काठमाडौँ ।आगामी २०८२ फागुन २१ मा हुने प्रतिनिधि सभा सदस्य निर्वाचनका लागि प्रशु साह नेतृत्वको आम जनता पार्टीले आफ्नो चुनावी घोषणा पत्र सार्वजनिक गरेको छ ।

बुधवार काठमाडौंमा एक कार्यक्रमका बीच पार्टी चुनावी घोषणा पत्र सार्वजनिक गरेको हो । पार्टीले प्रत्यक्ष निर्वाचित कार्यकारी प्रणाली, कर सीमा र निःशुल्क आधारभुत सेवासहित व्यापक सुधारका एजेन्डा अघि सारेको छ । पार्टीले सार्वजनिक गरेको घोषणापत्रमा शासन प्रणालीदेखि अर्थतन्त्र, शिक्षा, स्वास्थ्य, पूर्वाधार, कृषि, ऊर्जा र वैदेशिक नीतिसम्मका संरचनागत परिवर्तनका लागि प्रतिवद्धता जनाएको छ ।

प्रत्यक्ष कार्यकारी र पूर्ण समानुपातिक निर्वाचन प्रणाली 

सार्वजनिक घोषणापत्रमा प्रधानमन्त्री र मुख्यमन्त्री प्रत्यक्ष जननिर्वाचित हुने व्यवस्था लागू गर्ने प्रश्ताव गरिएको छ । संघ र प्रदेशमा पूर्ण समानुपातिक निर्वाचन प्रणाली अपनाउने नीति पनि समावेश घोषणापत्रमा उल्लेख गरेको छ । निर्वाचित जनप्रतिनिधिले काम नगरेमा कार्यकालमै जनताले फिर्ता बोलाउन पाउने ‘राइट टु रिकल’ को अधिकार सुनिश्चित गर्ने प्रतिवद्धता पनि घोषणापत्रमा छ । पार्टीले सरकारले कुल गार्हस्थ उत्पादनको २० प्रतिशतभन्दा बढी कर लगाउन नपाउने संवैधानिक व्यवस्था गर्ने प्रस्ताव गरिएको छ । पार्टीले गैरआवासीय र विदेशीलाई नागरिकता दिने विद्यमान प्रावधानको पुनरावलोकन गर्ने एजेण्डा अघि सारेको छ ।

भ्रष्टाचार नियन्त्रणका लागि  विशेष कानूनी संरचना र न्यायालयको पूर्ण डिजिटलीकरण

आम जनता पार्टीले भ्रष्टाचारमाथि जनताको प्रत्यक्ष निगरानी रहने विशेष कानुनी संरचना बनाउने प्रतिवद्धता जनाएको छ । मुलुकमा पारदर्शीता कायम गर्न सरकारी खर्च र विकास आयोजनाको विवरण अनलाइनमार्फत सार्वजनिक गरिने उल्लेख छ । त्यस्तै, नीतिगत भ्रष्टाचारमा संलग्न राजनीतिक नेता वा व्यक्तिको सम्पती जफत गरी कडा कारबाही गरिने प्रतिवद्धता व्यक्त गरिएको छ । न्यायालयको पूर्ण डिजिटलीकरण र पारदर्शी नियुक्ति प्रणालीमार्फत न्यायिक सुधार गर्ने योजना समेत पार्टीले अघि सारेको छ ।

रोजगारीको ग्यारेन्टी 

आम जनता पार्टीले ‘एक घर, एक रोजगारी’ कार्यक्रम लागू गर्ने र बेरोजगारलाई बेरोजगारी भत्ता दिने घोषणा गरेको छ । नेपाललाई ‘ग्लोबल आईटी हब’ बनाउने लक्ष्यसहित युवा उद्यमीलाई १० लाखदेखि २५ लाख रुपैयाँसम्म बीउ पुँजी (सीड मनी) उपलब्ध गराउने योजना सार्वजनिक गरेको छ । हरेक विद्यार्थीले अनिवार्य रूपमा कम्तीमा एक उच्च प्राविधिक सीप सिक्नुपर्ने व्यवस्थाको ग्यारेन्टी गर्ने सार्वजनिक घोषणा पत्रका उल्लेख छ ।

शिक्षा, स्वास्थ्य र आधारभुत सेवा निःशुल्क

पार्टीले पूर्ण साक्षर राष्ट्र, स्मार्ट कक्षाकोठा र ‘एक स्थानीय तह, एक खेलमैदान’ कार्यक्रम लागू गर्ने प्रतिबद्धता जनाएको छ । स्वास्थ्य क्षेत्रमा डिजिटल हेल्थ कार्ड, गम्भीर रोगको पूर्ण निःशुल्क उपचार र प्रत्येक पालिकामा विशेषज्ञ अस्पताल स्थापना गर्ने योजना सार्वजनिक गरेको छ । त्यस्तै, शिक्षा, स्वास्थ्य, खानेपानी र विद्युत् आधारभूत रूपमा निःशुल्क उपलब्ध गराउने प्रतिबद्धता आम जनता पार्टीले जनाएको छ ।

पूर्वाधार, ऊर्जा र आवास

पार्टीले मुख्य राजमार्गको स्तरोन्नति, सडक सुरक्षामा उच्च प्रविधिको निगरानी प्रणाली र ठूला सहरमा व्यवस्थित सार्वजनिक पार्किङको व्यवस्था गर्ने एजेण्डा अघि सारेको छ । राजमार्गमा अप्टिकल फाइबर विस्तारसहित डिजिटल करिडोर विकास गर्ने योजना घोषणापत्रमा समावेश छ । विद्युत् उत्पादन र निर्यात वृद्धि गर्दै ‘हिमालयन ओरिजिन’ ब्राण्डमार्फत बोतलको पानी अन्तर्राष्ट्रिय बजारमा प्रवद्र्धन गर्ने दाबी आम जनता पार्टीको छ । पार्टीले भूमिहीनका लागि ‘भर्टिकल हाउजिङ’ निर्माण र योजनाबद्ध नयाँ सहर विकास गर्ने प्रतिवद्धता पनि जनाएको छ ।

काठमाडौं। आम जनता पार्टी (आजपा)संग पार्टी एकीकरणका साथै पार्टी प्रवेश गर्ने लहर चलेको छ ।

२१ फागुनमा हुने प्रतिनिधिसभा सदस्यको निर्वाचन मिति नजिकिदै जाँदा पार्टी एकीकरण र पार्टी प्रवेश दिनदिनै भइरहेको छ ।

