केपी ओली – News Polar

अध्यक्ष ओलीको सरकारलाई चेतावनी– ‘उत्ताउलिएर अघि नबढ्नु, अराजकता धेरै टिक्दैन’

न्यूजपोलार — Wed, 03 Jun 2026 07:20:03 +0000

काठमाडौं । नेकपा एमालेका अध्यक्ष केपी शर्मा ओलीले सरकारलाई उत्ताउलिएर अघि नबढ्न चेतावनी दिएका छन्।

काठमाडौंमा सुरु भएको सदस्यता नवीकरण, विस्तार तथा उत्प्रेरणा सम्बन्धी कार्यशालाको उद्घाटन गर्दै उनले अराजक शैलीमा अघि बढेको सरकार धेरै समय नटिक्ने दाबी गरे।

अध्यक्ष ओलीले राणा शासन र पञ्चायती व्यवस्थाको आयु सकिएको उदाहरण दिँदै उत्ताउलोपन र अराजकता लामो समय टिक्न नसक्ने बताए। “अराजकता केही दिनको पाहुना हो, लामो समय चल्दैन,” उनले भने।

उनले भदौको विध्वंसकारी आन्दोलनपछि राजनीतिक दलका कार्यकर्ताहरू खुलेर बोल्न नसक्ने अवस्था बनेको दाबी गर्दै त्यस्तो अवस्थामा एमालेका नेता–कार्यकर्ताले अराजकताविरुद्ध आवाज उठाएको उल्लेख गरे।

“भदौ २४ पछि अराजकता र हिंसाको डरले कोही बोल्न सकेका थिएनन्, त्यतिबेला एमालेका नेता–कार्यकर्ता वडा–वडाबाट बोले,” उनले भने।

ओलीले एमालेका कार्यकर्ताले आवाज उठाएकै कारण अन्य दललाई पनि बोल्ने वातावरण बनेको दाबी गर्दै पार्टीका नेता–कार्यकर्ताप्रति धन्यवाद व्यक्त गरे। साथै, उनले गत फागुनमा भएको निर्वाचनलाई पनि “तमासा मात्र” भएको टिप्पणी गरे।

ओली, लेखक पक्राउः एमाले सडकमा, कांग्रेस अनिर्णित

न्यूजपोलार — Sat, 28 Mar 2026 11:53:51 +0000

काठमाडौं । नेकपा एमालेले आज बिहाज एमाले अध्यक्ष केपी ओलीलाई पक्राउ गरिएको बिरुद्धमा दशैभरि आन्दोलन गर्ने भएको छ ।

आजै दिउँसोदेखि काठमाडौँको बबरमहल र माइतीघरका अतिरिक्त विभिन्न जिल्लामा पनि प्रदर्शन भएको छ । एमालेले आजै बिहान पार्टीको केन्द्रीय समितिको बैठक गरेर सोको विरोध गर्ने निर्णय गरेको थियो ।

आज बिहानै बसेको एमालेको आकस्मिक बैठकले सरकारको ओली र रमेश लेखकलाई पक्राउ गरेको विरुद्धमा देशैभरि सरकारका विरुद्ध प्रदर्शन गर्ने निर्णय गरेको थियो । ओली पक्राउ परेपछि वरिष्ठ उपाध्यक्ष रामबहादुर थापा बादलको अध्यक्षतामा बसेको बैठकले सो निर्णय गरेको थियो ।

एमालेले प्रकाशन गरेको विज्ञप्तिमा पनि ओली र लेखकको पक्राउको विरोध गरिएको कुरा स्पष्ट उल्लेख छ ।

तर यता नेपाली कांग्रेस भित्र भने यस विषयले प्रवेश नै भएको छैन । आफ्ना नेता रमेश लेखकको पक्राउका विरुद्धमा अहिलेसम्म कांग्रेसबाट कुनै आधिकारिक धारणा नै आएको छैन ।

लेखक पक्राउको विरुद्धमा एमालेको बैठकमा नै कुरा भएको भए पनि यता कांग्रेसमा भने आफ्नै पार्टीका नेता रमेश लेखकको पक्राउका विषयमा केही आधिकारिक धारणा नै अएको छैन ।

शेरबहादुर देउवा र यता गगन थापा नेतृत्वको कांग्रेस दुवै तफबाट केही धारणा बाहिर अएको छैन । लेखक देउवा पक्षीय कांग्रेस हुन् । तर हालैमात्र सम्पन्न भएको विशेष महाधिवेसनमा गगन थाप नेतृत्वको कांग्रेसले वैधानिकता पाएपछि भने लेखक पार्टीको कुनै कमिटीमा छैनन् ।

एमालेले अध्यक्ष ओलीको पक्राउविरुद्ध कानुनी र राजनीतिक प्रतिवाद गर्ने

न्यूजपोलार — Sat, 28 Mar 2026 05:42:10 +0000

काठमाडौं। नेकपा एमाले सचिवालय बैठकले अध्यक्ष केपी ओलीको पक्राउविरुद्ध कानुनी र राजनीतिक प्रतिवाद गर्ने निर्णय गरेको छ।

केन्द्रीय कार्यालय च्यासलमा बसेको सचिवालय बैठक ओलीको रिहाइको लागि कानुनी र राजनीतिक प्रतिवाद गर्ने निर्णय गरेको सचिव महेश बस्नेतले जानकारी दिनुभयो ।

बैठकले आम जनसमुदाय , नागरिक समाजको दृढताको साथ कानुनी तथा राजनीतिक रूपमा सशक्त प्रतिबाद गर्ने,प्रत्येक जिल्लाको सदरमुकाममा आज अपराह्न ३ बजे जनसंगठनहरूको तर्फबाट विरोध प्रदर्शन गर्ने निर्णय गरेको छ ।

यसैगरी प्रत्येक जिल्लामा भोलि चैत्र १५ गते १२ बजे जिल्ला पार्टी कमिटीको आयोजनामा व्यापक प्रदर्शनसहित प्रमुख जिल्ला अधिकारी कार्यालयमा विरोधपत्र बुझाउने र लोकतन्त्र र कानुनी राज्यका पक्षधर सबै दलहरूसँग संबाद र सहकार्य गर्ने। नागरिक समाज र आम जनसमुदाय संग सहकार्य गर्ने निर्णय गरेको छ ।

झापा–५ मा बालेनको फराकिलो अग्रता, ओलीकाेभन्दा दोब्बर बढी मत

न्यूजपोलार — Fri, 06 Mar 2026 05:25:50 +0000

काठमाडौँ । झापा जिल्लाको प्रतिनिधि सभा क्षेत्र नम्बर ५ मा जारी मतगणनामा बालेन शाहले अग्रता कायम राखेका छन्। राष्ट्रिय स्वतन्त्र पार्टीका उम्मेदवार शाहले हालसम्मको मतपरिणाम अनुसार उल्लेखनीय मत अन्तर बनाएका छन्।

हालसम्म गणना भएको मतअनुसार शाहले १० हजार १९० मत प्राप्त गरेका छन्। उनका निकटतम प्रतिस्पर्धी केपी शर्मा ओलीले ४ हजार ८७ मत पाएका छन्। नेपाल कम्युनिष्ट पार्टी (एमाले)का उम्मेदवार ओलीभन्दा शाहले दोब्बरभन्दा बढी मतले अग्रता बनाएका हुन्।

निर्वाचन अधिकृतको कार्यालयका अनुसार क्षेत्र नम्बर ५ मा मतगणना कार्य अझै जारी छ।

ओलीको निर्देशनः हरेक बुथ सुरक्षाका लागि ३० जनाको भोलेन्टियर्स फोर्स बनाउनू

न्यूजपोलार — Mon, 23 Feb 2026 10:01:33 +0000

काठमाडाैँ । नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले हरेक बुथको सुरक्षा लागि कम्तिमा ३० जना भोलेन्टियर फोर्स बनाउन पार्टीका नेता, कार्यकर्तालाई निर्देशन दिएका छन् ।

सोमवार झापामा आयोजित पार्टीको कोशी प्रदेश स्तरीय भेलामा बोल्दै उनले आसन्न निर्वाचनलाई ध्यानमा राखेर हरेक बुथको सुरक्षाका लागि पार्टीको तर्फबाट स्वयंसेवक परिचालन गर्नुपर्ने भएकाले त्यसको तयारी गर्न सिंगो पार्टी पंक्तिलाई सचेत गराएका हुन् ।

अध्यक्ष ओलीले निर्वाचनमा मत सुरक्षाका लागि टोलटोलमा सुरक्षा समितिहरू बनाउन पनि पार्टीका नेता, कार्यकर्तालाई अपिल गरे । उनले स्थानीय तहमा निर्माण गरिएको भोटेन्टियर्स फोर्सहरूले पार्टीको निर्णय र निर्देशन अनुसार काम गर्ने भएकाले उनीहरूलाई सोही अनुसार परिचालन हुने वातावरण बनाउनुपर्ने पनि स्पष्ट पारे ।

अध्यक्ष ओलीले देशको सुरक्षाका लागि सुरक्षा निकायलाई सहयोग गर्न पार्टीले भोलेन्टियर्स फोर्स निर्माण गर्नुपरेको समेत बताए ।

सही कुरामा मात्रै अडिग रहने ओलीको दाबी

न्यूजपोलार — Mon, 23 Feb 2026 05:05:16 +0000

काठमाडौँ । केपी शर्मा ओलीले आफू सधैँ सही कुराका लागि मात्रै अडिग रहने गरेको बताएका छन् ।

नेपाल कम्युनिष्ट पार्टी (एकीकृत मार्क्सवादी–लेनिनवादी)का अध्यक्षसमेत रहेका ओलीले किशोरावस्थादेखि नै राजनीतिक परिवर्तनको आकांक्षा बोकेर आन्दोलनमा होमिएको स्मरण गरे। पञ्चायती व्यवस्था र राजतन्त्र अन्त्य गर्ने सङ्कल्पका साथ राजनीतिमा सक्रिय भएको उल्लेख गर्दै उहाँले लक्ष्य प्राप्त नभएसम्म संघर्ष नछाड्ने अठोटका साथ अघि बढेको बताए ।

उनका अनुसार पञ्चायतविरुद्धको आन्दोलनका क्रममा जेल सजाय, यातना र विभिन्न दमनका बाबजुद पनि आफ्नो अडान नडगमगिएको थियो । राजतन्त्र र पञ्चायत अन्त्य नगरेसम्म विश्राम नलिने अठोटका साथ संघर्ष जारी राखेको उनको भनाइ छ ।

ओलीले सानो आधारबाट सुरु गरेर एमालेलाई देशको प्रमुख शक्तिका रूपमा स्थापित गर्ने लक्ष्य लिएको र त्यो पूरा गर्न सफल भएको दाबी गरे। नेपालमा दुई तिहाइ हैसियतको पार्टी निर्माण गरे पनि त्यसलाई सहन नसक्ने शक्तिहरूले विभाजन गराएको उनको गुनासो थियो ।

आफूमाथि लाग्ने ‘जिद्दी’ आरोपबारे स्पष्ट पार्दै उहाँले गलत वा नराम्रो काममा कहिल्यै अडान नलिने तर सही कुरामा भने दृढ रहने गरेको बताए । संघर्षशील जीवन सहज नहुने भए पनि सही उद्देश्यका लागि गरिएको संघर्षको अन्त्य सकारात्मक हुने उनको तर्क छ ।

