काठमाडौं । एकदिवसीय खेलमा अमेरिकाले नेपाल ‘ए’सामु जितका लागि २६३ रनको लक्ष्य प्रस्तुत गरेको छ ।

माथिल्लो मुलपानी क्रिकेट मैदानमा टस जितेर पहिला ब्याटिङ गर्दै अमेरिकाले निर्धारित ५० ओभरमा ८ विकेट गुमाउँदै २६२ रन बनायो । अमेरिकाका लागि स्मित पटेलले शतकीय पारी खेले ।

उनले १०७ बल खेल्ने क्रमा १० चौका र ५ छक्कासहित ११६ रन बनाए । त्यस्तै हरमित सिंहले अविजित २५, जसदीप सिंहले अविजित ३३ रन, शायन जहाँगिरले ९, कप्तान मोनाङ्क पटेलले २०, सैतेजा मुक्कामल्लाले १०, मिलिन्द कुमारले ७, शुभम रञ्जनेले १६, सञ्जय कृष्णमुर्तीले १५ तथा शेहान जयसूर्याले ७ रन बनाए ।

बलिङतर्फ नेपाल ‘ए’ का लागि पवन सर्राफले २ तथा विपिन खत्री, शाहब आलम, बसिर अहमद, शेर मल्ल, राशिद खान र नारायण जोशीले एक एक विकेट लिए । अहिले नेपाल ‘ए’ले जवाफी ब्याटिङ गरिरहेको छ ।

काठमाडाैँ । आजदेखि सुरु भएको त्रिकोणात्मक एक दिवसीय अभ्यास खेलमा नेपाल ‘ए’ टोलीले स्कटल्याण्डको राष्ट्रिय टोलीलाई जितका लागि २७८ रनको प्रतिस्पर्धात्मक लक्ष्य दिएको छ ।

माथिल्लो मुलपानी क्रिकेट मैदानमा जारी खेलमा टस जितेर पहिले ब्याटिङ गरेको नेपाल ‘ए’ ले निर्धारित ५० ओभरमा ८ विकेट गुमाएर २७७ रनको योगफल बनाएको हो । नेपाल ‘ए’ का लागि देव खनालले सर्वाधिक ६३ रनको योगदान दिए ।

उनले ६५ बलमा ६ चौका र एक छक्काको सहयोगमा सर्वाधिक ६३ रनको बनाएका हुन । त्यसैगरी ओपनर मयन यादवले ४५ रन बनाउँदा कप्तान अनिलकुमार साहले १८ रन जोडे । सन्दीप जोरा ३४, पवन सरार्फ ३१ तथा नारायण जोशी ८ रन बनाउँदै आउट भए ।

दीपक डुम्रेले अविजित २३ रन बनाए । स्कटल्याण्डका लागि ब्राण्डली करी र सफियान सरिफले समान २÷ २ विकेट लिए भने ओलिभर डेभिडसन, ब्राण्डन म्याकमुलन, ज्याक जार्भिस र मार्क वाटले समान १÷१ विकेट लिए । स्कटल्याण्ड अहिले जवाफी ब्याटिङमा उत्रेको छ ।

काठमाडौं । नेपाल ‘ए’ र ओमानबिच एकदिवसीय श्रृङखलाअन्तरगत आज भएको पहिलो खेलमा ओमानले नेपाल ‘ए’सामु जितका लागि २८१ रनको लक्ष्य प्रस्तुत गरेको छ ।

माथिल्लो मुलपानी क्रिकेट मैदानमा ट्स जितेर पहिला ब्याटिङ गर्र्दै ओमानले निर्धारित ५० ओभरको खेलमा ९ विकेट गुमाएर २८० रन बनायो । ओमानका लागि मुजिबुर अलीले सर्वाधिक ७२ रन बनाए । उनले ८५ बल खेल्ने क्रममा ४ चौका र ३ छक्का प्रहार गरे ।

यस्तै कप्तान जितेन्दर सिंहले ४८ बलमा ५८, हषिर डपादारले ४६, आशिष ओडाराले २७ तथा विनायक शुक्लाले २५ रन बनाए । रामानन्दी १७ रनमा अविजित रहे ।

बलिङतर्फ नेपाल ‘ए’ का लागि आकाश चन्दले चार, सन्तोष यादवले दुई तथा शाहब आलम, शेर मल्ल र रशिद खानले एक एक विकेट लिए ।

यही वैशाख १२ गतेदेखि हुने आइसीसी विश्वकप लिग–२ अन्तर्गतको त्रिकोणात्मक सिरिज खेल्न आएको ओमानले तयारी स्वरुप नेपाल ‘ए’सित खेल्न लागेको हो । नेपाल ‘ए’ले अहिले जवाफी ब्याटिङ गरिरहेको छ ।

काठमाडौँ । नेपाली राष्ट्रिय क्रिकेट टोली आफ्नो पहिलो अभ्यास खेलमा साउथ अष्ट्रेलियासँग पराजित भएको छ । अष्ट्रेलिया आज भएको खेलमा नेपाल साउथ अष्ट्रेलियासँग तीन विकेटले पराजित भएको हो ।

नेपालले प्रस्तुत गरेको एक सय ४७ रनको लक्ष्य पछ्याएको साउथ अष्ट्रेलियाले निर्धारित २० ओभरमा सात विकेट गुमाउँदै लक्ष्य पूरा गर्‍यो । साउथ अष्ट्रेलियाका लागि विन्टरले सर्वाधिक ३६ रनको योगदान दिए । होगेनबोइजिमले २८, कप्तान हार्वेले २७, ड्रियुले २४ र मनेन्टीले २२ रनको योगदान दिए ।

नेपालका लागि सोमपाल कामीले तीन विकेट लिए भने नन्दन यादवले दुई र कप्तान रोहितकुमार पौडेलले एक विकेट लिए । त्यसअघि टस हारेर पहिला ब्याटिङको निम्तो पाएको नेपालले निर्धारित २० ओभरमा नौ विकेट गुमाउँदै एक सय ४६ रनको योगफल बनाएको थियो ।

नेपालका लागि भीम सार्कीले सर्वाधिक ३२ रनको योगदान दिए भने दीपेन्द्रसिंह ऐरीले २६, आसिफ शेखले २२, आरिफ शेखले २१ र सोमपाल कामीले अविजित १८ रन बनाए । साउथ अष्ट्रेलियाका लागि थोम्पसन, ब्राउन र मनेन्टीले समान दुईरदुई विकेट लिए भने म्याकफाडेन र मेन्जिसले समान एकरएक विकेट लिए ।

काठमाडौँ । टी–२० अन्तर्राष्ट्रिय क्रिकेटमा नेपालले बनाएको सर्वाधिक रनको कीर्तिमान तोडिएको छ । जिम्बाबेले सो कीर्तिमान तोडेको हो । साथै, टोलीले यसबाहेक दुई कीर्तिमान पनि तोडेको छ ।