काठमाडौंको कोटेश्वर स्थित आजपा केन्द्रीय कार्यालयमा आज (आइतवार) आजपा र पहिला देश अभियानबीच पार्टी एकता भएको छ । पाँच बुँदे सहमती गर्दै आजपा र अभियानबीच पार्टी एकीकरण भएको घोषणा भएको हो ।

आजपा अध्यक्ष एवं पूर्वमन्त्री प्रभु साह र अभियानका संयोजक नन्दप्रसाद काप्रीले सहमतीपत्रमा हस्ताक्षर गर्दै २१ फागुनको निर्वाचनमा मोवाइल चुनाव चिन्हबाट निर्वाचनमा सहभागि हुने सहमती गरेका छन् ।

‘आगामी २०८२ फाल्गुन २१ गतेमा सम्पन्न हुन गईरहेको संसदीय चुनावमा आम जनता पार्टीको चुनावी अभियानलाई परिणाममुखी बनाउन पहिला देश अभियान र आम जनता पार्टीको नीति बमोजिम हुने सबै क्रियाकलापमा संयक्त भूमिका खेल्ने समझदारी गर्दछौँ,’ सहमती पत्रमा उल्लेख गरिएको छ ।

यसैगरी, पुष्पकमल दाहाल प्रचण्ड संयोजक र माधवकुमार नेपाल सहसंयोजक रहेको नेपाल कम्युनिष्ट पार्टी (नेकपा)का १२ जना केन्द्रीय सदस्यहरु आजपामा प्रवेश गरेका छन् । विद्या प्रसाद शर्मा (दैलेख), राधेश्याम गुप्ता (रुपन्देही) सहितका १२ जना केन्द्रीय सदस्यहरु आजपामा प्रवेश गरेको आजपा सचिवालय सदस्य सुभाष साहले जनाएका छन् ।

‘विगत लामो समयदेखि वामपन्थी आन्दोलनमा सक्रिय योगदान गर्दै आउनुभएका प्रभावशाली नेता तथा नेपाली कम्यूनिष्ट पार्टीका केन्द्रीय सदस्यद्धय विद्या प्रसाद शर्मा (दैलेख –१) र राधेश्याम गुप्ता (रूपन्देही – ३) आजबाट हाम्रो आम जनता पार्टीमा गोलबन्द हुनुभएकोमा उहाँलाई सहर्ष हार्दिक स्वागत, सम्मान, बधाई सहित थप उज्जवल भविष्यको भव्य शुभकामना व्यक्त गर्दछु,’ पार्टी प्रवेश गराउदै आजपा अध्यक्ष साहले भने ।

यसैगरी आजै, जनमत पार्टीका केन्द्रीय सदस्य एवं मण्डल सेवा समाजका पूर्व अध्यक्ष पवनकुमार मण्डलले पनि आजपामा प्रवेश गरेका छन् । आजपा अध्यक्ष साहले उनीहरुलाई टिका, माला लगायर पार्टीमा प्रवेश गराउदै स्वागत गरेका छन् ।

जनकपुरधाम। आम जनता पार्टी (आजपा)ले मंगलबार एकैदिन दुई पार्टीसंग एकीकरण गरेको छ ।

रामकुमार महतो नेतृत्वको नेपाल सदभावना पार्टी (नेसपा) र ईमदाद गद्दी नेतृत्वको जन अधिकार पार्टी नेपालसंग पार्टी एकता गर्दै अन्य विभिन्न पार्टीका सयौं नेतालाई आजपाले पार्टी प्रवेश गराएको छ ।

धनुषाको महेन्द्रनगरमा आजप आजपाले धनुषा क्षेत्र नं. ४ को विशेष क्षेत्रिय भेला गरेको थियो । ‘भ्रष्टाचारीलाई खबरदारी तथा लघुबित्त पीडÞितलाई न्याय दिलाउने’ संकल्प धनुषाको महेन्द्रनगर आयोजित क्षेत्रिय भेलासम्पन्न गर्दै आजपाले महतो नेतृत्वको नेपाल सदभावना पार्टीसंग पार्टी एकीकरणको घोषणा गरिएको छ ।

सोही भेलामार्फत धनुषा मिथिला नगरपालिका निवासी रामजिवन महतोले पनि आजपामा प्रवेश गरेका छन् । महतो पर्यावरण शहिद स्वर्गीय दिलिप महतोका वुवा हुन् ।

सोही कार्यक्रमका बीच विभिन्न पार्टीमा आबद्ध सयौं नेता, युवा, समाजसेवीहरुले समेत आजपामा प्रवेश गरेका छन् । धनुषाका बिभिन्न पालिकाका निर्वाचित वडा अध्यक्षहरु समेत आजपामा प्रवेश गरेको आजपा प्रवक्ता चन्द्रभुषण साहले जनाएका छन् ।

नेसपासंग पार्टी एकता गर्नुभन्दा अघि मंगलबार बिहान वीरगंजमा आजपाले ईमदाद गद्दी नेतृत्वको जन अधिकार पार्टी नेपालसंग पार्टी एकीकरण गरेको छ ।

पार्टी एकतासंगै नेपाल सदभावना पार्टी र जन अधिकार पार्टीको सिंगो कमिटी आजपामा समाहित हुदै आगामी फागुन २१ गते हुने प्रतिनिधिसभा निर्वाचनमा ‘मोवाइल’ चुनाव चिन्हबाट प्रतिस्पर्धामा उत्रिने सहमती भएको छ ।

आजपा अध्यक्ष एवं पूर्वमन्त्री प्रभु साहले दुवै पार्टीसंग एकीकरण गर्दै पार्टीमा प्रवेश गर्नेहरु स्वागत गर्दै उज्जवल राजनीतिक भविष्यका लागि शुभकामना दिएका छन् ।

आजपामा पार्टी प्रवेश गर्ने एवं पार्टी एकीकरण गर्दै संयुक्तरुपमा अगाडी बढने सहमतीले पार्टी थप बलियो बन्दै गइरहेको साहले जनाएका छन् । पार्टी एकतासंगै पार्टीमा प्रवेश गर्ने नवप्रवेशीलाई उचित जिम्मेवारी दिदै मुलुक र जनताको हितमा शसक्त काम गर्दै अगाडी बढने उनले बताए ।

यसअघि आजपाले जनादेश पार्टी, लघुवित पीडित संघर्ष समिति, सहकारी पीडितका लागि संघर्ष गर्दै आएको समिति लगायतसंग चुनावी सहमती एवं गठबन्धन गरेको छ ।

