झापा: ‘हङरायो’ र ‘हरित परेवा’ फेला पार्ने संरक्षणकर्मी देवेन्द्रकुमार खरेललाई लाल भागिरथा बानियाँ प्रतिष्ठानले रु ३१ हजार राशिको यस वर्षको राष्ट्रिय प्रतिभा पुरस्कार प्रदान गर्ने घोषणा गरेको छ ।

खोज तथा अनुसन्धानका क्षेत्रमा योगदान पुर्याउने राष्ट्रिय प्रतिभा एक जना, कृषि क्षेत्रमा जैविक प्रविधिको सफल प्रयोग गर्ने एक जना उत्कृष्ट किसान र घरपरिवारमा असल व्यवहार गर्ने एक गृहिणीलाई प्रतिष्ठानले बर्सेनि पुरस्कार दिँदै आएको छ ।

यही मङ्सिर २० गते मेचीनगरको धाइजनमा ती पुरस्कार प्रदान गरिने प्रतिष्ठानका अध्यक्ष हरिचरण बानियाँले बताउनुभयो ।

यस वर्ष मेचीनगर–७ काँकरभिट्टा निवासी ५१ वर्षीय देवेन्द्रकुमार खरेल पुरस्कृत हुँदै हुनुहुन्छ । उहाँले हालसम्ममा तीन सय ४० प्रकारका चराको खोज र चार सय ७७ प्रकारका चराको तस्वीर खिचिसक्नुभएको छ । उहाँले नेपालबाट सय वर्षअघि नै लोप भइसकेको घोषणा गरिएको हङ्रायो नामक दुर्लभ चरा २०७८ साल पुस ६ गते इलामको सूर्योदय नगरपालिकामा फेला पारी तस्वीर र भिडियो खिच्नुभएको थियो चरा संरक्षणमा लाग्नुभएका उहाँले २०७७ साल मङ्सिर ९ गते मेचीनगर–७ मा नेपालमै पहिलोपल्ट हरित परेवा नामको चरा फेला पारेर त्यसको पनि तस्वीर तथा भिडियो खिच्नुभएको थियो ।

यसैगरी, प्रतिष्ठानले मेचीनगर–५ निवासी अनिताकुमारी कार्कीलाई लाल भागिरथा उत्कृष्ट कृषक पुरस्कार र बुद्धशान्ति वडा नं ५ निवासी रेणुका सङ्ग्रौला चापागाईँलाई लाल भागिरथा उत्कृष्ट गृहिणी पुरस्कार प्रदान गर्ने निर्णय गरेको प्रतिष्ठानका सचिव डम्बर देउजाले जानकारी दिनुभयो ।

उत्कृष्ट कृषक पुरस्कार प्राप्त गर्ने कार्कीले परम्परागत रुपमा हुँदै आएको निर्वाहमुखी करेसाबारीलाई कसरी व्यावसायिक कृषिमा रुपान्तरण गर्न सकिन्छ भनेर नमूना प्रस्तुत गर्नुभएको छ । तीन दशक शिक्षण पेशा गरेर सेवा निवृत्त उहाँले जैविक प्रविधि र मलखादबाट पाँच कठ्ठामा सागसब्जी र फलफूल उब्जाउँदै आउनुभएको छ ।

उत्कृष्ट गृहिणी पुरस्कार पाउने चापागाईँ क्यान्सर सङ्क्रमित वृद्धावस्थाका सासू दिलकुमारी चापागाईँ र ससुरा शिवलाल चापागाईँको नियमित उपचार र हेरचाहमा समर्पित बुहारी हुनुहुन्छ । उहाँका छोरा सौरभ चापागाई पनि जन्मजात शारीरिक अशक्त हुनुहुन्छ । बिरामी सासू र ससुराको स्याहारमा उहाँको समर्पणको कदर गर्दै नमूना बुहारीको रुपमा उहाँलाई पुरस्कार प्रदान गरिने प्रतिष्ठानका अध्यक्ष बानियाँले बताउनुभयो । रासस