पुरुष टी–२० विश्वकप अफ्रिका उप–क्षेत्रीय छनोट प्रतियोगितामा जिम्बाबेले बुधबार गाम्बियालाई ४ विकेटको क्षतिमा ३ सय ४४ रन बनाएर टी–२० क्रिकेटमा सर्वाधिक रनको नेपालको कीर्तिमान तोड्न सफल रह्यो ।

अघिल्लो वर्ष सन् २०२३ को सेप्टेम्बर २७ मा चीनको हान्झाऊमा भएको १९औँ एशियाली खेलकुदमा नेपालले मङ्गोलियासँगको खेलमा ३ सय १४ रन बनाउँदै विश्व कीर्तिमान बनाएको थियो ।

साथै, जिम्बाबेले २ सय ९० रनले खेल जितेर सर्वाधिक फराकिलो जितको कीर्तिमान पनि नेपालबाट खोस्न सफल भयो ।

जिम्बाबेका लागि कप्तान सिकन्दर रजाले ३३ बलमा शतक पूरा गरे । उनले ४३ बलमा १ सय ३३ रनको इनिङ खेलेका थिए ।

यस्तै, जिम्बाबेले यो इनिङमा २७ छक्का प्रहार गरेको थियो । यस अघि नेपालले २६ छक्काका साथ सर्वाधिक छक्काको कीर्तिमान बनाएको थियो । खेलमा कप्तान रजाले सर्वाधिक १५ छक्का प्रहार गरेका थिए ।

काठमाडौं । आईसीसी टि–ट्वेन्टी विश्वकपमा अहिले नेपाल र दक्षिण अफ्रिका बीच प्रतिस्पर्धा भइरहेको छ । नेपाललाई टेस्ट मान्यता प्राप्त राष्ट्रलाई हराउने अवसर छ ।

आजको खेलमा विजयी भए नेपालको सुपर एटमा पुग्ने सम्भावना कायमै रहेछ । वेस्ट इन्डिजको सेन्ट भिसेन्टमा नेपाल र दक्षिण अफ्रिकाबीच भइरहेको खेलका केही तस्बिर । (तस्बिर : क्यान)

काठमाडौं । नेपाली राष्ट्रिय क्रिकेट टोलीले अप्रिलमा युगान्डामा टी-२० सिरिज खेल्ने भएको छ ।

आगामी जुनमा अमेरिका र वेस्ट इन्डिजमा आयोजना हुन लागेको आईसीसी टी–२० विश्वकपको तयारी स्वरुप नेपालले चार देश सम्मिलित सिरिज खेल्न लागेको हो ।

आगामी जुन १ देखि २९ तारिखसमम सञ्चालन हुने टी–२० विश्वकपमा नेपाल समूह ‘डी’ मा परेको छ । नेपालको समूहमा दक्षिण अफ्रिका, श्रीलंका, बंगलादेश र नेदरल्यान्ड्स रहेका छन् ।

युगान्डाले आयोजना गर्न लागेको टी–२० सिरिजमा नेपालसहित युगान्डा, नेदरल्यान्डस् र नामिबिया खेल्नेछन् ।

अहिले नेपालले घरेलु मैदानमा त्रिकोणात्मक टी–२० शृंखला खेलिरहेको छ । पहिलो खेलमा नेपाल नामिबियासँग २० रन र दोस्रो खेलमा नेदरल्यान्डस्सँग २ रनले पराजित भएको थियो । आज नेदरल्यान्डस् र नामिबिया खेल्दैछन् । भोलि शुक्रबार नेपालले नामिबियाको सामाना गर्दैछ ।

एजेन्सी । क्रिकेट खेल्ने क्रममा बलिङ गर्ने क्रममा युवक लडेका थिए । नजिकै उभिरहेका साथीहरूले दौडेर युवकलाई उठाए तर युवकको शरीरमा कुनै हलचल भएन ।

आफन्तलाई खबर गरेपछि साथीहरुले युवकलाई निजी अस्पतालमा भर्ना गरे तर, चिकित्सकले उनलाई मृत घोषणा गरे । आफन्तले पोस्टमार्टम गर्न अस्वीकार गरे ।

सोही क्रममा हृदयघातका कारण मृत्यु भएको आशंका गरिएको छ । सहरको महल्ला विवेक विहारका सराफा व्यापारी सुखमल वर्माका छोरा २६ वर्षीय कुलदीप वर्मा शनिबार बिहान ८ बजे अन्य युवाहरूसँग माजरा रोडस्थित भीभी पीजी कलेजको मैदानमा क्रिकेट खेल्न गएका थिए । कुलदीप बल फ्याँक्न दौडेपछि भुइँमा ढले । साथीहरूले उसलाई उठाए र हल्लाए । अनुहारमा पानी पनि छर्किइयो तर उनको शरीरमा कुनै हलचल थिएन ।

त्यसपछि साथीहरूले आफन्तहरूलाई खबर गरे र युवकलाई गंगा अमृत अस्पताल पुर्याए, जहाँ चिकित्सकहरूले उनलाई मृत घोषित गरे । हृदयघातका कारण युवकको मृत्यु भएको चिकित्सकको अनुमान छ ।

मृतक युवक तीन दिदीबहिनीका एक मात्र भाई थिए । उनको तीन वर्षअघि विवाह भएको थियो । युवकको १३ महिनाकी छोरी पनि छिन् । शवको पोस्टमार्टम नगरी आफन्तले शोकपूर्ण वातावरणमा दाहसंस्कार गरेका छन् ।

उनी करिब साढे आठ बजे मैदानमा पुगेको युवकका साथीहरुले बताएका छन् । खेल करिब नौ बजे सुरु भएको थियो । कुलदीपको टोली पहिले बलिङ गर्न आएको थियो । उनले पहिलो ओभर बलिङ गरिरहेका थिए । उनले दुई बल सहि बल गरेका थिए, तर तेस्रो बल फ्याँक्न दौडँदा उनी क्रिजबाट टाढा खसे । खेलाडी नजिकै पुग्दा उनी बेहोस थिए । त्यसपछि उनलाई गंगा अमृत अस्पताल लगियो ।

एजेन्सी । मुम्बईको क्रिकेट मैदानमा ठूलो दुर्घटना भएको छ । खेल खेल्ने क्रममा ५२ वर्षीय पुरुषको मृत्यु भएको हो । मैदानमा दुई खेल चलिरहेको बेला यो दुर्घटना भएको हो ।

जयेश सावला नामका व्यक्तिको टाउकोमा पछाडिबाट बल लागेर उनको घटनास्थलमै ज्यान गएको भारतीय सञ्चारमाध्यमले जनाएको छ । सावलालाई लागेको बल दोस्रो खेलको थियो । उनी मैदानमा थिए र त्यही क्रममा बल उनको कान पछाडि लाग्न पुग्यो ।

यो दुर्घटना सोमबार दिउँसो माटुंगामा भएको हो । त्यतिबेला एउटै प्रतियोगिताका दुई टी–२० खेल चलिरहेका थिए । यो प्रतियोगिता ५० वर्षभन्दा माथिका व्यक्तिका लागि आयोजना गरिएको थियो ।

