मुस्ताङ। थासाङ गाउँपालिका–२ स्थित कोवाङ—लार्जुङ लाङ्क्यु खोलामा आरसिसी तटबन्ध निर्माण अन्तिम चरणमा पुगेको छ ।

प्रत्येक वर्ष लार्जुङ बस्ती वर्खायाममा बाढीको जोखिम भएकाले गाउँपालिकाले लाङ्क्यु खोलामा आरसिसी तटबन्ध निर्माण गरेको हो ।

सङ्घीय सशर्त अनुदानमा आरसिसी तटबन्ध निर्माण गरिएको हो। चालु आर्थिक वर्षको असार १५ गतेसम्म सम्पन्न हुने गरी रु एक करोड ३५ लाखमा मनि कन्ट्रक्सनले ठेक्का सम्झौता गरेको गाउँपालिकाले जनाएको छ ।

थासाङ गाउँपालिका–२ को कोवाङ र लार्जुङ गाउँबाट बग्ने लाङ्क्यु खोलामा आरसिसी तटबन्ध निर्माण भइरहेको गाउँपालिकाका इञ्जिनियर त्रिलोचन गिरीले जानकारी दिनुभयो ।

बेनी–जोमसोम सडकमार्गको पक्की पुलदेखि कोवाङ–लार्जुङ लाङ्क्यु खोला पुलसम्म दाँयाबाँया दुईतर्फी ३७८ मिटर तटबन्ध निर्माण भइरहेको उहाँको भनाइ छ ।

उहाँका अनुसार हालसम्म तटबन्धको ८० प्रतिशत काम सकिएको छ । गत वर्षको असार १६ गते थासाङको लाङ्क्यु खोलामा बाढी आउँदा लार्जुङ गाउँ जोखिममा परेको थियो ।

बाढी आएपछि लार्जुङका केही घरधुरीलाई स्थानान्तरण गरिएको थियो । रासस