आइसिसि टी–२० विश्वकप अन्तर्गत गएराति भएको खेलमा विश्व च्याम्पियन भारतले कप्तान सूर्य कुमार यादव (८४ रन) को उत्कृष्ट ब्याटिङ प्रदर्शनको मद्दतले संयुक्तराज्य अमेरिकी टिमलाई २९ रनले हराएको छ ।

कसिलो बलिङ र फिल्डिङ गरेको अमेरिकी टिमले भारतमाथि दबाब राखे पनि अन्तत: भारतले जित निकालेर विश्वकप यात्रालाई सुखद बनाएको छ ।

भारतले जितका लागि १६२ रनको मध्यम लक्ष दिए पनि अमेरिकी टिमले २० ओभरमा ८ विकेट गुमाएर १३२ रन मात्र बनाउन सक्यो । स्कोरबोर्डमा १३ रन हुँदै तीन विकेट गुमाएको अमेरिकाले त्यसपछि केही सुदृढ ब्याटिङ गरे पनि त्यो पर्याप्त हुन सकेन ।

अमेरिकाका लागि मिलिन्द कुमारले ३४, संजय कृष्णमुर्थीले ३७ र शुभम रन्जनेले ३७ रन बनाएर केही चुनौती प्रस्तुत गरेका थिए । तर अन्य खेलाडी दोहोरो अंक पनि नबनाई पभेलियन फर्कन बाध्य भएका थिए ।

भारतका लागि मोहम्मद सिराजले ३, अर्सदिप सिंह र अक्षर पटेलले दुई दुई तथा वरुण चक्रवर्तीले एक विकेट लिए ।

समूह ए मा रहेको भारतले यो जितसँगै दुई अंक जोडेको छ ।

यसअघि, भारतले अमेरिकासामु जितका लागि १६२ रनको लक्ष प्रस्तुत गरेको थियो ।

समूह ए मा रहेको भारतले मुम्बईको वान्खडे रंगशालामा टस हारेर पहिले ब्याटिङको निम्तो पाएको थियो । भारतले निर्धारित २० ओभरमा ९ विकेट गुमाउँदै १६१ रन बनाएको थियो ।

एक समय बोर्डमा ७७ रन हुँदा नै छ विकेट गुमाएको भारतले ११८ रन बनाउँदा सातौं तथा १४० रनमा आठौं विकेट गुमाएको थियो ।

तर भारतका लागि कप्तान सूर्य कुमार यादवले अविजित ८४ रन बनाएर टिमका लागि सम्मानजनक स्कोर खडा गरेका थिए । उनले ४ छक्का र १० चौका प्रहार गरेका थिए ।

भारतीय आक्रामक ब्याट्सम्यानहरु इशान किसनले २०, तिलक बर्माले २५ तथा अक्षर पटेलले १४ रन बनाए । तर अन्य ब्याटरहरु दोहोरो अंकमा रन समेत नबनाई पभेलियन फर्केका थिए ।

तुलनात्मक रुपमा कसिलो बलिङ र राम्रो फिल्डिङ गरेको अमेरिकाका लागि शाड्ले भान शाल्वीकले चार तथा हरमित सिंहले दुई विकेट लिएका थिए । Agency

काठमाडौँ : नोबेल मेडिकल कलेज टिचिङ अस्पतालले आइसिसी ट्वान्टी २० विश्वकप एसिया क्षेत्र फाइनल छनोटको खेलमा नेपाल फाइनलमा पुगेमा राष्ट्रिय क्रिकेट टोली र अफिसियलाई प्रोत्साहनस्वरुप रू १५ लाख दिने घोषणा गरेको छ ।

अस्पतालका प्रमुख कार्यकारी अधिकारी डा भोगेन्द्रप्रसादद्वारा आज जारी प्रेस विज्ञप्तिमा राष्ट्रिय क्रिकेट टिम र अफिसियलाई एकमुष्ट रू १५ लाख दिने उल्लेख गरिएको छ । अस्पतालले उक्त प्रतियोगिताको फाइनल खेलमा पनि नेपाल विजयी भएमा थप रू पाँच लाख प्रदान गर्ने विज्ञप्तिमा जनाएको छ ।

नोबेल मेडिकल कलेज टिचिङ अस्पतालका पूर्वअध्यक्ष तथा प्रबन्ध निर्देशक र हाल मोरङ क्षेत्र नं ३ का प्रतिनिधिसभा सदस्य डा सुनिलकुमार शर्माको अगुवाइमा उक्त अस्पतालले खेलाडीहरुलाई निःशुल्क एवम् सहुलियत शुल्कमा स्वास्थ्य उपचार सेवा प्रदान गर्दै आइरहेको पनि सो विज्ञप्तिमा उल्लेख गरिएको छ । नेपालमा क्रिकेट खेलको विकासमा सानो भए पनि सहयोग पुगोस् र खेलाडीमा हौसला प्रदान होस् भनेर सो प्रोत्साहन रकमको व्यवस्था गरिएको सांसद डा शर्माले बताउनुभयो ।

कीर्तिपुरस्थित त्रिभुवन विश्वविद्यालयको क्रिकेट मैदान र माथिल्लो मूलपानी क्रिकेट मैदानमा भइरहेका उक्त प्रतियोगितामा नेपाल सेमिफाइनलमा पुगेको छ । नेपालले पहिलो खेलमा सिङ्गापुरलाई आठ विकेटले पराजित गर्दै विजयी भएको थियो भने दोस्रो खेलमा मलेसियालाई ६ विकेटले हराएउँदै सेमिफाइनलमा पुगेको हो ।

अर्को वर्ष अमेरिका र वेस्ट इन्डिजमा आयोजना हुने ट्वान्टी २० विश्वकपको अन्तिम छनोटमा नेपालसहित आठ टोलीले प्रतिस्पर्धा गरिरहेका छ्न । जसमा प्रतियोगिताबाट शीर्ष दुई टोली विश्वकपको लागि छनोट हुनेछन् । नेपाल समूह ‘ए’मा परेको छ । नेपालको समूहमा सिङ्गापुर, मलेसिया र ओमान छन् । त्यस्तै समूह ‘बी’ मा संयुक्त अरब इमिरेट्स (युएई), हङकङ, बहराइन र कुवेत छन् । नेपालले अब आफ्नो तेस्रो खेल भोलि ओमानसँग खेल्नेछ ।रासस