प्रतियोगिताको नाम कच्छी भिसा ओखल विकास लिजेन्ड कप हो । एक प्रत्यक्षदर्शीका अनुसार जयेश सावला नजिकैको दादर पारसी कालोनी स्पोर्टिङ क्लब मैदानमा ब्याट्सम्यानलाई पिठ्युँ टेकेर फिल्डिङ गरिरहेको बेला उनको कान पछाडि बल लागेको थियो ।

घाइते भएका जयेशलाई अस्पताल लगिएको थियो । त्यहाँ उनलाई मृत घोषित गरियो । एउटै मैदानमा दुई खेल हुनु सामान्य कुरा हो । यसअघि पनि यस्ता खेलमा खेलाडी घाइते भएको खबर आए पनि मृत्यु भएको यो पहिलो पटक हो ।

प्रहरीले आकस्मिक मृत्युको उजुरी दर्ता गरेको जनाएको छ । उनले पोस्टमार्टमको आदेश दिए तर त्यहाँ कुनै खराब खेल वा षड्यन्त्रको सम्भावना नदेखिएको प्रहरी बताउँछ । पछि शव परिवारलाई बुझाइयो । जयेश सावला व्यवसायी थिए र उनका श्रीमती र एक छोरा छन् ।

काठमाडौं। नेपालले आज टेस्ट राष्ट्र आयरल्यान्डसँग प्रतिस्पर्धा गर्दैछ । जिम्बाबेमा जारी आईसीसी पुरुष क्रिकेट विश्वकप छनोटअन्तर्गतको सुपर सिक्समा पुग्न नसकेको नेपाली टोलीले आज सातौ स्थानका लागि टेस्ट राष्ट्र आयरल्याण्डसँग प्रतिष्पर्धा गर्न लागेको हो । आज नेपाल टेस्ट राष्ट्रविरुद्ध पहिलो जित निकाल्ने उद्देश्यका साथ मैदानमा उत्रँदैछ ।

आजको खेल हरारेस्थित टाकासिंगा स्पोर्ट्स क्लबमा दिउँसो १२ः४५ बजेदेखि सुरु हुनेछ । नेपालले विश्वकप छनोटमा समूह चरणमा टेस्ट राष्ट्रविरुद्धको खेलमा आयोजक जिम्बाबे र वेस्ट इन्डिजविरुद्ध हार बेहोरेको थियो । आज तेस्रो टोलीसँग खेल्न लागेको नेपालले आफ्नो जादु देखाउने अपेक्षा गरिएको छ ।

नेपालले यसअघिको खेलमा यूएईलाई पराजित गरेको थियो । प्रतियोगितामा नवौँ र दशौँ स्थानका लागि बिहीबार यूएई र अमेरिका भिड्नेछन् ।

काठमाडौँ । आइसीसी विश्वकप क्रिकेट छनोट प्रतियोगिता अन्तर्गत आज नेपालले बलियो वेस्ट इन्डिजको सामना गर्दैछ । दिउँसो १२ः४५ बजे सुरु हुने खेलमा दुवै टोली दोस्रो जीत निकाल्दै सुपर सिक्सको सम्भावना जोगाउने दाउमा हुनेछन् ।

नेपालले २ खेलमध्ये एकमा जीत निकाल्दै दुई अंकका साथ तेस्रो स्थानमा छ भने वेस्ट इन्डिज एक खेलमा जीतका साथ दोस्रो स्थानमा छ । समूह चरणमा घरेलु टोली जिम्बाबे दुबै खेलमा जीत निकाल्दै पहिलो नम्बरमा छ ।

समूहमा नेपालसहित जिम्बाबे, बेस्ट इन्डिज, नेदरल्याण्ड, अमेरिका छन् । जसमध्ये शीर्ष तीन टोली सुपर सिक्समा जानेछन् । नेपाल पहिलो खेलमा जिम्बाबेसँग पराजित भएको थियो भने दोस्रो खेलमा अमेरिकालाई छ विकेटले पराजित गरेको थियो ।

काठमाडौं । आगामी साता नेपालमा  एसीसी प्रिमियर कप हुन लागेको छ । प्रिमियर कप अघि ओमानले घरेलु टोली नेपालसँग अभ्यास खेल खेल्ने भएको छ ।

क्रिकेट ओमानले कप अघि नेपाल र बहराइनसँग अभ्यास खेल खेल्ने जनाएको छ । जसको लागि ओमान राष्ट्रिय क्रिकेट टोली आज सोमबार साँझ नेपाल आईपुग्ने भएको छ ।

ओमानले चैत्र ३० (अप्रिल १३ मा) मा बहराइनसँग र नेपालसँग वैशाख २ (अप्रिल) १५ मा अभ्यास खेल खेल्नेछ । यद्यपी नेपालले अभ्यास खेल मुलपानी वा टियु मध्ये कहाँ खेलाउने भन्ने पक्का गरेको छैन ।

क्यानका कार्यवाहक सचिव दुर्गाराज पाठकले बन्द प्रशिक्षणमा रहेका टोलीले नै अभ्यास खेल खेल्ने तर कहाँ खेल्ने भन्ने बारे छलफल हुन बाँकि रहेको बताए । उनले भने, ‘अभ्यासको लागि कुरा भएको छ । अहिले बन्द प्रशिक्षणमै रहेको नेपालको टोलीले नै अभ्यास खेल खेल्ने हो । माथिल्लो मुलपानी या टियुमा खेल्ने कुरा छ । आज सबै थाहा हुन्छ’ ।

एसीसी प्रिमियर कप १८ अप्रिल देखि १ मे सम्म टियु र मुलपानी मैदानमा हुनेछ । समूह ए मा नेपाल, ओमान, कतार, मलेसिया र साउदी अरेविया रहेका छन् । समूह बी मा हङकङ, युएई, कुवेत, सिंगापुर र बहरान छन् ।

हरेक समूहबाट शीर्ष दुई टोली सेमिफाइनलमा पुग्नेछन् । विजेता टोलीले एसिया कपमा भारत र पाकिस्तानसँग खेल्न पाउनेछ ।

क्रिकेट ओमानले आईतबार १४ सदस्यीय टोली घोषणा गरेको थियो ।

ओमानको टोली:

जिशान मकसुद (कप्तान), अकिब इलायस (उप-कप्तान), जय ओडेडेरा, कलिमुल्लाह, शोएब खान, कश्याप प्रजापति, अदील शफिक (विकेटकिपर), जतिन्दर सिंह, मोहम्मद नदिम, सन्दीप गौड, बिलाल खान, आयन खान, नसिम खुसी (विकेटकिपर) र फैज बुट ।

महेन्द्रनगर । कञ्चनपुर क्रिकेटको इतिहास नियाल्ने हो भने, विगतदेखि अहिलेसम्म क्रिकेटका परिचित खेलाडी उत्पादनको हब भए पनि यहाँ खेल संरचनाको अवस्था भने दयनीय छ ।