आगो लगाएर मार्नेहरूले उल्टै मलाई हत्यारा भन्छन्ः केपी ओली

न्यूजपोलार — Thu, 05 Feb 2026 05:24:00 +0000

काठमाडौँ । नेकपा (एमाले) का अध्यक्ष तथा पूर्वप्रधानमन्त्री केपी शर्मा ओलीले राष्ट्रघाती तत्वहरुले अराजकता सिर्जना गरेर आफूमाथि आरोप लगाउने काम गरिरहेको बताउनुभएको छ ।

झापावासीहरुसँगको भेटघाटका क्रममा उहाँले यस्तो बताउनुभएको हो । उहाँले गत भदौ २३ र २४ गतेको घटना केही तत्वहरूले उपद्रव मच्चाएर ठूलो उपद्रव तथा राष्ट्रिय स्तरको अराजकता सिर्जना गर्ने वातावरण बनाउने प्रयास गरेको बताउनु भयो । उहाँले पहिलेदेखि नै यस्तो सम्भावनाबारे सचेत रहेको तर पूर्ण रूपमा रोक्न नसकेको बताउनु भयो । उहाँले आगो लगाउने तथा मार्नेहरूले उल्टै आफूमाथि हत्यारा, षड्यन्त्रकारी तथा घृणित आरोप लगाएर देशलाई बद्नाम गर्ने काम गरेको बताउनु भयो । प्रधानमन्त्रीले गोली चलाउने आदेश दिन नसक्ने भन्दै ओलीले प्रधानमन्त्रीले गोली चलायो भन्नेहरु बेवकुफ वा अपराधी भएको बताउनु भयो ।

ओलीको यो अभिव्यक्ति भदौ २३ गतेको जेन–जी प्रदर्शन तथा हिंसात्मक घटनासँग सम्बन्धित छ । जसमा प्रदर्शनकारीहरूको आक्रमण, आगजनी तथा प्रहरीको कारबाहीका क्रममा दर्जनौंको ज्यान गएको थियो । सो घटनापछि ओलीले प्रधानमन्त्री पदबाट राजीनामा दिनुभएको थियो । उहाँले पटक–पटक गोली चलाउने आदेश नदिएको दाबी गर्दै आउनुभएको छ भने छानबिनको माग पनि गर्नुभएको छ ।

उहाँले भन्नुभयो, ‘उपद्रव मच्चाएर, ठूलो उपद्रवका लागि राष्ट्रिय उपद्रवको वातावरण बनाउन सक्छन्, पहिला नै तयार हुनु भनेको थिएँ, त्यो हुन सकेन । पछि कोही लुट्न गएका, लुट्न गएकाहरुलाई भित्रै राखेर बाहिरबाट आगो लगाएर भित्रभित्रै मारिएको छ । कसैको सनाखत नै हुन सकेको छैन । को हो के हो ? मराउने को हुन्, यिनीहरु । अनि मराउनेहरुले उल्टै हाम्रा विरुद्ध मार्ने र मराउने, आगो लगाउनेर गोली चलाउन बाध्य पार्नेहरुले हाम्रा विरुद्ध, षड्यन्त्रका पोकाहरुले त्यस्ता घृणित लाञ्छना लगाएर, झुटा आरोप लगाएर देश दुनियाँमा बद्नाम गर्ने काम गरेका छन् । सबैले बा भने भन्ने रिसले यिनीहरुले केही मान्छे मार्ने परिस्थिति बनाएर उ हत्यारा हो भनेर भन्दैछन् । आगो लगाएर मार्ने उनीहरु अनि हत्यारा हुने केपी ओली । सबैलाई थाहा छ, प्रधानमन्त्रीले आदेश दिने त के गोली चल्नु भन्दा अगाडि थाहा पनि पाउँदैन । अफ्ठ्यारो स्थितिमा पुलिसले सोध थाल्छ, कहाँ छ प्रधानमन्त्री भनेर । प्रधानमन्त्री त्यस्तो सुलभ सम्पर्कमा हुन्छ ? आदेश लिएर बसेको हुन्छ, हतियार लियो जब त्यतिबेलै यस्तो यस्तो परिस्थितिमा गोली चलाउने भन्ने आदेश पाएरै बसेको हुन्छ । परिस्थिति हेरेर काम गर्छ । अनि प्रधानमन्त्रीले गोली चलायो भन्ने । या त यि बेबकुफ हुन् । या त यि अपराधी हुन् । झुट र बेइमान हुन् । यो कुरा बुझाउन सक्नुपर्छ ।’

अध्यक्ष ओलीले झुटको प्रचार गर्नेहरुले विभिन्न आरोप लगाइरहे पनि यथार्थ कुरा आम नागरिकलाई बुझाउन सक्नुपर्ने बताउनु भयो ।

के ओली-गगन चुनावी तालमेल हुन लागेको हो ?

न्यूजपोलार — Mon, 02 Feb 2026 15:20:18 +0000

काठमाडौं । आसन्न निर्वाचनको अब महिना दिनमात्र बाँकी छ । त्यसैले मत आफ्ना पक्षमा पार्न विभिन्न कसरत जारी छन् । दलहरु प्रचारप्रसारका लागि आफ्ना निर्वाचन क्षेत्रमा छन् र आफूले प्राप्त गर्ने मतका आआफ्ना आँकडा र अनुमानहरुको विश्लेषण गरिरहेका छन् ।

यस निर्वाचनको एउटा फरक विशेषता के छ भने यसपटक दलहरुका हिजोका निर्वाचनमा सुनिने गरेको यो गठबन्धन भन्ने शब्द भने कम सुनिएको छ । नत्र निर्वाचन नजिकिँदै गरेको यो समयमा पहिले पहिले कुन दल कुनसँग भन्ने गठबन्धनका समाचारहरु बग्रेल्ती आउने गर्दथ्यो ।

तर अहिले भने आजका दिनसम्ममा कुनै पनि दलले आधिकारिक रुपमा गठबन्धन गरेको भन्ने सुनिएको छैन । एकाध त छन् तर ती राष्ट्रिय राजनीतिका लागि फरक पार्ने खालको अंक गणित नै ल्याउने खालका भने छैनन् ।

आज भने एउटा फरक समाचार केही मिडियामा छापिएको देखिएको छ कि तीन दलका नेता केपी ओली, शेरबहादुर देउवा र पुष्पकमल दाहाल प्रचण्ड भेटेर चुनावी रणनीति बनाए रे भन्ने । यीमध्ये प्रचण्ड र ओली त चुनावी मैदानमै छन् भने देउवा चुनावमा उठेका छैनन् । तर पनि उनीहरुका बीचमा आगामी निर्वाचनका बारेमा कुराकानी भए र त्यसमा एक आपसमा हुनसक्ने गठबन्धन र एकले अर्कालाई सघाउने विषयमा पनि कुराकानी भएको समाचार स्रोतहरुले दाबी गरिरहेका छन् ।

नेपाली कांग्रेसका निबर्तमान सभापति शेरबहादुर देउवा, नेकपा एमालेका अध्यक्ष केपी शर्मा ओली र नेपाली कम्युनिस्ट पार्टीका संयोजक पुष्पकमल दाहार प्रचणडबीच भेटवार्ता भएको समाचारलाई केही अनलाइन मिडियाले प्राथमिकता साथ राखेका छन् । उनीहरुबीच आइतबार भेट र कुराकानी भएको स्रोतको दाबी छ ।

यो भेटमा मुख्यगरी केपी शर्मा ओलीले देउवा र प्रचण्डसँग सहयोग मागेको बताइएको छ । स्रोतका अनुसार ओलीले आफ्नै निर्वाचन क्षेत्र झापा ५ मा सहयोग गर्न आग्रह गरेका थिए ।

ओलीले खासगरी झापामा आफूलाई के कसरी हुन्छ सहयोग गर्नुपर्यो भनेर देउवा र प्रचण्डसँग खुलस्त रुपमा कुराकानी गरेका स्रोतले बतायो । झापामा ओली आफैं उम्मेदवार छन् भने दाङमा उनका विश्वासपात्र महासचिव शंकर पोखरेल उम्मेदवार छन् । ओलीले दाङमा पनि सहकार्यका लागि आग्रह गरेको बताइएको छ ।

एक अर्काे समाचार स्रोत भन्छ त्यस लगत्तै यता ओली र कांग्रेस सभापति गगन थापा पनि भेटेका छन् । आइतबार साँझ उनीहरुबीच भेटघाट र कुराकानी भएको र त्यस अवसरमा ओलीलाई झाप ५ मा र यता गगन थापालाई सर्लाही ४ मा सघाउने विषयमा कुराकानी भएको बताइएको छ ।

तर सो समाचारपछि पार्टीभित्रैबाट गगनको विरोध भएको बताइएको छ । ओली अहिले निकै विवादित नेता रहेका तथा कांग्रेसले यसअघि नै कुनै पनि दलसँग र अझ विशेष रुपमा भन्दा एमालेसँग सहकार्य नै नगर्ने भन्ने सिद्धान्तका बारेमा अडान राख्दै आएकाले कुनै पनि क्षेत्रका लागि एमालेसँग सहकार्य गर्नै नहुने भनेर कांग्रेसमा विरोध भएको बताइएको छ ।

निर्वाचनको प्रचार सुरु: सबैका आँखा झापातिर

न्यूजपोलार — Wed, 21 Jan 2026 03:04:11 +0000

प्रतिनिधिसभाको आसन्न निर्वाचनको प्रचार प्रसार सुरु भएको छ । फागुन २१ गते मतदान हुने यस निर्वाचनको सम्पूर्ण प्रक्रिया सुरु भएर प्रत्यक्षतर्फका उम्मेदवारले पनि हिजो मनोनयन गराएका छन् ।

उम्मेदवारी फिर्ता र केही प्राविधिक प्रक्रिया बाहेक अबको राज्यको काम भनेको सुरक्षा व्यवस्था कडा बनाउने र मतदातको वातावरण बनाउने मात्र छ । यता राजनीतिक दल र उम्मेदवारहरु भने मतदानका लागि तयारी अवस्थामा रहेका छन् ।

सबै दलले आआफ्नो उम्मेदारी तथा दलको प्रचार त छँदैछ, तर यस पटकको निर्वाचनको आकर्षण भने झापा जिल्लाको निर्वाचन क्षेत्र नं ५ बन्न पुगेको छ । जुन क्षेत्रमा यतिखेर सबैको आँखा पुगेको अवस्था छ । दल र उम्मेदवारले आफ्नो प्रचार र आफ्ना दलको अवस्था विश्लेषण गर्ने र जनताको घरदैलोमा पुग्ने त छँदैछ, यसका अतिरिक्त ती सबै दल र उम्मेदवारले झापामा के होला भनेर पनि बडो उत्सुकतापूर्वक हेरिरहेका छन् ।

