एजेन्सी । अस्ट्रेलियाका स्टार अलराउन्डर ग्लेन म्याक्सवेलले मंगलबार यो पुष्टि गरेका छन् कि उनी आईपीएल २०२६ को मिनी–अक्सनमा सहभागी हुनेछैनन्।

उनको यस निर्णयले संकेत दिएको छ सम्भवतः उनले अब इन्डियन प्रिमियर लिग (आईपीएल) मा आफ्नो अन्तिम खेल खेलेका छन्। म्याक्सवेलभन्दा अघि आन्द्रे रसेल र फाफ डु प्लेसिस जस्ता दिग्गजहरू पनि यसपटक अक्सनबाट हटिसकेका छन्। यस वर्षको मिनी–अक्सन डिसेम्बर १६ मा अबु धाबीमा हुने छ।

सामाजिक सञ्जालमार्फत निर्णयको घोषणा

३७ वर्षीय म्याक्सवेलले सामाजिक सञ्जालमा एक पोस्ट गर्दै भने यो निर्णय सजिलो थिएन, तर धेरै सोच–विचारपछि उनले यो कदम चालेका हुन्।

उनले लेखेका छन्– ‘आईपीएलमा बिताएको धेरै यादगार सिजनहरूपछि मैले यस वर्ष आफ्नो नाम अक्सनमा नहाल्ने निर्णय गरेको छु। यो ठूलो निर्णय हो, र म यसलाई निकै कृतज्ञतापूर्वक लिन चाहन्छु, किनकि यस लिगले मलाई धेरै चिज दिएको छ।’ उनले आफ्नो पोस्टमा यो संकेत पनि दिए कि उनको आईपीएल यात्रा अब समाप्त हुन सक्छ।

म्याक्सवेलको भावुक सन्देश

पोस्टमा म्याक्सवेलले आईपीएललाई धन्यवाद दिँदै भने, ‘आईपीएलले मलाई केवल राम्रो खेलाडी मात्र बनाएन, यसले मलाई राम्रो मानिस बन्न पनि मद्दत गर्‍यो। यो लिगमा मैले विश्व–स्तरीय खेलाडीहरूसँग खेल्ने अवसर पाएँ, उत्कृष्ट टिमहरूको हिस्सा बनेँ र भारतीय दर्शकहरूको ऊर्जा सधैं मेरो प्रेरणाको स्रोत रह्यो।’ उनले अन्त्यमा लेखे, ‘यहाँका यादहरू, चुनौतीहरू र भारतमा पाएको ऊर्जा, सधैं मेरो मनमा रहनेछ। धन्यवाद, छिटै भेट्ने आशा राख्छु।’

चोट र फर्मले निर्णय कठिन बनायो

अघिल्लो सिजन म्याक्सवेलले पंजाब किङ्सबाट खेलेका थिए। कप्तान श्रेयस अय्यर र कोच रिकी पोन्टिङको नेतृत्वमा उनले राम्रो सुरुआत गरेका थिए तर पछि औँलाको चोटका कारण सिजनबाट बाहिरिनुपर्‍यो।

पंजाबले उनलाई ४.२ करोड रुपैयाँमा किनेको थियो। तर उनले ६ इनिङ्समा जम्मा ४८ रन मात्रै बनाउन सके। निराशाजनक प्रदर्शनका कारण टिम व्यवस्थापनले उनलाई मुख्यतः बलरको भूमिकामा प्रयोग गर्‍यो।

म्याक्सवेलले अक्सनमा सहभागी नहुनुको कारण स्पष्ट रूपमा भनेनन्, तर प्रायः ठूला टिमहरू उनको राम्रो प्रदर्शनको प्रतीक्षाबाट थाकिसकेका छन्। महँगो मूल्यमा बिक्ने गरे पनि धेरै सिजनमा उनी अपेक्षित प्रदर्शन गर्न सकेनन्। तथ्यांक विश्लेषणले पनि देखाएको छ कि उनलाई आफ्नो क्षमताभन्दा बढी मूल्य प्रदान हुँदै आएको थियो।

उतार–चढावले भरिएको आईपीएल यात्रा

म्याक्सवेलको आईपीएल करियर धेरै उतार–चढावपूर्ण रह्यो। उनलाई पहिलोपटक २०१२ मा दिल्ली डेयरडेभिल्स (हाल दिल्ली क्यापिटल्स)ले किनेको थियो। २०१४ मा किङ्स इलेभेन पंजाब (हाल पंजाब किङ्स)का लागि उनले धमाकेदार प्रदर्शन गरे र त्यो सिजनका सबैभन्दा खतरनाक ब्याट्सम्यानमध्ये परे।

त्यसपछि धेरै सिजनमा उनको प्रदर्शन मिश्रित रह्यो—कहिले दमदार ब्याटिङले टिम जिताए, कहिले निराशाजनक खेल देखाए। उनको आक्रमक खेल, अनौठा शट र पार्ट–टाइम स्पिनले उनलाई टी–२० क्रिकेटमा एउटा छुट्टै पहिचान दियो।

म्याक्सवेलका लागि २०१४, २०२१ र २०२३ वर्ष ब्याटिङदेखि उत्कृष्ट सिजन रहे। २०१४ मा उनले ५५२ रन बनाए र पंजाबलाई फाइनलसम्म पुर्‍याउन महत्वपूर्ण भूमिका खेले। २०२१ मा उनले ५१३ रन बनाए भने २०२३ मा ४०० रन जोडे।

के आइपीएलमा पुनः फर्किन सक्छन् ?