पछिल्लो समय विभिन्न पार्टीले आजपासंग पार्टी एकताका साथै विभिन्न पार्टीका नेता, समाजसेवी, युवा, विद्यार्थी लगायत व्यक्तिहरु प्रवेश गर्ने लहर चलेको छ ।

काठमाडौं। आम जनता पार्टी (आजपा)को केन्द्रीय कमिटी पुनर्गठन गरिएको छ । प्रभु साहको अध्यक्षतामा पुनर्गठन गरिएको केन्द्रीय कमिटीमा ३ सय ४८ सदस्यीय रहेको छ ।

१४ सदस्यीय केन्द्रीय कार्यालय, केन्द्रीय कार्यालय सदस्य सहित ८७ सदस्यीय केन्द्रीय सचिवालय सदस्य र २ सय ४७ सदस्यीय केन्द्रीय सदस्य रहेको छ । यस्तै बैकल्पिक १ सय १ जनालाई बैकल्पिक केन्द्रीय सदस्य राखिएको छ ।

प्रभु साह अध्यक्ष, तिलक थापामगर सहअध्यक्ष सहित कार्यालय सदस्यहरुमा रितादेवी साह, समिना हुसेन, बिल्टु यादव, अशोक कुमार लामा, त्रिभुवन साह, चन्द्रभुषण साह, धनकुमारी मगर, सुधिर यादव, सियाराम कुशवाहा, श्रीचन्द मुखिया, उमेश कुशवाहा, देवी पण्डित रेग्मी रहेका छन् ।

यसैगरी सचिवालय सदस्यहरुमा श्रीलाल महासेठ, रबिन्द्र प्रसाद सिंह, जुरीलाल मोची, धर्मेन्द्र पटेल, भोजराज त्रिपाठी, लालबाबु मन्सुरी, लखिन्द्र साह, उदयचन्द्र प्रसाद, नरेश तुरहा, श्रीभगवान पटेल, राधेश्याम साह, बिजय यादव, सुभाषप्रसाद साह, रामकेशव गुप्ता, ओमप्रकाश सिंह, ममता शर्मा, भोला पाण्डे, कुमारी बबिता, रञ्जुकुमारी साह, सञ्जय यादव, बबिता यादव, गितादेवी साह, ठागा दास, बालकृष्ण सापकोटा, उमाशंकर साह, उपेन्द्र साह, पासाङ तामाङ, सराज बछार, अञ्जित कुशवाहा, शिव थापा, शुभद्रा गुप्ता, अनिल झा, राजेश साह, सुरेश चौधरी रहेका छन् ।

यसैगरी सचिवालय सदस्यहरुमा मिन बहादुर खत्री, किशोरी साह, देवेन्द्र ठाकुर, रामनाथ माझी, रामबाबु कुशवाहा, राजकिशोर साह, विवेक साह, हेमप्रसाद साह, तेजनारायण चौधरी, बालाशंकर कुशवाहा, जयलाल महतो, विश्वराज पटेल, रविन्द्र यादव, भानु कोइराला, सुरेश साह, डा. नवलकिशोर साह, सिमा जैसवाल, बिजय साह, देवकुमारी साह, पप्पु साह, ब्रम्हा यादव, रामशरण यादव, रामकृत साह, अरबिन्द साह, गोपाल साह, बिरबल महतो, आर्या पाण्डे, हरि थापा, मिनादेवी साह, सन्तोष साह, प्रहलाद पौडेल, खगेन्द्र भण्डारी, कालबहादुर विक, राम बिष्ट, अमर योन्जन, एमडी सतार, शम्भु जयसवाल, बद्रि पासवान र चन्दन साह रहेका छन् ।

काठमाडौंको कमलादी स्थित नेपाल प्रज्ञा भवनमा ४ असोजमा केन्द्रीय कमिटी र ५ असोजमा बसेको पदाधिकारी बैठकले गरेको केन्द्रीय कमिटी पुनर्गठन गर्ने निर्णय गरेको हो ।

काठमाडौं। आम जनता पार्टी (आजपा)ले संसद विघटन गरी नयाँ सरकार र नयाँ संविधान निर्माणको दिशामा अगाडी बढन अपिल गरेको छ । नेपाली जनताले अहिलेको संविधान र सरकार दुबै अस्वीकार गरिसकेकाले संविधानको रटान लगाउनुको कुनै औचित्य नभएको आजपाले जनाएको छ ।

जेन–जी पुस्ताको अगुवाईमा भएको जनआन्दोलनमार्फत प्रकट गरेको ताजा जनादेशलाई सर्लक्क स्वीकार गरेर देशलाई बदलावको दिशामा अगाडि बढाउन नसक्नु गम्भीर चिन्ताको विषय भएको आजपाले जनाएको छ ।

आजपा प्रवक्ता चन्द्रभुषण साहले आज एक प्रेस विज्ञप्ती जारी गर्दै जेनजीको आन्दोलनमा युवा विद्यार्थीको नरसंहार एवं हत्या गर्ने आदेशको नेतृत्वकर्ता तत्कालिन प्रधानमन्त्री केपी शर्मा ओली सहित बरवर्तापूर्ण अपराधमा संलग्न सबैलाई कारवाही गर्न माग समेत गरेका छन् ।

‘वर्तमान संकट एवं सङ्क्रमणकालीन अवस्थाबाट निकासका लागि आन्दोलनमा अबोध युवा विद्यार्थीहरूको निर्मम नरसंहार एवं हत्या गर्ने आदेशको नेतृत्वकर्ता तत्कालीन प्रधानमन्त्री सहित यस बरवर्तापूर्ण अपराधमा संलग्न अन्य सरकारी अधिकारीहरुलाई समेत कानुन बमोजिम कारबाही गर्ने र राज्य सञ्चालनको उच्चतहमा रहेर काम गरेका सम्पूर्ण शासक एवं प्रशासकहरूको सम्पत्तिको स्रोत छानबिन गरी दोषी ठहर हुनेलाई दण्डित गर्ने प्रतिबद्धता सहित तत्काल जनआक्रोशको केन्द्रको रूपमा रहेको संसदलाई विघटन गरी नयाँ सरकार र नयाँ संविधान निर्माणको दिशामा अघि बढ्न सम्पूर्ण सरोकारवालाहरूमा एकमुष्ट हार्दिक अनुरोध÷अपिल गर्दछौं,’ प्रवक्ता साहले जारी गरेको विज्ञप्तीमा उल्लेख गरिएको छ ।