हरेक चुनावमा कुनै न कुनै आकर्षण हुने गर्दछ । जस्तो कि यस अघिका निर्वाचनमा प्रायः प्रचण्ड कुन क्षेत्रबाट उठ्छन् र उनले निर्वाचन जित्छन् कि जित्दैनन् भन्ने हुने गर्दथ्यो । उनी चितवत पुग्दा होस् या यस अघिको निर्वाचनमा अन्तिम आवरमा भागेर त्यहाँबाट गोरखा पुग्दा होस्, उनको क्षेत्रको चुनावको चर्चा अरुको तुलनामा बढी नै हुने गर्दथ्यो ।

तर यसपालि प्रचण्डको छैन । किनभने उनी देशका धेरै ठाउँमा पुगिसके, धेरै निर्वाचन क्षेत्र चाहारिसके । सिराहादेखि काठमाडौँ सम्म अनि चितवन देखि गोरखा हुँदै अहिले रुकुमसम्म । यसकारण पनि अब न मिडिया र नत कुनै राजनीतिक अभियन्ता या दल नै उनको चर्चा गर्न छोडिसके । अहिले नयाँ निर्वाचन क्षेत्र छ चर्चामा झापाको ५ नं क्षेत्र ।

जहाँ नेकपा एमालेका अध्यक्ष केपी ओली र राष्ट्रिय स्वतन्त्र पार्टीका बालेन साह भिड्दैछन् । बालेन काठमाडौँ महानगरपालिकाका पूर्व प्रमुख हुन् र उनी केही हप्तामात्र अघि सो पार्टीमा प्रवेश गरेका हुन् । गएको भदौ २२ र २३ गतेको जेनजी आन्दोलनदेखि नै उनी चर्चामा छन् । वर्तमान सरकार निर्माणमा पनि उनको नै हात रहेको कुरा प्रत्यक्ष रुपमा जनताले देखे भोगेका हुन् ।

अनि त्यो आन्दोलन पनि मुलतः ओली सरकारका विरुद्ध नै थियो । ओली प्रधानमन्त्री थिए र सो आन्दोलनबाट अपदस्थ भएका थिए । त्यसपछिका मिडियाले विशेषगरी ओलीको पिछा गरिरहेका छन् । उनी हालैको महाधिवेशनमा पार्टीको अध्यक्ष उठ्दा होस् या उनीसँग आन्दोलनका क्रममा भएको दमनका विषयमा छानबिन आयोगले बयान लिँदा होस् ।

पछिल्लो समय उनी उम्मेदबार बनेपछि फेरि मिडिया उनका विरुद्ध खनिन थालेका छन् । र, अहिले तुलनात्मक रुमपा बालेनको पछि मिडिया लागिरहेका छन् । बालेन किन झापा पुगे भन्ने विषयले देशव्यापी रुपमा बडो चर्चा पाएको छ । जस्तो कि हिजोमात्र पनि देशैभरि मनोनयन भइरहेको थियो, तर चर्चा र चित्र झापाकै बढी देखिन्थ्यो ।

उनलाई आगामी निर्वाचनपछिको प्रधानमन्त्रीका रुपमा सो पार्टीले अघि सारिसकेको छ । यसकारण पनि बढी चर्चा हुनु त स्वाभाविकै भयो । त्यसमा पनि केपी ओलीजस्तो विगत पटकौँसम्म आफ्नै निर्वाचन क्षेत्रबाट उठ्दै र जित्दै आएको बलियो क्षेत्रमा किन बालेन हामफाले भन्ने विषय अहिले धेरैको विश्लेषणको विषय बनेको छ ।

के बालेनले चुनाव जित्लान त ? के उनी निर्वाचन जितेपछि रास्वपाले प्रधानमन्त्री बनाउला त ? ओलीले निर्वाचन हारे भने के हुन्छ ? त्यसपछि एमालेको संसदीय दलको नेता को हुन्छ ? के रविले साँच्चिकै चुनाव जिताउनकै लागि बालेनलाई ओलीसँग भिड्न पठाएका हुन् त ? कि बालेनले चुनाव हारेपछि आपूmलाई हाइसुख्ख हुन्छ भनेर त रविले बालेनलाई झापा पठाएका होइनन् ? यस्ता धेरै प्रश्नहरुमा अहिले चिया पसलमा बढी चर्चा हुने गर्दछ ।

त्यसैले यतिखेर देशका ठूला देखि साना मिडियादेखि प्रायः युट्युबहरु झापा ५ मै गएर थुप्रिएका छन् । कतिले अनुसन्धान गरेका छन् त कतिले अनुमानकै भरमा समाचार सम्प्रेषण गरिरहेका छन् । उनीहरु पनि कसले जित्छ भनेर यकिन गर्न सकिरहेका छैनन्, समाचारहरु भने दिइरहेका छन् कि सो क्षेत्रको चर्चा अरुको भन्दा बढी चर्चा छ । सबैको आँखा त्यतै छ ।

हुन पनि बालेनसँग चुनाव लड्नका लागि धेरै क्षेत्रका विकल्प थिए । उनी काठमाडौँका मेयर रहेकाले यहाँका १० मध्येको कुनै न कुनै क्षेत्र रोज्न सक्थे ।

उनी मधेशको भएकाले आफ्नो गृह जिल्ला या कुनै न कुनै मधेशको निर्वाचन क्षेत्र पनि रोज्न सक्थे । कांग्रेसका गगन थापादेखि कैयौँ नेताहरु आफू सुरक्षित हुनका लागि मधेश दौडिरहेका छन् भने बालेनसँग पनि त्यो रोजाइको अवसर पक्कै थियो ।

तर पनि उनी किन झापा पुगे भन्ने विषयले अहिले चर्चा पाइरहेको छ । त्यसैले मिडियादेखि दलसम्म र राजनीतिक विश्लेषकदेखि पार्टीका नेतासम्म नै अहिले झापा ५ को चर्चा गर्ने गर्दछन् । त्यसैले सर्वसाधारणदेखि धेरैको आँखा अहिले झापा ५ तिरै छ ।

भ्रममा परेर तरंगित नहुन ईश्वरको ओलीलाई सुझाव

न्यूजपोलार — Tue, 23 Dec 2025 00:54:04 +0000

काठमाडौं । नेकपा एमालेको ११ औ महाधिवेशनमा अध्यक्ष पदमा प्रतिस्प्रर्धा गर्नुभएका नेता ईश्वर पोखरेलले सही कुरा बुझ्न र बुझौं भ्रममा परेर तरंगित नबन्न पार्टी नेतृत्वलाई सुझाब दिनु भएको छ ।

सामाजिक संञ्जालमा एक स्टाटस राख्दै पोखरेलले महाधिवेशनबाट निर्वाचित नेतृत्वको विरोधमा कसैबाट पनि कुनै काम नहुने स्पष्ट पार्नुभएको छ ।

उहाँले नेतृत्वबाट सबैले आत्मसमर्पण होइन , समान र सम्मानजनक व्यवहारको अपेक्षा पनि गरेका जनाउनु भएको छ । उहाँले लेख्नुभएको छ ।

अध्यक्ष केपी ओली र अर्का नेता प्रदीप ज्ञावलीले ले केही दिन पोखरेल पक्षको भेला प्रति कडा टिप्पणी गर्नुभएको थियो । त्यसको प्रतिक्रिया स्वरुप पोखरेलले यस्तो टिप्पणी गर्नुभएको हो ।

उहाँले लेख्नुभएको छ-

सही कुरा बुझौं ! भ्रममा परेर तरंगित नबनौं !!

हालै नेकपा (एमाले) को एघारौं राष्ट्रिय महाधिवेशन सम्पन्न भइसकेको छ । त्यहां उठेका छलफलका विषय , नेतृत्वका लागि भएको प्रतिस्पर्धा र त्यसपछि प्रतिस्पर्धी समूहमा रहनु भएका साथीहरूका विचमा भएको सामान्य र विदाइ छलफललाई लिएर अहिले केही साथीहरूले तरंगित बनेर सार्वजनिक गर्नु भएको प्रतिकृयाप्रति ध्यानाकर्षण भएको छ ।

विगतमा पटक पटक पार्टीभित्रको वहस विवादमा नकारात्मक र नोक्सानदायी परिणाम झेल्दै र भोग्दै आएको पृष्ठभूमिका बारेमा हामी जानकारनै छौं । त्यसले सृजना गरेको त्रासबाट हामी अहिले पनि केही हदसम्म त्रसित छौं र पीडित पनि रह्यौं । तर अहिले विगतको त्यही त्रास वा ‘भूत’ बाट तर्सिरहनु कति उचित हुन्छ ? एउटा कुरा – विगतको दुर्भाग्यपूर्ण अध्यायको पुनरावृत्ति हुने छैन – हुन दिइने छैन ।

संस्थागत गरिएका ( वा गरिने ) निर्णय र महाधिवेशनबाट निर्वाचित नेतृत्वको विरोधमा कसैबाट पनि कुनै काम हुने छैन । तर हरेक तहका नेता / कार्यकर्ताले आत्म समर्पण होइन, आत्मसम्मान खोज्छन् ; कसैलाई काखा कसैले पाखा नगरियोस् भन्ने आशा र अपेक्षा गरेका हुन्छन् । र, त्यस्तो नहुंदा वा हुन नसक्ता त्यसप्रति असहमती वा विरोध भने हुनेछ भन्ने कुरालाई अस्वाभाविक रूपमा लिनु हुन्न पनि ! हो, यसपटक विभिन्न कारणले सर्वसम्मती भएन,नेतृत्वका लागि । ( खासमा नेतृत्वबाट सर्वसम्मतीका लागि ठोस पहल नभएको कुरा महाधिवेशनका आम सहभागीहरूले बुझेकै हुनुपर्छ । नेतृत्वमा रहेका खास खासलाई विदा गर्ने पूर्व योजना रहेर त त्यस्तो गरिएको त थिएन – धेरै सहभागीले यो प्रश्न मनमा लिएर आआफ्ना क्षेत्रमा फिरेको हुनुपर्छ । )

समूह/ समूह बनेपछि र समूहकै हिसावले प्रतिस्पर्धाको प्रकृयामा गएपछि केही नीतिगत अडान, खासगरी पार्टी जीवनको लोकतान्त्रिकरणसित सम्वन्धित विषयमा केन्द्रीत रहेर विषयहरू उठाइएका थिए । ती मुद्दाका रूपमा प्रस्तुत गरिएका थिए , ‘अबधारणा पत्र ‘ का रूपमा सार्वजनिक गरिएका थिए र महाधिवेशनको बन्द सत्रमा समेत प्रस्तुत गरिएकै हुन् ! अर्थात् , लुकाइरहनुपर्ने केही विषय छैनन् वा होइनन् पनि ! जे होस् , अहिले महाधिवेशनले एउटा निष्कर्श दिइसकेको छ ! त्यसलाई पालना गर्नु सबैको कर्तव्य हो। तर नेतृत्वबाट सबैले आत्मसमर्पण होइन , समान र सम्मानजनक व्यवहारको अपेक्षा पनि गरेका हुन्छन् – नेतृत्वले र तरंगित हुने सबैले बुझ्नैपर्छ । त्यस्तो हुन नसक्ता अप्रिय र नोक्सानदायी परिणाम भोग्न हामी सबै अभिशप्त हुने कुराबाट कसरी बच्न सकिएला र !?