नेपाली क्रिकेटका परिचित नाम विनोद भण्डारी, प्रदीप ऐरी, दीपेन्द्रसिंह ऐरीदेखि भीम सार्कीको गृह जिल्ला कञ्चनपुरमा क्रिकेटको क्रेज ग्रामीणस्तरसम्म रहे पनि यहाँ खेल मैदानस्तरीय बनाउने विषय भने प्राथमिकतामा परेको छैन् । दुई वर्षअघि कञ्चनपुरको महेन्द्रनगरस्थित कवर्डहल परिसरमा आधुनिक क्रिकेट मैदान निर्माण थालनी गरिए पनि सो कार्य अहिले अलपत्र छ ।

अघिल्लो आर्थिक वर्ष २०७६/०७७ मा राष्ट्रिय खेलकुद परिषद्ले रकम विनियोजन गरी सुदूरपश्चिम क्षेत्रीय खेलकुद विकास समिति धनगढीमार्फत ठेक्का आह्वान गरेर क्रिकेट मैदान निर्माण थालिएको थियो । मैदानमा निर्माणको पहिलो चरणमा माटो भरान र ‘चेन्जिङ रुम’ मा रु ३९ लाख खर्च भएको थियो । त्यसपछि सोही आर्थिक वर्षमा रु ३३ लाखको माटो भरानसमेत भयो ।

दुई वर्षअघि रु एक करोड रकम क्रिकेट मैदानका लागि आए पनि त्यहाँ माटो भरानबाहेक अरु काम अघि बढ्न सकेको छैन । सोही निर्माणस्थलमा केही वर्षअघि जिल्ला खेलकुद विकास समितिले माछापालनका लागि जग्गा दिँदा अहिले सो क्षेत्र कुरुप बनाएर छाडिएको छ ।

“क्रिकेट मैदानका लागि आएको रकमले माछा पोखरी पुर्नुपरेको छ”, क्रिकेटका एक सिनियर खेलाडीले भन्नुभयो, “हचुवाका भरमा खेलकुदको जग्गा अनावश्यक भाडामा दिँदा समस्या भएको छ ।” पछिल्लो समय यु–१९ को राष्ट्रिय टिममा पनि कञ्चनपुरबाट सन्दीप जोरा, हेमन्त धामी, आकाश चन्द र मिलन बोहरा छन् ।

कञ्चनपुरमा झण्डै डेढ दशक क्रिकेटको स्वयंसेवक प्रशिक्षकका रुपमा प्रशिक्षण गराएका वीरेन्द्र शाहीले कञ्चनपुरलाई क्रिकेटको भूमिभन्दा फरक नपर्ने बताउँछन् । “विगतदेखि नै यहाँका खेलाडी राष्ट्रिय टिममा परेर अन्तर्राष्ट्रियस्तरमा आफ्नो परिचय बनाउँदै आएकै छन् ।” हाल सुर्खेतमा प्रशिक्षण गराइरहनुभएका प्रशिक्षक शाहीले भन्नुभयो, “यहाँ हरेक समय क्रिकेटका गतिविधि तथा आयोजना प्रसस्त भइरहेका हुन्छन् ।”

यहाँस्थित खेलकुद विकास समितिका कार्यालय प्रमुख गोपालदत्त भट्टले प्रदेश सरकारको रातो किताबमा क्रिकेट मैदानका लागि रकम राखिएको बताउनुभयो । “प्रदेशको मन्त्रिमण्डलले पूर्णता: पाएपछि यहाँ बजेट आउने कुरो छ”, उहाँले भन्नुभयो, “यहाँ २०६६ सालमा छैटौँ राष्ट्रिय हुँदा क्रिकेट मैदान बनेको थियो ।”

यता सुदूरपश्चिम प्रदेश सरकारको पहलमा भने कञ्चनपुरको महेन्द्रनगरमा रु २६ करोडको लागतमा बहुउद्देश्यीय कवर्डहल बन्ने तयारी छ । यस क्षेत्रबाट निर्वाचित प्रदेशसभाका सदस्य एवं पुर्व प्रदेशमन्त्री प्रकाश रावलको पहलमा यहाँ सो कवर्डहल निर्माणको सुरुआतका लागि रु आठ करोड बजेट विनियोजन भएको छ ।

“कवर्डहलको डिपिआरमा समस्या आएपछि संशोधनको प्रक्रियामा छ”, प्रदेशसभा सदस्य एवं पूर्वमन्त्री रावलले भन्नुभयो, “यस चालु आर्थिक वर्षमा ठेक्का भएर काम भने सुरु भइसक्छ ।” उहाँले उक्त हल निर्माण भए यहाँ खेलकुद गतिविधिमा अझ बढी बढावा मिल्नेमा आशावादी रहेको बताउनुभयो ।

कञ्चनपुर जिल्ला क्रिकेट सङ्घका अध्यक्ष वीरेन्द्र चन्दले चालु आवमा क्रिकेट मैदानका लागि रु ५० लाख बजेट विनियोजन भएको बताउनुभयो । “राष्ट्रिय खेलकुद परिषद्बाट सो रकम विनियोजन भएको हो”, उहाँले भन्नुभयो, “ यो माटो भरानको काम पुन: होला ।” उहाँले यहाँ राष्ट्रियस्तरका प्रतियोगिता सञ्चालनका बेला ‘टर्प पिच’ नभएको बताउनुभयो ।

“छैटौँ राष्ट्रियका बेला क्रिकेट मैदान बने पनि त्यसको संरक्षण नुहँदा त्यहाँ फुटबल, हक्कीदेखि मर्निङवाकसम्म हुन थाले”, उहाँले भन्नुभयो, “क्रिकेट सङ्घलाई संरक्षणका लागि मैदान दिन खेलकुद समिति मञ्जुर भएन ।” रासस

काठमाडौँ । सन् २०१९ देखि सुरुआत भएको आइसिसी (अन्तर्राष्ट्रिय क्रिकेट काउन्सिल) विश्वकप क्रिकेट लिग दुईबाट शीर्ष तीन स्थान हासिल गर्ने स्कटल्यान्ड, ओमन र नेपालले विश्वकप छनोटका यात्रा तय गर्न सफल भएका छन् ।

विभिन्न सात राष्ट्र सम्मेलित विश्वकप क्रिकेट लिग दुईबाट स्कटल्यान्ड पहिलो, ओमन दोस्रो र नेपाल तेस्रो स्थानमा रहँदै जिम्बावेमा आगामी जुन १८ देखि जुलाई ९ तारिखसम्म हुने विश्वकप छनोटमा प्रवेश पाएका हुन् । यससँगै अब नेपालले जिम्बावेमा हुने विश्वकप छनोटमा टेस्ट मान्यता राष्ट्रसहित अन्य देशसँग खेल्न पाउने पक्का भएको छ ।

