काठमाडौं । पूर्वप्रधानमन्त्री डाक्टर बाबुराम भट्टराईले राष्ट्रिय स्वतन्त्र पार्टी (रास्वपा) का सभापति रवि लामिछानेको भारत भ्रमण सफल होस् भन्ने शुभकामना व्यक्त गर्दै नेपाल–भारत सम्बन्धका संवेदनशील विषयमा दुवै पक्षले गम्भीरतापूर्वक सोच्नुपर्ने बताएका छन्।

बुधबार बिहान सामाजिक सञ्जालमार्फत आफ्नो धारणा सार्वजनिक गर्दै भट्टराईले रवि लामिछानेको द हिन्दुस्तान टाइम्स मा प्रकाशित लेखले नेपाल र भारत दुवैतर्फ सकारात्मक चर्चा ल्याएको उल्लेख गरेका छन्।

उनले नेपाल–भारत सम्बन्धमा विकास साझेदारी, सभ्यता र संस्कृति तथा ‘रोटी–बेटी’ सम्बन्धका विषयमा दुवैतर्फ प्रशंसा हुने गरे पनि सम्बन्धको अर्को गम्भीर पाटो सामरिक सुरक्षा र राष्ट्रिय सार्वभौमसत्तासँग जोडिएको बताएका छन्।

भट्टराईका अनुसार भारतीय पक्षमा अंग्रेज शासनकालदेखि नै ‘हिमालयन फ्रन्टियर’ अर्थात् हिमाली क्षेत्रलाई आफ्नो सुरक्षा चासोको घेराभित्र हेर्ने सोच कायम रहेको छ भने नेपाली समाजमा ‘सिक्किमीकरण’ को त्रास गहिरोसँग बसेको छ। यही मनोवैज्ञानिक र राजनीतिक कारणले नेपाल–भारत सम्बन्ध बारम्बार जटिल बन्ने गरेको उनको भनाइ छ।

पूर्वप्रधानमन्त्री भट्टराईले आफू सरकार प्रमुख हुँदा यही जटिलता समाधान गर्न नेपाल र भारतका प्रबुद्ध व्यक्तिहरू सम्मिलित ईपीजी (प्रबुद्ध व्यक्ति समूह) को अवधारणा अघि सारेको स्मरण गरेका छन्। तर, गठित ईपीजीको प्रतिवेदन अहिलेसम्म कार्यान्वयनको पर्खाइमा रहेको भन्दै उनले त्यसप्रति असन्तुष्टि व्यक्त गरेका छन्।

भट्टराईले रवि लामिछानेको वर्तमान दिल्ली भ्रमणले नेपाल–भारत सम्बन्धमा देखिँदै आएको दुष्चक्र तोड्न योगदान पुर्‍याओस् भन्ने अपेक्षा व्यक्त गरेका छन्। यद्यपि, पछिल्ला दिनमा काठमाडौं र दिल्ली दुवैतर्फ सुनिएका ‘गड्याङगुडुङ’ का आवाज आफूलाई त्यति प्रिय नलागेको टिप्पणी पनि गरेका छन्।

काठमाडौं: वरिष्ट बामपन्थी नेता एवं पूर्वप्रधानमन्त्री डा बाबुराम भट्टराईले कोशी प्रदेश सरकार बन्ने र भत्कने कार्यले दलहरुभित्रको कुर्सीको निर्लज्ज तमासा रहेको र यसले संघीय लोकतान्त्रिक गणतन्त्रलाई बदनाम गराउन भूमिका निर्वाह गरिरहेको टिप्पणी गर्नु भएको छ ।

कोशी प्रदेशमा नेपाली कांग्रेसको एउटा खेमाको नेतृत्व तथा नेकपा एमालेको समर्थनमा नयाँ सरकार गठन हुने भएपछि डा भट्टराईले सामाजिक सञ्जालमा यस्तो लेख्नु भएको हो ।

उहाँले दलहरुको यस्तो प्रवृत्ति घोषित व्यवस्था विरोधीहरुको भूमिका भन्दा बढी भएको बताउनु भएको छ । नेपाली कांग्रेस र नेकपा एमालेलाई पनि उछिनेर माओवादी केन्द्रका अध्यक्ष समेत रहेका प्रधानमन्त्री प्रचण्डले गरेको हर्कतले लाज पनि लजाउनु पर्ने स्थिति बनेको भन्दै तिखो टिप्पणी गर्नु भएको छ ।

उहाँले अब संघीय लोकतान्त्रिक गणतन्त्रको रक्षा निम्ति यिनीहरूसंग वेलावखत सहकार्य गर्न खोज्नु गोरू दुहुनु जस्तै मूर्खतापूर्ण प्रयास भएको र हुनेवारे कुनै शंका रहेन भनी निराशा व्यक्त गर्नु भएको छ ।

नेता डा भट्टराईको टिप्पणी यस्तो छ:

कोशी प्रदेशमा गत दश महिनामा प्रमुख पुराना दलहरूले गरेको निर्लज्ज कुर्सीको तमासाले संघीय लोकतान्त्रिक गणतन्त्रलाई बदनाम गराउन जति भूमिका खेलेको छ त्यति यो घोषित व्यवस्थाविरोधीहरूको भूमिकाले पनि खेलेको छैन।

त्यसमा पनि कांग्रेस र एमालेलाई समेत उछिनेर प्रचण्ड माओवादीले गरेको हर्कतले लाज पनि लजाउनुपर्ने स्थिति बनेको छ।

अब संघीय लोकतान्त्रिक गणतन्त्रको रक्षानिम्ति यिनीहरूसंग वेलावखत सहकार्य गर्न खोज्नु गोरू दुहुनु जस्तै मूर्खतापूर्ण प्रयास भएको र हुनेवारे कुनै शंका रहेन!

अत: विगतका उदारवादी र आदर्शवादी कमजोरी हटाउॅदै दृढतापूर्वक अग्रगामी वैकल्पिक शक्ति निर्माणमा लाग्नु देश र जनताकालागि अपरिहार्य आवस्यकता बनेको सबैले स्वीकारौं!

चुनावदेखि चुनाव र सत्तादेखि सत्तासम्मको फोहरी खेल खेलेर कुनै समाजवाद र अझै झन् साम्यवाद त आउॅदै आउदैन भन्ने सबैले वेलैमा बुझून्!