रूपान्तपणका लागि निरन्तर वहस/ छलफल , आधिकारिक र संस्थागत निर्णयहरूको पालना, व्यवहारमा काखा पाखा नहुने कुराको सुनिश्चितता, विभाजनको दुर्भाग्यपूर्ण कुराको दृढतापूर्वक विरोध – अहिलेको आवश्यकता हो । महाधिवेशनमा नेतृत्व चयनमा समूह/ समूह रहे पनि सम्बद्ध सबैलाई यिनै कुराबाट निर्देशित हुने / निर्देशित गर्नुपर्ने अहिलेको आवश्यकता हो ।

कसैप्रति पनि आग्रहप्रेरित कटाक्ष गरिनु कुनै पनि अर्थमा पार्टी र आन्दोलनलाई लाभ पुर्याउने विषय नभएर नोक्सान मात्र पुर्याउने विषय हुन् । अनावश्यक तरंगित नबनौं ! सबैले बुझौं ! अहिले नेकपा ( एमाले) सम्बद्ध सबै नेता, कार्यकर्ताहरूले यी कुरामा ध्यान पुर्याउनै पर्ला –

– विधि र प्रकृया अनुसार गरिएका/ भएका संस्थागत

निर्णयहरूको निशर्त पालना !

– पार्टी एकतालाई मजबुत बनाउन सबैबाट त्यसै अनुसारको व्यवहार ! पार्टीलाई विभाजित बनाउने कुराको सख्त बिरोध । संगसंगै , सबै कार्यकर्ताको स्वाभिमान र आत्मसम्मानको पक्षपोषण !

– यिनै कुराका आधारमा पार्टी नेतृत्वको प्रतिरक्षा हुन्छ – सबै षडयन्त्रहरूलाई पराजित गर्न सकिन्छ ! र नेकपा ( एमाले) लाई एउटा निर्णायक राष्ट्रिय शक्ति बनाउन सम्भव हुनेछ ।

ओली अध्यक्ष, रवि रिहा, पूर्वराजा भारततिर

न्यूजपोलार — Thu, 18 Dec 2025 15:21:23 +0000

काठमाडौं । नेकपा एमालेको आज सम्पन्न ११ औँ महाधिवेशनबाट नेकपा एमालेको अध्यक्षमा केपी ओली पुनः निर्वाचित भएका छन् । उनले एमालेको अध्यक्षमा ह्याट्रिक गरेका छन् । उनको जित त अपेक्षित नै थियो तर मिडियाले जेनजी आन्दोलनपछि एमालेको नेतृत्वमा उनको पुनरागमन नहुने अड्कलबाजीहरु गरिरहेका थिए । परिणाम त्यस्तो आएन, ओली अध्यक्षमा अत्यधिक बहुमतले निर्वाचित भए ।

तर मतदाताले एउटा सन्देश भने दिए कि ओलीका सहयोगी र अन्ध समर्थक ठिक छैनन् । विष्णु रिमाल हार्नु, यति सम्म हार्नु कि केन्द्रीय सदस्यमा पनि नआउनु पहिलो सन्देश हो भने महासचिवमा सुरेन्द्र पाण्डेले ल्याएको मत अर्काे सन्देश हो । रिमालसँग जत्तिकै महासचिव दोहोर्याएका शंकर पोखरलेसँग पनि कार्यकर्ता खुसी छैनन् भन्ने सन्देश पाण्डेले पाएको मतले स्पष्टसँगै दिएको छ ।

आजको ओलीको जित नयाँ ब्रेकिङ त होइन तर पनि जेनजी आन्दोलन र त्यसमा भएको जनधनको क्षतिमा जसरी जाँचबुझ आयोगले उनलाई तारो बनाउने सुर कसिरहेको छ, त्यसको पृष्ठभूमिको यो जित केही होइन भन्ने पनि होइन । किनभने देशको ठूलो राजनीतिक पार्टीबाट यसरी अनुमोदित अध्यक्षसँग बयानका नाममा हुन र गर्न सक्ने हर्कतलाई यो जितले औँला भने ठड्याएकै छ ।

आजको अर्को समाचार हो रास्वपाका सभापति रवि लामिछानेको रिहाई । उनको रिहाई भने अनपेक्षित थियो, तर भयो । आज साँझको यो घटनालाई समाचारका रुपमा मात्र नलिएर राजनीतिक घटनाक्रमको विकाससँग जोडेर हेर्ने पनि धेरै छन् । उनीहरुको प्रश्न छ— अब के हुन्छ ?

जेनजी आन्दोलनपछि उम्रिएका नयाँ दलहरु त जनअनुमोदित हुन बाँकी नै छ, तर रास्वपाले ८४ को चुनावलाई मिसन नै बनाएको थियो । उसले पुराना दललाई ८४ मा देखाइदिन्छौँ भनी थालेको अभियान अगावै देशले चुनावको घोषणा गरिसकेकोले त्यो चुनाव र यी रविको रिहाइको अबको संयोग के होला ? त्यसलाई अबका केही दिनका दलका, सरकारका र खासगरी नवनिर्वाचित ओलीका गतिविधिले पनि नयाँ स्वरुपमा परिभाषित गर्न सक्ने अनुमान गर्न सकिन्छ ।

हिजोका दिनको भाष्य के थियो भने रविको कुनै गल्ती छैन, तर पुराना पार्टीहरुले ८४ को निर्वाचनमा रास्वपाको धम्की देखेर जेल हालेका हुन् । रवि जेलबाट मात्र निस्किएका हुन्, सफाइ पाएका होइनन् । तर पनि एक नभई तीन अदालतमा मुद्धा रहेका रवि चुनावका केही दिनमात्र अघि रिहा हुनुलाई केवल रिहाइमात्र बुझ्नु हुँदैन ।

आजैका दिन सार्वजनिक भएको अर्को समाचार हो पूर्वराजा ज्ञानेन्द्र शाहको भारत भ्रमण । उनी हिजो नै स्थलमार्ग भएर भारतको सिलीगुडी पुगेका छन् । समाचार स्रोतले भनेअनुसार उनको भारत भ्रमण र नेपालको राजनीतिक घटनाक्रमसँग कुनै सम्बन्ध त छैन, तर यतिखेरको उनको यो भ्रमण र करिब एक हप्ताको बसाईलाई केबल घुमघामका रुपमा मात्र पनि लिन सकिँदैन ।

उनले राष्ट्रिय स्वयंसेवक संघ (आरएसएस) का अध्यक्ष मोहन भागवतसँग पनि भेटघाट गर्नेछन् । अनि यो भेटघाटमा हुने नेपालको पछिल्लो विकसित राजनीतिक घटनाक्रमसँगको सम्बन्धलाई नकार्न सकिने अवस्था पनि छैन । पूर्वराजा ज्ञानेन्द्र निकट स्रोतले नै राजनीतिक कुराकानी या भेटवार्ता हुन सक्ने कुरालाई नकार्न नसकिने बताउँछ ।

आजका यी तीन घटनाक्रम केवल समाचारका विषयवस्तु मात्र नभएर राजनीतिक घटनाक्रमसँग पनि जोडेर हेर्नुपर्ने र हेर्न सकिने कुरालाई नकार्न सकिन्न ।

केपी ओलीले अध्यक्षमा नयाँ मान्छेलाई अगाडी सार्नुहुन्छः विन्दा पाण्डे

न्यूजपोलार — Tue, 09 Dec 2025 10:46:15 +0000

काठमाडौँ । नेकपमा एमाले नेतृ विन्दा पाण्डेले अध्यक्ष केपी ओली तेस्रो पटक अध्यक्ष नबन्ने बताउनुभएको छ ।

एमालेको ११ औं महाधिवेशन सन्दर्भमा मंगलवार आयोजित अन्तरसंवाद कार्यक्रममा उहाँले महाधिवेशनको अन्तिम समयमा अध्यक्ष ओलीले नयाँ अनुहार अगाडी सार्ने बताउनुभएको हो ।

महाधिवेशनको उम्मेद्वारी दर्ता गर्ने दिनसम्ममा अध्यक्ष ओलीले आफुले नेतृत्व छाडेको घोषणा गर्नेमा आफू विश्वस्त रहेको उहाँले बताउनु भयो । अध्यक्ष ओलीले नेतृत्व छोडेर नयाँ पुस्तालाई नेतृत्व गर्नको लागी सघाउनेमा आफू आशावादी रहेको उहाँको भनाई छ । नेपाली राजनीतिमा पछाडीको नेतृत्वलाई मार्गदर्शन गर्ने परिपाटी अहिलेसम्म नरहेको उल्लेख गर्नुहुँदै उहाँले अध्यक्ष ओलीले त्यसको मान्यता स्थापित गर्ने बताउनु भयो । केपी ओलीकै अगुवाईमा दुई कार्यकाल नेतृत्व र ७० वर्षे उमेरहदको व्यवस्था पार्टीमा आएको स्मरण गर्नुहुँदै उहाँले आफूले स्थापित गरेको मान्यता भन्दा बाहिर जान नमिल्ने उल्लेख गर्नुभयो । उहाँले केपी ओली विनाको एमाले कल्पना गर्न सकिदैन भन्ने खालको नारा स्थापित गर्न खोजिएकोप्रति पनि असन्तुष्टी जनाउनु भयो ।

उहाँले भन्नुभयो, ‘जुन बेला माधव कमरेड पार्टीको शिष नेतृत्वमा हुनुहुन्थ्यो । १५ वर्षसम्म उहाँ त्यहाँ रहँदाखेरीमा पार्टीमा नेतृत्व विकास हुन सकेन, जाम भयो, त्यो जाम खुलाउनको लागि पछिल्लो चरणमा दुई कार्यकाल भएपनि अहिले पहिलो केही अवधिको लागि एक कार्यकालमा पनि अलि छिटो छिटो महाधिवेशन गरेर नेतृत्व परिवर्तन गर्नुपर्छ भन्ने मान्यतालाई स्थापित गर्ने हाम्रो अध्यक्ष केपी ओली आज आफू शिर्ष तहमा पुगेपछि आजिवन त्यो पदमा रहिरहनपर्छ भन्ने खालको स्थिति सोच्नु एकदमै उहाँको आफैँले स्थापित गरेको मूल्य र मान्यता भन्दा गलत कुरा हो । मलाई लाग्छ, २२ गतेसम्मको स्थितिमा उहाँको एउटा मनस्थिति थियो । तर अहिले परिवर्तित स्थितिमा सायद फेरि एकपल्ट आफैँले स्थापना गरेको मूल्य र मान्यतालाई कम्तिमा पनि मैले बिदा लिँदै गर्दाखेरिमा त्यसलाई स्थापित गरेर जानुपर्छ भन्ने मनस्तिथिमा उहाँ पुग्नुहुनेछ ।’

