काठमाडौं। बागमती प्रदेश स्तरमा जुनियर खेलाडीहरूको सहभागिता रहने तेक्वान्दो प्रतियोगिता आयोजना हुने भएको छ। जैशिदेवल युथ क्लवको आयोजनामा तथा काठमाडौं महानगरपालिकाको मुख्य प्रायोजनमा ‘स्व. पि.एल. सिंह स्मृति छैठौं बागमती प्रदेश स्तरीय जुनियर आमन्त्रण मेयर कप तेक्वान्दो प्रतियोगिता २०८३’ आगामी बैशाख २४ देखि २६ गतेसम्म त्रिपुरेश्वरस्थित दशरथ रंगशालाको कभर्डहलमा सञ्चालन हुने भएको हो।

प्रतियोगिताका लागि निजी क्षेत्रबाट पनि महत्वपूर्ण सहयोग जुटेको छ । एग्रो थाई फुड्स प्रा. लि.ले करिब रु. ५ लाख बराबरको १ केजी तौलको चाँदीको रनिङ शिल्ड उपलब्ध गराएको छ। यस सम्बन्धमा बैशाख २० गते कम्पनीको प्रधान कार्यालय कमलादीमा कम्पनीका ब्रान्ड म्यानेजर अमित झा र जैशिदेवल युथ क्लवका अध्यक्ष राजेश प्रजापतिबीच सम्झौतापत्रमा हस्ताक्षर भएको जानकारी दिइएको छ।

आयोजकका अनुसार प्रतियोगितामा बागमती प्रदेशअन्तर्गतका २५ भन्दा बढी स्थानीय तहका टोलीहरूको सहभागिता रहनेछ भने करिब ५०० खेलाडीले प्रतिस्पर्धा गर्ने अपेक्षा गरिएको छ। सहभागी खेलाडीहरूका लागि बीमा, निःशुल्क दर्ता, खाना तथा नास्ताको व्यवस्था गरिनेछ। साथै खेलाडीलाई टिसर्ट, आयोजक टिमका खेलाडीलाई ट्रयाकसुट, प्रशिक्षक, निर्णायक तथा अतिथिहरूलाई ज्याकेट उपलब्ध गराइनेछ।

प्रतियोगितामा उत्कृष्ट प्रदर्शन गर्ने खेलाडी, प्रशिक्षक र निर्णायकलाई जनही १०० अमेरिकी डलरसहित ट्रफी प्रदान गरिनेछ भने टिमतर्फ प्रथम हुने टोलीलाई १ केजी चाँदीको रनिङ शिल्ड प्रदान गरिने आयोजकले जनाएको छ।

काठमाडौँ । नेपालस्थित दक्षिण कोरियाली दूतावास र नेपाल तेक्वान्दो सङ्घको संयुक्त आयोजनामा ११औँ कोरियन एम्बेसडर खुल्ला अन्तर्राष्ट्रिय तेक्वान्दो प्रतियोगिता–२०२३ हुने भएको छ । प्रतियोगिता यही भदौ २७ देखि ३१ गतेसम्म राजधानीमा हुने आज आयोजित पत्रकार सम्मलेनमा जानकारी दिइएको छ ।

प्रतियोगितामा सात सय ११ महिला र एक हजार ६७ पुरुष गरी कुल एक हजार सात सय ७८ जना सिनियर तथा जुनियर खेलाडी सहभागी हुने तेक्वान्दो सङ्घका उपाध्यक्ष तथा प्रतियोगिता आयोजक समितिका संयोजक भानबहादुर चन्दले जानकारी दिनुभयो । उहाँका अनुसार पुम्सेतर्फ २५ र ग्यरोगी (फाइट) तर्फ ३२ गरी जम्मा ५७ स्वर्ण पदकका लागि प्रतिस्पर्धा हुनेछ ।

यसअघि नेपाली खेलाडीमात्र भाग लिने यस प्रतियोगितामा पहिलो पटक भारत र बङ्गलादेशका खेलाडीले सहभागिता जनाउनेभएका छन् । भारतबाट ३५ र बङ्गलादेशबाट ३३ खेलाडीले भाग लिने आयोजक सङ्घले जनाएको छ ।

उक्त प्रतियोगिता सञ्चालनका लागि करिब रु ३५ लाख खर्च लाग्ने आयोजकको भनाइ छ । प्रतियोगिताका उत्कृष्ट खेलाडीलाई कोरियामा आयोजना हुने विश्व कोरियन एम्बासडर प्रतियोगितामा सहभागी गराइने आयोजक सङ्घले जनाएको छ । रासस