रामपुर । गर्मीयाम बढेसँगै तालपोखरामा पर्यटकको चहलपहल बढ्न थालेको छ । रामपुर नगरपालिका–६ स्थित तालपोखरामा यतिबेला घुम्न जाने आन्तरिक पर्यटक आउने जाने क्रम बाक्लिँदै गएको छ ।

तालपोखरामा डुङ्गा सयर गर्ने, पार्क अवलोकन गर्दै फोटो, टिकटक तथा भिडियो बनाएर रमाउने बढेका छन् । रामपुरको बेझाड बजार, किसानबारी बजार, विजयपुरबाट पक्की सडक जोडिएकाले तालपोखरा पर्यटकको गन्तव्यस्थल बनेको हो ।

बिदाका दिन घुम्न आउनेको बाक्लो उपस्थिति रहने गरेको तालपोखरा संरक्षण समिति सदस्य जनक भण्डारी बताउनुुहुन्छ । सडक सुविधाको पहुँच भएपछि तालपोखरा आउन पर्यटकलाई सहज भएको भण्डारीको भनाइ छ । तालमा पाँच वटा डुङ्गा रहेको डुङ्गा चालक भगवान देवकोटाले जानकारी दिनुभयो ।

ताल परिसरको आरामस्थल चिटिक्क पारिएको छ । हाल दैनिकजसो एक सयभन्दा बढी पर्यटक आउने गरेको जनाइएको छ । वर्षायाममा पानी जम्मा हुने सामान्य पोखरीलाई पर्यटकीय विकास गर्ने उद्देश्यले यहाँका स्थानीयले व्यवस्थित ताल निर्माण गरी सञ्चालनमा ल्याएपछि यो क्षेत्र पछिल्लो समय उत्कृष्ट पर्यटकीय गन्तव्यस्थलका रूपमा विकास भएको छ । नेपाल सरकारले पनि यस क्षेत्रलाई एक सय पर्यटकीय गन्तस्थलको रूपमा सुचीकृत गरी पर्यटन विकासमा सघाएको छ । रासस

पाल्पा । पूर्वी पाल्पाको रामपुरमा रहेको तालपोखरा यतिबेला पाल्पा घुम्न जाने पर्यटकको प्रमुख आकर्षक गन्तव्य बनेको छ ।

बिदाको अवसरमा घुम्न जानेदेखि बाहिरी जिल्लाबाट शैक्षिक अवलोकन भ्रमणमा पुग्ने जो कोहीको रोजाईमा परेसँगै तालपोखरामा पुग्ने पर्यटकको संख्यमासमेत वृद्धि हुँदै जान थालेको हो । फेवा तालको भल्को मेटाउने तालपोखरा दुई दशक अगाडिसम्म सानो पोखरीमा सिमित थियो । तालपोखरालाई क्षेत्र बिस्तार गरी कास्कीको फेवा तालको स्वरुप र शैलीमा पूर्वाधार निर्माण गरिएसँगै यतिबेला तालपोखरामा जाने पर्यटकको उल्लेख्य वृद्धि हुन थालेको छ ।

तालपोखरालाई लुम्बिनी प्रदेश सरकारले एक सय पर्यटकीय गन्तव्य स्थलका रुपमा घोषणा गरेपछि यहाँ पर्यटकको चहलपहल अझ बढेको स्थानीयहरुको भनाइ छ । राष्ट्रिय गौरवको आयोजना कालीगण्डकी करिडोरलेसमेत दाहिने परेकोे यस तालमा पाल्पासहित छिमेकी जिल्लाहरुरुपन्देही,स्याङ्जा,तनहँु,पूर्वीनवलपरासी लगायतका जिल्लाहरुबाट अवलोकनको लागि पर्यटकहरु पुग्ने गरेको बताउनुहुन्छ आन्तरिक पर्यटक सागर भुसाल । उहाँले तालपोखराको अझै प्रचार हुनसके धेरै पर्यटकहरु लोभ्याउने बताउनु भयो ।

स्थानिय नगर सरकारलेसमेत पर्यटन प्रवद्र्धनका लागि डुंगा दौड प्रतियोगिता समय समयमा सञ्चालन गर्दै आएको छ । तीन वर्ष कोभिड १९ का कारण थला परेको पर्यटन व्यवसाय पछिल्लो समयमा सर्वसाधारणलाई खुला गरिएपछि आन्तरिक पर्यटकको मुख्य रोजाईमा तालपोखरा परेको व्यवस्थापन समितिका सचिव सुनिल देवकोटा बताउनु हुन्छ ।