‘अझैपनि ५ दिन बाँकी छ, मेरो अपेक्षा के हो भन्दा हामी ११ औँ महाधिवेशनको नोमिनेशन गर्ने तहसम्म पुग्ने बेलामा केपी कमरेडले मैले विदा लिएँ, अब अरु साथीले नेतृत्व गर्नुहुनेछ र मैले साईडमा बसेर, पद छाड्ने भनेको पार्टी छाड्ने होईन । पद छाड्ने भनेको साईडमा बसेर आफू भन्दा पछाडीकोलाई मेन्टरिङ गर्ने कुरा हो । लोकतन्त्रमा, त्यसमा पनि यो राजनितिक क्षेत्रमा मेन्टरिङ एकदमै आवश्यक कुरा हो । जुन कुरा हामीले त्यति धेरै स्थापित गर्न सकेका छैनौ । जसरी लोकतान्त्रिक पद्धतिमा उहाँले मान्यता स्थापित गर्नुभएको थियो, अब नेतृत्वले आफू साईडमा बसेर नयाँ आउने पुस्तालाई मेन्टरिङ गर्नुपर्छ भन्ने खालको अर्को मान्यता पनि स्थापित गर्नेतर्फ उहाँ जानुभयो भने उहाँले अहिलेसम्म गर्नुभएको कामको एउटा खाका त छँदैनै छ, राजनितिक र मानवीय हिसावबाट पनि उहाँले अर्को मान्यता स्थापित गर्न सक्नुहुनेछ ।’

एमाले केन्द्रिय सदस्य रचना खड्काले पार्टी नेतृत्वले जनताले चाहिरहेका छन् भन्ने बुझ्न नसकेको बताउनु भयो । तर महाधिवेशनमा भाग लिन आएका महाधिवेशन प्रतिनिधिहरुले जनता र पार्टी नेतृत्व दुबैको कुरा सुनेको उहाँको भनाई छ । उहाँकाअनुसार प्रतिनिधिहरुले पार्टी नेतृत्व र जनताको बीचमा तालमेल मिलेको छ कि छैन भन्ने बारेमा जानकार रहेका छन् । सोहीअनुसार महाधिवेशन प्रतिनिधिले विवेक प्रयोग गरेर नेतृत्व चयन गर्ने उहाँको दाबी छ । उहाँले पार्टीका पदाधिकारीमा रहेका व्यक्तिहरुले नै महाधिवेशनबाट अध्यक्ष ओली नै दोहोरिने भन्ने गरेकोमा पनि आपत्ति जनाउनु भयो । महाधिवेशन अगाडी नै पूर्वनिर्धारित जस्तो अभिव्यक्ति जिम्मेवार व्यक्तिबाट नै आउनु अस्वाभविक रहेको उहाँको भनाई छ । पार्टीको नेतृत्व महाधिवेशन प्रतिनिधिले चुन्ने उहाँले बताउनु भयो ।

उहाँले भन्नुभयो, ‘हामीलाई लाग्छ हाम्रो नेतृत्वले हामी जस्ता धेरैको कुरा सुनेको छ । नेतृत्वले पार्टीमा भएका विभिन्न संरचनाका व्यक्तिहरुको कुरा सुनेको छ । जनतासंगको अन्तरक्रिया, जनताले के भनिरहेको छन् भन्ने कुराको अझै भेउ पाउन भने सकेको छैन । तर पार्टी सदस्य जो महाधिवेशन प्रतिनिधि भएर आएको छ, उनीहरुले नेतृत्वको पनि कुरा सुनेको छ र आम जनताको पनि कुरा सुनेको छ । पार्टीको नेतृत्व र जनताबीचको कुरा मिलेको छ कि छैन भन्ने पनि उसलाई थाहा छ । त्यसैलै आजको पार्टी पंक्ती र महाधिवेशन प्रतिनिधिले जसले पार्टी नेतृत्व र जनता दुवैको कुरा सुनेको छ, उसलाई थाहा छ पार्टी कस्तो बनाउनुपर्छ । आजको पार्टीको चुनौती के हुन र जनताले हामीसंग के डिफर राखिरहेको छ । के कुरामा सहमत छ र के कुरालाई प्रोत्साहन गर्नुपर्छ र के कुरालाई निरुत्साहित गर्नुपर्छ भन्ने कुरा महाधिवेशन प्रतिनिधीले राम्रोसंग बुझेको छ ।’

केन्द्रिय सदस्य उषाकिरण तिमल्सिनाले ईश्वर पोखरेलको पार्टीमा योगदान केपी ओलीको भन्दा कम नभएको बताउनु भयो । केपी ओली र ईश्वर पोखरेल सँगै राजनीतिमा लागेको उल्लेख गर्नुहुँदै उहाँले कोअर्डिनेसन केन्द्रदेखि नै पोखरल निरन्तर रुपमा देशका सम्पूर्ण भुगोलमा गएर पार्टीको काम गरेको बताउनु भयो । पोखरेलले सामुहिक रुपमा पार्टी चलाउने प्रतिवद्धता जनाउनुभएको उहाँको भनाई छ । ओलीले पार्टी र राज्यसत्ता मनपरि ढंगले चलाएर आफुहरुको कुरा नसुनेको गुनासो गर्नुहुँदै उहाँले पोखरेलले आफूहरुका कुरा सुन्ने विश्वास व्यक्त गर्नुभयो । उहाँले अध्यक्ष ओलीले आफ्नो विपक्षमा बोल्नेहरुको सदस्यता नै हटाइदिने गरेको बताउनु भयो । भीम रावल र पुर्व राष्ट्रपति विद्या भण्डारीले केपी ओलीको विपक्षमा बोलेको कारण नै पार्टी सदस्यता खोसिदिएको आरोप लगाउनु भयो । नेतृत्वको विपक्षमा बोलेकै कारण आफूले पनि कारबाही भोगेको उहाँको भनाई छ ।

उहाँले भन्नुभयो, ‘महाधिवेशको प्रतिष्पर्धामा हामी टीम खडा गरेर जान लागेका छौँ । कमरेड केपी शर्मा ओली जुन बेलादेखी पार्टी राजनितिमा जोडिनुभएको थियो । सोही बेलादेखि नै पार्टी राजनीतिमा हुनुभएका, कोअर्डिनेसन केन्द्रदेखी निरन्तर रुपमा यो देशका सम्पूर्ण भुगोलमा गएर पार्टीको काम गर्नुभएका वरिष्ठ उपाध्यक्ष ईश्वर पोखरेल हाम्रो टिमको नेतृत्व गरेर उभिनुभएको छ । उहाँले सामुहिक रुपमा पार्टी चलाउने प्रतिवद्धता जनाउनुभएको छ । आज केपी शर्मा ओली जसले पार्टी र राज्यसत्ता मनपरि ढंगले चलाएर हामीले भनेको कुरा सुन्नुभएन, हामीलाई के विश्वास छ भने हाम्रो नेताले हाम्रो कुरा सुन्नुहुनेछ, सुन्नुभएन भने हामी फेरि सुन्ने गरी ठूलो आवाजमा भन्नेछौँ । यो आवाज आज दिन प्रतिदिन बढिरहेको छ ।’

केन्द्रिय सदस्य सर्मिला कार्की, सरिता न्यौपाने लगायतले नेतृत्व परिवर्तनमा जोड दिनुभएको छ । उहाँहरुले दुई कार्यकाल अध्यक्ष र ७० वर्षे उमेरहदलाई अनिवार्य लागू गर्नुपर्ने बताउनु भयो । अध्यक्ष ओलीले सहज रुपमा नेतृत्व हस्तान्तरण गर्नु नै आजको आवश्यकता रहेको उहाँहरुले औँल्याउनु भयो ।

अष्टलक्ष्मी शाक्यको आरोपः केपी ओलीले महिलाको अपमान गर्छन्

न्यूजपोलार — Tue, 09 Dec 2025 10:10:38 +0000

काठमाडौं । नेकपा एमालेकी उपाध्यक्ष अष्टलक्ष्मी शाक्यले एमाले अध्यक्ष केपी ओलीले महिलाहरुलाई सधैँ अपमान गरेको आरोप लगाउनुभएको छ ।

एमालेको ११ औं महाधिवेशन सन्दर्भमा मंगलवार आयोजित अन्तरसंवाद कार्यक्रममा उहाँले यस्तो आरोप लगाउनुभएको हो ।

एमाले अध्यक्ष ओलीले पूर्वराष्ट्रपति विद्या भण्डारीलाई धामीझाँक्री भनेर अपमान गरेको बताउनु भयो । गणतन्त्र नेपालको प्रधानमन्त्री भईसकेको व्यक्तिले पूर्वराष्ट्रपतिलाई पटकपटक अपमानित शब्दहरु प्रयोग गर्ने गरेको उहाँको आरोप छ । उहाँले कुनैपनि नेतृत्वलाई महिलाहरुको अपमान गर्न नसुहाउने भएपनि केपी ओलीलाई भने सुहाउने भन्दै व्यङ्ग्य पनि गर्नुभयो । ओलीमा महिलालाई हेर्ने सकरात्मक सोच र दृष्टिकोण नै नभएको उहाँको दाबी छ । उहाँले महिलाको अपमान गर्नेको विरुद्ध सशक्त आवाज उठाउनुपर्ने बताउनु भयो ।

महिलालाई अपमान गर्ने, अवमूल्यन गर्ने नेतृत्व आजको आवश्यक्ता नभएको उहाँको भनाई छ । अध्यक्ष ओलीले सञ्चार माध्यममा पूर्वराष्ट्रपति भण्डारी चालेका कदमहरुमा व्यंग्य भावसहित आफूसँग सल्लाह नै नगरिकन परैदेखि धामीले जस्तो घुमरौं लाएर झल्र्याङ्–झल्र्याङ् गरेर मुजुरका प्वाँख–स्वाँख लाएर ढ्याङढ्याङ पार्दै ‘म राष्ट्रपतिबाट आएँ, ठाउँ छोड्, ठाउँ छोड्, म अध्यक्ष हुन्छु, ठाउँ छोड्’ भन्दै आउन मिल्छ ? भन्दै प्रश्न उठाउनुभएको थियो । सोही कुरालाई उपाध्यक्ष शाक्यले आपत्ति जनाउनुभएको हो ।

उहाँले भन्नुभयो, ‘एउटा पूर्वराष्ट्रपति, परमाधिपति पनि भन्छौँ, देशको संरक्षक पनि भन्छौँ, संविधानको संरक्षक पनि भन्छौँ । उहाँलाई धामीझाँक्री भनेको के हो ? यस्तो अपमान गर्न पाइन्छ । सामान्य महिलालाई त गर्न पाइँदैन भने पूर्वराष्ट्रपति भईसकेकोलाई यो शब्दले अपमान गर्ने हद भनेको यो नेतृत्वलाई सुहाउँदैन । यो नेतृत्वले गर्नै हुँदैन । तर गर्न हुन्छ, कसले गर्न हुन्छ ? केपी ओलीले गर्न हुन्छ । किनभने उहाँमा सोच नै छैन । महिलाप्रति हेर्ने दृष्टिकोण नै छैन । महिलालाई अपमान गरेको ग¥यै छ । आधा भन्दा बढी जनसंख्याको हिस्सा महिलाले ओगटिरहेको अवस्थामा, महिला हिंसा विरुद्धको यत्रो १६ दिने अभियान मात्रै होईन, निरन्तर आवाज उठीरहको बेलामा यो खालको शब्द प्रयोग गर्ने भनेको सबै महिलाहरुको अपमान हो । यसको विरुद्ध सशक्त आवाज उठ्नुपर्छ । यस्तो नेतृत्व अवको आवश्यक्ता होईन । महिलालाई अपमान गर्ने नेतृत्व आजको आवश्यक्ता होईन । महिलालाई अवमुल्यन गर्ने नेतृत्व आजको आवश्यकता होइन । त्यसो भएको हुनाले यो ईस्यू चाहीँ जल्दोबल्दो रुपमा उठाउनुपर्छ, उठ्नुपर्छ ।’

