काठमाडौँ । चीनका लागि ७ पूर्वराजदूतहरुले छिमेकीसँगको परराष्ट्र नीति बदलेको भन्दै सरकारसंग प्रश्न गरेका छन् ।

पूर्व राजदूतहरू राजेश्वर आचार्य आचार्य, महेन्द्र पाण्डे, टंक कार्की, महेश मास्के, लीलामणि पौडेल, विष्णु पुकार श्रेष्ठ र कृष्ण प्रसाद ओलीले एक संयुक्त प्रेस वक्तव्य जारी गर्दै यस्तो प्रश्न गरेका हुन् ।

उनिहरुले काठमाडौँमा हालै सम्पन्न १४औं दलाइ लामाको ९१औं जन्मोत्सव कार्यक्रममा विदेशी कूटनीतिज्ञहरूको सहभागितालाई लिएर गम्भीर आपत्ति जनाएका छन्। विज्ञप्तिमा नेपालले सधैँ दृढतापूर्वक पालना गर्दै आएको ‘एक चीन नीति’ विपरीत यस्ता गतिविधि हुनु निन्दनीय रहेको उल्लेख गरिएको छ।

विज्ञप्तिमा भनिएको छ- ‘नेपालको भूमिबाट कुनै पनि मित्र राष्ट्रविरुद्ध अप्ठ्यारो हुने वा प्रतिकूल असर पार्ने कार्य नगर्ने र गर्न नदिने प्रतिबद्धता परराष्ट्रमन्त्रीको हालैको चीन भ्रमणमा समेत दोहोर्‍याइएको थियो। के अहिले त्यो प्रतिबद्धतामा परिवर्तन आएको होरु के हामीले छिमेकीसँगको परराष्ट्र नीति बदलेका हौँ।’

विज्ञप्तिमा भनिएको छ -‘यो कार्यक्रम सरकारको सहमतिमा भएको हो भने त्यसले नेपाल र चीनबीचको दौत्य सम्बन्ध र नेपालले अवलम्बन गर्दै आएको भू–राजनीतिक सन्तुलनमा प्रतिकूल असर पार्ने चेतावनी दिएका छन्। यस्ता गतिविधिले देशको स्थायित्व, विकास र स्वतन्त्रतामा समेत धक्का पुग्ने छ।’

यदि यो कार्यक्रम सरकारको सहमतिमा भएको हो भने, नेपालले मित्र राष्ट्र चीनसँगको दौत्य सम्बन्धको स्थापनाकालदेखि हालसम्म कायम राखेको एक–चीन नीतिको प्रतिकूल हुन गएको छ र यसले नेपालले अवलम्बन गर्दै आएको भू–राजनीतिक सन्तुलनमा समेत प्रतिकूल असर पार्ने स्पष्ट देखिन्छ।

यस्ता गतिविधि हाम्रो देशको स्थायित्व, विकास र स्वतन्त्रताको लागि प्रत्युत्पादक हुने भएकाले हामी नेपाल सरकार लगायत सबै सरोकारवालालाई सतर्क र सचेत रहन समेत अपिल गर्दछौँ। साथै भविष्यमा यस्ता गतिविधिहरू नदोहोरिने सुनिश्चितता प्रदान गर्न र छिमेकीसँगको सम्बन्धमा संवेदनशील हुन नेपाल सरकारको ध्यानाकर्षण गर्दछौँ ।

चीनका लागि पूर्व राजदूतहरू :

* राजेश्वर आचार्य

* महेन्द्र पाण्डे

* टंक कार्की

* महेश मास्के

* लीलामणि पौडेल

* विष्णुपुकार श्रेष्ठ

* कृष्ण प्रसाद ओली