यद्यपि म्याक्सवेलले स्पष्ट रूपमा संन्यासको घोषणा गरेका छैनन्, तर उनको ‘सी यू सून’ सन्देशले भविष्यमा मेन्टर, कोच वा टिम एम्बेसेडरको रूपमा आईपीएलमा फर्किन सक्ने संकेत दिन्छ।

म्याक्सवेलको आईपीएल यात्रा समाप्तिको दिशामा गएजस्तो देखिए पनि उनले आफ्नो खेलले दर्शकहरूलाई निकै मनोरञ्जन दिएका छन्। जसरी आन्द्रे रसेल र फाफ डु प्लेसिसले लिग छोँड्दा आफ्नो एक विरासत छाडे, म्याक्सवेलको प्रभाव पनि त्यसभन्दा कम छैन।

एजेन्सी । अस्ट्रेलियाका अलराउन्डर ग्लेन म्याक्सवेलले एकदिवसीय क्रिकेटबाट सन्यास‍को घोषणा गरेका छन् । सोमबार एक पोडकास्टमार्फत म्याक्सवेलले सन्यासको घोषणा गरेका हुन् ।

म्याक्सवेलले २०१२ मा अफगानिस्तानविरुद्ध डेब्यू गरेका थिए । हालसम्म १४९ एकदिवसीय खेल खेलेका उनले ३,९९० रन बनाएका छन् । बलिङतर्फ उनले ७७ विकेट लिएका छन् भने ९१ क्याच गरेका छन् । उनको औसत ३३.८१ र स्ट्राइक रेट १२६.७० रहेको छ।

एकदिवसीयमा चार शतक र एक दोहोरो शतक बनाएका उनले अस्ट्रेलियाका लागि सन् २०१५ र सन् २०२३ को एकदिवसीय विश्वकप जितेका छन् । उनले सन् २०२३ को एकदिवसीय विश्वकपमा अफगानिस्तानविरुद्ध २०१ रनको अविजित पारी खेलेका थिए ।

उनले पोडकास्टमा भनेका छन्, ‘मैले चयन समिति अध्यक्ष जर्ज बेलीसँग राम्रो कुरा गरें, हामीले २०२७ विश्वकपबारे छलफल गर्यौं । म त्यो विश्वकप खेल्छु जस्तो लाग्दैन, अब मेरो स्थानमा अरूलाई मौका दिने समय आएको छ।’

म्याक्सवेल टी-२० मा भने खेल्नेछन् । उनले अस्ट्रेलियाका लागि सन् २०२१ को टी-२० विश्वकप पनि जितेका छन् ।

एजेन्सी । आईपीएल अन्तर्गत पाँचौं खेल गुजरात टाइटन्स र पञ्जाब किंग्सबीच भयो । मंगलबार भएको यो खेल पञ्जाबले ११ रनले जित्यो ।

तर, पञ्जाबका ग्लेन म्याक्सवेललाई ठूलो झट्का लाग्यो । उनी खाता नखोली नै प्याभिलियन फर्किए । योसँगै उनले अनावश्यक कीर्तिमान आफ्नो नाममा बनाए ।

अहमदाबादको नरेन्द्र मोदी स्टेडियममा खेलिएको उक्त खेलमा गुजरातले टस जितेर पन्जाबलाई पहिले ब्याटिङको निम्तो दिएको थियो ।

पञ्जाबका लागि पाँचौं नम्बरमा ब्याटिङ गर्न आएका म्याक्सवेल खाता नखोलेर आउट भए । उनलाई साई किशोरले एलबीडब्ल्यू आउट गरेका थिए । योसँगै अस्ट्रेलियाका अलराउन्डरको नाममा लज्जास्पद कीर्तिमान दर्ता भएको छ ।

उनी आईपीएलमा सबैभन्दा धेरै पटक शून्य रनमा आउट हुने ब्याट्सम्यान बनेका छन् । उनी १९औं पटक आईपीएलमा खाता खोल्नै नसकेर आउट भएका हुन् ।

सबैभन्दा बढीपटक शून्य रनमा आउट हुने ब्याट्सम्यान
ग्लेन म्याक्सवेल – १९
रोहित शर्मा र दिनेश कार्तिक – १८
पियुष चावला – १७
सुनिल नारायण – १६

एजेन्सी । आईपीएल २०२४ को ६८ औं खेलमा चेन्नई सुपर किंग्सका कप्तान रुतुराज गायकवाडलाई पहिलो बलमा नै आउट गरेर ग्लेन म्याक्सवेलले शनिबार ठूलो उपलब्धि हासिल गरेका छन् ।

इनिङ्सको पहिलो बलमा म्याक्सवेलले गायकवाडलाई यश दयालको हातमा सर्ट फाइन लेगमा क्याच आउट गराए ।

ग्लेन म्याक्सवेल आरसीबीका दोस्रो स्पिनर बने, जसले विपक्षी टोलीका ब्याट्सम्यानलाई पहिलो बलमै आउट गरे । यसअघि सन् २००९ मा केभिन पिटरसनले कोलकाता नाइट राइडर्सविरुद्ध यस्तो उपलब्धि हासिल गरेका थिए ।

पिटरसनले ब्रेन्डन म्याकुलमलाई विराट कोहलीबाट क्याच आउट गराएका थिए ।

आरसीबीले शनिबार भर्चुअल नकआउट खेलमा चेन्नई सुपर किंग्सलाई २७ रनले पराजित गर्दै प्लेअफमा स्थान पक्का गर्यो । एम चिन्नास्वामी रंगशालामा भएको खेलमा आरसीबीले पहिले ब्याटिङ गर्दै २० ओभरमा ५ विकेट गुमाएर २१८ रन बनाएको थियो । जवाफमा चेन्नईले २० ओभरमा ७ विकेट गुमाएर १९१ रन बनायो ।