पश्चगामीको डरले यथास्थितिमा रमाउने खेल कुनै पनि हिसाबले सही नभएको आजपाको चेतावनी छ । ‘अहिलेको विषम परिस्थितिमा देशलाई अग्रगामी निकास दिनका लागि राष्ट्रपतिजस्तो सम्मानित संस्थाले यस आन्दोलनका नेतृत्व एवं सहयोगी शक्तिहरू तथा परिवर्तन पक्षधर धारसँग वार्ता र संवाद गरी समस्या समाधान गर्नुको सट्टा उल्टै उही अस्वीकृत यथास्थितिवादी एवं प्रतिक्रियावादी धारका पार्टी, प्रवृत्ति र व्यक्तिसँग छलफल गर्ने कार्य हामीलाई किमार्थ स्वीकार्य छैन ।

यो अशोभनीय एवं आपत्तिजनक कदम सडकबाट मुखारित जनादेश, जनआन्दोलनको भावना तथा नागरिक स्वतन्त्रता समेतको बर्खिलाप हो,’ विज्ञप्तीमा भनिएको छ ।

नेपालको वर्तमान राज्य व्यवस्था नै भ्रष्टाचारको मूल जड भएको निष्कर्ष आजपाको छ । अनुहार परिवर्तन गरेर मात्र भ्रष्टाचारको अन्त्य सम्भव नभएको जनाउदै आजपाले भ्रष्टाचार केवल केन्द्र सरकारमा मात्र नभई प्रदेशदेखि स्थानीय तह लगायत सम्पूर्ण सरकारी निकाय एवं संयन्त्रमा व्यापक रहेको जनाएको छ । भ्रष्टाचारको जननी यो लुटकारी व्यवस्था एवं प्रणालीमा सुधार बिना सुशासन र बदलाव सम्भव नभएको आजपाले जनाएको छ ।

‘अनुहार परिवर्तन गरेर मात्र भ्रष्टाचारको अन्त्य सम्भव छैन । किनकि भ्रष्टाचार केवल केन्द्र सरकारमा मात्र नभई प्रदेशदेखि स्थानीय तह लगायत सम्पूर्ण सरकारी निकाय एवं संयन्त्रमा व्याप्त छन् । अझ यसो भनौँ नेपालको वर्तमान राज्य व्यवस्था नै भ्रष्टाचारको मूल जड हो । यो यर्थातलाई सबैले स्वीकार्न जरूरी छ । जस्तो कारखाना हुन्छ, उत्पादन त्यस्तै हुन्छ । त्यसैले, भ्रष्टाचारको जननी यो लुटकारी व्यवस्था एवं प्रणालीमा सुधार बिना सुशासन र बदलाव सम्भव छैन ।

सार्वभौम जनताले सडकमार्फत संसद, सरकार एवं यसको विधि विधानलाई अस्वीकार गरिसकेको सन्दर्भमा संविधानवादको रटान गर्नु हास्यास्पद हो । त्यसैले, भ्रष्ट, दलाल, लुटेरा एवं भगौडा वर्गको पक्षपोषण गर्ने वर्तमान अस्वीकृत संविधानको निर्माता एवं तक्माधारीहरूले माफी मागेर बाटो छोड़नुको सट्टा उल्टै आफूलाई केन्द्रमा राखेर संविधान रक्षाको नाटक प्रहसन गर्नु भनेको लुटकारी व्यवस्था र अवस्थाबाट असन्तुष्ट एवं आक्रोशित जनतालाई थप सशक्त विद्रोहको लागि उक्साउनु र नयाँ समस्या खडा गर्नु हो,’ आजपाले जारी गरेको विज्ञप्तीमा उल्लेख गरिएको छ ।

आजपाले जनविद्रोहको मर्मलाई तुरन्त सम्बोधन गर्नुको सट्टा विभिन्न आवरणमा अल्झाउनु, बल्झाउनु र खेलाउनु दुःखद् रहेको टिप्पणी गरेको छ ।

सर्लाही। आम जनता पार्टी (आजपा)ले किसानलाई समयमै मलखाद सहितको सेवा सुविधा उपलब्ध गराउनुपर्ने माग सरकारसंग गरेको छ ।

जिल्ला प्रशासन कार्यालय सर्लाही, मलंगवामा प्रमुख जिल्ला अधिकारलाई ज्ञापनपत्र बुझाउदै किसानलाई मलखाद्य लगायतका सेवासुविधा उपलब्ध गराउन माग गरेको हो ।

आफूहरुको माग समयमै सम्बोधन गर्दै किसानलाई बिउँबिजन, मलखाद्य, सिचाई सहितका सेवा सुविधा उपलब्ध नगराए कडा आन्दोलनको चेतावनी समेत आजपाले दिएको छ । आजपा प्रवक्ता चन्द्रभुषण साहले सरकारले किसानसंग विभेद गर्दै आएको बताउदै आफूहरुको माग पुरा नभए सडकमा उत्रिने चेतावनी दिएका छन् ।

समयमै युरिया मलखादको पर्याप्त उपलब्धता गराउनुपर्ने, अन्नदाता किसानलाई सम्मान सहित पेन्सनको व्यवस्था गर्नुपर्ने, कृषि बिमा तत्काल लागु गर्नुपर्ने, पर्याप्त एवम् सहज रुपमा सहुलियत कृषि ऋण उपलब्ध गराउनुपर्ने, कृषी उपकरण ट्याक्टरमा लाग्ने सम्पूर्ण कर खारेजी गर्नुपर्ने, कृषी विद्युतिकरण पूर्ण निःशुल्क गर्नुपर्ने, किसानहरुलाई आधुनिक कृषि औजारको व्यवस्था गर्नुपर्ने, कृषि उपजको प्रभावकारी भण्डारण एवं बजारीकरणको व्यवस्था गर्नुपर्ने माग आजपाले गरेको छ ।

यसैगरी प्राकृतिक प्रकोपबाट हुने क्षतिका लागि राहत प्याकेजको व्यवस्था गर्नुपर्ने, भुमिहीन किसानलाई जग्गा उपलब्ध गराउनुपर्ने, लगायतका माग रहेको छ । प्रधानमन्त्री तथा मन्त्रिपरिषदको कार्यालय, सिंहदरबार, काठमाडौं, मुख्यमन्त्री तथा मन्त्रिपरिषदको कार्यालय, जनकपुरधाम, मधेश प्रदेशका साथै सर्लाही जिल्लाका सम्पूर्ण स्थानीय सरकारहरुलाई ज्ञापनपत्रको बोधार्थ आजपाले पठाइएको छ ।

