• १५ चैत्र २०८०, बिहीबार
  •      Thu Mar 28 2024
  •   Unicode
Logo
Latest
★   उत्तरपुस्तिका हराएको विषयमा छानबिन गर्न उच्चस्तरीय समिति गठन ★   शिक्षा मन्त्रालयका बीस कर्मचारीलाई स्पष्टीकरण ★   मन्त्रिपरिषद्को बैठक: सचिव पदमा लम्सालको बढुवा,चैते धानको मूल्य निर्धारण  ★   नेपालको पर्यटकीय सम्भावनालाई विश्वमा प्रचार गर्नसके चार गुणा पर्यटक आउँछन्: सांसद राणा ★   इलाम २ मा रास्वपाका उम्मेदवार मिलन लिम्बू ★   एमडीएमएस खरिदमा अनियमितता गरेको अभियोगमा २० जनाबिरुद्ध मुद्दा दर्ता ★   कर्णाली नदीमा हाम फालेर बेपत्ता भएका युवक मृत फेला ★   सवारी दुर्घटनाबाट दैनिक ७ जनाको मृत्यु हुने प्रहरीको तथ्यांक ★   सादा पोशाकमा जनशक्ति परिचालन नगर्न गृहको निर्देशन ★   चीनमा आँधीको चेतावनी

विनियोजन विधेयकमाथिको छलफल समाप्त



विराटनगर । विनियोजन विधेयकमा निर्दिष्ट गरी राखिएका शीर्षकमाथिको छलफल समाप्त भएको छ । प्रदेश नं १ को प्रदेशसभाको आज बसेको बैठकमा मुख्यमन्त्री तथा मन्त्रिपरिषद्को कार्यालय, आन्तरिक मामिला तथा कानुन मन्त्रालय र खानेपानी, सिँचाइ तथा ऊर्जा मन्त्रालयसँग सम्बन्धित शीर्षकमाथि छलफल भएको थियो ।

छलफलमा प्रदेशसभा सदस्य लोकप्रसाद सङ्ग्रौलाले सुशासनको प्रत्याभूति दिलाउने प्रमुख जिम्मेवारी मुख्यमन्त्रीको रहेको चर्चा गर्दै राष्ट्रलाई समृद्ध बनाउन योजनाको सफल कार्यान्वयन र स्रोतको व्यवस्थापन भएको बताउनुभयो ।

उहाँले सुन्दर हरैचामा रहेको प्रहरी चौकीको घेराबेरामा विगतदेखि नै बजेट माग गर्दै आएकामा अहिलेसम्म नभएकाले बजेटको व्यवस्थापन गरी सरकारले शान्ति सुरक्षामा खटिने सङ्गठनलाई बलियो बनाउनुपर्ने धारणा राख्नुभयो । उहाँले जनतालाई स्वच्छ खानेपानीको व्यवस्था र सिँचाइको समुचित प्रबन्ध मिलाउने सरकारको जिम्मेवारी रहेकाले यसतर्फ सरकारको ध्यान जानुपर्नेमा जोड दिनुभयो । उहाँले प्रदेशको सबै भौतिक संरचना एकै ठाउँमा बनाउन सुझाव पनि दिनुभयो ।

सदस्य अम्बिका थापाले एकमुष्ट बजेट विनियोजन गरेर योजनालाई अलपत्र पार्ने काम बजेटमा भएको धारणा राख्नुभयो । सदस्य नारायणबहादुर मगरले प्रदेश सरकारले गोष्ठी, कार्यालयशाला, सेमिनार तथा छलफलमा राखिएको बजेट खानेपानी र सिँचाइमा लगाएको भए जनता बढी लाभान्वित हुने धारणा राख्नुभयो । सदस्य विमल कार्कीले बजेटमा वित्तीय अनुशासन नभएको चर्चा गर्नुभयो । सदस्य मोहनकुमार खड्काले समग्रमा बजेटमा समर्थन जनाउँदै सिँचाइ र खानेपानीका योजनामा विशेष ध्यान दिनुपर्ने कुरामा जोड दिनुभयो । सदस्य राजकुमार ओझाले विगतमा ठूलो लगानी भएको योजनामा अहिले सरकारले अत्यन्त न्यून रकम विनियोजन गरेकाले आपत्ति जनाउनुभयो । सदस्य होमकुमार साँवाले सरकारले विगतमा जनतासँग जोडिएको मुख्यमन्त्री सडक योजना र पुल अहिलेको सरकारले छायाँमा पारेकाले दुःख व्यक्त गर्नुभयो ।

विशेष समय
नेपाली कांग्रेस संसदीय दलका तर्फबाट विशेष समय लिएर प्रमुख सचेतक सूयर्माराज राईले प्रदेश सरकारको पहिलो बैठक विसं २०७४ माघ २२ गतेको बैठकमा आफूले सुकुम्बासीको समस्या समाधान गर्न माग गर्दै आएकामा अहिलेसम्म नभएकामा दुःख व्यक्त गर्नुभयो । उहाँले चुरे र नदी दोहनले तराईको उर्वराशील जग्गा मरुभूमिमा परिणत हुने खतरा देखिएकाले यसतर्फ सरकारको ध्यान जानुपर्ने भन्दै सरकारले प्रदेशको राजधानी तोकिए पनि नामकरण गर्न नसक्नु कमजोरी भएको बताउनुभयो ।

उहाँले प्रदेशको नामकरण गर्न सदनमा प्रस्ताव प्रवेश गराउनुपर्ने माग गर्दै सुशासनका नाममा नयाँ सन्देश दिन सरकारले नसकेको आरोप लगाउनुभयो । प्रमुख सचेतक राईले प्रकृतिको संरक्षणले नै मानव सभ्यताको संरक्षण हुने भएकाले यसतर्फ सरकारको ध्यान जानुपर्ने भन्दै विगतका अभ्यासलाई समीक्षा गरेर अघि बढ्न सके प्रदेश बलियो हुने विचार राख्नुभयो । उहाँले सरकारले प्रदेशको संरचना बनाउन पनि विशेष ध्यान दिनुपर्नेमा जोड दिनुभयो ।

शून्य समय
प्रदेशसभा सदस्य इन्दिरा राई, कला घले, वसन्तकुमार बानियाँ, वीणादेवी राई, यशोदा अधिकारी र सरिता थापाले प्रदेशको जल्दाबल्दा समस्याका बारेमा सदनको ध्यानाकर्षण गराउनुभएको थियो ।