एजेन्सी । रोयल च्यालेन्जर्स बैंगलोरका ब्याट्सम्यान ग्लेन म्याक्सवेलले आईपीएल २०२४ बाट केही समयको लागि ब्रेक लिएका छन् । यद्यपी उनी कहिले फर्कने भन्ने टुंगो छैन । आफूलाई मानसिक र शारीरिक आराम दिन म्याक्सवेलले यस्तो गरेका हुन् ।

आईपीएल २०२४ मा अहिलेसम्म खेलेका म्याचहरूमा म्याक्सवेलको प्रदर्शन राम्रो रहेन । उनले यो सिजन खेलेका ६ इनिङ्समा ३२ रन मात्र बनाएका छन् । जसमा उनी तीन पटक शून्यमा आउट भएका थिए ।

तर, आईपीएल आउनुअघि उनी उत्कृष्ट फर्ममा थिए । उनले गत वर्ष नोभेम्बरदेखि आईपीएल सुरु हुँदासम्म खेलेका १७ टी–२० खेलमा ४२.४६ को औसत र १८५.८५ को स्ट्राइक रेटमा ५५२ रन बनाएका थिए। यस अवधिमा उनले दुई शतक पनि बनाए ।

हैदरावादविरुद्ध प्लेइङ इलेभेनबाट बाहिर राख्न गरेका थिए अनुरोध

आइपिएलको शुरुवाती खेलमा खराब प्रदर्शनका कारण उनले सोमबार हैदरावादमा सनराइजर्स हैदरावादविरुद्धको खेलबाट बाहिरिएका थिए ।

ग्लेन म्याक्सवेल आफूले नै सकारात्मक योगदान दिन नसकेको महसुस गरेको कारण फिर्ता लिने निर्णय गरेको बताए । उनले भने, ‘सुरुका खेलहरूमा मेरो प्रदर्शन राम्रो थिएन । यस्तो अवस्थामा मलाई यो निर्णय लिन सजिलो भयो । मैले अन्तिम खेलपछि कप्तान फाफ डु प्लेसिस र प्रशिक्षकहरूसँग कुरा गरेँ र अरू खेलाडीलाई मौका दिनुपर्छ भनें। मलाई लाग्छ मेरो यो मानसिक र शारीरिक रूपमा आराम गर्ने सही समय हो।’

म्याक्सवेलले टोलीको प्रदर्शनलाई ध्यानमा राख्दै यो निर्णय सहज भएको बताए । उनले भने, ‘हाम्रो टोलीले अपेक्षाअनुरुप प्रदर्शन गर्न सकेको छैन । मेरो आफ्नै प्रदर्शनले पनि टोलीको प्रदर्शन झल्काउँछ। हामीले पछिल्लो केही सिजनमा पावरप्ले र मध्य ओभरमा राम्रो प्रदर्शन गर्थ्यौं, तर यसपटक धेरै कमी छ। मैले सकारात्मक योगदान दिन नसकेको महसुस गरें।’

म्याक्सवेललाई लाई हेर्दा अरु खेलाडीलाई मौका दिनु उचित हुनेछ । यो ठाउँमा नयाँ खेलाडीले राम्रो प्रदर्शन गर्ने अपेक्षा गरिएको छ ।

जारी सिजनमा आरसीबीले खेलेका सात खेलमध्ये एक खेल मात्र जितेको छ । टोली दुई अंकको साथ अंकतालिकाको पुच्छरमा रहेको छ । अब छनोट हुन आरसीबीले सबै खेल जित्नुपर्ने दबाब छ ।

एजेन्सी । विष्फोटक ब्याट्सम्यान ग्लेन म्याक्सवेल आईपीएल २०२४ मा अहिलेसम्म पूर्ण रूपमा फ्लप देखिएका छन् । रोयल च्यालेन्जर्स बैंगलोर (आरसीबी)का ब्याटिङ अलराउन्डरले अहिले टिमका लागि ब्याटिङबाट कुनै चमत्कार गर्न सकेका छैनन् ।

राजस्थानविरुद्धको पाँचौं खेलमा म्याक्सवेल मात्र १ रन बनाएर प्याभिलियन फर्किएका थिए । म्याक्सवेलले आफ्नो पाँच इनिङ्समा एकपटक पनि ३० रनको आँकडा पार गर्न सकेका छैनन् ।

तर २०२३ मा भएको एकदिवसीय विश्वकपमा म्याक्सवेलले उत्कृष्ट प्रदर्शन गरेका थिए । अष्ट्रेलियाका ब्याट्सम्यानले भारतको भूमिमा खेलिएको एकदिवसीय विश्वकप २०२३ मा विस्फोटक ब्याटिङ प्रदर्शन गरेका थिए । तर, त्यही भारतीय पिचमा म्याक्सवेल आईपीएलमा लगातार फ्लप भइरहेका छन् ।

विश्वकपमा अफगानिस्तानविरुद्धको खेलमा म्याक्सवेलले लक्ष्य पछ्याउँदै अस्ट्रेलियालाई जित दिलाउन दोहोरो शतक प्रहार गरे र त्यो खेलमा उनको खुट्टामा गम्भिर चोट लागेको थियो, जसका कारण उनी दुवै खुट्टामा राम्ररी उभिन समेत सकेका थिएनन् । त्यस्तो अवस्थामा नायक बन्दै म्याक्सवेलले खेल जिताए ।