‘के आफ्नो पसीना र पौरखले सबैका लागि अन्न उत्पादन गर्ने श्रमजीवी किसानहरुको दुःख, पीडा र समस्याको समाधान राज्यको दायित्वभित्र पर्दैन ? कृषीमा सुधार नै नगर्ने हो भने, संवैधानिक हैसियतको ७६१ ओटा सरकार र तीनका संयन्त्रहरुको आवश्यकता र औचित्य के हो ? मुलुकमा राजनीतिक बदलावको नाममा पटक पटक कथित व्यवस्था परिवर्तन भयो तर किसानहरुको अवस्थामा तात्विक परिवर्तन किन आएन ? कृषिप्रधान देशमा कृषकहरु नै कृषी पेशाबाट किन पलायन हुँदैछ ? के किसानको अवस्थामा सुधार बिना देशको समृद्धि र विकास सम्भव छ ?,’ आजपाले ज्ञापनपत्रमा उल्लेख गरेको छ ।

नेपालमा लगभग प्रत्येक वर्ष नै यूरिया मलको हाहाकार हुन्छ तर विभिन्न जोरजाम गरेर किसानहरुले मित्र राष्ट्र भारतको सिमावर्ती क्षेत्रबाट मल ल्याउँदा पनि प्रहरी र भन्सार प्रशासनले जनताको सम्पति सम्बन्धी मौलिक हक हनन हुने गरि कमिशनको चक्करमा जफ्त गर्नु कतिको न्यायोचित हो ? आजपाले सरकारसंग प्रश्न गरेको छ ।

‘असारे खेती सुरू भैसक्दा समेत हालसम्म मलखादको समुचित प्रबन्धको सुनिश्चितता समेत नहुनु दुःखद कुरा हो । यसर्थ, आम किसानहरुलाई समयमै युरिया मलखादको पर्याप्त उपलब्धता सहितको तल उल्लेखित मागहरु सरकारसंग जोडदार रुपमा प्रस्तुत गर्दछौं ।

साथै, कृषकहरुको न्यायोचित मागहरुलाई स्थानीय प्रशासन तथा राज्यले गम्भीरतापूर्वक नलिएमा÷कार्यान्वयन नगराएमा हामी चरणबद्ध रुपमा सशक्त संघर्षका कार्यक्रमहरू गर्न बाध्य हुने र त्यसबाट सृजित हुने क्षति एवम् परिस्थितिको सम्पूर्ण जिम्मेवारी स्वयं राज्य पक्षले नै लिनुपर्ने विषय अग्रीम रूपमा अवगत गराउँदै यो ज्ञापन–पत्र पेश गर्दछौं,’ ज्ञापनपत्रमा उल्लेख गरिएको छ ।

आजपा प्रवक्ता साहका साथै आजपा नेताहरु रेहाना खातुन, सुरेश महतो, सुनिल गुप्ता, डा.शैलेन्द्र यादव, पुनिताकुमारी महरा लगायतका नेताहरु जिल्ला प्रशासन कार्यालयमा पुगेर ज्ञापनपत्र बुझाएका हुन् । रासस

काठमाडौं। आम जनता पार्टी (आजपा) निकटको आम सुकुम्बासी तथा अब्यवस्थित बासोबासी संघले काठमाडौंको सुकुम्बासी बस्तीमा खानेपानीको माग गर्दै काठमाडौं उपत्यका खानेपानी लिमिटेडमा आज ज्ञापनपत्र बुझाएको छ ।

काठमाडौंको सुकुम्बासी तथा अव्यवस्थित बस्तीहरूमा खानेपानी आपूर्ति नगरिए चरणबद्ध आन्दोलन गर्ने चेतावनी समेत संघले दिएको छ । खानेपानी संघर्ष समिति सुकुम्बासी बस्ती काठमाडौंले आफूहरुको माग सम्बोधन नभए कडा आन्दोलन गर्ने चेतावनी समेत दिएको छ ।

आम सुकुम्बासी तथा अब्यवस्थित बासोबासी संघका अध्यक्ष एवं संघर्ष समितिका संयोजक समेत रहेका कालबहादुर विकले एक हप्ताभित्रमा आफूहरुको माग सम्बोधन नभए खाली गाग्री सहित खानेपानी कार्यालय घेराउन गर्ने बताए ।

संघर्ष समितिले ध्यानकर्षण सहितको ज्ञापनपत्र बुझाएको र एक हप्तामा खानेपानीको समस्या समाधान नभए चरणबद्ध आन्दोलनमा उत्रिने संघर्ष समितिका प्रवक्ता रञ्जु साहले जनाएकी छन् । साहका अनुसार २ असारदेखी खाली गाग्री सहित खानेपानी कार्यालय घेराउ गर्ने र १० असारदेखी काठमाडौंको खानेपानी वितरण अवरुद्ध गर्ने लगायतका आन्दोलनका कार्यक्रम रहेको छ ।

‘सुकुम्बासी तथा अव्यवस्थित रूपमा बसोबास गरिरहेका टोल–बस्तीहरूमा अहिलेसम्म खानेपानीको आपूर्ति गरिएको छैन । जसले गर्दा हामी पीडित जनतामा अत्यन्तै अन्याय, असन्तोष र पीडाको अनुभूति भईरहेकोछ । शत्रुलाई पनि खानेपानिबाट बञ्चित गर्नुहुँदैन भन्ने हाम्रो समाजको परम्परागत मान्यता विपरित आजको २१औं शताब्दीमा आएर यस्तो अपराध गर्नु भनेको असंवैधानिक हर्कत मात्र नभएर गम्भीर मानवता विरोधी कुकृत्य पनि हो । हाम्रो मत र राजस्वबाट राज्य संचालन हुने तर हामी नै शुद्ध खानेपानिको अभावमा तडपिनु पर्ने विभेदपूर्ण व्यवहारको तुरुन्त अन्त्य गरियोस भन्ने माग सहित यस कार्यालयको गम्भीर ध्यानाकर्षण गराउन चाहन्छौं,’ संघर्ष समितिले बुझाएको ज्ञापनपत्रमा उल्लेख गरिएको छ ।