उहाँले अध्यक्ष ओली कहिल्यै नसच्चिने दाबी गर्नुभयो । उहाँले ओलीको नेतृत्वमा नै अब पनि एमाले जाने हो भने एमाले र देश दुवै कमजोर हुने बताउनु भयो । एमाले बलियो बनाउन ओलीलाई अध्यक्ष बनाउन नहुने बताउनु भयो । ११ औँ महाधिवेशनबाट केपी ओली अध्यक्ष नबन्ने उहाँको भनाई छ ।

पार्टीबाट टाढिएका सबैलाई ‘आफ्नै घर फर्किन’ एमाले अध्यक्ष ओलीको अपिल

न्यूजपोलार — Fri, 31 Oct 2025 14:34:24 +0000

काठमाडौं । नेकपा एमाले अध्यक्ष केपी ओलीले बिगतमा पार्टीबाट टाढिएका सबैलाई ‘आफ्नै घर फर्किन’ अपिल गर्नुभएको छ ।

सामाजिक सञ्जालमार्फत ओलीले यस्तो अपिल गर्नु भएको हो ।

ओलीले भन्नुभएको छ ‘विगतमा नेकपा (एमाले) को निर्माण गर्न र यसलाई बलियो बनाउने यात्रामा सँगै हिँड्नु भएका सबै नेता-कार्यकर्तालाई हृदयदेखि आह्वान गर्न चाहन्छु । जहाँ हुनुहुन्छ, फर्किनुस् आफ्नै घर फर्किनुस् । यो घर तपाईँहरूको पसिना र रगतले बनेको हो ।’

उहाँले सामाजिक सञ्जालमा लेख्नु भएको छ-

दिदीबहिनी तथा दाजुभाइहरु,
कमरेडहरु !

निरंकुशताको अन्धकार हटाएर लोकतन्त्रको उज्यालो फैलाउने संघर्षमा नेकपा (एमाले) ले सधैं अग्रपंक्तिमा रहेर नेतृत्वदायी भूमिका खेल्यो। अनेकौं प्रहार खेपेर राष्ट्रिय स्वाधीनता जोगाउने बलियो कवच यही पार्टी बन्यो। देशभक्तिको भावना जगाउने र विकासका संरचना निर्माण गर्ने कामको नेतृत्व यही पार्टीले गर्‍यो । सामाजिक सुरक्षाका कार्यक्रम ल्याउने लोक कल्याणकारी राज्यको आरम्भ यही पार्टीले गरेको हो । समृद्ध नेपाल, सुखी नेपालीको लक्ष्य पूरा गर्न हामीले गरेका यी कामका सयौं उदाहरण छन्।

एमाले केवल एउटा राजनीतिक संगठन होइन — यो जनताको रगत, पसिना, आँसु र आशाबाट बनेको विशाल परिवार हो। यस पार्टीको जग बसाल्न तीन पुस्ताले आफ्नो जीवनका उज्याला क्षण समर्पण गरेका छन्। कसैले जेलयातना भोगे, कतिले जीवन बलिदान गरे, कसैले आफ्नो युवावस्था आन्दोलनमा अर्पण गरे, र धेरैले सानो–ठूलो योगदान गरेर यो घरलाई अड्याए ।

आज फेरि महाविनाश निम्त्याएर देशको सार्वभौम अस्तित्वमाथि चुनौती खडा गरिएको छ, लोकतान्त्रिक संविधानमाथि आक्रमण भइरहेको छ। यस्तो बेला हामी मौन रहन सक्दैनौं। राष्ट्रिय एकता, देशको स्वाभिमान, र लोकतन्त्रको रक्षाका लागि हामी सबै एकै मन, एकै स्वर र एकै दिशामा अघि बढ्नुपर्छ।

त्यसैले, विगतमा नेकपा (एमाले)को निर्माण गर्न र यसलाई बलियो बनाउने यात्रामा सँगै हिँड्नु भएका सबै नेता–कार्यकर्तालाई हृदयदेखि आह्वान गर्न चाहन्छु —

जहाँ हुनुहुन्छ, फर्किनुस् आफ्नै घर फर्किनुस्।

यो घर तपाईंहरूको पसिना र रगतले बनेको हो।

फेरि हामी सबै काँधमा काँध मिलाएर अघि बढौं — देशको स्वाधीनता जोगाऔं, लोकतन्त्रको रक्षा गरौं, र जनताको जीवनमा सुख, समृद्धि र आशाको ज्योति बालौं।

हामी एउटै परिवार हौं —

हाम्रो लक्ष्य स्पष्ट छ —

समृद्ध नेपाल, सुखी नेपाली।

म सबैमा आह्वान गर्न चाहन्छु –

कोही अलमलमा नपर्नुस्, आउनुस्, आफ्नै घरमा —

हाम्रो साझा सपना साकार पार्न ।

निर्णायक राष्ट्रिय शक्ति निर्माणमा जुटौं।

गृहमन्त्रीले किन देखे भक्तपुरमा सुरक्षा ‘थ्रेट’ ?

न्यूजपोलार — Thu, 23 Oct 2025 03:11:18 +0000

काठमाडौँ: तिहार र छठ लगत्तै आन्दोलन हुँदैछ भन्ने हल्लालाई सरकारले पनि पुष्टि गरेको छ । सो प्रचारप्रति सरकार पनि सतर्क रहेको गृहमन्त्री ओमप्रकाश अर्यालले स्यवंले बताएका छन् । उनले यससम्बन्धी ब्रिफिङ नै गरेका छन् ।

गृहमन्त्री ओमप्रकाश अर्यालले मंगलवार सरकार र दलहरुबीचको बैठकमा नै यससम्बन्धी जानकारी गराएका हुन् । उनले तिहार र छठपछि आन्दोलन हुन लागेको जानकारी सरकारले प्राप्त गरेको र त्यसमा पनि भक्तपुर सबैभन्दा धेरै सुरक्षा थ्रेटको अवस्थामा रहेको जानकारी गराएका थिए ।

उनको सुरुको संकेत त दुर्गा प्रसाईंप्रति थियो । तर पछि पनि उनले अन्य सुरक्षा चुनौतीहरु औंल्याउँदै लगे र भक्तपुरको गुण्डुसम्म पु-याएका थिए । त्यसमा उनले देखेको अर्काे सुरक्षा चुनौती एमाले नेता महेश बस्नेत थिए ।

उनको ब्रिफिङ त्यत्तिमै पनि सकिएन । त्यसपछिको उनको अर्काे सुरक्षा थ्रेटका रुपमा एमाले अध्यक्ष केपी ओलीलाई नै औल्याए । त्यसपछि भने दलका प्रतिनिधिका रुपमा त्यहाँ उपस्थित एमाले महासचिव शंकर पोखरलले गृहमन्त्रीमाथि जाइलागेका थिए ।

ओलीका पछिल्लो अभिव्यक्ति र सरकारमाथिको आलोचनालाई गृहमन्त्रीले आगामी चुनाव र वर्तमान सरकारमाथि कै सुरक्षा चुनौतीका रुपमा व्याख्या गरेका थिए ।

त्यसपछि महासचिव पोखरेलले भनेका थिए— सरकारले चुनावमा भाग लिन सरकारलाई आग्रह पनि गर्छ अनि प्रमुख दलका नेतालाई नै सुरक्षा चुनौती देख्छ भने यो दलप्रतिको प्रतिशोध नभएर के हो ? यसरी पनि कहीँ चुनाव हुन्छ ? यस्तै हो भने चुनावको नाटक किन गर्नुपर्यो ?

पछिल्लो समय एमाले अध्यक्ष ओलीले गृहमन्त्रीमाथि निकै नै तिखो आलोचना गरिरहेका छन् । त्यस्तै यो सरकार अवैधानिक रहेकोले कुनै दिन पुक्लुक्क ढल्ने पनि बताइरहेका छन् । खासमा गृहमन्त्री अर्यालले दुर्गा प्रसाईंलाई सुरक्षा चुनौतीका रुपमा रुपमा देखेको बताएका थिए । यो प्रतिक्रियासँगै प्रसाईंमाथि कठोर हुने संकेत पनि गृहमन्त्रीले गरेका गरेका छन् ।

उता व्यवसायी तथा अभियन्ता दुर्गा प्रसाईंले छठपछि काठमाडौंमा मात्र नभएर देशैभरि देश ठप्प पार्ने खालको आन्दोलन गर्ने जानकारी सार्वजनिक रुपमा नै गराइरहेका छन् । उनले टेलिभिजनमा अन्तर्वार्ता नै दिएर आन्दोलनका कारण कम्तीमा पनि दुई महिना देश नै ठप्प पर्ने भएकाले दाल चामल तथा ग्यास किनेर घरमा राख्न समेत जनतालाई आह्वान गरेका छन् ।

उनको यो तयारीसँगै यता सरकारले भने प्रसाईमाथि राजनीतिक व्यवहार नगरिने संकेत दिएको छ । त्यसैले पनि गृहमन्त्रीले भक्तपुरबाट सरकारलाई खासगरी दुईथरी चुनौति थपिएको र त्यो एमाले अध्यक्ष ओली र दुर्गा प्रसाईतिर संकेत गरेका छन् ।

उनीहरु दुवैजना र एमालेका अर्का नेता महेश बस्नेत पनि भक्तपुरमै बस्छन् । गृहमन्त्री अर्यालले यो आन्दोलनलाई वास्ता नगर्न र चुनावको तायारीमा लाग्न आग्रह गर्दै दलहरुलाई आस्वस्त पार्ने प्रयास गरेका थिए ।

उनले स्पष्ट भाषामा नै प्रसाईमाथि छठलगत्तै सरकारले नियन्त्रण गर्ने संकेत देखाएका थिए । सो बैठकमा सहभागी एकजना नेताका अनुसार सरकारले दुर्गा प्रसाईमाथि राजनीतिक नभएर एकजना अपराधीको जस्तो व्यवहार गर्न सक्ने संकेत देखिएको छ । गृहमन्त्री अर्यालले छठपछि प्रसाईलाई सरकारले कडा निगरानीमा राख्ने या घरमै नजरबन्द गर्ने सम्मको तयारी गरेको छ ।

सो बैठकमा गृहमन्त्री आर्यालले राजनीतिक दलका नेताहरुले आफूलाई लक्षित गरेर आपत्तिजनक तथा धम्कीपूर्ण अभिव्यक्ति दिने गरेको भनेर दुख पनि पोखेका थिए । त्यतिमात्र नभएर उनले मिडियाबाट पनि आफूले साथ नपाएको दुखेसो पोखेका थिए । आफूले बोलेका कुराहरु पनि मिडियाबाट बंग्याएर आउने गरेको तथा नेताहरुले आफूलाई दिएका धम्कीहरु धेरै नै आउने गरेको जानकारी उनले दिएका थिए ।