तर आईपीएलमा पूर्ण रूपमा फिट भए पनि म्याक्सवेलले केही गर्न सकेका छैनन् । पाँच इनिङ्समा ब्याटिङ गर्दै म्याक्सवेल चार पटक एक अंकको स्कोरसहित प्याभिलियन फर्केका छन्, जसमा दुई शून्य पनि छन् । उनको उच्च स्कोर २८ रन रहेको छ । म्याक्सवेलले पाँच इनिङ्समा क्रमशः ००, ०३, २८, ०० र ०१ रन बनाए । आफ्नो खराब फर्मका कारण अष्ट्रेलियाका खेलाडी आरसीबीका लागि जिम्मेवार बनेको देखिन्छ ।

यद्यपि, चित्त बुझाउने बाटो भनेको म्याक्सवेल प्रायः पार्ट टाइमरको रूपमा बलिङ गर्छन् । तर यो सिजन उनी आरसीबीका मुख्य बलरभन्दा राम्रो देखिन्छन् । एकातिर आरसीबीबाट सुरुका तीन खेल खेलेका अल्जारी जोसेफले एक विकेट लिएका छैनन् भने म्याक्सवेलले ५ खेलमा ४ ब्याट्सम्यानलाई आफ्नो शिकार बनाएका छन् । अब आउने खेलमा म्याक्सवेलले कस्तो प्रदर्शन गर्छन् हेर्नु चासोको विषय हुनेछ ।

एजेन्सी । अस्ट्रेलिया र वेस्ट इन्डिजबीचको दोस्रो टी–२० खेल एडिलेड ओभल मैदानमा जारी छ । यो खेलमा अष्ट्रेलियाका स्टार अलराउन्डर ग्लेन म्याक्सवेलले विष्फोटक शतक प्रहार गर्दै ठूलो उपलब्धि हासिल गरेका छन् ।

आफ्नो करियरको १०२ औं टी–२० अन्तर्राष्ट्रिय खेल खेल्दै म्याक्सवेलले करियरको पाँचौं शतक प्रहार गरे । म्याक्सवेलले ५० बलमा ९ चौका र ७ छक्का प्रहार गर्दै शतक पूरा गरे । यस क्रममा उनले भारतीय टोलीका कप्तान रोहित शर्माको विश्व कीर्तिमान पनि बराबरी गरेका छन् ।

यस अवधिमा म्याक्सवेल संयुक्त रूपमा टी–२० अन्तर्राष्ट्रिय क्रिकेटमा सबैभन्दा धेरै शतक बनाउने विश्वका पहिलो ब्याट्सम्यान बनेका छन् । यस मामिलामा म्याक्सनेलले भारतीय टोलीका कप्तान रोहित शर्माको विश्व कीर्तिमानको बराबरी गरेका छन् ।

म्याक्सवेलको खातामा पनि पाँच टी–२० अन्तर्राष्ट्रिय शतक भएको छ जसले रोहितको कीर्तिमानलाई बराबरी गर्यो । म्याक्सवेलले ९४ इनिङ्समा यो उपलब्धि हासिल गरेका थिए भने रोहितले १४३ इनिङ्समा यो उपलब्धि हासिल गरेका थिए । सूर्यकुमार यादव ४ शतकसहित तेस्रो स्थानमा छन् ।

काठमाडौँ । अष्ट्रेलिया भ्रमणमा रहेको वेस्ट इन्डिजले दोस्रो टी–२० आईमा २४२ रनको विजयी लक्ष्य पाएको छ ।

एडिलेडमा टस हारेर ब्याटिङ थालेको अष्ट्रेलियाले २० ओभरमा ४ विकेटको क्षतिमा २४१ रन जोड्यो । अष्ट्रेलियाका लागि ग्लेन म्याक्सवेलले विष्फोटक शतकीय पारी खेले । उनी ५५ बलमा १२० रनसहित नटआउट रहे । उनले १२ चौका र ८ छक्का प्रहार गरे । म्याक्सवेलको यो टी–२० अन्तर्राष्ट्रियमा पाँचौं शतक हो ।

यस्तै, डेभिड वार्नरले २२, मिचेल मार्शले २९, मार्कुस स्टोइनिसले १६ रन जोड्दा टिम डेभिड ३१ रनमा अविजित रहे ।

बलिङतर्फ वेस्ट इन्डिजका लागि जेसन होल्डरले दुई तथा अल्जारी जोसेफ र रोमारियो सेपहर्डले एक–एक विकेट लिए ।

एजेन्सी । अस्ट्रेलियाका स्टार अलराउन्डर ग्लेन म्याक्सवेल शुक्रबार राति एडिलेडको अस्पतालमा भर्ना भएका छन् । रिपोर्टका अनुसार उनले त्यो दिन एडिलेडमा रातभर पार्टी गरेका थिए र धेरै मदिरा सेवन गरेका थिए ।

त्यसपछि उनको स्वास्थ्य बिग्रिएपछि एम्बुलेन्सबाट अस्पताल लगिएको थियो । क्रिकेट अष्ट्रेलियाले यस विषयमा अनुसन्धान गरिरहेको छ ।

म्याक्सवेललाई सोमबार वेस्ट इन्डिजविरुद्धको एकदिवसीय सिरिजबाट विश्राम दिइएको छ । फेब्रुअरी २ देखि ३ वटा एकदिवसीय सिरिज सुरु हुनेछ । अष्ट्रेलियाको कप्तानी स्टिभ स्मिथले गर्नेछन् ।

डेली टेलिग्राफको रिपोर्ट अनुसार यो घटना त्यतिबेलाको हो । जब म्याक्सवेल ब्रेट लीको रक ब्यान्ड ‘सिक्स एन्ड आउट’ हेर्न आएका थिए । एम्बुलेन्स बोलाइयो र म्याक्सवेललाई अस्पताल लगियो, यद्यपि उनी लामो समयसम्म अस्पतालमा बसेनन् ।