तीन तहकै सरकार र पर्यटन बोर्डलेसमेत अबका दिनमा हातेमालो गरेर अगाडि बढेको खण्डमा विदेशी पर्यटकको अध्ययन र अवलोकनको मुख्य गन्तव्य ताल पोखरा बन्नेसचिव सापकोटाको भनाइ छ । उहाँले तालपोखराले विदेशी मुद्रालाई सहज ढंगबाट स्वदेशमा भित्र्यााउन टेवा पु¥याउने बताउनु भयो ।

– सुशीला रेग्मी
रामपुर । ‘मिनि फेवाताल’को नामले चिनिएको रामपुरको तालपोखरामा यतिबेला पर्यटकको आकर्षण बढेको पाइएको छ । यहाँ नयाँ र आरामदायी खालको डुङ्गा सुचारु गरिएपछि तालपोखराले पर्यटक लोभ्याइरहेको हो । पर्यटकलक्षित हाँस आकारको फाइवर प्याडल डुङ्गा चढ्ने र हेर्नेको उत्साह छ ।

निस्दी गाउँपालिका–४ मित्यालका निर्मल राना हाँस आकारको डुङ्गा सयर गर्दा काठको डुङ्गाको तुलनामा बेग्लै रमाइलो भएको बताउनुहुन्छ । पारिवारिक घुमघामका लागि तालपोखरा आउनुभएका रानाले निर्धक्कका साथ तालमा घुम्दा निकै रमाइलो लागेको सुनाउनुभयो । “काठको डुङ्गाको तुलनामा धेरै आनन्ददायी लाग्यो, डुङ्गाभित्र पानी पस्छ कि भन्ने डर पनि भएन, ढुक्कका साथ नयाँ डुङ्गामा परिवारसहित ताल घुमियो, धेरै आनन्द लाग्यो” उहाँले भन्नुभयो ।

उक्त डुङ्गामा आठ जनासम्म बस्न मिल्ने, सुरक्षित खालको, फोटो, भिडियो खिच्न सहज, एकै पटक धेरै जना सयर गर्र्न मिल्ने सुविधा छ । त्यसकारण पनि यस डुङ्गामा बसेर तालमा घुम्दै सेल्फी खिच्ने, टिकटक बनाउने, भिडियो तथा फोटो खिच्नेहरु बढेका हुन् ।

रामपुरमा नयाँ र देख्दै आकर्षक खालको भएकाले यहाँ घुम्न आउने पर्यटकले अनौठो मान्दै अवलोकन गर्ने गरेको बताउनुहुन्छ, स्थानीय भगवती खनाल । उहाँ भन्नुहुन्छ, “सानो काठको डुङ्गामा चढ्दा पानी पस्ने, हल्लिँदा डुङ्गा पल्टिँन्छ कि भन्ने मनमा त्रास हुन्थ्यो भने यसमा ढुक्क भएर चढ्न पाउँदा धेरै खुशी र रमाइलो लागेको छ ।”

यस आर्थिक वर्षमा रामपुर नगरपालिकाले जलमार्ग सामग्री खरिदका लागि रु १० लाख रकम उपलब्ध गराएको थियो । सो रकमबाट एउटा हाँस आकारको फाइवर प्याडल डुङ्गा रु चार लाखमा र एउटा काठको डुङ्गा रु दुई लाख ४० हजार खरिदमा खर्च गरिएको छ । बाँकी रकम तालपोखरा परिषरको करिब १४० मिटर पक्की बारबन्देज व्यवस्थापनमा खर्च गरिएको तालपोखरा संरक्षण समितिका अध्यक्ष सागरप्रसाद देवकोटाले बताउनुभयो ।

“पर्यटकहरु विभिन्न ठाउँबाट तलापोखरा हेर्नकै लागि आउनुहुन्छ, नयाँपन दिन र पर्यटन प्रवद्र्धनका लागि पोखराबाट हाँस आकारको नयाँ डुङ्गा खरिद गरी चलाउन थालेपछि तालपोखरामा छुट्टै खालको रौनकता थपिएको छ” उहाँले भन्नुभयो ।

दिउँसो र साँझपखको समयमा ताल वरपरको प्राकृतिक वातावरणमा रमाउँदै आनन्द लिने युवाको सङ्ख्या यहाँ बढ्दो छ । पाल्पाको सदरमुकाम तानसेनबाट करिब ६५ किलोमिटर पूर्वमा अवस्थित रामपुरको तालपोखरालाई पर्यटकीय क्षेत्रको रुपमा विकास गरिएपछि यहाँ आउने आन्तरिक पर्यटक ह्वात्तै बढेका हुन् ।

