काठमाडाैँ । काठमाडौँको टोखा र गोरखाको पालुङटार नगरपालिकाबीच भगिनी सम्बन्ध स्थापना भएको छ । टोखा र पालुङटार नगरपालिकाबीच आपसी मैत्री, सहकार्य तथा दिगो विकासका विविध क्षेत्रमा अनुभव आदान–प्रदान गर्ने उद्देश्यले भगिनी सम्बन्ध स्थापना गरिएको हो ।

भगिनी सम्बन्ध स्थापना गर्ने सम्झौतापत्रमा सोमबार टोखा नगरपालिकाका प्रमुख प्रकाश अधिकारी र पालुङटार नगरपालिकाका प्रमुख विवश चिन्तनले हस्ताक्षर गर्नुभयो । सम्झौतामा दुवै नगरपालिकाले सुशासन, सेवा प्रवाह, भौतिक पूर्वाधार विकास, सहरी व्यवस्थापन, वातावरण संरक्षण, विपद् व्यवस्थापन, शिक्षा, स्वास्थ्य, पर्यटन, संस्कृति, आर्थिक विकास तथा सामाजिक विकासलगायतका क्षेत्रमा आपसी सहकार्य, अनुभव आदानप्रदान तथा प्राविधिक सहयोगलाई संस्थागत रूपमा अघि बढाउने भएका छन् ।

यस्तै, दुवै नगरपालिकाबीच जनप्रतिनिधि तथा कर्मचारीको अध्ययन भ्रमण, सफल अभ्यासहरूको आदानप्रदान, योजना तथा नीतिसम्बन्धी जानकारीको साझेदारी, पर्यटन प्रवद्र्धन, सांस्कृतिक आदानप्रदान तथा निजी क्षेत्रबीचको सहकार्य विस्तार गर्ने विषयमा समझदारी भएको छ । सम्झौतासँगै पालुङटार वडा नं ५ स्थित चारकुने बगैँचामा टोखा–पालुङटार खुला व्यायामशाला सहितको मैत्रीपूर्ण पार्क निर्माण हुने भएको छ । यस्तै, पालुुङटारको रैथाने उत्पादनलाई टोखामा बजारीकरण गरिने भएको छ ।

उक्त सम्बन्धले ऐतिहासिक तथा सांस्कृतिक पहिचान बोकेको टोखा र ऐतिहासिक उगमस्थल लिगलिगकोट रहेको पालुङटार नगरपालिकाबीचको सम्बन्धलाई अझ सुदृढ बनाउँदै स्थानीय विकास, सुशासन, पर्यटन प्रवद्र्धन तथा जनस्तरको आपसी सम्बन्ध विस्तारमा महत्वपूर्ण योगदान पुग्ने विश्वास लिइएको पालुङटार नगरपालिकाकका प्रमुख प्रशासकीय अधिकृत शेरबहादुर विसीले बताउनुभयो । कार्यक्रममा दुवै नगरपालिकाका उपप्रमुख, प्रमुख प्रशासकीय अधिकृतलगायत कर्मचारी तथा जनप्रतिनिधिको सहभागिता रहेको थियो ।