काठमाडौँ । जननेता मदन भण्डारीको ७५औँ जन्मजयन्तीको अवसरमा आयोजित कार्यक्रममा नेपालका प्रमुख कम्युनिस्ट नेताहरू लामो समयपछि एउटै मञ्चमा देखिएका छन्।

मदन भण्डारी फाउन्डेसनले आइतबार राष्ट्रिय सभागृहमा आयोजना गरेको ‘नेपालको कम्युनिस्ट आन्दोलन र जननेता मदन भण्डारी’ विषयक राष्ट्रिय गोष्ठीमा नेकपा एमालेका अध्यक्ष केपी शर्मा ओली, नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ र सहसंयोजक माधवकुमार नेपाल एकै मञ्चमा उपस्थित भएका हुन्।

कार्यक्रममा नेकपा नेता झलनाथ खनालको पनि सहभागिता रहेको थियो। पछिल्लो समय फरक–फरक राजनीतिक धारमा सक्रिय रहेका यी नेताहरू मदन भण्डारीको स्मृतिमा आयोजित कार्यक्रममा एउटै मञ्चमा देखिनु राजनीतिक वृत्तमा चासोका रूपमा हेरिएको छ।

गोष्ठीको प्रमुख आतिथ्य पूर्वराष्ट्रपति विद्यादेवी भण्डारीले गरेकी थिइन्। कार्यक्रममा मदन भण्डारीको राजनीतिक योगदान, नेपाली कम्युनिस्ट आन्दोलनमा उनले अघि सारेको जनताको बहुदलीय जनवाद (जबज) र त्यसको समकालीन सान्दर्भिकतामाथि छलफल हुने कार्यक्रम रहेको आयोजकले जनाएको छ।