हाल काठमाडौं उपत्यकाको अधिकांश क्षेत्रमा मेलम्ची खानेपानी योजना अन्तर्गत पाइपलाइन विस्तार भई पानी आपूर्ति भइसकेको छ । तर, काठमाडौंको सुकुम्बासी बस्तीहरुमा खानेपानीको व्यवस्था गरिएको छैन् ।

कुनैपनि किन्तु परन्तुको आडमा आफूहरुको न्यायोचित मागलाई नजरअन्दाज गर्ने गराउने दुस्प्रयास भएमा कडा संघर्षमा उत्रिने र त्यसबाट सृजीत हुने सम्पूर्ण क्षतिको जिम्मेवारी स्वयं नेपाल सरकारको हुने विषय अग्रीम रूपमा अवगत गराउन ज्ञापनपत्र बुझाएको समितिले जनाएको छ ।

आजपा सहअध्यक्ष तिलक थापामगर, संघका अध्यक्ष कालबहादुर विक सहितका नेताहरु खानेपानी लिमिटेटको त्रिपुरेश्वर कार्यालयमा पुगेर ज्ञापनपत्र बुझाएका हुन् ।

काठमाडौं। आम जनता पार्टी (आजपा)ले काठमाडौंको विभिन्न क्षेत्रमा बसोबास गर्दै आएका सुकुम्वासीहरुलाई जग्गाधनी लालपुर्जा दिन माग गर्दै भूमी समस्या समाधान आयोग ताहाचल, काठमाडौंमा आज ज्ञापनपत्र बुझाएको छ ।

आजपाका सहअध्यक्ष एवं संविधान सभाका सदस्य तिलक थापामगर, कार्यालय सचिव रन्जुकुमारी साह, सुकुम्वासी संघर्ष समितिका संयोजक सुनिता सिलवाल सहितका नेताहरुको टोलीले आयोगका विज्ञ सदस्य टेकबहादुर शाहलाई ज्ञापनपत्र बुझाउदै यथाशिघ्र लालपुर्जा दिनुपर्ने माग गरेका छन् ।

‘जनताको कर लिने तर काम नगर्ने । तलब खाने तर सुकुम्वासीको समस्या समाधान किन भएन ? जनताको समस्या समाधान आयोगले नगरी राजनीतिक भर्तीकेन्द्रको रुपमा बनाउनु गलत हो,’ आजपा सहअध्यक्ष थापामगरले भने ।

सुुकुम्वासी समस्या समाधान नभए र सुकुम्वासीलाई जग्गाधनी लालपुर्जा यथाशिघ्र नदिइए कडाभन्दा कडा आन्दोलन गर्न बाध्य हुने आजपा नेतृ साहले जनाएकी छन् । ‘सुकुम्वासीको कर चल्ने, मत चल्ने तर उनीहरुलाई खानेपानी, विधुत, शिक्षा, स्वास्थ्य नदिनु सरकारको मानवता विरोधी कार्य हो । सुकुम्वासीलाई यथाशिघ्र जग्गाधनी लालपुर्जा नदिइए हामी कडाभन्दा कडा आन्दोलन गर्न वाध्य हुने र त्यसको सम्पूर्ण जिम्मेवारी सरकारले लिनुपर्ने हुन्छ,’ आजपा नेतृ साहले भनिन् ।

‘भूमिहीन गरिब, दलित र सुकुम्वासीहरुको आवास तथा भूमिमाथिको पहुँच र स्वामित्व स्थापित गराई देशबाट भूमिहीनताको अन्त्य गरी जनमुखी एवं न्यायपूर्ण भूमिव्यवस्था स्थापनामा योगदान गर्ने प्रतिबद्धताका साथ स्थापित नेपाल सरकारको यस आयोगले हालसम्म पनि संघीय राजधानीमा समेत हामीलाई भोगको आधारमा जग्गाधनी लालपुर्जा प्रदान नगरेको नगराएको हुँदा हामी धेरै पिरमर्कामा रहेको बिषय जाहेर गर्न चाहन्छौं । यसले गर्दा हामीले खानेपानी, विधुत, बैंकिङ ऋण, घर नक्सा, व्यापार व्यवसाय जस्ता विविध समस्याहरु समेत झेल्नुपर्ने बाध्यात्मक स्थिति छ,’ आजपा र सुकुम्वासी संघर्ष समितिले संयुक्त रुपमा आयोगमा बुझाएको ज्ञापनपत्रमा उल्लेख गरिएको छ ।

आफूहरुको माग सम्बोधनमा ढिलाई, आलटाल भए कडा संघर्षमा उत्रिने चेतावनी समेत दिइएको छ । ‘हाम्रो जनजीविकासंग जोडिएको यी महत्वपूर्ण समस्याहरु समाधान गर्न गराउन यथाशिघ्र हामीलाई जग्गाधनी लालपुर्जा उपलब्ध गराउन यस आयोगको गम्भिर ध्यानाकर्षण गराउन चाहन्छौं । हाम्रो माग समयमा सम्बोधन नभए हामी कडाभन्दा कडा संघर्षका कार्यक्रमहरु गर्न बाध्य हुने र यसबाट सिर्जित सम्पूर्ण क्षतिको जिम्मेवारी नेपाल सरकारले लिनुपर्ने बिषय अग्रिम रुपमा खबरदारी समेत गराउन चाहन्छौं,’ आयोगमा बुझाइएको ज्ञापनपत्रमा उल्लेख गरिएको छ ।

आजपा अध्यक्ष एवं सांसद प्रभु साहले सुकुम्वासीलाई जग्गाधनी लालपुर्जा दिनुपर्ने आवाज सडकदेखी संसदसम्म पटक–पटक उठाउँदै आएका छन् । सुकुम्वासीलाई जग्गाधनी लालपुर्जा दिएर खानेपानी, विधुत, बैंकिङ ऋण, घर नक्सा, व्यापार व्यवसाय गर्ने जस्ता समस्याको समाधान गर्न सरकारसंग साहले माग गर्दै आएका छन् ।

‘काठमाण्डौको सुकुम्बासीलाई छिटो जग्गाधनी लालपुर्जा प्रदान गर्न आम जनता पार्टीले आज भुमि समस्या समाधान आयोगलाई ज्ञापनपत्र बुझाएकोछ । वर्षौदेखि बसोवास गर्दै आएका सुकुम्बासीहरूले लालपुर्जाको अभावमा खानेपानी, बिजुली लगायतका कयौ आधारभुत सेवाबाट वंचित भईरहेको सन्दर्भमा हाम्रो पार्टीका सुकुम्बासी अगुवा साथीहरूले सुकुम्बासीलाई जग्गाधनी लालपुर्जा दिलाउन लिएको यो पहलकदमी सराहनीय छ ।