सिरिजबाट विश्राम पाएका ग्लेन म्याक्सवेलको स्थानमा फ्रेजर मगार्चलाई एकदिवसीय टोलीमा मौका दिइएको छ । क्रिकेट अष्ट्रेलियाले म्याक्सवेललाई टी–२० विश्वकप र टी–२० सिरिजअघि कामको बोझ व्यवस्थापनलाई ध्यानमा राखेर विश्राम दिएको जनाएको छ । अष्ट्रेलियाले फेब्रुअरीमा वेस्ट इन्डिज र न्युजिल्याण्डसँगको टी–२० सिरिज पनि खेल्नेछ ।

एजेन्सी । भारतीय टोलीका पूर्व कप्तान सौरभ गांगुलीले अफगानिस्तान विरुद्ध खेलेको ग्लेन म्याक्सवेलको म्याच–विजेता इनिङ्सको प्रशंसा गरे तर यसलाई एकदिवसीय ढाँचाको सबैभन्दा ठूलो इनिङ्स मान्नु पर्नेमा उनी सहमत भएनन् ।

ग्लेन म्याक्सवेलले अष्ट्रेलियालाई अफगानिस्तानमाथि ३ विकेटले यादगार जित दिलाएका थिए । २९२ रनको लक्ष्य पछ्याउने क्रममा अष्ट्रेलियाले ९१ रनमा ७ विकेट गुमाएको थियो । त्यसपछि म्याक्सवेलले २१ चौका र १० चौकाको मद्दतले १२८ बलमा अविजित २०१ रन बनाएर अष्ट्रेलिया टोलीलाई जित दिलाए ।

म्याक्सवेलको इनिङ्सको विशेष कुरा यो थियो कि उनले दुखाइसँग संघर्ष गरे तर पनि अन्तिम समयसम्म खेल्न जारी राखे र टोलीलाई जित दिलाए । कोलकातामा दिल्ली क्यापिटल्सको प्रशिक्षण शिविरको छेउमा पत्रकारहरूसँग कुरा गर्दै, सौरभ गांगुलीले म्याक्सवेलको इनिङ्समा आफ्नो प्रतिक्रिया दिए ।

गांगुलीको बयान यस्तो –
होइन होइन । म यो इनिङलाई एकदिवसीय ढाँचामा सबैभन्दा ठूलो इनिङ्स ठान्दिनँ । मैले सचिन तेन्दुलकर र विराट कोहलीको धेरै उत्कृष्ट इनिङ्स देखेको छु । मैले अन्य केही उत्कृष्ट इनिङ्स देखेको छु । म्याक्सवेलको इनिङ्स विशेष छ किनभने उनको अवस्था फरक थियो । उनी चोटिल थिए । दौडन सकेनन् । उनी टेल ब्याट्सम्यानसँग क्रिजमा थिए । छक्का प्रहार गर्दै थिए । तर सचिन र विराटले धेरै उत्कृष्ट इनिङ्स खेलेका छन् ।

सौरभ गांगुलीले अफगानिस्तानले अष्ट्रेलियाविरुद्धको खेल जित्नुपर्ने पनि बताए किनभने उनीहरूसँग राम्रो पकड थियो । गांगुलीले भने, ‘अफगानिस्तानले धेरै राम्रो खेलेको थियो र जित्नुपर्ने थियो । म्याक्सवेलले उत्कृष्ट पारी खेले । तर अफगानिस्तानको बलिङ र कप्तानी राम्रो भएन ।’

एजेन्सी । ग्लेन म्याक्सवेलले मंगलबार अफगानिस्तानविरुद्ध विश्व क्रिकेटको सबैभन्दा ठूलो इनिङ खेलेका थिए, जसलाई देखेर भारतीय स्टार ब्याट्सम्यान विराट कोहली निकै प्रभावित भए ।

ग्लेन म्याक्सवेलले वानखेडे स्टेडियममा दुखाइको बावजुद दोहोरो शतक प्रहार गरे र अस्ट्रेलियालाई सेमिफाइनलमा पुर्याए ।

२०२३ को विश्वकपको ३९ औं खेलमा अफगानिस्तानले पहिले ब्याटिङ गर्दै निर्धारित ५० ओभरमा ५ विकेट गुमाएर २९१ रन बनाएको थियो । जवाफमा अस्ट्रेलियाले ४६ दशमलव ५ ओभरमा ७ विकेट गुमाएर लक्ष्य पुरा गर्यो । अष्ट्रेलियाको जितका हिरो बनेका ग्लेन म्याक्सवेलले १२८ बलमा २१ चौका र १० छक्काको मद्दतले अविजित २०१ रन बनाए ।

कोहलीले गरे तारिफ
ग्लेन म्याक्सवेलको इनिङ्सबाट कोहली निकै प्रभावित भएका थिए । कोहलीले आफ्नो इन्स्टाग्राम स्टोरीमा ६ शब्दमा म्याक्सवेलको प्रशंसा गरेका छन् । म्याक्सवेलको तस्बिर सेयर गर्दै ३५ वर्षीय कोहलीले क्याप्सन लेखेका छन्, ‘केबल तिमिले मात्र यो गर्न सक्छौं । अविश्वसनीय ।’

ग्लेन म्याक्सवेल र विराट कोहली आईपीएलमा रोयल च्यालेन्जर्स बैंगलोरबाट सँगै खेल्छन् । यी दुईबीच निकै गहिरो मित्रता छ ।