कीर्तिपुरस्थित त्रिभुवन विश्वविद्यालयको क्रिकेट मैदानमा बिहीबार सम्पन्न आइसिसी विश्वकप क्रिकेट लिग दुईको अन्तिम खेलमा नेपालले संयुक्त अरब इमिरेटस (युएई) लाई पराजित गर्दै विश्वकपको छनोटमा प्रवेश पाएको हो । खराब प्रकाशका कारण खेल रोकिँदा नेपाल डकवर्थ लुइस नियमअनुसार ९ रनले विजयी भएको थियो ।

त्यस्तै, लिग दुईको अङ्कतालिकामा चौथो, पाँचौँ, छैटौँ र सातौँ स्थान हासिल गरेका क्रमश: नामिबिया, अमेरिका, युएई र पपुवा न्युगिनीले विश्वकप छनोटका लागि प्लेअफ खेल्नुपर्नेछ । प्लेअफमा यी चार टोलीसहित च्यालेन्ज लिगको शीर्ष दुई टोली क्यानडा र जर्सी गरी ६ राष्ट्रको प्लेअफ छनोट हुनेछ । उक्त खेल नामिबियामा यसै महिनामा हुनेछ । जसबाट शीर्ष दुई टोलीले जिम्बावेमा हुने विश्वकप छनोटमा सहभागिता जनाउन पाउनेछन् ।

जिम्वावेमा विभिन्न १० टोली प्रतिस्पर्धामा उत्रनेछन् । विश्वकप लिग दुईबाट नेपाल ओमान र स्कटल्यान्डले स्थान बनाए भने सुपर लिगबाट जिम्बावे र नेदरल्यान्ड्सले खेल्ने पक्का भइसकेको छ । अन्य टोलीको छनोट हुन भने बाँकी छ । जिम्बावेमा हुने विश्वकप छनोटमा आइसिीसी सुपर लिगका पुछारका पाँच टोली, लिग दुईको शीर्ष तीन टोली र प्लेअफ छनोटबाट आउने शीर्ष दुई टोली गरी १० टोलीले प्रतिस्पर्धा गर्नेछन् ।

नेपाली राष्ट्रिय क्रिकेट टोलीका मुख्य प्रशिक्षक मोन्टी देशाईले सम्हालिएर खेल्दा जितिन्छ भन्ने आत्मविश्वास हुनाका साथै खेलाडीले अनुशासित भई ब्याटिङ गर्दा नेपालले कीर्तिमानी जित हासिल गर्न सकेको बताउनुभयो । उहाँले अहिलेको नेपाली टोलीमा अद्भुत क्षमता भएको खेलाडी रहेको र उनीहरुले भविष्यमा नेपाली क्रिकेटका लागि राम्रो गर्नसक्ने बताउनुभयो ।

यसैगरी, नेपाली टोलीका कप्तान रोहितकुमार पौडेलले युएईले दिएको लक्ष्य धेरै भए पनि जित निकाल्ने विश्वास नगुमेकाले विजयी हासिल गर्न सकेको भन्दै यस जितको श्रेय प्रशिक्षक मन्टी देसाईलाई दिन चाहेको बताउनुभयो । प्रशिक्षक मन्टी आएदेखि नेपालली टोलीको माहोल परिवर्तन भएको र प्रत्येक खेलमा केन्द्रित हुन सिकाएको उहाँको भनाइ छ । देसाई नियुक्त भएपछि नेपालले लिग २ का पछिल्ला १२ खेलमध्ये ११ खेलमा जित हात पार्न सफल भएको थियो ।

कीर्तिपुर । बिहीबार कीर्तिपुरस्थित त्रिवि क्रिकेट रङ्गशाला पुग्नुभएका प्रधानमन्त्री पुष्पकमल दाहाल ‘प्रचण्ड’ विशिष्ट अतिथि कक्षतर्फ पुग्दै गर्दा दर्शकहरूले समवेत स्वरमा भने, “प्रधानमन्त्रीज्यू, दर्शक अट्ने रङ्गशाला चाहियो ।”

दर्शकहरूले क्रिकेट हेर्न कीर्तिपुर पुग्नभएका राष्टियसभा अध्यक्ष गणेशप्रसाद तिमिल्सिना, नेपाली कांग्र्रेसका नेता डा प्रकाशशरण महत, नेकपा (एमाले) नेता रघुजी पन्त, राष्ट्रिय प्रजातन्त्र पार्टी (राप्रपा) का नेता ज्ञानेन्द्र शाहीदेखि कांग्रेस नेता प्रदीप पौडेलसम्म अट्ने रङ्गशाला चाहिएको अनुरोध गरे । प्रधानमन्त्री दाहालसँगै भरतपुर महानगर प्रमुख रेणु दाहाललाई पनि देखेपछि दर्शकहरूले फेरि भन्न थाले, “दिदी, रङ्गशाला चाहियो ।”

नेपाली क्रिकेट इतिहासकै महत्त्वपूर्ण जित हासिल भएको आजको खेलमा नेपाल विरुद्ध कुनै देशले बनाएको सबैभन्दा ठूलो योगफलमात्र होइन दर्शकको उपस्थिति पनि ऐतिहासिक भन्न लायक थियो ।

आयोजकहरूका अनुसार ११ हजार वटा टिकट बिक्री अघिल्लो दिन नै भएको थियो । तर टिकट किन्नेमध्ये धेरैले भित्र पस्न पाएनन् । टिकट खरिदकर्ता र सञ्चार माध्यमलाई प्रवेशका लागि तोकिएको ६ नम्बर गेटमा खेल सुरु हुँदा नहुँदै अत्यधिक चाप भएपछि प्रहरीले गेट नै बन्द गरिदिएको थियो । परिणामस्वरूप धेरै क्रिकेट प्रेमीहरू रङ्गशाला वरिपरिका अग्ला स्थान र रुखमा समेत चढन बाध्य भएका थिए । सँगैको आयुर्वेद विभागको छतसमेत पूरै भरिएको थियो । भिड बढदै गएपछि प्रहरीले बलपूवर्क पाखा लगाएको थियो । त्यसपछि त्यहाँ केही बेर नाराबाजीसमेत भयो ।

“यो अवस्थाले कीर्तिपुर रङ्गशालाको संरचनालाई जतिसक्दो ठूलो बनाउनुपर्ने देखियो”, त्यहाँ खेल हेर्न पुगेका नेपाली कांग्रेसका नेता प्रदीप पौडलले रासससँग भन्नुभयो ।

खेलमा जीतसँगै नेपाल विश्वकप छनोट चरणमा पुगेको छ । तर देशमा हालसम्म एउटा पनि अन्तर्राष्ट्रियस्तरको रङ्गशाला छैन भन्नुपरेको नेपाल क्रिकेट सङ्घ ९क्यान०का पदाधिकारीहरू बताउँछन् । “एउटा भन्नु त्यही त्रिवि रङ्गशाला छ जहाँ प्यारापिट छैन, राति र दिनमा पनि खेलाउन सकिने फ्लड लाइटहरू छैनन् र चाहे जति दर्शकलाई खेल देखाउन पनि सक्दैनौँ”, क्यानका सचिव दीर्घराज पाठकले राससलाई भन्नुभयो । उहाँका अनुसार अहिलेको रङ्गशालामा थोरै सुधार गर्ने हो भने पनि झण्डै २० हजार दर्शक अटाउन सक्छन् । आज भने ११ हजार टिकट मात्र बिक्री गरिएको उहाँले बताउनुभयो ।