आज भुमाफियाहरूले रातारात काठमाण्डौको बहुमूल्य जग्गा आफनो नाऊमा गराई रहदा वर्षौदेखि बसोवास गर्दै आएको सुकुम्बासीहरूले आफूले भोग गरेको जग्गाको लालपुर्जा नपाऊनु दुःखद हो । यसमा सरकारको गम्भीर ध्यानाकर्षण गराउदै काठमाण्डौको सुकुम्बासीलाई छिटो जग्गाधनी लालपुर्जा उपलब्ध गराउन जोड़दार माग गर्दछु,’ आजपा अध्यक्ष साहले फेसबुकमा लेखेका छन् ।

काठमाडौँ । आम जनता पार्टीले गणतन्त्र दिवसका अवसरमा वर्तमान सरकार र संसद्को हालसम्मको कार्यक्रमलगायत समसामयिक राजनीतिक विषयमा समीक्षा गर्नेभएको छ ।

शनिबार बस्ने पदाधिकारी बैठकमा संसद्को गतिरोध, सरकारका काम कारबाही, जनचासोलगायतका विषयमा छलफल हुने पार्टी अध्यक्ष प्रभु साहले जानकारी दिनुभयो ।

जनकपुरधाम । प्रभु साह नेतृत्वको आम जनता पार्टीले आज मधेश प्रदेशमा आम हडतालको आह्वान गरेको छ । बैंकको ब्याज आतंकविरुद्ध आजपाले आज एक दिनका लागि हडतालको आह्वान गरेको हो ।

उनीहरुले बैंकहरुले मनोमानी ढंगले लिएको ब्याज फिर्ता गर्नुपर्ने, लघुवित्त तथा सहकारीबाट गरिब किसानले लिइएको कर्जा माफी गर्नुपर्ने, आम जनतालाई सहज रूपमा कर्जाको व्यवस्था गर्नु पर्नेलगायतका माग राखेका छन् ।

आपजाले रौतहटको गौर नगरपालिका र पूर्व-पश्चिम राजमार्गमा सडकमा टायर बालेर प्रदर्शन गरिरहेका छन् ‌। यसैबिच प्रदर्शन गरिरहेका २१ जना कार्यकर्ता पक्राउ गरिएको जिल्ला प्रहरी प्रवक्ता डिएसपी एलिजा गिरीले जानकारी दिईन् ।

गिरीका अनुसार बन्दको खासै प्रभाव परेको छैन । यद्यपी, गौरबाट लामो दुरीका सवारीसाधन ठप्प भएका छन् । पूर्व(पश्चिम राजमार्ग भने सञ्चालनमा रहेको छ ।

काठमाडौँ । आरती साहको न्यायकोलागि पीडित परिवारले गरिरहेको धर्नामा प्रभु साह नेतृत्वको आम जनता पार्टीले ऐक्यवद्धता जनाएको छ ।

गत जेठ ७ गते धनुषास्थित थापाचोक–९ जनकपुरधाममा आरती साहलाई सासु, ससुरा, श्रीमान र देवर मिलि दाइजोको निउमा निर्घात कुटपिट गरेर हत्या गरेको भन्दै पीडित परिवारले माइतिघर मण्डलामा असार १ गतेदेखि २४सैँ घण्टा धर्ना बस्दै आएका छन् ।

बुधबार आम जनता पार्टीका अध्यक्ष प्रभु साह लगायत पार्टीका नेता, कार्यकर्ताहरु धर्नास्थलमै पुगेर धर्नामा ऐक्यवद्धता जनाएका हुन् । सो क्रमममा सञ्चारकर्मीहरुसँग कुराकानी गर्दै अध्यक्ष साहले पीडित परिवारले १४६ दिनसम्म धर्ना बस्दापनि न्याय नपाउनु दुर्भाग्य भएको बताउनुभयो । उहाँले राज्यले पीडित परिवारको माग सम्बोधन गर्न वेवास्ता गरेको भन्दै खेद प्रकट गर्नुभयो । उहाँले पीडित परिवारको माग सम्बोधन गरेर आरती साहलाई न्याय दिन सरकारसँग माग गर्नुभयो । उहाँले समस्या समाधानका लागि सरकारले औपचारिक वार्ता छिटो सुरु गर्नुपर्ने बताउनु भयो ।

उहाँले भन्नुभयो – ‘नेपालमा गणतन्त्र छ । लोकतन्त्र छ । लोकतन्त्रको यो युगमा १४६ दिनसम्म न्याय नपाउनु दुर्भाग्यको विषय हो । म सर्वप्रथम राज्यबाट भएको बेवास्ताप्रति खेद प्रकट गर्न चाहन्छु । आरती साहको परिवारको जुन मागहरु छ, त्यसमा म ऐक्यवद्धता जायर गर्दछु । जायज मागहरु छ । त्यो सम्बोधन गर्नैपर्छ । राज्यले छिटो सम्बोधन गरोस् भन्ने हामी चाहन्छौँ । आम जनता पार्टीले यो आन्दोलनलाई समर्थन गरेको छ । सहयोग गर्ने भन्ने निर्णय गरेको छ । त्यही अनुसार हामी आज धर्ना कार्यक्रममा सहभागि छौँ । कानूनको शासनमा यस्तो सुन्नै नपर्ने हो । सुन्नै लाजको कुरा हो । सरकारले गम्भिरतापूर्वक लेओस् । औपचारिक वार्ता छिटो शुरु होस् ।’

सञ्चारकर्मीहरुसँग कुराकानी गर्दै मृतक आरती साहकी कान्छि बहिनी मनिषा साहले आफुहरु १४६ दिनसम्म न्यायको माग गर्दै धर्नामा बस्दापनि माग पूरा हुन नसकेको बताउनु भयो । आफ्नी दिदीको हत्यारा बाहिर खुलेआम हिडिरहँदा पनि कानूनी कारबाही नभएको बताउनु भयो । आफूहरुलाई गरिब, निमुखा भएको कारण राज्यले हेपेर माग सम्बोधन नगरेको उहाँले बताउनु भयो ।

उनीहरुले दोषि उपर कानूनी कारबाही हुनुपर्ने माग गरेका छन् । त्यसैगरी पीडित परिवारका सदस्यलाई कुटपिट गरेको भन्दै एसपी विश्वराज खड्का र डिएसपी प्रकाश गौतमलाई पनि नियन्त्रण गरि कारबाही गर्नुपर्ने माग गरेका छन् ।