एजेन्सी । स्टार अलराउन्डर ग्लेन म्याक्सवेलको अविजित २०१ रनको इनिङको आधारमा अष्ट्रेलियाको टोली अफगानिस्तानबाट जित खोसेर सन् २०२३ को विश्वकपको सेमिफाइनलमा प्रवेश गरेको छ ।

ग्लेन म्याक्सवेलको यो ऐतिहासिक इनिङ्स उनका लागि सहज थिएन । यो इनिङ्सका क्रममा उनलाई खुट्टामा दुखाइ पनि भएको थियो । साथै ह्यामस्ट्रिङमा गम्भीर चोट लागे पनि उनले टोलीको साथ छाडेनन् । म्याक्सवेलले अन्तिमसम्म पुरै खेल खेले र एक्लैले अष्ट्रेलियालाई शानदार जित दिलाए ।

कुनै बेला २९२ रनको लक्ष्य पछ्याएको टोलीले ९१ रनमा ७ विकेट गुमाएको थियो, त्यसपछि खेल अफगानिस्तानको पोल्टामा गएको जस्तो देखिन थालेको थियो तर ग्लेन म्याक्सवेलको ब्याटबाट आएको चमत्कारी इनिङ्सले सबैलाई चकित बनायो ।

म्याक्सवेलले पक्कै पनि यो दोहोरो शतक बनाए, तर उनलाई मैदानमा दुईपटक पीडाले कराएको देखेर फ्यानहरू निकै भावुक भए । हरेक पटक आफ्नो पीडा सहेर ग्लेन म्याक्सवेलले ब्याट उठाए र इनिङ्स जारी राखे तर यसैबीच ग्लेनलाई किन ‘रनर’ नदिइएको भन्ने प्रश्न सबैको मनमा उठिरहेको थियो । यसको पछाडिको कारणबारे यहाँ चर्चा गरौँ ।

वास्तवमा, क्रिकेटको खेलमा बाउन्ड्रीमा रन बनाउनुभन्दा दौडमा सिंगल लिनु महत्त्वपूर्ण हुन्छ । ब्याट्सम्यानहरू हावामा प्रहार गर्नबाट जोगिँदै र लामो समय क्रिजमा बस्न सिंगल लिने गर्छन्, तर धेरै पटक क्रिजमा रहेका दुई मध्ये एक ब्याट्सम्यान चोटका कारण रन बनाउन सक्दैनन् । यही अवस्थालाई मध्यनजर गर्दै ‘रनर’ नियम लागू गरिएको हो ।

क्रिकेटको नियम २५ मा रनर नियमको बारेमा भनिएको छ, जब कुनै ब्याट्सम्यान घाइते हुन्छ, उसको स्थानमा रनर आफ्नै टोलीको सदस्य हुनुपर्छ । एक रनर घाइते खेलाडीलाई रन लिन दौडँदा रनरको प्रयोग ल्याइएको हो ।

सामान्यतया रनर खेलमा प्रयोग भएको पिचको समानान्तर दुरीमा उभिने र नन स्ट्राइकरसँग मिलेर दौडिन्थ्यो तर सन् २०११ मा आईसीसीले धेरै सोचविचार गरेर रनर नियम खारेज गर्‍यो ।

त्यसबेला आईसीसीले क्रिकेटको नियम परिवर्तन नभएको तर अन्तर्राष्ट्रिय खेलाडीका लागि खेल्ने अवस्था परिवर्तन भएको बताएको थियो । अब कुनै खेलाडी चोटका कारण दौडन नसकेमा ‘रिटायर्ड हर्ट’ लिनुपर्नेछ ।

एक समय चोटिल म्याक्सवेलको स्थानमा एडम जाम्पा क्रिजमा आउन लागिसकेका थिए । तर, म्याक्सवेलले हार मानेनन् र क्रिजमा डटेर रहे ।

यही कारणले गर्दा घाइते भए पनि ग्लेन म्याक्सवेललाई ‘रनर’ दिइएको थिएन । म्याक्सवेलले २०१ रनको अविजित पारी खेल्दै अष्ट्रेलियालाई अफगानिस्तानविरुद्धको खेलमा ३ विकेटको जित दिलाए ।

यो पनि नछुटाउनुहोलाः दोहोरो शतकीय इनिङ्स खेल्दै अष्ट्रेलियालाई जिताउने म्याक्सवेलले बनाएका रेकर्डहरु

एजेन्सी । विश्वकप २०२३ को ३९ औँ खेल कीर्तिमानी थियो । अष्ट्रेलिया र अफगानिस्तानबीचको यो खेलमा कैयौं कीर्तिमान तोडिएका छन् । फिल्मी शैलीमा खेलिएको यो खेल अष्ट्रेलियाले ३ विकेटले जित्यो ।

मुम्बईको वानखेडे मैदानमा टस जितेर पहिले ब्याटिङ गरेको अफगानिस्तानले इब्राहिम जाद्रान (१२९ रन)को शतकको मद्दतले निर्धारित ५० ओभरमा ५ विकेट गुमाएर २९१ रन बनाएको थियो । २९२ रनको लक्ष्य अष्ट्रेलियाले ४६.५ ओभरमा ७ विकेट गुमाएर पुरा गरेको थियो । दोहोरो शतक प्रहार गरेका ग्लेन म्याक्सवेल प्लेयर अफ द म्याच घोषित भए ।

