काठमाडौं । सरकारले संक्रमणकालीन न्यायसमबन्धी दुई वटा आयोगमा पदाधिकारी सिफारिका लागि पूर्वप्रधानन्यायाधीश ओमप्रकाश मिश्रकै समितिलाई निरन्तरता दिने निर्णय गरेको छ ।

प्रधानमन्त्री तथा मन्त्रिपरिषद्को कार्यालय सिंहदरबारमा आज साँझ बसेको मन्त्रिपरिषद् बैठकले मिश्र नेतृत्वको समितिलाई निरन्तरता दिने निर्णय गरेको हो ।

समितिमा पूर्वमहान्यायाधिवक्ता खम्मबहादुर खाती, पूर्वराजदूत डा. अर्जुनकुमार कार्की र अधिकारकर्मी स्टेला तामाङ छन् । यसअघि समितिले पदाधिकारी नियुक्तिको सिफारिस गर्न सकेको थिएन । समितिले ४० जनाको नाम छनोट गरेपछि समितिका सदस्यहरुबीच कुरा नमिल्दा सरकारलाई नाम सिफारिस गर्न सकेको थिएन । तर आज सरकारले फेरि यही समितिलाई नाम छनोट गर्ने जिम्मेवारी दिने निर्णय गरेको हो ।

यसअघि प्रधानमन्त्री केपी शर्मा ओली, नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहालबीच भएको छलफलमा पुन: सिफारिस समिति बनाएर काम अघि बढाउने सहमति गरेका थिए ।

सोही सहमति अनुसार लगत्तै बसेको मन्त्रिपरिषद् बैठकले मिश्र नेतृत्वको समितिलाई निरन्तरता दिने निर्णय गरेको हो ।

यो समितिमा मानव अधिकार आयोगको एकजना प्रतिनिाधि रहन्छन्, यदि यसअघिको समितिले निरन्तरता पाउने हो भने आयोगले सदस्य मनोज दवाडीलाई पठाउनुपर्ने हुन्छ ।