क्यानले यसबारे सरकारलाई धेरै पटक ध्यानाकर्षण गराइसकेको जानकारी पनि पाठकले दिनुभयो । “स्रोतको अभावका कारण चाहेर पनि धेरै गर्ने सक्ने अवस्था छैन । अर्कोतर्फ त्रिविको स्वामित्व भएको जमिनमा केही गर्न उसको पनि सहमति चाहिन्छ”, उहाँको भनाइ छ ।

त्रिविबाहेक उपत्यकामा मूलपानी लगायतका स्थानमा रंगशाला र बाहिरका रङ्गशालालाई पूर्ण क्षमतामा चलाउन नसक्दासम्म नेपाली क्रिकेटको व्यवस्थापन राम्रो हुन नसक्ने देखिने बताइएको छ । रासस

काठमाडौं । आईसीसी विश्वकप लिग टू मा बिहिबार हुने युएईविरुद्धको खेल जितेमा नेपालले अंक तालिकाको शीर्ष ३ मा रहदै विश्वकप छनोटमा स्थान बनाउने छ ।

नेपालले बिहिबारको खेलमा युएईलाई पराजित गरेमा विश्वकप छनोटमा टेस्ट राष्ट्रसँग खेल्ने अवसर पाउने छ ।

आईसीसी एकदिवसीय विश्वकप छनोट आगामी जुन जुलाईमा जिम्बावेमा आयोजना हुनेछ । विश्वकप सुपर लिगको पुछारमा रहेका ५ टोलीले विश्वकप छनोट खेल्नेछन् । आयोजक जिम्बाबे र आयरल्याण्डले यसअघि नै छनोटमा स्थान पक्का गरिसकेको छ । टेस्ट राष्ट्रहरु श्रीलंका, वेस्ट इण्डिज तथा दक्षिण अफ्रिका मध्ये दुईले विश्वकप छनोट खेल्नेछन् ।

लिग टू बाट पनि विश्वकप छनोटमा पाचँ टोलीहरु सहभागि हुनेछन् । लिग टूको शीर्ष तीनमा रहने टोलीले सोझै छनोट खेल्न पाउछन् । शीर्ष तीनमा नपरेकाले पनि क्वालिफायर प्लेअफबाट शीर्ष दुईमा रहदै छनोटमा सहभागि हुन पाउछन् ।

लिग टू बाट स्कटल्यान्ड र ओमानले विश्वकप छनोटमा स्थान बनाईसकेको छ । नेपालले पनि बिहिबार हुने खेलमा यूएईलाई पराजित गरे सोझै छनोट खेल्नेछ । नेपाल पराजित भएको खण्डमा भने शीर्ष तीनमा रहेको नामिबियाले सोझै विश्वकप छनोट खेल्नेछ ।

यूएईसँग पराजित भएतापनि नेपालले यसै महिना अन्तिममा नामिबियामा हुने क्वालिफायर प्लेअफ खेल्नेछ । क्वालिफायर प्लेअफमा शीर्ष दुईमा रहने टोलीले पुन विश्वकप छनोट खेल्न पाउनेछन् । नेपालले लिग टूमा पछिल्ला ११ मध्ये १० खेल जित्दै आएको छ ।

विश्वकप छनोटमा सहभागी रहने १० टोलीमध्ये शीर्ष दुई टोलीले आईसीसी विश्वकप खेल्नेछ । छनोटमा सहभागी रहदै शीर्ष दुईमा पर्न सके नेपालले भारतमा आयोजना हुने विश्वकप खेल्नेछ ।

काठमाडौं । आइसिसी विश्वकप लिग–२ त्रिकोणात्मक सिरिजमा नेपालले पपुवा न्युगिनीविरुद्ध ७.४ ओभरमा पूरा गरेको लक्ष्य ओडिआई इतिहासकै सर्वाधिक छिटो जितमध्येमा परेको छ ।

नेपालले सोमबार पिएनजीले दिएको ९६ रनको लक्ष्य ७.४ ओभरमा १ विकेट गुमाउँदै पूरा गरेको थियो । जुन ओडिआई इतिहासको सर्वाधिक छिटो पाँचौं जित थियो ।

ओडिआईमा श्रीलंकाले सर्वाधिक छिटो जित निकालेको थियो । श्रीलंकाले २००१ मा जिम्बावेविरुद्ध ३९ रनको लक्ष्य ४.२ ओभरमा १ विकेट गुमाउँदै पूरा गरेको थियो । उक्त खेलमा श्रीलंकाले २ सय ७४ बल बाकिँ रहदा नै जित निकालको थियो ।

दोस्रो सर्वाधिक छिटो जित पनि श्रीलंकाकै नाममा छ । श्रीलंकाले २००३ मा क्यानडाविरुद्ध ३७ रनको लक्ष्य ४.४ ओभरमा १ विकेट गुमाउँदै पूरा गरेको थियो । श्रीलंकाले उक्त खेल २ सय ७२ बल अगावै पूरा गरेको थियो ।

सर्वाधिक छिटो जित निकाल्नेको तेस्रो स्थानमा नेपालको नाम छ । नेपालले २०२० मा अमेरिकाले दिएको ३६ रनको लक्ष्य ५.२ ओभरमा २ विकेटको क्षतिमा पूरा गरेको थियो । नेपालले उक्त लक्ष्य २ सय ६८ बल अघि नै पूरा गरेको थियो ।

चौथो स्थानमा भने न्युजिल्यान्ड रहेको छ । २००७ मा न्युजिल्यान्डले बंगलादेशले दिएको ९४ रनको लक्ष्य ६ ओभरमा कुनै विकेट नगुमाई पूरा गरेको थियो ।

त्यसपछि नेपालले हिजो सोमबारको खेलमा पपुवा न्युगिनीविरुद्ध हात पारेको जित सर्वाधिक छिटो पाँचौं जित रहेको हो । नेपालपछि छैठौ स्थानमा अष्ट्रेलिया रहेको छ ।

नेपालको सोमबारको पपुवा न्युगिनीविरुद्धको जितमा आसिफ शेखले २१ बलमा ८ चौका र ३ छक्कासहित ५३ रनमा अविजित रहे । कुशल भुर्तेलले १४ बलमा ४ चौका र २ छक्काको सहयोगमा ३३ जोडे भने कुशल मल्ल १२ रनमा अविजित रहे।