यी खेलमा म्याक्सवेलले विभिन्न रेकर्डहरु बनाए । यसबारे यहाँ चर्चा गरौँ ।
१. म्याक्सवेल एकदिवसीयमा दोहोरो शतक बनाउने पहिलो अस्ट्रेलियाली खेलाडी
ग्लेन म्याक्सवेल एकदिवसीय क्रिकेटमा दोहोरो शतक प्रहार गर्ने पहिलो अष्ट्रेलियाली र विश्वका ९औँ ब्याट्सम्यान बनेका छन् । म्याक्सवेलअघि भारतीय कप्तान रोहित शर्माले तीन पटक यस्तो उपलब्धि हासिल गरेका थिए । यी दुई बाहेक विश्वका अन्य ७ ब्याट्सम्यानले पनि एकदिवसीय क्रिकेटमा २०० रन बनाएका छन् । जसमा मार्टिन गप्टिल (२३७ रन अविजित), विरेन्द्र सहवाग (२१९ रन), क्रिस गेल (२१५ रन), फखर जमान (२१० रन), इशान किशन (२१० रन), शुभमन गिल (२०८ रन), सचिन तेन्दुलकर (२०० रन अविजित) रहेका छन् ।

२. एकदिवसीयमा गैर ओपनरद्वारा उच्चतम स्कोर
म्याक्सवेलले कुनै पनि गैर ओपनर ब्याट्सम्यानको सर्वाधिक रन बनाएका छन् । उनले जिम्बाब्वेका चार्ल्स कभेन्ट्रीको १९४ रनको कीर्तिमान तोडेका छन्, जुन उनले २००९ मा बंगलादेशविरुद्ध बनाएका थिए ।

३. म्याक्सवेलले एकदिवसीय क्रिकेटमा रन चेजमा सर्वाधिक रन बनाए
एकदिवसीय क्रिकेटमा ग्लेन म्याक्सवेलले रन पछ्याउँदै सर्वाधिक व्यक्तिगत स्कोर बनाएका छन् । उनले पाकिस्तानी ब्याट्सम्यान फखर जमानको दुई वर्ष पुरानो कीर्तिमान तोडे । फखरले सन् २०२१ मा जोहानेसबर्गमा दक्षिण अफ्रिकाविरुद्ध खेल्दै १९३ रनको इनिङ खेलेका थिए ।

४. विश्वकपमा रन चेजमा उच्चतम स्कोर
म्याक्सवेलले विश्वकपको एक खेलमा रन पछ्याउने क्रममा सबैभन्दा ठूलो स्कोर बनाएका छन् । उनले इंग्ल्याण्डका एन्ड्रयु स्ट्रसको कीर्तिमान तोडे । स्ट्रसले सन् २०११ को विश्वकपमा भारतविरुद्ध खेल्दा १५८ रन बनाएका थिए ।

५. एकदिवसीय क्रिकेटमा अस्ट्रेलियाका लागि सर्वाधिक व्यक्तिगत स्कोर बनाए, वाट्सनलाई पछाडि छोडे
म्याक्सवेल एकदिवसीय क्रिकेटमा अस्ट्रेलियाका लागि सर्वाधिक व्यक्तिगत रन बनाउने ब्याट्सम्यान बनेका छन् । उनले शेन वाट्सनको कीर्तिमान तोडे । वाट्सनले सन् २०११ मा मिरपुरमा बंगलादेशविरुद्ध १८५ रनको अविजित इनिङ खेलेका थिए ।

६. विश्वकपमा सर्वाधिक व्यक्तिगत स्कोर बनाउने अस्ट्रेलियाली खेलाडी
म्याक्सवेल विश्वकपको एक खेलमा सर्वाधिक रन बनाउने अष्ट्रेलियाका ब्याट्सम्यान बनेका छन् । उनी समग्र सूचीमा तेस्रो नम्बरमा छन् । यो सूचीमा पहिलो नाम न्यूजिल्याण्डका मार्टिन गप्टिलको छ ।

७. विश्वकपमा सबैभन्दा छिटो दोहोरो शतक बनाउने ब्याट्सम्यान
ग्लेन म्याक्सवेल विश्वकपमा सबैभन्दा छिटो दोहोरो शतक बनाउने ब्याट्सम्यान बनेका छन् । उनले १२८ बलमा दोहोरो शतक पूरा गरे । म्याक्सवेलले वेस्ट इन्डिजका लिजेण्ड क्रिस गेलको कीर्तिमान तोडेका छन् । सन् २०१५ को विश्वकपमा गेलले जिम्बावेविरुद्ध १३८ बलमा दोहोरो शतक र वेस्ट इन्डिजविरुद्ध मार्टिन गप्टिलले १५२ बलमा दोहोरो शतक बनाएका थिए ।

ओडिआईको कुरा गर्दा सबैभन्दा छिटो दोहोरो शतक प्रहार गर्ने ब्याट्सम्यानको सूचीमा म्याक्सवेल दोस्रो स्थानमा छन् । यो सूचीमा पहिलो नाम इशान किशनको छ । इशानले यसै वर्ष बंगलादेशविरुद्ध १२६ बलमा दोहोरो शतक बनाएका छन् ।

एजेन्सी । भारतमा जारी एकदिवसीय विश्वकप अन्तर्गत अफगानिस्तान र अष्ट्रेलियाबीच मंगलबार वानखेडेमा भएको खेलमा क्रिकेट फ्यानहरूले क्रिकेटरको अदभुत खेल देखेका छन् । ग्लेन म्याक्सवेलको अविजित २०१ रनको इनिङ ।

घाइते भए, दुई पटक फिजियोमा आए, रन बनाउन गाह्रो भयो तर म्याक्सवेल न रोकिए न थाके । टोलीले आठौं विकेटका लागि २०२ रनको साझेदारी गर्दै २९२ रनको लक्ष्य पुरा गर्यो ।