यो सरकारलाई विस्थापित गर्ने षडयन्त्र राजनीतिक दलहरुबाट भइरहेको अभिव्यक्ति गृहमन्त्रीले दिएपछि एमाले बाहेकका अरु नेताहरुले पनि उनीसँग सवालजवाफ गरेका थिए ।

राजीनामा दिँदै प्रधानमन्त्री

न्यूजपोलार — Tue, 09 Sep 2025 05:32:38 +0000

काठामाडौं । प्रधानमन्त्री केपी ओलीले राजीनामा दिने भएका छन् । उनले अहिले केही बेरमै राजीनामा दिने तयारी गरेका हुन् । तर राजीनामा राष्ट्रका नाममा सम्बोधन गरेर दिने या राष्ट्रपतिसमक्ष बुझाउने भन्ने विषयमा उनले परामर्श गरिरहेको बुझिएको छ ।

प्रधानमन्त्री स्रोतका अनुसार अहिले केही बेरमै राजीनामा दिने भएका हुन् । जेन्जी पुस्ताको आन्दोलन आज थप सशक्त बन्दै गएको र नेताहरुका घरमा नै आक्रमणको तारो बनाएपछि प्रधानमन्त्री राजीनामाको तयारीमा आएका हुन् ।

केपी ओलीलाई सोध्न मन लागेका विद्याका दुई प्रश्न

न्यूजपोलार — Wed, 20 Aug 2025 03:34:57 +0000

काठमाडौं । नेकपा एमालेका अध्यक्षसमेत रहेका प्रधानमन्त्री केपी शर्मा ओली र पूर्वराष्ट्रपति विद्यादेवी भण्डारीबीचको वाकयुद्ध सकिएको छैन । विशेष गरी प्रधानमन्त्री ओलीले भण्डारीलाई बेलाबेलामा कटाक्ष गरिरहेका छन् । भण्डारीले पनि ओलीको कार्यशैलीलाई लिएर आलोचना गरिहेकी हुन्छन् । भलै यी दुई नेताबीच सार्वजनिक आरोप- प्रत्यारोप जारी छ ।

प्रधानमन्त्री ओली र पूर्वराष्ट्रपति भण्डारीबीच एकै ठाउँमा बसेर छलफल गर्न नसक्ने अवस्था पनि होइन । तर दुई जनाबीच पछिल्ला केही दिनयता न भेटघाट भएको छ न त फोनमै संवाद । एकलाई लागेका जिज्ञासा अर्कोलाई सिधै सोध्न सकिन्छ । तर पूर्वराष्ट्रपति भण्डारीले आफूलाई दुई वटा प्रश्नको जवाफ ओलीले दिनुपर्ने बताउनुभएको छ । उहाँले पत्रकारहरुमार्फत् नै ती प्रश्न ओली सामु पठाउनुभएको हो । आफूले भने प्रश्न नसोध्ने उहाँको भनाइ थियो ।

विराटनगरमा हिजो सञ्चारकर्मीहरुसँग कुरा गर्दै पूर्वराष्ट्रपति भण्डारीले अध्यक्ष ओलीले मदन भण्डारी फाउन्डेसनसँग असन्तुष्ट भएको विषयमा केही बोलिनन् । तर उनको बोलीमा अध्यक्ष ओलीप्रतिको आक्रोस भने देखिन्थ्यो । भण्डारीले भनिन्, ‘ओलीले असार १४ को कार्यक्रममा जे भन्नुभयो, अनि मदन भण्डारी फाउण्डेसनका बारेमा पछाडि जे भन्नुभयो, त्यसबारे तपाईंहरू जस्तै पत्रकारले उहाँलाई नै सोध्नुहोला। म चाहिँ अब सोध्दिनँ ।’

गत साउन ४ पछि आफूले ओलीसँग कुराकानी नगरेको उल्लेख गर्दै भण्डारीले भनिन्, ‘यदि तपाईंहरूलाई कुनै किसिमको डर लाग्दैन भने, लोकतन्त्रमा प्रश्न गर्ने अधिकार प्रयोगमा तपाईंहरूको रूचि छ भने, उहाँलाई प्रश्न सोध्नुहोला ।’

ओलीलाई पत्रकारहरूले सोध्ने प्रश्नको अन्तरवस्तु सिफारिस गर्दै उनले भनिन्, ‘तपाईंहरूको उहाँ (ओली) सँग भेट भइहाल्छ । त्यसेबला सोध्नुहोला । सर, तपाईंले मदन भण्डारी, जसलाई पार्टीले जननेता मान्छ, आफ्नो गौरव ठान्छ । जबजको प्रणेता मान्छ । उहाँको निधनको ३२ वर्षपछि असार १४ मा किन त्यसो भन्नुभयो? म चाहिँ उहाँलाई यसबारे सोध्दिनँ। डर लाग्दैन भने तपाईंहरूले सोध्नुहोला ।’

गत असार १४ अर्थात मदन भण्डारीको जन्मजयन्तीका दिन काठमाडौंमा आयोजित सोही कार्यक्रममार्फत मदन पत्नी विद्याले सक्रिय राजनीतिमा फर्कने घोषणा गर्ने तयारी थियो ।

मदन भण्डारी फाउण्डेसन अध्यक्षसमेत रहेकी मदन–विद्या पुत्री उषाकिरण भण्डारी र उनकी आमा विद्या दुवै मञ्चमा रहेका बेला ओलीले एमालेका पुरानो र नयाँ पुस्ताले थाहै नपाएको लाञ्छनाको प्रसंग उठाएका थिए । त्यसदिन प्रधानमन्त्री ओलीले मदन भण्डारीविरूद्ध चारवटी श्रीमती विवाह गरेको र सहकारी ठगेर हिँडेको भन्नेसम्मको लाञ्छना लगाइएको प्रसंग निकालेका थिए ।

पत्रकारहरुसँग कुरा गर्ने क्रममा उनी मदन भण्डारी फाउण्डेसनसँग सम्बद्ध विषयमा आउँदै थिइन् । तर, उनले त्यस विषयमा उत्तर होइन, प्रश्न नै सिफारिस गरिन् ।

उनले भनिन्, ‘मदन भण्डारी फाउण्डेसनबारे पनि उहाँलाई तपाईंहरूले सोध्नुहोला । त्यसबेलाको पार्टी नेतृत्वले तपाईंलाई पार्टीभित्र ढिम्किन नदिँदा त्यही फाउण्डेसनले तपाईंलाई चौतारी दिएको हो कि होइन भनेर पनि उहाँलाई सोध्नुहोला ।’

उनले अगाडि भनिन्, ‘कुनै बेला मदन भण्डारी फाउण्डेसनलाई कसैले कर्के नजर लगाए म त्यसको आँखा फुटाइदिन्छु भन्नुहुन्थ्यो । त्यस्तोसम्म भन्ने तपाईंले आज फाउण्डेसनलाई किन त्यसो भन्नुभयो भनेर पनि तपाईं पत्रकारहरूले उहाँलाई सोधिदिनुहोला ।’

साउन २६ मा मदन आश्रित प्रतिष्ठानको अध्यक्षमा पार्टी उपमहासचिव प्रदीप ज्ञवालीलाई सपथ गराउने क्रममा ओलीले फाउण्डेसनप्रति तीव्र असन्तोष प्रकट गरेका थिए ।

कुनै बेला ओली र भण्डारीबीचको सम्बन्ध यस्तो थियो कि एकले अर्कोलाई जुनसुकै बेला पनि सहयोग गर्ने मात्र होइन, एकले अर्कोलाई अघि बढाउनसमेत मद्दत गर्ने । तर अहिले दुई जनाबीचको सम्बन्ध औपचारिकतामा सीमित हुन थालेको छ । त्यति मात्र नभए एकले अर्कोसँग कुरा गर्न पनि सञ्चारकर्मीको साथ चाहिएको छ ।

प्रधानमन्त्रीको प्रश्न- एउटा व्यक्तिमाथि प्रतिशोध भएको हो भने थुनामा रहेका अन्य व्यक्तिमाथि के भएको हो ?

न्यूजपोलार — Wed, 13 Aug 2025 08:31:29 +0000

काठमाडौं। प्रधानमन्त्री केपी ओलीले अदालतले पुर्पक्षका लागि थुनामा पठाएका कुनै एक व्यक्तिमाथि ‘राजनीतिक प्रतिशोध’ भएको भन्ने जबर्जस्त भाष्य बनाउन खोजिएको बताउनु भएको छ ।

प्रतिनिधि सभाको बैठकमा केही समसामयिक विषयमा चर्चा गर्दे प्रधानमन्त्री ओलीले पूर्वमन्त्री, पूर्वसांसद्, वहालवाला मेयर लगायत विभिन्न ओहोदामा रहिसकेका दर्जनौं व्यक्तिहरुलाई अदालतले थुनामा पठाएको समेत स्मरण गराउनु भएको छ ।

उहाँको सम्बोधनको पूर्णपाठ

म अब केही समसामयिक विषयमा चर्चा गर्ने अनुमति चाहन्छु ।

हामी सरकारमा आउँदा संसद्को यो रोष्ट्रममा उभिएर हामीले संकल्प गरेका थियौं–

— विथोलिएको राजनीतिलाई लयमा फर्काउने

— शिथिल अर्थतन्त्रलाई गतिशील बनाउने

— राजनीति र नीतिमा उत्पन्न अस्थिरतालाई अन्त्य गरी नीतिगत स्थिरता कायम गर्ने, थालेको काम सक्ने– प्रतिनिधिसभाको यस कार्यकालमा हुन नसक्ने कामलाई थाती राख्ने, र मुलुकलाई बोझ बनेका असान्दर्भिक योजना/कार्यक्रमहरु खारेज गर्ने ।

म यो संसद्मा सरकारले यी घोषित उद्देश्य अनुरुप के कति काम गर्‍यो भन्ने प्रश्न उठोस् भन्ने चाहन्थें । यस्ता प्रश्नले सरकारलाई आफ्ना कामको समीक्षा गर्न प्रेरित गर्थे । तर, हाम्रो संसद्लाई होस् वा बहसको सार्वजनिक वृत्तलाई– सरकारले यसबारेमा के गर्‍यो भन्ने प्रश्नबाट बहकाएर अर्थहीन विषयमा विषयान्तर गर्ने प्रयास भइरहेको छ । विषयान्तर गरिएका यस्ता कपटी बहसले देशको समृद्धिका लागि होइन, देशमा केही गरौं भन्ने युवाहरुलाई भरोसा प्रदान गर्न पनि होइन– उनीहरुलाई गाली, निन्दा, आरोप र भत्र्सनाका कन्टेन्ट उत्पादनमा भुलाउने र समाजलाई उत्तेजनामा ल्याउने नियत राख्छ ।

आज संसद्मा उछालिएका कतिपय विषय राष्ट्रिय प्राथमिकता र आवश्यकतामा आधारित छैनन् । देश र जनताको हितमा केन्द्रित रहेर काम गर्नु पर्ने यस सम्मानित सदनलाई झुठा कथा सिर्जना गरेर ‘कन्फ्युजन’ पैदा गर्ने र सोसल मिडियाका लागि कन्टेन्ट उत्पादन गर्ने थलो बनाउने दुष्प्रयास भइरहेको छ । के आजको हाम्रो राष्ट्रिय आवश्यकता यही हो ? पोजिसनका हिसावले प्रतिपक्षमा भए पनि जनताको मत लिएर आइसकेपछि प्रतिपक्षको पनि देशप्रति केही न केही दायित्व त होला नि !