डुङ्गा चालक भगवान देवकोटाले हाँस आकारको डुङ्गाले रौनकता थपेको र यसैमा धेरैको आकर्षण बढेको बताउनुहुन्छ । उहाँ भन्नुहुन्छ, “नयाँ आउने पर्यटक आश्चर्यजनक मान्दै डुङ्गा चढ्ने गर्नुहुन्छ, यसमा सयर गर्दा आनन्दको अनुभूति हुने, देख्दै आकर्षक खालको रहेकाले पनि सबै उमेर समूहलाई लोभ्याइरहेको छ” । हाँस डुङ्गा प्रतिव्यक्ति रु १०० र काठको डुङगा प्रतिव्यक्ति रु ५० शुल्क कायम गरिएको छ ।

तालमा हाल दैनिक दुई डुङ्गा चालकको व्यवस्था गरिएको छ । बिहान ७ बजेदेखि साँझ रात नपरुन्जेलसम्म डुङ्गा सञ्चालन गर्ने गरिएको बताउनुहुन्छ, चालक श्रीधर पराजुली । उहाँका अनुसार विशेषगरी तालपोखरामा युवायुवती र बालबालिका डुङ्गा सयर गर्दै सेल्फीमा रमाउने, भिडियो तथा टिकटक बनाउने र फोटो खिचाउनेको भीड लाग्छ । हाल यहाँ दैनिक एक हाँस डुङ्गा र दुई काठको डुङ्गा सञ्चालनमा ल्याइएको छ ।

एक सय पर्यटकीय गन्तव्यस्थलका रुपमा सूचीकृत पर्यटकीयस्थल तालपोखरामा हालसालै विभिन्न पूर्वाधार स्तरोन्नतिका काम सम्पन्न गरिएपछि यसको सुन्दरताले पर्यटकलाई लोभ्याएको छ । पोखराको फेवातालको झल्को दिनेगरी पर्यटकीय पूर्वाधारका कार्य भएपछि अहिले रामपुरको पर्यटन विकासमा यसले योगदान दिएको छ ।

प्रयोगमा नआउने सामान्य खाडलजस्तो जमिनलाई तालको रुपमा विकास गरी पर्यटकीय क्षेत्र बनाइएको छ । यहाँका स्थानीय र समितिले एक दशकदेखि तालपोखराको स्तरोन्नतिमा भौतिक पूर्वाधारका काममा जोड दिँदै पर्यटकीय गन्तव्यस्थलका रुपमा चिनाउन सफल भएका छन् ।

हालसम्म विभिन्न क्षेत्रको सहयोगमा पर्यटकीय पूर्वाधार विकासमा रु तीन करोड ५० लाख बढी रकम खर्च भइसकेको छ । श्रीमद्भागवत धान्याञ्चल ज्ञान–महायज्ञ गरी विसं २०६६ बाट यहाँ पर्यटन प्रवद्धर््नको काम सुरु गरी पर्यटकीय क्षेत्रका रुपमा विकास गरिएको हो । फेवातालको झल्कोस्वरुप तालको बीचमा मन्दिर निर्माण गरिएको छ । यहाँ २०७४ माघ २४ गतेदेखि डुङ्गा सञ्चालन सुरु गरिएको हो । कोरोनाको कहरमा केही समय बन्द रहे पनि अहिले भने नियमित रुपमा डुङ्गा सञ्चालन भइरहेको छ ।

करिब ४५ रोपनी क्षेत्रफलमा ताल फैलिएको छ । तालकोबीच भागमा जलेश्वर महादेवको मन्दिर छ । ताल वरिपरी घेराबार, प्रवेशद्वार, पर्यटकका निम्ति फोटो खिचाउन तालको आडैमा सेल्फी जोनको व्यवस्था छ । यसको नाममा पोखरी र पार्कसमेत छ । पार्कमा विभिन्न कार्यक्रम, वनभोज हुन्छ । ताल र पार्कसहित करिब ७५ रोपनी क्षेत्रफल तालपोखरा समितिको नाममा छ

वर्षायामको पानी जम्मा हुने पोखरीलाई विकास गरी तालको रुपमा परिणत गरिएको हो । हाल यहाँ स्थानीय कुलो, नहरबाट पानी व्यवस्थापन गरिएको छ ।

तालपोखरामा पर्यटक दैनिकजसो बढ्दै जान थालेपछि पार्क परिसरमा बाल–उद्यान तयार गर्ने समितिले जनाएको छ । पार्क व्यवस्थित गर्ने, बाल–उद्यान निर्माणका सामग्री खरिद, तालकोबीच भाग (मन्दिर परिसरमा)मा पर्यटकलक्षित बस्ने ठाउँको व्यवस्थापन गर्न सङ्घ, प्रदेश र स्थानीय सरकारसमक्ष वजेट माग गरी पुर्वाधार निर्माण गर्ने जनाइएको छ ।