म्याक्सवेलको यो साहसी खेलमा अष्ट्रेलियाले अफगानिस्तानलाई ३ विकेटले पराजित गरेको छ । टोलीले ९१ रनमा ७ विकेट गुमाएको थियो । यहाँबाट म्याक्सवेलले कप्तान प्याट कमिन्ससँग आठौं विकेटका लागि अविजित २०१ रनको कीर्तिमानी साझेदारी गर्दै सबैभन्दा ठूलो रन पछ्याएका थिए ।

टस जितेर ब्याटिङ रोजेको अफगानिस्तानको टोलीले निर्धारित ५० ओभरमा ५ विकेट गुमाएर २९१ रन बनाएको थियो । ओपनर इब्राहिम जाद्रानले अविजित १२९ रनको इनिङ्स खेले । अस्ट्रेलियाले ४६.५ ओभरमा ७ विकेट गुमाएर २९२ रनको लक्ष्य पुरा गर्यो ।

योसँगै अफगानिस्तानलाई हराएर अष्ट्रेलिया सेमिफाइनलमा प्रवेश गरेको छ भने अफगानिस्तानको छनोट हुने आशा निकै कम बनेको छ । अष्ट्रेलियाले ८ खेलमा ६ जितमा १२ अंक जोडेको छ भने टोली अंक तालिकाको तेस्रो स्थानमा छ । जबकि अफगानिस्तानको ८ खेलमा ४ जितबाट ८ अंक छ र छैटौं स्थानमा रहेको छ ।

एजेन्सी । अष्ट्रेलियाका अलराउन्डर ग्लेन म्याक्सवेल ४ नोभेम्बरमा अहमदाबादमा हुने इंग्ल्याण्डविरुद्धको खेलमा खेल्ने छैनन् ।

क्रिकेट अष्ट्रेलियाले बुधबार ट्वीट गर्दै यो जानकारी दिएको हो ।

बोर्डका अनुसार म्याक्सवेल सोमबार गल्फ कार्टको पछाडि सवार थिए जहाँ उनी लडेर घाइते भएका थिए ।

एजेन्सी । रोयल च्यालेन्जर्स बैंगलोर टिमको आईपीएलमा खराब प्रदर्शन हुन सक्छ, तर टोलीका लागि सबैभन्दा राम्रो कुरा कप्तान फाफ डुप्लेसिस र ग्लेन म्याक्सवेलको रन स्कोरिङ हो ।

यो वर्ष दुवैको ब्याट राम्रो चल्यो तर टोली प्लेअफ पुग्न अझै संघर्षरत छ । यसैबीच म्याक्सवेलका लागि खुसीको खबर आएको छ । उनी छिट्टै बुबा बन्न लागेका छन् ।

उनकी श्रीमती विनी रमनले सामाजिक सञ्जालमा यो खुसीको खबर दिएकी छन् । विनी भारतीय मूलकी हुन् । म्याक्सवेल अस्ट्रेलियाको बिग ब्यास लिगको समयमा उनीसँग प्रेममा परेका थिए ।

यस वर्ष सेप्टेम्बरमा दुवै पहिलो सन्तानको अभिभावक बन्न लागेको विनीले बताइन् । दुवैले गत मार्चमा विवाह गरेका थिए । विनी म्याक्सवेलसँग आईपीएलको मजा लिन भारत आएकी हुन् ।

विनीले सामाजिक सञ्जाल पोस्टमा लेखेकी छिन्– ‘ग्लेन र म यो घोषणा गर्न पाउँदा धेरै खुसी छौं कि हाम्रो बच्चा सेप्टेम्बर २०२३ मा हुने छ । यो यात्रा हाम्रो लागि सजिलो छैन भन्ने कुरा स्वीकार गर्नु हाम्रो लागि धेरै महत्त्वपूर्ण छ ।’

विनीको यो पोस्टमा धेरै स्टारहरुले कमेन्ट गरेका छन् । रोयल च्यालेन्जर्स बैंगलोरमा म्याक्सवेलकी पार्टनर विराट कोहलीकी पत्नी तथा बलिउड अभिनेत्री अनुष्का शर्माले पनि हार्ट इमोजी कमेन्ट गरेकी छिन् । विनी यस सिजनमा धेरै खेलमा आरसीबीलाई सपोर्ट गर्दै आएकी छन् ।

विनी रमन मेलबर्नको एक औषधि कम्पनीमा काम गर्छिन् । उनको परिवार मूल रूपमा चेन्नईको हो । यही कारण दुवैले पहिले क्रिस्चियन र त्यसपछि हिन्दू रितीरिवाजमा विवाह गरेका थिए । म्याक्सवेल र विनी रमनको पहिलो भेट सन् २०१३ मा भएको थियो । म्याक्सवेल त्यतिबेला बिग ब्यास लिगमा मेलबर्न स्टार्सको एक हिस्सा थिए र त्यही टोलीको एक कार्यक्रममा विनी रमनलाई भेटे ।

दुबैले करिब पाँच वर्ष एक अर्कालाई डेट गरेका थिए । यसपछि २०१७ मा उनीहरुको अफेयरको खबर बाहिर आएको थियो । केही समयपछि म्याक्सवेल र विनीसँगै क्रिकेट अवार्ड समारोहमा पुगे । यसपछि यी दुवै रिलेशनशिपमा रहेको खबर बाहिर आएको थियो । म्याक्सवेल र विनीको इन्गेजमेन्ट भए र सम्बन्ध आधिकारिक रूपमा भयो । गत वर्ष चेन्नईमा दुवैले हिन्दू परम्परा अनुसार विवाह गरेका थिए ।