त्यसअघि टस हारेर पहिला ब्याटिङको निम्तो पाएको पपुवा न्युगिनी ३२ ओभरमा ९५ रन बनाएर अल आउट भएको थियो । नेपालका स्पिनर सन्दीप लामिछानेले १० ओभरमा १ मेडनसहित २५ रन खर्चेर ५ विकेट लिएका थिए ।

महेन्द्रनगर । दुई वर्षअघि कञ्चनपुरको महेन्द्रनगरस्थित कभर्डहल परिसरमा क्रिकेट मैदान निर्माणको काम अघि बढाइए पनि अहिले अलपत्र अवस्थामा छ ।

अघिल्लो आर्थिक वर्ष २०७६र७७ मा राष्ट्रिय खेलकुद परिषद्ले रकम विनियोजन गरी सुदूरपश्चिम क्षेत्रीय खेलकुद विकास समिति धनगढीमार्फत ठेक्का आह्वान गरेर क्रिकेट मैदान निर्माण थाले पनि अहिले बजेटलगायतका कारणले निर्माण अघि बढेको छैन ।

क्षेत्रीय खेलकुद विकास समितिका इञ्जिनीयर केशवप्रसाद जोशीले ठेक्कामार्फत क्रिकेट मैदानमा पहिलो चरणमा माटो भरान र ‘चेञ्जिङ रुम’ मा रु ३९ लाख खर्च भएको बताउनुभयो । “त्यसपछि सोही आवमा रु ३३ लाखको माटो भरान उपभोक्ता समितिमार्फत पनि भयो”, इञ्जिनीयर जोशीले भन्नुभयो, “कभर्डहलमा मास्टर प्लानभन्दा बाहिर गएर धेरै संरचना बनेका कारण क्रिकेट मैदान बनाउनमा ठाउँको पहि समस्या रह्यो ।”

दुई वर्षअघि रु एक करोड रकम क्रिकेट मैदानका लागि आए पनि त्यहाँ माटो भरानबाहेक अरु काम अघि बढ्न सकेको छैन । क्रिकेट मैदान निर्माणस्थलमै जिल्ला खेलकुद विकास समितिले माछा पोखरी निर्माणका लागि जग्गा ठेक्कामा दिँदा अहिले क्रिकेटमा आएको रकम पोखरी पुर्नमा समेत खर्च भएको देखिन्छ ।

“क्रिकेट मैदान बनाउने ठाउँमा माछापोखरी विगतमा बनेकाले पोखरी भरानमै अनावश्यक खर्च भयो”, क्रिकेटका एक खेलाडीले भन्नुभयो, “माटो भरानमा लाखौँ खर्च भए पनि यहाँ निर्माण अघि बढाउन सरोकारवाला निकायको चासो देखिँदैन ।” उहाँले विगत लामो समयदेखि राष्ट्रिय टोलीमा कञ्चनपुरका खेलाडी पर्दै आए पनि गृह जिल्लामा क्रिकेट मैदान बनाउने विषयमा भने यहाँ बेवास्ता हुँदै आएको दुखेसो पोख्नुभयो ।

त्यसैगरी कञ्चनपुर जिल्ला क्रिकेट सङ्घका अध्यक्ष वीरेन्द्र चन्दले निर्माणाधीन क्रिकेट मैदानको काम अहिले रोकिएको बताउनुभयो । “क्रिकेटका लागि मैदानलगायत संरचना बनाउने राष्ट्रिय खेलकुद परिषद्को आयोजना रहे पनि यसलाई प्राथमिकताका साथ अघि बढाउन आवश्यक छ”, उहाँले भन्नुभयो, “गत वर्षयता निर्माण कार्य अलपत्रजस्तै भएको छ ।”

अध्यक्ष चन्दले गत वर्ष पनि रु ७५ लाख निर्माणका लागि बजेट आए पनि काम हुन नसक्दा रकम फ्रिज भएको बताउनुभयो । “चालु आवमा पनि रु ५० लाख रकम क्रिकेट मैदानका लागि विनियोजन भएको भन्ने छ”, उहाँले भन्नुभयो, “त्यो रकम आएपछि निर्माण प्रक्रिया अघि बढाउने छौँ ।” उहाँले माथिल्लो निकायबाट पुग्ने गरी बजेट विनियोजन गरेर निर्माणमा सहयोग गर्न आग्रह समेत गर्नुभयो ।

त्यसैगरी जिल्ला खेलकुद विकास समितिका कार्यालय प्रमुख गोपालदत्त भट्टले क्रिकेट मैदान निर्माणको काम क्षेत्रीय खेलकुदमार्फत हुँदै आएको बताउनुभयो । “अहिले निर्माणको काम अधुरो अवस्थामा छ”, उहाँले भन्नुभयो, “यो वर्ष यहाँ बहुउद्देश्यीय कभर्डहल निर्माणमा समेत प्रदेश सरकारबाट बजेट विनियोजन भएको छ ।”

सुदूरपश्चिम प्रदेश सरकारले यहाँ बहुउद्देश्यीय कभर्डहल बनाउन चालु आर्थिक वर्षमा रु आठ करोड रकम विनियोजन गरेको खेलकुद विकास समितिले जनाएको छ । “बहुउद्देश्यीय कभर्डहलको कूल लागत अनुमान रु २७ करोडको हो”, भट्टले भन्नुभयो, “चालु आवमा बजेट विनियोजन भएकाले नयाँ प्रदेश सरकार आएपछि उक्त काम अघि बढ्छ होला ।”

काठमाडौँ । प्रदेश १ माथि सोमवार २ सय १३ रनको फराकिलो जित निकाल्दा सुदूरपश्चिम प्रदेशले राजधानीमा जारी वाई वाई यु–१९ पुरुष राष्ट्रिय क्रिकेट प्रतियोगितामा लागातार चौथो जितलाई निरन्तरता दिएको छ ।

कीर्तिपुरस्थित त्रिभुवन विश्व विद्यालयको मैदानमा सम्पन्न खेलमा सुदूरपश्चिम प्रदेशले दिएको २ सय ६५ रनको विशाल लक्ष्य पछ्याउने क्रममा प्रदेश नम्बर १ ले १६.३ ओभरमा सबै विकेट गुमाएर मात्र ५१ रन जोड्न सक्यो । प्रदेश नम्बर १ का लागि भुपाल दंगालले सर्वाधिक १० रन जोड्नु बाहेक अन्य ब्याटरले दोहोरो अंकको स्कोर गर्न सकेनन् भने सुदूरपश्चिम प्रदेशले १६ रन खर्चिएको थियो । प्रदेश १ लाई सस्तैमा समेट्ने क्रममा सुदूरपश्चिम प्रदेशका हेमन्त धामीले सर्वाधिक ५ विकेट निकाल्दा आकाश चन्दले ३ तथा मिलन बोहोराले २ विकेट आफ्नो नाममा लेखाए ।