— लाखौं जनताले सहकारीमा गरेको वचत हिनामिना गर्ने सयौं व्यक्तिमाथि न्यायालयमा मुद्दा चलेको छ । अदालतले मुद्दा हेरिरहेको छ । पूर्वमन्त्री, पूर्वसांसद्, वहालवाला मेयर लगायत विभिन्न ओहोदामा रहिसकेका दर्जनौं व्यक्तिहरुलाई अदालतले थुनामा पठाएको छ । तर अदालतले पुर्पक्षका लागि थुनामा पठाएका कुनै एक व्यक्तिमाथि ‘राजनीतिक प्रतिशोध’ भएको भन्ने जबर्जस्त भाष्य बनाउन खोजिएको छ । एउटा व्यक्तिमाथि प्रतिशोध भएको हो भने थुनामा रहेका अन्य व्यक्तिमाथि के भएको हो रु त्यो चाहिँ कानुनी कारवाही हो रु अर्बौं रुपैयाँ अपचलन गरेको आरोपमा थुनामा रहेका सयौं मध्ये कुनकुन व्यक्तिमाथि ‘प्रतिशोध’ भएको हो ? कुनकुन व्यक्तिमाथिको थुना जायज हो ? भीडद्वारा न्यायको हत्या गरेर अभियोगमुक्त हुन खोज्नेहरुबाट समयले यसको जवाफ सधैं माग्ने छ । त्यस्ताका पछि लागेर कुद्ने भीड अचम्मको मात्र होइन दयालाग्दो पनि छ ।

— यस्ता कुरालाई लिएर लगातार संसद् अबरुद्ध गरी विस्मयकारी, भावनात्मक र हानीकारक उत्तेजनाको एकालापमा मुलुकलाई लैजानु कदापि उचित हुँदैन ।

— स्वतन्त्र न्यायालयले गर्ने निर्णय सरकार अनुकूल वा प्रतिकूल जेसुकै भए पनि त्यसमा सरकारको हात हुँदैन ।

संसद्, सरकार, न्यायालय लगायत आफ्नो काम गर्नु पर्ने लोकतान्त्रिक प्रणालीका सबैजसो अंगहरुलाई पेशेवर ‘मास म्यानुपुलेसन’को आक्रमणबाट वचाउनु पर्छ । लोकतान्त्रिक शक्तिहरुले यो काम गर्नै पर्छ ।

कतिसम्म भने भिजिट भिसामा विदेश गएर उतैको नागरिकता लिएर, उताको नागरिकता नत्यागी नेपाल फर्केर मन्त्रीसम्म भएका प्रमाणित अभियुक्तहरु र भिजिट भिसामा गएर उतै दुईदुई पटक बिहे गरिसकेका व्यक्तिहरुले समेत अन्तर्राष्ट्रिय विमानस्थलमा प्लेन चढ्ने सबै नागरिकलाई ‘बेचिएको’ भन्ने भाष्य स्थापित गर्न खोजिरहेका छन् । यसका पछाडी मुलुक र नागरिकको हित जोडिएको छैन, यसले इमोसनल ब्ल्याकमेलिङ मार्फत आफ्नो स्वार्थको रोटी सेक्ने प्रवृत्ति मात्र उजागर गरेको छ ।

मुलुकमा राजनीतिक र नीतिगत स्थिरता कायम गरौं र बिग्रेको अर्थतन्त्रलाई सही बाटोमा फर्काऔं भनेर संसद्का दुई प्रमुख दलहरु मिलेर, अन्य दलहरुको समेत सहयोगमा यो सरकार बनेको हो । तर, विपक्षमा रहेका दलहरुलाई स्थिरता कति अप्रिय लागेको हो ? प्रमुख दल कांग्रेस र एमाले मात्रैको संसद्मा भारी बहुमत छ, त्यसमाथि अन्य दलहरु समेत यस सरकारमा सहभागि छन् । सरकार बनाउने संसद्को गणितले हो । बलियो संसदीय गणितको जगमा उभिएको सरकार आजै ढल्छ, भोलि नै ढल्छ भनेर अस्थिरताका लागि हल्ला पिटिरहनेजस्तो अस्थिरताको यो पक्षपोषण केका लागि रु देशका लागि, राजनीति र नीतिगत स्थिरताका लागि त यो पक्कै होइन, र हुन सक्दैन । म सबैलाई स्पष्ट पार्न चाहन्छु, अस्थिरताको जतिसुकै चाहना राखे पनि आगामी ०८४ सालको निर्वाचनसम्म यही राजनीतिक समीकरण अगाडि बढ्छ ।

अङ्ग्रेजी साहित्यमा एउटा प्रसिद्ध कथा छ– सोलोमनको न्याय १ दुई महिलाले एउटै बच्चालाई आफ्नो छोरो भएको दाबी गर्छन् । दावी–प्रतिदावीबाट हैरान सोलोमनले सबैलाई अचम्मित पार्ने फैसला सुनाउँछन्– यो बच्चालाई ठाडो चिरेर दुवै महिलाहरुलाई आधा–आधा दिनू ! तीमध्ये एउटी महिला आधा भए पनि ठीकै छ भन्छिन्, तर अर्की आत्तिँदै र रुँदै भन्छिन्, ‘भो ! मलाई चाहिएन । बच्चा उसैलाई देऊ, तर मर्न नदेऊ !’ त्यसपछि न्यायमूर्ति सोलोमनले तिनै महिला साँचो आमा भएको थाहा पाउँछन् र बच्चा उसैलाई दिन्छन् ।

लोकतन्त्रका लागि लड्ने र जेलनेल सहितको यातना भोग्ने हामी यहीँ छौं । हामीलाई यो प्रणाली ज्यान सरह प्रिय छ। यसको जीवनको लागि हामी कस्तै कष्ट सहन पनि तत्पर छौं ।

कति लोकतन्त्र मन नपर्ने पनि यहीँ हुन सक्छौं । कति लोकतन्त्रको संबद्र्धनका लागि हैन, त्यसको उपभोग गर्ने– त्यसको हुर्मत लिने अभिष्ट भएका पनि हुनसक्छौं ।

तिनीहरुबाट यो प्रणाली जोगाऔं ।

प्रधानमन्त्रीलाई बालेनको कटाक्ष: माफ गर्नुहोस् म तपाईंको भ्रष्ट प्रणालीलाई समर्थन गर्दिन !

न्यूजपोलार — Mon, 19 May 2025 14:41:37 +0000

काठमाडौं : काठमाडौं महानगरपालिकाका मेयर बालेन्द्र (बालेन) साहले प्रधानमन्त्री केपी ओलीले भ्रष्टाचारीलाई संरक्षण गरेको आरोप लगाउनु भएको छ ।

आगामी जेठ १५ गते गणतन्त्र दिवस मनाउन आयोजित बैठकमा काठमाडौं महानगरपालिकाका मेयर बालेन्द्र साह नआएपछि प्रधानमन्त्री केपी शर्मा ओलीले उहाँ माथी प्रश्न उठाउनु भएको थियो ।

मूल आयोजक समितिका पदेन सदस्य रहने काठमाडौंका मेयरको अनुपस्थितिलाई लिएर प्रधानमन्त्री केपी शर्मा ओलीले असन्तुष्टि जनाएको खबर सार्बजनिक भएपछि मेयर साहले सामाजिक संञ्जाल मार्फत प्रधानमन्त्री माथी कटाक्ष गर्नुभएको हो ।

मेयर साहले सामाजिक संञ्जालमा लेख्नु भएको छ-

जुन देशमा राजधानीको मेयरले भ्रस्टचार रोक्छु भन्दा ,

देशको सवै पार्टीको सबै लागेर भ्रस्टचारी जोगाउछु भन्छ ?

त्यस्को नाइकेको कार्यक्रममा म गैदिनु पर्ने ?

माफ गर्नुहोस् केपी ओली, म तपाईंको भ्रष्ट प्रणालीलाई समर्थन गर्दिन।

समितिको बैठकमा प्रधानमन्त्री ओलीले बालेनको नाम नलिइकन लगातार अनुपस्थिति हुनेहरुलाई बोलाइरनु पर्ने कि नपर्ने भनेर प्रश्न गर्दे अर्कोपटकदेखि राम्ररी सोधेर आउने भएमात्र नाम राख्न निर्देशन दिनु भएको थियो।

देश विकासमा पूर्वाग्रह र मतभेद राख्न आवश्यक छैन : प्रधानमन्त्री

न्यूजपोलार — Fri, 18 Apr 2025 11:56:07 +0000

चितवन, ५ वैशाखः प्रधानमन्त्री केपी शर्मा ओलीले चितवनको पूर्व पश्चिम राजमार्गको पुल्चोक–गोन्द्राङ– ६ लेन सडकको आज उद्घाटन गर्नुभएको छ ।

नेपाल सरकारको आफ्नै लगानी निर्मित भैरहवा, वीरगञ्ज, पोखरा र काठमाडौँको मध्यभागमा पर्ने उक्त सडक एसियाली मापदण्डअनुसार बनाइएको छ । उद्घाटन कार्यक्रमलाई सम्बोधन गर्दै प्रधानमन्त्री ओलीले देश विकासमा पूूर्वाग्रह र मतभेद नराखी काम गर्न आग्रह गर्दै पूर्व–पश्चिम राजमार्गलाई थप फराकिलो बनाइने बताउनुभयो ।

“अहिले चुनाव लाग्या पनि छैन र चुनाव प्रचार गर्नु प¥या पनि छैन । त्यतापट्टि गइहाल्नुपर्ने आवश्यकता पनि छैन । म आग्रह गर्न चाहान्छु, सबैलाई सधै राजनीति मात्रै, सधैँ चुनाव मात्रै होइन । विकासमा ध्यान दिउँ । हामीले एक भएर देश बनाउनुपर्नेछ । मतभेदमा होइन एकतामा जोड दिउँ ।’’, प्रधानमन्त्री ओलीले भन्नुभयो, “विचारमा विविधता हुनसक्छ तर देशको विकास गर्ने कुरामा मतभेद राख्न आवश्यक छैन । देशको विकास हामी सबै मिलेर गर्ने हो । कोही आएर हाम्रो देश बनाउँदैन । आफ्नो बलमा लोकतन्त्रलाई बलियो बनाउँदै राष्ट्रिय एकताका साथ एकजुट भएर अघि बढेर विकास गर्नुपर्छ ।’’

प्रधानमन्त्री ओलीले चितवन जिल्ला त्रेतायुगदेखि नै राम जन्मेदेखिको ऐतिहासिक महत्व बोकेको जिल्ला भएको उल्लेख गर्दै यो एउटा सभ्यताको सुरुआत भएको भूभाग हो भन्नुभयो ।

उक्त सडक खण्डको २०७७ माघ १७ गते प्रधानमन्त्री ओलीले नै शिलान्यास गर्नुभएको थियो । सडक रु एक अर्ब १३ करोड ३५ लाख ३४ हजारमा निर्माण सम्पन्न भएको हो ।