काठमाडौं । आम जनता पार्टीले गौर हत्याकाण्डबारे सत्तागठबन्धनले गरेको निर्णयले कानूनको शासन र मानव अधिकारको उपहास गरेको जनाएको छ ।

पार्टीका प्रवक्ता चन्द्र भुषण साहले एक विज्ञप्ति जारी गर्दे गठबन्धनले गरेको निर्णय आपत्तिजनक रहेको जनाउनु भएको छ ।

विज्ञप्तिमा भनिएको छ ‘गौर हत्याकाण्ड पीडित संघर्ष समिति र नेपाल सरकार बिच भैसकेको पाँच बुँदे सहमतिलाई लिएर कथित सत्तारुढ गठबन्धनको नाममा सञ्चारकर्मीहरु संग राजेन्द्र पाण्डेले गरेको आपत्तिजनक अभिव्यक्ति प्रति गम्भीर ध्यानकर्षण भएको छ । ‘

विज्ञप्तिमा भनिएको छ – काण्डै काण्डको नाईके पाण्डेले फेरी अर्को काण्डको बचाउ गरेका देख्दा लाज पनि लजाएको छ । यो अभिव्यक्ति पाण्डेको मनोगत कुष्ठा मात्र हो की नेपाल सरकारको पनि हो तत्काल धारणा सार्बजनिक हुनु पर्दछ ।

सरकार सहमति बाट पछि हट्न खोजेको आशंका गर्दे पार्टीले गठबन्धन अपराधीको संंरक्षकको रुपमा रहेको भन्दै प्रश्न गरेको छ । पार्टीले यस घटनामा न्याय दिलाउन प्रतिबद्ध नेपाल प्रति आधारहिन आरोप लगाउनु आपराधीक कार्य भएको समेत जनाएको छ ।

काठमाडौँ । गौर हत्याकाण्डका हत्यारालाई जोगाउन रौतहटका सत्तारुढ राजनीतिक दलहरु एकजुट भएको आरोप लगाउँदै आम जनता पार्टी (आजपा) ले उक्त हत्याकाण्डका दोषीलाई कानूनी दायरामा ल्याउन माग गरेको छ ।

मंगलबार आजपाका अध्यक्ष प्रभु साहको नाम जोडेर रौतहटका सत्तारुढ दलहरु नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी (जसपा), जनमत पार्टी र लोकतान्त्रिक समाजवादी पार्टी (जसपा) ले संयुक् रुपमा प्रदर्शनप्रति आजपाले गम्भीर ध्यानाकर्षण भएको भन्दै आपत्ति जनाएको छ ।

“आम जनताको कुनै हक अधिकार वा पीडितहरुलाई न्याय दिलाउन एकजुट हुनुको सट्टा आज एकाएक विगत १७ वर्षदेखि अनवरत न्यायको पर्खाइमा रहेका विभत्स गौर हत्याकाण्डका पीडितहरुले न्याय पाउने सम्भावना बढेसँगै हत्याकाण्डका अपराधी र तीनका संरक्षकहरु आतंकित भई हताश मनोविज्ञानका साथ यसरी संगठित हुनुले पनि काफी कुराको संकेत गरिरहेको स्थित छ”, विज्ञप्तिमा भनिएको छ ।

आजपाका प्रवक्ता चन्द्रभुषण साहद्वारा जारी विज्ञप्तिमा सर्वोच्च अदालतसहित देशका तिनै तहको न्यायालयबाट न्याय निरुपण हुँदा कहीँ कतै प्रभु साहको नाम निशानसमेत नआएको विषयमा पूर्वाग्रही भई कपोकल्पित, आधारहीन र झुटो आरोप लगाएर प्रदर्शन भएको बताइएको छ ।

“यदि सत्तारुढ गठबन्धनले लगाएको आरोपमा थोरै पनि सत्यता छ भने यसलाई प्रमाणित गर्न आम जनता पार्टी खुल्ला चुनौती दिन चाहन्छ”, विज्ञप्तिमा भनिएको छ, “गौर हत्याकाण्डका अपराधीहरुलाई यथाशीघ्र कानूनी दायरामा ल्याउन मार्गप्रशस्त गरी सहयोग गर्न सम्बन्धित सबै पक्षहरुसँग जोडदार माग समेत गर्दछौँ ।

काठमाडौँ । नवगठित आम जनता पार्टी (आजपा) लाई नेकपा (एमाले) का पूर्व नेता एवं पूर्वराज्यमन्त्री रामवीर मानन्धरले साथ दिने भएका छन् । पूर्वमन्त्री प्रभु साहको अध्यक्षतामा आम जनता पार्टी गठन भएको हो ।

माछापोखरीस्थित मानन्धर निवासमा आजपा अध्यक्ष साह र मानन्धरबीच भएको भेटमा अब मानन्धर संगठितरुपमा अघि बढ्ने भएको आजपा प्रचारप्रसार विभाग उपप्रमुख निवेश यादवले जानकारी दिएका छन् ।

दुवै नेताबीच मिलेर पार्टी खोल्ने पूर्वसहमति भएको थियो । २०७७ सालमा केपी शर्मा ओली नेतृत्वको सरकारमा साह विगतमा शहरी विकास मन्त्री हुँदा मानन्धर सोही मन्त्रालयमा राज्यमन्त्री थिए ।

काठमाडौँ निर्वाचन क्षेत्र नं ७ बाट २०७० को संविधानसभा सदस्य रहेका मानन्धर २०७४ सालको प्रतिनिधिसभा सदस्यमा निर्वाचित भएका थिए । उनी हालै भएको प्रतिनिधिसभा सदस्य निर्वाचनमा समेत सोही निर्वाचन क्षेत्रबाट स्वतन्त्र हैसियतमा निर्वाचित भएका थिए ।

साह भने नेकपा एमालेबाट टिकट लिएर पनि रौतहटमा स्वतन्त्र उम्मेदवारी दिएर प्रतिनिधिसभा सदस्यमा निर्वाचित भएका थिए । साथै साहले तीनजनालाई स्वतन्त्र हैसियतमा प्रतिनिधिसभा सदस्यमा निर्वाचित गराएका थिए । उनले तीन स्वतन्त्र सांसदहरुलाई साथमा लिएर आम जनता पार्टी गठन गरेका हुन् ।