यसअघि टस जितेर पहिला ब्याटिङ गरेको सुदूरपश्चिमले कप्तान अनुराग सिंह र मिलन बोहोराको अर्धशतकीय इनिङको सहयोगमा २ सय ६४ रनको योगफल बनाएको थियो । पूरै ५० ओभर खेलेको सुदूरपश्चिमले ९ विकेट गुमाउन पुगेको थियो । अर्धशतकीय पारी खेलेका कप्तान अनुरागले व्यक्तिगत ८३ रन बनाउँदा मिलनले ६४ रनको व्यक्तिगत स्कोर बनाएका थिए । यस बाहेक दीपक बोहोराले ३२ रनको योगदान गर्दा गजेन्द्र बोहोराले २४ रन बनाए । बलिङतर्फ प्रदेश १ का अभिनय राजवंशीले सर्वाधिक ४ विकेट निकाले । यस्तै आशिस खरेल र दिपेश कँडेलले समान २÷२ विकेट आफ्नो नाममा लेखाए ।

यस जितसँगै सुदूरपश्चिम प्रदेशले ४ खेलबाट स्पष्ट जित हात पार्दै तालिकामा ८ अंक बनाएको छ । सुदूरपश्चिम तालिकाको शीर्ष स्थानमा अटाउँदा पराजित प्रदेश १ को ३ खेलबाट २ अंक छ ।

प्रतियोगिता अन्तर्गत सोमवार नै मुलपानीमा भएको अर्को खेलमा लुम्बिनी प्रदेशले गण्डकी प्रदेशलाई ४ विकेट हरायो । ओसिलो मैदानका कारण खेल ४० ओभरमा घटाइएको थियो । गण्डकीले ३६.३ ओभरमा सबै विकेट गुमाएर लुम्बिनीलाई १ सय ६२ रनको लक्ष्य दिएको थियो । लक्ष्य पछ्याएको लुम्बिनीले पूरै ४० ओभर सकिन ४ बल बाँकी रहँदा भेटाउन सफल रह्यो । लुम्बिनीका लागि विशाल भुषाले अविजित ५२ रनको पारी खेले । ओपनर आकाश त्रिपाठीले ४५ रनको व्यक्तिगत स्कोर बनाउँदा विकेटकिपर प्रज्वल थापाले २४, अर्का ओपनर देव खनालले १५ रनको योगदान गरे । बलिङतर्फ गण्डकीका किरण भट्टराई र सुदीप अर्यालले समान २/२ विकेट लिए । यस्तै सुवास भण्डारी र निर्तेश गिरीले समान १/१ पाए ।

यसअघि टस जितेर पहिला ब्याटिङ गरेको गण्डकीले प्रदेशकालागि सुदीप अर्यालले सर्वाधिक ३६ रनको पारी खेल्दा दीपक डुम्रले ३०, करण पंगेनीले २९ तथा गोविन्द बिकले १० रनको व्यक्तिगत स्कोर बनाए । यस्तै शिशिर भुषाल १२ रनमा अविजित रहे । बलिङतर्फ दुर्गेश गुप्ताले सर्वाधिक ५ विकेट निकाले । यस्तै निर्मल गुरुङले ३ तथा नर शार्की र तुलबहादुर थापाले समान १/१ विकेट हात पारे ।

प्रतियोगितामा मंगलवार कीर्तिपुर मैदानमा वागमती र कर्णाली प्रदेशबीच प्रतिष्पर्धा हुँदा मुलपानी मैदानमा मधेस प्रदेश र प्रदेश १ बीच खेल हुनेछ ।

काठमाडौँ । तीन एक दिवसीय श्रृंखला अन्तर्गत पाहुना टोली युएईसँगको पहिलो खेलमा नेपाल ८४ रनले पराजित भएको छ ।

कीर्तिपुरस्थित त्रिभुवन विश्व विद्यालयको मैदानमा युएईले दिएको २ सय ६४ रनको लक्ष्य पछ्याएको नेपालले निर्धारित ५० ओभरको समाप्तिमा नौ विकेट गुमाएर मात्र १ सय ७९ रन जोड्न सक्यो । रोहितकुमार पौडेलको कप्तानीमा मैदान उत्रिएको नेपालले जवाफी ब्याटिङ गर्ने क्रममा ओपनर अर्जुन साउद र दीपेन्द्र सिंह ऐरीले अर्धशतकीय पारी खेले पनि जितका लागि पर्याप्त भएन । ओपनर अर्जुन साउदले ७९ बल खेल्दा ५ चौकाको सहयोगमा ५१ रन जोड्ने क्रममा पवेलियन फर्किन पुगेका थिए ।

चौथो विकेटको जाँदा स्कोरकार्डमा मात्र ४१ रन जोडेको नेपालले ५ विकेट जाँदा अर्जुनलाई गुमाउन पुगेको थियो । यस्तै ८४ बलको सामना गरेका दीपेन्द्रले ५४ रन जोड्दा ६ चौका प्रहार गरेका थिए । यस बाहेक अर्का ओपनर आसिफ शेखले १२ रन जोड्दा गुल्सन झा १९ रनमा अविजित रहे । यस्तै डेब्युटेन्ट हरिशंकर साह ८ रनमा पवेलियन फर्किए । अन्य ब्याट्सम्यानले भने राम्रो प्रदर्शन गर्न सकेनन् । नेपाललाई सस्तैमा समेट्ने क्रममा युएईका आयन अफ्जल खानले सर्वाधिक ४ विकेट लिए । बसिल हामिदले २ तथा जाहोर खान, रोहन मुस्तफा र अहमेद राजाले १/१ विकेट लिए ।

यसअघि टस हारेर पहिला ब्याटिङको निम्तो पाएको युएईले रोहन मुस्ताफाको अर्धशतकको सहयोगमा नेपालामु जितका लागि २ सय ६३ रन बनाएको थियो । युएईले निर्धारित ५० ओभरमा ७ विकेट गुमाउँदै २ सय ६३ रनको योगफल बनाउँदा मुस्ताफाले अर्धशतकीय पारी खेलेका हुन् ।

७७–२ को स्थितीमा ब्याटिङका लागि आएका मुस्ताफाले ७३ बलमा ७ चौकाको मद्दतमा ५३ रन बनाए । त्यस्तै ओपनर अरविन्दले ४० रन बनाए । अरविन्दले पहिलो विकेटका लागि अर्का ओपनर मुहामेद वासिमसँग ७५ रनको साझेदारी गरेका थिए । वासिमले ४१ कलमा ६ चौका र १ छक्का मद्दतमा ४४ रन जोडे । बलिङतर्फ नेपालका गुल्सन झाले २ तथा सोमपाल कामी र दीपेन्द्रसिंह ऐरीले समान १/१ विकेट लिए ।

नेपाल डिसेम्बरमा आइसिसी विश्वकप क्रिकेट लिग टु का लागि नामिबिया भ्रमणमा जाँदैछ । त्यसैले युएईबिरुद्धको श्रृंखलालाई नेपालले अभ्यासको रुपमा लिएको छ । तीन एक दिवसीय श्रृंखलाअन्तर्गत दोस्रो खेल बुधवार र अन्तिम खेल शुक्रवार हुनेछ ।