पुरुष क्रिकेट प्रतियोगितामा मधेश प्रदेशले गण्डकी प्रदेशलाई विरुद्ध भारी अन्तरले पराजित गरेको छ ।

गण्डकीलाई १४५ रनको अन्तरले हराउदै मधेश अंकतालिकाको दोस्रो स्थानमा उक्लिएको छ । मधेशको ८ खेलमा ५मा जित र ३ मा हारसहित १० अंक छ । यता गण्डकी भने ६ खेलमा ४ अंक सहित आठौ स्थानमा यथावत छ ।

मधेशले जितको लागि दिएको ३३६ रनको विशाल लक्ष्य पछ्याएको गण्डकी ३९.५ ओभरमा १९० रन बनाएर अलआउट भयो ।

गण्डकीको लागि ओपनर इश्वोर छेत्री र कमल परियारले सर्वाधिक २७/२७ रन बनाए । यस्तै कृश ऐरले २६, चन्द्र पौडेलले २३, रोशन गौतमले २२, समिर कंडेल र मुश्कान थापाले समान १८/१८ रन बनाए ।

मधेशका लागि रंजित कुमारले ४ विकेट लिए । यस्तै हरिशंकर शाहले ३ विकेट लिदा प्रदिप पासवानले २ र राजेश यादवले १ विकेट लिए ।

त्यसअघि त्रिवि क्रिकेट मैदान मैदानमा टस जितेर पहिला ब्याटिङ रोजेको मधेशले निर्धारित ५० ओभरमा ५ विकेट गुमाउँदै ३३५ रन बनाएको थियो । यो प्रधानमन्त्री कप क्रिकेट इतिहासको दोस्रो ठूलो योगफल हो । यसअघि २०१८ मा एपीएफले मधेश प्रदेशविरुद्ध ३३९ रन बनाएको थियो ।

मधेशका अनिल साहले १२७ रनको शानदार शतकीय इनिङ खेलेका थिए । उनले १२५ बलमा ११ चौका र ६ छक्का प्रहार गरे । उनी जारी प्रतियोगिताको एउटै खेलमा सर्वाधिक रन बनाउने खेलाडी पनि बनेका छन् ।

मधेशका अरनिको यादबले पनि अर्धशतकीय इनिङ खेले । उनले ३४ बलमा ५ चौका र ३ छक्कासहित अविजित ६३ रन बनाए ।पवन सर्राफले ४०, मयान यादबले २७, रुपेश सिंहले २३ रन थप्दा अभिषेक तिवारीले अविजित २७ रन थपे ।

गण्डकीका सन्दीप पराजुलीले २ विकेट लिए । कृष्ण पौडेल र कमल परियारले १/१ विकेट लिए ।